Read Northwest Gbaya BARUK 2 Bible Online

BARUK 2 - Northwest Gbaya bible

BARUK 2

¹Hegɔ Gasa Wan dee ha̧ wen n'Aa beé so a zu yɛ in o wigɔnkita nɛ ɔɔ so wan zu Israɛl, o wannu k’ɛ́ɛ́, o wi-ya-zu-yɛ, o be-Israɛl in o be-Juda lɛŋ, mɛ hɔ gba̧a̧.

²Pɛrti mɔ nɛ hɔɔ Jerusalɛm, nyɛm nɛ ɗoŋ heembea ko Mɔise’ɛ, tɛ hɔ zaŋnu hɛ̧ɛ̧ nɛti hɔ̧ɔ̧ na.

³Gana ŋgai, nyɛmna, ɓɛɛ ɛ́ɛ́ nyɔŋ so, ŋma nɛ murtɛ be-wiwii kɔ‘i ŋma nɛ murtɛ be-koo kɔ‘i.

⁴Gasa Wan ee wa ɗɔɔ ŋgai ko o be-nù nɛ zika yɛ, wen ha̧ wa mɛ zii tɛ dara, kifi nɛ geemɔ mgbara o zuduk, fara nɛ Gasa Wan pɛsa wa si sɛnɛ‘i,

⁵ha̧ wa mɛ gan gana o wi nɔ‘i bo na, nɛ́ o wi nɔ‘i a tɛ̀ɛ́ gan gana wa, wen n’ɛɛ́ dea ɗaŋmɔ si tɛ Gasa Wan Sɔ̧ k’ɛ́ɛ́, tɛ bɛ̧a wen nú-A̧.

⁶Dee mɔ nɛ yuwar-a nɛ́ ko Gasa Wan Sɔ̧ k’ɛ́ɛ́, ɓɛɛ k’ɛ́ɛ́ in o zɔmdáà k’ɛ́ɛ́, nɛ foe a a̧-a̧ zu-yɛ́, hee sɔsɔɔ‘i ga.

⁷Bɔnɛ o fom nɛ Gasa Wan bee a zu yɛ lɛŋ baa yɛ́.

⁸Ɓɛɛ ɛ́ɛ́ gɔm so er-yɛ ha̧ Gasa Wan, ha̧ A̧ mɛ de h’ɛ́ɛ́ mɛ zik ɗoŋ-yɛ ha̧ o ɗaŋ wɔmɔ kɔ̧ see-yɛ́ na.

⁹Hegɔ Gasa Wan yora zu o ŋgaŋamɔ nɔ‘i mɛ tik zu yɛ, wen mɔ lɛŋ nɛ Gasa Wan tɔ̧ɔ̧ h’ɛ́ɛ́ mɛ de duk nɛ wara.

¹⁰Mɔ kpɔk, ɛ́ɛ́ zii tigɛr-A ŋgimbi n'Aa tɔ̧ɔ̧ nɛnɛ‘e ɛɛ kasi o heembea n'Aa ee ti yɛ‘i na.

¹¹Ɓɛɛ kinii, Gasa Wan Sɔ̧ ko Israɛl, Ɛ́nɛ́ mgbɔɔ dukbii k’Ɛ́nɛ́ gbonɛ nɛ Egyptɛ, nɛ tɛ ŋgai mɛ er-Nɛ, nɛ tɛ o ŋga mɔɔ-usi-mɔ in o mɔɔkifi, nɛ tɛ ŋgai ɔm-Nɛ́ in kin-ɓaa-Nɛ́; Ɛ́nɛ́ dee ha̧ nin-Nɛ́ mɛ hu̧r, hee mɔ'ɔ n’ɛɛ́ zɔk sɔsɔɔ‘i ga.

¹²Gasa Wan Sɔ̧ k’ɛ́ɛ́, ɛ́ɛ́ dea ɗaŋmɔ, ɛ́ɛ́ iŋ‘Nɛ́ na, ɛ́ɛ́ demɔ nɛ yuwar-a na, ɛ́ɛ́ kasi heembea k’Ɛ́nɛ́ na.

