Read Northwest Gbaya BARUK 4 Bible Online

BARUK 4 - Northwest Gbaya bible

BARUK 4

¹Ɗuka-taamɔ nɛ kalata o geŋga ko Sɔ̧: nɛ́ heembea nɛ dúk kpoo nɛ kpoo; wi, nɛ hɛr tɛ nɛ a̧, tɛ duk kpasa, ɓɛɛ wi, nɛ siŋ a̧ pi̧ nù, tɛ fe.

²Mɛ zík tɛ-mɛ, Jakɔb, mɛ kas'aa; mɛ nɛ́ nɔ si tɛ bòóŋ mɔ ɗɔɔ sa̧a̧mɔ kɔ̧-a̧.

³Ká mɛ ha̧ gasi kɔ-mɛ ha̧ ŋma bii nɛtɛ na. Ká mɛ ha̧ de sɔnti kɔ-mɛ ha̧ ŋma gɔni zudukbii nɛtɛ na.

⁴Ɛ́ɛ́ o be Israɛl, ɛɛ ya nɛ desee, wen ɛɛ nyɛma mɛ iŋ mɔ nɛ de tɛ Sɔ̧.

⁵Ɛnɛ nɔ́ ŋgiɗi, dukbii kɔ‘m, ɛnɛ n’ɛnɛ ba nin Israɛl e ŋgɔn’ɛ!

⁶Wa ɗɔra ‘nɛ ha̧ o wi nɛ iŋ Sɔ̧ na, ɓɛɛ bó so nɛ wen kuma ‘nɛ́ na, ɓɛɛ, nɛ́ wen n’ɛnɛ tu̧u̧ so see Sɔ̧, sa'i e ‘nɛ́ er o wisɛn k’ɛ́nɛ;

⁷wen ɛnɛ tu̧u̧see-Wi nɛ dee ‘nɛ́, tɛ ɗafa o geesɔ̧ e kpasa Sɔ̧ duk;

⁸Tɛ-‘nɛ bii so ɗoŋ Sɔ̧ nɛ dúk ɓɔnsɛnɛ, nɛ daia ‘nɛ́; ɛnɛ ɗaŋa see-Jerusalɛm, náá nɛ daia ‘nɛ́ mbɛt.

⁹Jerusalɛm zɔka nyimsea ko Sɔ̧ fara tika zu ‘nɛ́, ɓɛɛ a̧ tɔ̧: «Ɛ́nɛ́, o ye ka̧ Siɔn, ɛnɛ zíí, Sɔ̧ pii zɔm ditasee zu'm,

¹⁰wen mi zɔka hee mɔ nɛ Wan nɛ dúk kpoo nɛ kpoo foo nɛ o buibem, in o bokobem kɔ‘m a yi bara ga;

¹¹Mi daia so wa nɛ desee, ɓɛɛ nɛ́ zaŋ tu̧u̧see in ditasee a'M e nɛ mɛ mɛ yak.

¹²Ká tortɛ pi̧i̧ ŋma bii kpɔk wen n'am kifa ko-oi, in wen o bii nɛ dɔkaa ea'm duk na! Nɛ́ ɗaŋmɔ ko o bem kɔ‘m, nɛ kɛ̧ɛ̧ tɛ nɛ Heembea ko Sɔ̧, a dee ha̧‘m mɛ duk ɛn'am.

¹³Wa kasi o geŋa Heembea na, wa ndak pata o yuwar-a na, wa ba o tana war kɔ̧-a̧, nɛ wa usa ha̧ wa, na.

¹⁴O ye ka̧ Siɔn, wa'a gar tɛnɛ! Tɛ-‘nɛ́ a mbaŋ ɗoŋ a nde Gasa Wan nɛ duk ɓɔnsɛnɛ foo so o buibem in o bokobem k’ɛ́ɛ́ a tɛ bara.

¹⁵Wen A̧ foo ŋma gɔni-duk nɛ tɛa nɛ nyɛi̧a fara a zu wa: nɛ́ ŋma dukbii-de-sakayi nɛ‘i zií nú kɔ-wa na, nɛ tu̧ tɛ o sɔkawi, kà bó nɛ dea ko ha̧ obem na.

¹⁶Nɛ́ wa'a kaia o yaa-dua-see kógɛ́ra yaknɛ, ɓɛɛ e nɛ a̧ ɛnɛ-a̧, e ŋma bokobem kɔ̧-a̧ ha̧ a̧ na.

¹⁷Ɓɛɛ kɔ‘m, nɛ́ hee ge a'm nyɛma mɛ gbak nɛ ɛnɛ ge?

¹⁸Kana nɛ wi nɛ foo o ŋgamɔ nɔ‘i a zu ‘nɛ́‘i a tɛ ɓar ‘nɛ́ yinɛ er o wisɛn k’ɛ́nɛ́ ɓɛɛ.

¹⁹Ɛnɛ nɛ́, o bem kɔ‘m, ɛnɛ nɛ́! Mi tɛ ɓɔn kɔ‘m ɛn'am ɓɛɛ.

²⁰Mi kpɔi̧a zia̧ laa-gbooyi pi nù, pi̧ nɛ́ laa-zimmɔ. Tɛ dukaa kɔ‘m zaŋnu hɛ̧ɛ̧, mi tɛ hiɗi nɛ mɔ, wese lɛŋ, sitɛ Gasa Wan nɛ dúk ɓɔnsɛnɛ.

