Read Northwest Gbaya BARUK 3 Bible Online

BARUK 3 - Northwest Gbaya bible

BARUK 3

¹Gasa Wan nɛ a̧-a̧ nɛ ŋgayamɔ lɛŋ, Sɔ̧ ko Israɛl, nɛ́ wi nɛ bele daka pi nú, nɛ bo nɛ nɔɔŋgiɗi ɓɔ na a hiɗi mɔ sitɛ‘Nɛ́:

²«Gasa Wan, Ɛnɛ yéŋ zer-‘Nɛ́, Ɛnɛ dé ko h’ɛ́ɛ́, wen ɛ́ɛ́ dee ɗaŋmɔ in'Nɛ́:

³wen, k’Ɛ́nɛ́, Ɛnɛ ɔ wan kpoo nɛ kpoo, ɓɛɛ, k’ɛ́ɛ́, ɛɛ yɔɔ k’ɛ́ɛ́ kpoo nɛ kpoo.

⁴Gasa Wan nɛ a̧-a̧ nɛ ŋgayamɔ lɛŋ, Sɔ̧ ko Israɛl, Ɛnɛ zíí aia-nú ko o be-Israɛl, nɛ hɛɗa kumaa kaɗi, aia-nú ko o bezaŋ o wi nɛ dee so ŋgazu in'Nɛ́ɛ́'ɛ: wa zii so nú Gasa Wan Sɔ̧ kɔ-wa na, nɛ́ hegɔ á o ŋgamɔ ndaɗa nɛ ɛ́ɛ́.

⁵Ká tɛ-‘Nɛ́ mbaŋ doŋ o ɗaŋmɔ ko o zɔmdáà k’ɛ́ɛ́ na, ɓɛɛ kinii tɛ́‘Nɛ a mbaŋ ɗoŋ ŋgai k’Ɛ́nɛ́ in gasi k’Ɛ́nɛ́,

⁶wen Ɛ́nɛ́ nɛ́ Gasa Wan Sɔ̧ k’ɛ́ɛ́, ɓɛɛ ɛɛ tɛ zɔn nin-‘Nɛ́, Gasa Wan.

⁷Nɛ́ hegɔ s’Ɛnɛ dee h’ɛ́ɛ́ mɛ tu̧ tɛ-‘Nɛ, wen h’ɛ́ɛ́ mɛ sa sara sitɛ‘Nɛ́; ɛɛ tɛ gasi'Nɛ́ sɛn nù-bara k’ɛ́ɛ́, wen ɛɛ a̧ra tɛ-yɛ nyɛi nɛ ŋgazu ko o zɔmdáà k’ɛ́ɛ́, nɛ dee so ɗaŋmɔ in'Nɛ́ɛ́'ɛ.

⁸Zɔ́k yɛ kinii sɛn nù-bara, n’Ɛnɛ pɛsa ɛ́ɛ́ si sɛnɛ‘i, wen zia dara in fóm in wen zɔka bɔnɛ oi ŋgazu ko o zɔmdáà k’ɛ́ɛ́, nɛ a̧ra tɛ nɛ Gasa Wan Sɔ̧ k’ɛ́ɛ́.

⁹Israɛl, mɛ zíí o heembea nɛ ha̧ duka-kpasa ha̧ bii; ɛnɛ yéŋ zer-‘Nɛ́ h’ɛ́nɛ́ mɛ iŋ kɛ̧ɛ̧ mgbara mɔ!

¹⁰Nɛ́ ge a yak ge nde, Israɛl? Mɛ a̧-a̧ bɔɔ nú ko o wisɛn wen ge? Mɛ sɔ́k sɛn gɔni nù wen ge?

¹¹Simbo fio baa mɛ, bii tɔr nɛ mɛ mgbara o wi nɛ ye fara ko o fio wen ge?

¹²Nɛ́ wen nɛ mɛ ee kpukput ɗuka-taamɔ dúk.

¹³Kà mɛ ba so yuwar ko Sɔ̧ ga'a, mɛ tɛ̀ɛ́ dùk zaŋ ga̧a̧mɔ kpoo nɛ kpoo.

¹⁴Mɛ kíí mɛ iŋ fara nɛ kɛ̧ɛ̧-mgbara-mɔ, ŋgai in iŋamɔ a̧-a̧ sɛnɛ, kà de ká mɛ iŋa fara nɛ dukaa zɛ dɔk zaŋnu in duka kpasa tɛ sa̧a̧mɔ in zaŋ ga̧a̧mɔ a̧-a̧ sɛnɛ.

¹⁵Nɛ́ o'o kpaa fara-duk ko ɗuka-taamɔ o? Nɛ́ o'o yee zaŋ o kpaamɔ kɔ̧-a̧ o?

¹⁶O wi nɛ ɔ wan zu o dukbii zaŋ nú a̧-a̧ dée? O wi nɛ ɔ wan zu o saɗi zaŋbɛɛ usi nɛ̀ ɗoŋ mɔ ha̧ wa a̧-a̧ dée?