¹³Ɛ́nɛ́ dé ha̧ tu̧u̧see k’Ɛ́nɛ́ mɛ ga zu-yɛ́, wen be oi ɛ́ɛ́ dɔk mgbara o bii, n’Ɛ́nɛ́ pɛsa ɛɛ si sɛnɛ‘i ɓɔ na.

¹⁴Gasa Wan, Ɛ́nɛ́ zíí kɔfamɔ in aia-nú k’ɛ́ɛ́. Ɛ́nɛ́ kpasi yɛ́ zu hu̧ra nin-‘Nɛ́, Ɛ́nɛ́ dé ha̧ o bii nɛ kaia so ɛ́ɛ́ yaknɛ nɛ bara mɛ zɔk yɛ́ nɛ ko,

¹⁵Hegó o bii zaŋnu lɛŋ tɛ iŋ‘e Ɛ́nɛ́ nɛ́ Gasa Wan Sɔ̧ k’ɛ́ɛ́, in Israɛl nɛ oi-aa lɛŋ nɛ́ o mgbak bii k’Ɛ́né.

¹⁶«Gasa Wan, Ɛ́nɛ́ kɛ̧i̧ mɔ tɛ́nɛ́ nɛ tɛ sa̧a̧ fara duk k’Ɛ́nɛ́ mɛ, ɓɛɛ Ɛ́nɛ́ tá mɔ wen ɛ́ɛ́; Ɛ́nɛ́ yéŋ zer-‘Nɛ́, Ɛ́nɛ́ zíí!

¹⁷Ɛ́nɛ́ hu̧i̧ yí-‘Nɛ́, Ɛ́nɛ́ zɔ́k! Bo nɛ o bii ye-ko-fio, o wi nɛ bo nɛ ɔmi ɓɔ na a̧ tɛ gasi'Nɛ́, zɔn nɛ deemɔ k’Ɛ́nɛ́ nɛ yuwar-a na,

¹⁸ɓɛɛ nɛ wi bɔnɛ ŋmana-see, wi nɛ zum nɛ zu nɛ́ nɛ nɔ in nɛ ziɓa lɛŋ, wi nɛ yí zik zik nduyɛɛ, in wi nɛ wɔ kas'a a̧ tɛ gasi'Nɛ́, zɔn nɛ deemɔ k’Ɛ́nɛ́ nɛ yuwar-a ɛ̧!

¹⁹Hegɔ, Gasa Wan Sɔ̧ k’ɛ́ɛ́, bo nɛ́ wen zu deemɔ nɛ yuwar-a ko o zɔmdáà in o wannu k’ɛ́ɛ́, ɛ́ɛ́ ai nɛ nu-yɛ ti'Nɛ́ na.

²⁰Wen Ɛ́nɛ́ dea ha̧ tu̧u̧see in nyimsea k’Ɛ́nɛ́ mɛ tik zu-yɛ́, hee mɔ'ɔ n’Ɛnɛ tɔ̧ɔ̧ so nɛ nú o witɔ̧wen oi nú-‘Nɛ́ ga: wen'i nɛ́ mɔ'ɔ:

²¹«Gasa Wan tɔ̧a̧: Ɛ́nɛ́ gu nu si ɗɔɔ de nɛ tom ha̧ wannu Babilɔŋ, ɓɛɛ ɛ́nɛ́ tɛ duk sɛn nu n'Am ha̧a̧ so ha̧ o zɔmdáà k’ɛ́nɛ‘i.

²²Ɓɛɛ, k’ ɛ̀nɛ̀ zíí wen nú Gasa Wan, nɛ tɔ̧ h’ɛ́nɛ́‘e ɛnɛ de tom ha̧ wannu Babilɔŋ na,

²³Mi tɛ dor o hiɗimɔ desee in hɔ́ɔ́ zaŋgule, in gaia gima ko wii in kóó nɛ baa ŋmaa nɛ mbea, sɛn ye Juda lɛŋ in Jerusalɛm; nu'i nɛ oi-aa lɛŋ tɛ kifi bɛɛ-oi, bii bo sɛnɛ ɓɔ na.

