Read Northwest Gbaya O AIA-NÚ 4 Bible Online

O AIA-NÚ 4 - Northwest Gbaya bible

O AIA-NÚ 4

¹Ho! Ɛ̧ɛ̧ nɛ gba ge? Lɔr nɛ tok so tok zar-zar nɛ mɔ'ɔ nɛ tok ɓɔna’ɛ! O ta ŋgeŋ tua ko Sɔ̧, nɛ mɔ'ɔ nɛ gbina pɛsi ya nɛ ka̧ war sinɛ'ɛ!

²O bezaŋ Siɔŋ nɛ yaa so nɛ zɔm mɔ, hee lɔr ga, nɛ mɔ'ɔ nɛ‘i zɔk hee gee kpáná-gìì, nɛ wi-ɓu-kpánà ɓua ga’ɛ!

³O gba-toyo iŋa ha̧a̧ bere dai nɛ o bem kɔ‘i, ɓɛɛ ko o be-zɔŋa-dùk kɔ‘m bo hegɔ na; wa kifa nɛ o ɗaŋ nàá-wan-bem hee ndao-ŋga-gbara ga.

⁴Leɓe o be-zɔɗi kora lati kɔ̧ war ger-wa kpák-kpák; o bem ai nɛ́ nú wen nyɔŋmɔ, ɓɛɛ wi-ha̧a̧-a̧ ha̧ wa bo na.

⁵O wi nɛ ya so tɛ bɔtɛ nyɔŋ nɛ de nyɔŋmɔ, nɛ mɔ'ɔ nɛ fe nɛ ká̧ war sinɛ'ɛ! O wan nɛ wa daia so tɛ bɔtɛ nɛ mɔ'ɔ nɛ ɔ nɛ zu-buk-paa sinɛ'ɛ!

⁶Ɗaŋmɔ nɛ dukbíí kɔ‘m dea, gana ko Sɔdɔm, nɛ Sɔ̧ baa ɗaŋ so yinɛ hee gɔma-yí ga, nɛ bo nɛ ŋma er-bíí a̧ foo na’ɛ.

⁷O be-wan mɛ Jerusalɛm yaa so nɛ sa̧a̧-a̧ tok nɛnɛ lak-lak, tɛ-wa nɛ bu-a ndáká-ndáká; wa yaa so nɛ ŋga-tɛ, nɛ ŋmaŋa-a zoɗoe.

⁸Ɓɛɛ kinii, yí-wa tu̧u̧ tu̧u̧ ndir-ndir; kà‘i kpa wa yuwar, wi iŋ yí-wa na. Kànà nɛ́ ndàrá-tɛ-wa a̧ duk zu gba̧a̧, wa ɔ̧ka̧ ɓak-ɓak hee kora gua ga.

⁹Fio nu gba-paa war kpɔk, dee gan fio-kaɓa, nɛ‘i kpa mɔɔ-nyɔŋ na, ɓɛɛ wi duka ɔ̧k nɛnɛ kpa fe nɛnɛ mbɛt'i.

¹⁰Ŋgimbi nɛ ŋgamɔ tika nɛnɛ zu dukbíí kɔ‘m, o nàá-wan-bem, nɛ oi kɔ̧ɔ̧ o bem kɔ‘i, gii o bem kɔ‘i wen nyɔŋa-a.

¹¹Kiitɛ nyimsea ko GASA WAN nɛ mɔ'ɔ nɛ hɔa'i; a̧ pi̧i̧ ŋga nyimsea kɔ̧-a̧ zu bíí. A̧ pi̧i̧ wee zu ye Siɔŋ dɔ a̧ a nu gbuɗuk hɔ ndaa-a mɛ.

¹²O wannu in o bíí zu nu lɛŋ ta so'e nde, ŋma ŋgimbi wisɛn tɛ nyɛm mɛ ye nu garo Jerusalɛm na.