¹⁷O wi nɛ usi ɗɔŋ mɔ ha̧ o nɔi̧ a̧-a̧ dée? O wi-kusi bu-mbɔi in lɔr, nɛ o bii zaŋnu e nɛ ta, nɛ ndaa-mbɔi kɔ-wa gɔn na, wa a̧-a̧ dée?

¹⁸O wi nɛ ha̧ tɛ lɛŋ ɓo nɛ mɔ nɛ bu-mbɔi, ɓɛɛ nɛ tom kɔ-wa'i gana zu iŋamɔ ko bii, wa a̧-a̧ dée?

¹⁹Wa kuma lɛŋ, wa zira si Ye ko o fio, ɓɛɛ o mbe bii ya oi wa.

²⁰O be ŋgai-a zɔka sa̧a̧mɔ, ɓɛɛ wa ya zaŋnu mbɛt, wa iŋ ti yuwar nɛ ba sitɛ ɗuka taamɔ na,

²¹wa zɔk o be doé nɛ nɛ sitɛ a na, wa ta mɔ si sɛnɛ na mbɛt; o obem yaa nyɛi nɛ yuwar ko o dáà kɔ‘i.

²²Wa zii nyɛrɛ kɔ̧-a̧ sɛn nú Kanaan, kà bó nɛ zɔka a̧ sɛn nu Teman na.

²³Kóó o bezaŋ Agar, nɛ kia so iŋa mgbara mɔ zu nù, kóó o wiɗɔrmɔ saaye Madian in Teman, kóó o wi-tɔ̧-to in o wi-kíí-ndaa-mɔ, wa lɛŋ, wa iŋ ti yuwar Ɗuka-taamɔ na, wa de taamɔ wen o be doé nɛ nɛ́ si tɛ a̧ na mbɛt.

²⁴Ho Israɛl! oe, geé gasa tua ko Sɔ̧ wa! oe pɛsa fara kɔ̧-A̧ wa!

²⁵A̧ ɔ gasa, ndutia bó na! A̧ ɔ kusa, mɔ-we-aa bó na!

²⁶Nɛ́ sɛn hi̧i̧ a wa koa so o ŋgaŋa kusa wi mɛ ɓeemɛ‘i sɛnɛ, mɛ nɛ o kpokot bii, nɛ iŋa so war biro nyɛmna.

²⁷Ɓɛɛ bó nɛ o wi nɔ‘i a Sɔ̧ hoka na. A̧ usi yuwar kpaa iŋamɔ ha̧ wa na mbɛt.

²⁸Hegɔ wa kuma lɛŋ, wen nɛ wa bo so nɛ iŋamɔ na, wa fee nɛ fio mgbele kɔ-wa.

²⁹O'o daŋa yiwese mɛ ba Duka-taamɔ zir nɛnɛ, nɛ mgbara o turazan mɛ, o?

³⁰O'o kuu gbatɔp nɛ̀ɛ́ kpa a̧, ká hi̧fi̧ a̧ nɛ ŋga gɛnɛ lɔr, ba piinɛ o?

³¹Ŋma bii iŋ yuwar hɔaa tɛ a̧ na, ŋma bii nɛ tá mɛ ba yuwar kɔ̧-a̧ bɔ na.

³²Ɓɛɛ nɛ́ Wi nɛ iŋa mɔ lɛŋ a iŋa Duka-taamɔ; nɛ́ iŋamɔ kɔ̧-A̧ a dee ha̧ A̧ mɛ iŋ ti A̧. A̧ ɗafa o mɔɔ zu nu lɛŋ a nɛnɛ wen ɓɔnsɛnɛ, ɓɛɛ dun nu'i nɛ o saɗi.

³³A̧ tom sa̧a̧mɔ, ɓɛɛ sa̧a̧mɔ baa war: A̧ sa a̧, ɓɛɛ a̧ mboo zu nak nɛnɛ tu-tu-tu.

³⁴O sɔra tok fara-yaa kɔ‘i nɛ desee.

³⁵A̧ sa wa, ɓɛɛ wa kifi nú ha̧ A̧‘e: «ɛ́ɛ́ nɛ mɔ'ɔ!» Wa tok nɛ desee wen Wi nɛ dee wa.

³⁶A̧ nɛ́ Sɔ̧ k’ɛ́ɛ́, ɓɛɛ wi beka kpa ŋma mbea nɛtɛ na.

³⁷A̧ kpaa o yuwar nɛaa sitɛ Ɗuka-taamɔ lɛŋ, ɓɛɛ A̧ usi o yuwar nɔ‘i ha̧ Jakɔb widetom kɔ̧-A̧, in ha̧ Israɛl yaa-dua-see-a.

³⁸Hɔɗoŋ-aa wi zɔka Ɗuka-taamɔ‘i zaŋnu, ɓɛɛ a̧ dúk mgbara o bii.