Read Northwest Gbaya BARUK 1 Bible Online

BARUK 1 - Northwest Gbaya bible

BARUK 1

¹Ɛ̧ɛ̧ nɛ́ kalata nɛ́ Baruk yɔra sɛn Babilɔŋ, tɛ mɔɔrɔ pɛ, in ɔɔ-zɛ mɔɔrɔ-ɗoŋ-yiitoo tɛ fio-zɛ, tɛ ŋgimbi nɛ o be-Kaldee baa so nɛ Jerusalɛm, ká dɔ nɛ a̧'ɛ. Baruk'i nɛ́ bem ko Nerias, be-koo Maasias, nɛ gboo nɛ tɛ Helkias, nɛ ɗoŋ Asadias in Sedesias.

³Baruk tɔra gba̧a̧-wen kalata'i ti Jekonias, wannu Juda, bem ko Joakim, in ti giiwi lɛŋ nɛ tɛa mɛ zii wen'i,

⁴nɛ zer o gasawi, o be-wan, in o kutiwi, kana nɛ yi bii lɛŋ, dika tɛ o obem gu nɛ o gasa bii, nɛ zer o bii lɛŋ nɛ ɔ so Babilɔŋ, ka̧ zaŋ nanayi Sud.

⁵Wa lɛŋ hi̧i̧ so nɛ kɔ̧a̧, zim nɛ yi, kɔfi nɛ Gasa Wan

⁶Nɛ mɔ'ɔ nɛ wa ndɛma mbɔi, nyɛm nɛ ɗoŋ kpaamɔ ko bii kpɔk kpɔk,

⁷ɓɛɛ tom yaknɛ si Jerusalɛm ha̧ Joakim wiɗafisɔ̧, bem ko Helkias, be-koo Salɔm, in ha̧ oi o wiɗafisɔ, gu nɛ o dukbii lɛŋ, nɛ a̧-a̧ so Jerusalɛm in a̧.

⁸Nɛti, tɛ ɔɔ-zɛ ɓu ko fiozɛ Siwan, Baruk kaia so o mɔ kɔ̧ Tua ko Gasa Wan, o mɔ nɛ wa zu̧u̧ so kɔ̧ Tua'i, pii nɛ ɗoŋ nu ko Juda; duka so nɛ o mɔ, nɛ wannu Juda, nin-a nɛ Sedesias, bem ko Josias, dee so nɛ bu-mbɔi,

⁹ɗoŋ nɛ Nabukɔdɔnɔzɔr, wannu Babilɔŋ, baa so nɛ Jekonias in o gasawi, o wi-iŋ-tom, o be-wan, ká bá nɛ dukbii lɛŋ, nɛ bara-biro, yaknɛ nɛ Jerusalɛm si Babilɔŋ.

¹⁰O bara-biro nɔ‘i toma ha̧ o be Jerusalɛm'e: «Ɛ́ɛ́ toma nɛ sede h’ɛ́nɛ́: ɛnɛ bá, ɛnɛ hi̧fi̧ nɛ o saɗi-ɗafi-sɔ̧, o ŋma wen dɔaa nɛ oi-aa, o ŋma wen bura war-tɛ, ɛnɛ hi̧fi̧ fuu-nyama mbɛt; ɛnɛ ha̧ o mɔ ha̧ Gasa Wan Sɔ̧ k’ɛ́ɛ́ zu taŋge ɗafi-A̧

¹¹Ɛnɛ kɔfi Sɔ̧ wen Nabukodonosɔr wannu Babilɔŋ, in wen bem kɔ̧-a̧ Baltazar, ha̧ zɛ dukaa kɔ-wa mɛ dɔk hee zɛ-dukaa ko yiwɛse zu nu ga.

¹²Hegɔ Gasa Wan tɛ ha̧ ŋgai h’ɛ́ɛ́, ɓɛɛ A̧ tɛ hu̧i̧ yí-yɛ, ɛɛ tɛ ya ɗɔɔ gi̧ɔ̧-tɛ Nabukodonosɔr, wannu Babilɔŋ, in ɗɔɔ gi̧ɔ̧-tɛ bem kɔ̧-a̧ Baltazar; ɛɛ tɛ de tom ha̧ wa nɛ dɔka zɛ, ɓɛɛ wa tɛ zɔk yɛ nɛ de yí.