²¹O bem kɔ‘m, ɛnɛ nyɔŋ nin-‘nɛ́, ɛnɛ hiɗi mɔ sitɛ Sɔ̧, ɓɛɛ A̧ tɛ ɓar ‘nɛ́ yi bɔnɛ in er o wisɛn k’ɛ́nɛ́ yinɛ.

²²Wen, kɔ‘m, mi e ta'm nde nɛ́ Gasa Wan a tɛ kpasi ‘nɛ́, nɛ́ Sɔ̧ a toma desee’ɛ ha̧‘m. Mi iŋa'e dekpaa Wankpasi'nɛ dea ko h’ɛ́nɛ́.

²³Wen, nɛ́ zaŋ bɔnɛ in ditasee a'm ea nɛ ɛnɛ fara yakaa, ɓɛɛ Sɔ̧ tɛ fo ‘nɛ́ piinɛ ɗoŋ ha̧‘m wen ɓɔnsɛnɛ, zaŋ yɔyɛ in yili.

²⁴Sɔsɔɔ, o ye ka̧ Siɔn zɔka'e ɛnɛ a̧-a̧ tɛ bara, ɓɛɛ wa tɛ zɔk kpasa ‘nɛ́ nɛ Gasa Wan Sɔ̧ k’ɛ́nɛ́ tɛ kpasi tɛ zɔm gasamɔ in sa̧a̧mɔ kɔ̧-A̧‘i.

²⁵O bem kɔ‘m, ɛnɛ nyɔŋ kana nin'nɛ́ tɛ mɔɔ oi nyimsea ko Sɔ̧. Wisɛn de nɛ ŋmaa in'nɛ́ɛ́. Dekpaa ɛnɛ tɛ zɔk tikaa kɔ̧-a̧, ɓɛɛ ɛnɛ i̧sa gɛr-a mbɛt.

²⁶O bem kɔ‘m, n'am kɔ̧ɔ̧ nyɛmna, baa kpoɗo-kpoɗo war. Wa kaia ‘nɛ́ yaknɛ hee o mɔdai nɛ o wisɛn zu̧ yaknɛ ga.

²⁷Ɛnɛ nɔ ŋgiɗi, o bem kɔ‘m, ɓɛɛ ɛnɛ hiɗi mɔ sitɛ Sɔ̧, wen tɛ-Wi nɛ daka mɔ‘i pi zu ‘nɛ́‘i tɛ mbaŋ ɗoŋ ‘nɛ.

²⁸Hee mɔ nɛ taamɔ k’ɛ́nɛ́ ira'nɛ́ nyɛi̧ nɛ Sɔ̧ ga, k’ɛnɛ nɛ́ kpaia see-‘nɛ kaɗi ɓɛɛ n’ɛnɛ ha̧ ŋgai tɛ-nɛ war ɓu war ɓu, mɛ kií nɛ A̧.

²⁹Wen wi nɛ foo o ŋgaŋamɔ nɔ‘i a zu ‘nɛ‘i tɛ kpasi ‘nɛ́, ha̧ nɛ desee h’ɛ́nɛ́ wen ɓɔnsɛnɛ.

³⁰Mɛ nɔ́ ŋgiɗi, Jerusalɛm! Wi nɛ aa nin mɛ‘i tɛ ga̧ see-mɛ.

³¹Bɔnɛ aa zu o wi nɛ dea ɗaŋmɔ in mɛɛ, ɓɛɛ nɛ dea nyɛŋɛ tikaa kɔ-mɛ!

³²Bonɛ aa zu o ye nɛ o bem kɔ-mɛ dea bara sɛnɛ! Bɔnɛ aa zu ye nɛ kpaa o buibem kɔ-mɛ tɛ bara!

³³Wen, hee mɔ'ɔ n'aa dee nɛ nyɛŋɛ tikaa kɔ-mɛ ká tortɛ pi̧ nɛ a̧ wen zu kumaa kɔ-mɛ ga, nɛ hegɔ mbɛt a̧‘a̧ tɛ kpa nɛ ɗaŋsee zu war yaiaa kɔ̧-a.

³⁴Gba gii-wi ye kɔ̧-a̧, nɛ ha̧ desee ha̧ a̧‘i, mi tɛ dor wa yinɛ, ɓɛɛ ditasee tɛ kpai duka-tɛ kɔ̧-a̧.

³⁵Wen Gasa Wan nɛ duk ɓɔnsɛnɛ tɛ pi wee mɛ yai a̧ yinɛ nɛ dɔka zɛ, ɓɛɛ o ɗaŋ-sɔ̧ tɛ ɔ sɛnɛ nɛ dɔka zɛ gan woyo.

³⁶Jerusalɛm, mɛ kɛ̧i̧ mɔ si war daŋa-wese, a mɛ zɔk desee nɛ Sɔ̧ ba tɛnɛ ha̧ mɛ‘i.

³⁷Mɛ zɔk! waa pii ɗoŋ‘i! o bem kɔ-mɛ, nɛ mɛ zɔka so fara yaka tɛ bara. Tigɛr Sa̧a̧-Wi mɔi̧a̧ wa, dika ndaazan hɔ zuzan; wa hɔ nɛ zaŋgule pii nɛnɛ ti gasamɔ ko Sɔ̧.