²⁴Ɛnɛ tɔ̧ɔ̧ so h’ɛ́ɛ́ mɛ de tom ha̧ wannu Babilɔŋ, ɓɛɛ ɛɛ zii nú-‘Nɛ́ na. Hegɔ, Ɛnɛ dea ha̧ wen n’ɛnɛ tɔ̧ɔ̧ so h’ɛ́ɛ́ nɛ nú o widetom k’Ɛ́nɛ́, o witɔ̧wen oi nú-‘Nɛ'ɛ mɛ hɔ gba̧a̧, nɛ heé: wa tɛ̀ɛ́ kai so gba̧a̧tɛ o wannu in o zɔmdáà k’ɛ́ɛ́ gbɔnɛ nɛ kɔ̧ pɛsi.

²⁵Wi siŋa o gba̧a̧tɛ-wa a bú-wese in tɛ ŋga gɛ̧ɛ̧-zɛ; wa fea tɛ o ŋga bɔnɛ, tɛ kaɓa, gbapaa in ye bara.

²⁶Ɓɛɛ Ɛnɛ ee Tua k’Ɛ́nɛ́ mɛ duk hee mɔ n’ɛɛ́ zɔk sɔsɔɔ‘i ga, wen zu ɗaŋ ko nutua ko Israɛl in nutua ko Juda.

²⁷Zua'i mbɛt, Gasa Wan, Ɛnɛ dea mɔ in yɛɛ nɛ wara, in tɛ gasa deako,

²⁸nyɛm nɛ ɗoŋ wen n’Ɛ́nɛ́ tɔ̧a̧ nɛ nú Mɔise widetom k’Ɛ́nɛ́, wese n’Ɛ́nɛ́ ha̧nɛ nú ha̧ a̧ mɛ yɔr heembea k’Ɛ́nɛ́, nɛ yi o be-Israɛl, tɔ̧ nɛnɛ‘e:

²⁹K’ɛnɛ nɛ́ zia wen nu'M na, ɛnɛ iŋ‘e gba zɔm gii-ɛnɛ tululu tɛ pii ɗoŋ kifi sɛgbɛrɛ mgbara o dukbii n'Am tɛ pɛsi wa si sɛnɛ;

³⁰wen mi iŋa nɛ dea'e wa beka zii nú‘M na, wen wa nɛ́ o wi-ŋgazu, ɓɛɛ wa tɛ ta mɔ nɛ tatɛ-wa sɛn nu nɛ wa tɛ kai wa nɛ bara si sɛnɛ‘i.

³¹Ɓɛɛ wa tɛ iŋ‘e Mi nɛ́ Gasa Wan Sɔ̧ kɔ-wa. Mi tɛ hu̧i̧ see-wa in zer-wa

³²Wa tɛ zɔn Am sɛn nu bara kɔ-wa, ɓɛɛ tɛ-wa tɛ mbaŋ ɗoŋ nin-Am.

³³Wa tɛ siŋ ŋgazu in ɗaŋ deemɔ kɔ-wa e duk, wen tɛ-wa tɛ mbaŋ ɗoŋ mɔ nɛ kpaa so o zɔmdáà kɔ wa, nɛ dee so ɗaŋmɔ in Gasa Wan’ɛ.

³⁴Ɓɛɛ Mi tɛ kai wa pii nɛ ɗoŋ sɛn tɛ nù n'Am ha̧so nú‘M wen-aa ha̧ o zɔmdáà kɔ-wa Abraham, Isaak, in Jakɔb; wa tɛ ɔ wan zu a. Mi tɛ de ha̧ wa mɛ nyɛɓi, wa beka sir ɓɔna.

³⁵Mi tɛ nɔ tɔk nɛ tɛ dùk kpoo nɛ kpoo in wa, wen ha̧‘M mɛ dùk nɛ Sɔ̧ kɔ-wa in ha̧ wa mɛ ya nɛ dukbii kɔ‘M. Mi beka ndak Israɛl dukbii kɔ‘M tɛ nù n'Am ha̧ha̧ wa ɓɔ na.