¹³Ɛnɛ kɔfi Gasa Wan Sɔ̧ k’ɛ́ɛ́ wen zu-yɛ mbɛt, wen ɛɛ dea ɗaŋmɔ si tɛ Gasa Wan Sɔ̧ k’ɛ́ɛ́, ɓɛɛ hɔ sɔsɔɔ tu̧u̧see in nyimsea ko Gasa Wan tɛ yu zu-yɛ hɔ̧ɔ̧ na.»

¹⁴Ɓɛɛ ɛnɛ tɔ́r kalata n’ɛɛ́ tom h’ɛ́nɛ́ hɛ̧ɛ̧, wen ha̧ o bii mɛ gbar o ɗaŋmɔ kɔ‘i sɛn kɔ̧ Tua ko Gasa Wan, wese gbaŋá Tua-laa, kóó ŋma ŋgimbi nɛ nyɛma sɛnɛ.

¹⁵Ɛ́nɛ́ tɛ tɔ̧: «Dee mɔ nɛ yuwar-a nɛ́ mɔ ko Gasa Wan Sɔ̧ k’ɛ́ɛ́; ɓɛɛ k’ɛ́ɛ́, nɛ́ foe a a̧-a̧ yí-yɛ́, hee sɔsɔɔ‘i ga! foe wen o be-Juda in o bii Jerusalɛm,

¹⁶wen o wannu k’ɛ́ɛ́, o wi-duk-zu'yɛ, o wiɗafisɔ̧ k’ɛ́ɛ́, o witɔ̧wen oi nú Sɔ̧ in o zɔmdáà k’ɛ́ɛ́ lɛŋ.

¹⁷Wen ɛɛ dea ɗaŋmɔ si tɛ Gasa Wan,

¹⁸ɛ́ɛ́ mbo zu ha̧ A̧ na; ɛ́ɛ́ zii tigɛr Gasa Wan Sɔ̧ k’ɛ́ɛ́, nɛ tɔ̧a̧ h’ɛ́ɛ́ mɛ ba yuwar o heembea, n'Aa ee ti yɛ, na.

¹⁹Dika wese nɛ Gasa Wan gboa nɛ o zɔmdáà k’ɛ́ɛ́ yinɛ nú Egyptɛ, hɔ sɔsɔɔ, ɛ́ɛ́ kaɗi dee ŋgazu in Gasa Wan Sɔ̧ k’ɛ́ɛ́ na, ɓɛɛ ɛ́ɛ́ e see-yɛ́ mɛ zii mɔ n'Aa tɔ̧ h’ɛ́ɛ́ na.

²⁰Hegɔ, hee mɔ n’ɛɛ́ zɔk sɔsɔɔ‘i ga, o bɔnɛ tika zu-yɛ́, in o ɗaŋ yoŋgo, nɛ Gasa Wan toka so a zu-yɛ́, nɛ nú Mɔise widetom kɔ̧-A̧, wese n'Aa kaia nɛ zɔmdáà k’ɛ́ɛ́ gbonɛ nɛ nu Egyptɛ, si ŋma nù, nɛ yibere in gɔrɔ fok sɛnɛ lata lata.

²¹A̧ toma so o witɔ̧wen oi nu-A̧ h’ɛ́ɛ́, ɓɛɛ ɛ́ɛ́ zii tigɛr Gasa Wan Sɔ̧ k’ɛ́ɛ́ tɛ wen nɛ wa tɔ̧a̧ h’ɛɛ‘i lɛŋ na.

²²Ɓɛɛ kóó o nde ndak so nɛ doŋ ɗaŋ wɔmɔ mɛ kɔ̧ see-a, de nɛ tom ha̧ o geesɔ̧, de nɛ o mɔ nɛ de tɛ Gasa Wan Sɔ̧ k’ɛ́ɛ́ na.