¹³Mɔ dea hegɔ wen nɛ o wi-tɔ̧-wen oi nu Sɔ̧ in o wi-ɗafi-sɔ̧ dee ɗaŋmɔ; wen wa gbaia tɔk tɛ o wi-de-mɔ nɛ yuwar-a a nu nɛ see ye nɛnɛ!

¹⁴Wa yar nɛ yuwar nɛnɛ hee o wi-boma-yí ga; tɛ-wa lɛŋ nɛ tɔk mgbɛzuɛ, nɛ‘i beka tam laa kɔ-wa nɛ er na.

¹⁵O bíí gai nɛ mɔ a zu wa tɔ̧ nɛnɛ‘e: «Ɛ̀nɛ̀ yú siɓi, ɛ́nɛ́ nɛ́ o wi-simbo! Ká‘i tam tɛ-wa na!» Kóó wa yuu so nɛ mɔ si ŋma gɔni nu, o bíí tɛ nu'i tɛ tɔ̧‘e nde: «Ɛɛ kɔ̧ ha̧ wa mɛ duk mgbara yɛ siti na!»

¹⁶GASA WAN nɛ tɛ-wi ndaka wa pɛsi sót-sót; a̧ kɔ̧ zɔka wa nɛ yí-a ɓɔna. Bíí tu̧ tɛ o wi-ɗafi-sɔ̧ ɓɔna, bíí zɔn o sɔkawi ɓɔna mbɛt.

¹⁷War k’ɛɛ, yí-ɛɛ gbɛ̧ɛ̧ fara zɛm mɔ‘e nde, ŋma bíí tɛ ye ɗoŋ yɛ wo, takaɗi! Ɛɛ pɛma so mɔ ha̧ ŋma tugun bíí nɛ nyɛm so mɛ kpasi yɛ na mɛ tɛ̀ɛ́ kpasi yɛ wo, ɓɛɛ yí-ɛɛ ɗuk.

¹⁸Ko o wisɛn k’ɛɛ kànà nɛ́ mbaɗa naŋ yɛ, ɛɛ kpa fara gbo si zan na; ŋgimbi k’ɛɛ a̧ hɛɗi'i, sɔŋkur wese k’ɛɛ nɛ mɔ'ɔ nɛ hɔɔ kaɗi'i!

¹⁹Naŋ o wi-ndak-ɛɛ ɔ haya gan bu̧i̧a̧-a̧ ko o zua, wa ndak yɛ nɛ zu kaya nɛnɛ, gba nɛ mbaŋtol h’ɛ́ɛ́ nɛ ŋga-gbárà.

²⁰Wi-pɛm-ɔmi k’ɛ́ɛ́[8] nɛ̀ dúk nɛ́ wi nɛ GASA WAN hoka, tika lim nɛ wa gɔna. Mɛ̀ nɛ́ a̧ a̧ ɛ́ɛ́ ee só nɛ̀ ta tɔ̧́ nɛnɛ‘e, nɛ́ ɗɔɔ gi̧ɔ̧-tɛ-a ɛ́ɛ́ tɛ̀ɛ́ kpa so yaa-a nɛ de-a mgbara tugun bíí.

²¹Ɓɛɛ kɔ-mɛ Edɔm, nɛ̀ duk hee gba de be-zɔŋa ga’ɛ, mɛ́, nɛ̀ duk tɛ nu Us’ɛ, mɛ̀ kpíɗí nɛ desee, mɛ̀ dé nyɛŋɛ! Mɔ‘i tɛ tik zu mɛ mbɛt; dɔ̧ɔ̧ tɛ gbɛ mɛ ɓɛɛ mɛ tɛ duk nɛ sɔŋgɔɗɔ.

²²Siɔŋ, simbo kɔ-mɛ kaɗa kaɗi; GASA WAN beka e ha̧ wa ba mɛ nɛ bara si gɔni nu ɓɔna. Nɛ̀ kɔ-mɛ, Edɔm, a̧ tɛ usi mɔɔ-oi-ɗaŋmɔ kɔ-mɛ ha̧ mɛ; a̧ tɛ tati ɗaŋmɔ kɔ-mɛ yí bíí.