Read Northwest Gbaya Daniɛl (Grɛk) 1 Bible Online

Daniɛl (Grɛk) 1 - Northwest Gbaya bible

Daniɛl (Grɛk) 1

⁴

⁵

²⁴O wi nɔ‘i taar'i yara nɛ mgbara leɓe-wee gasi nɛ Sɔ̧, zɔn nɛ Gasa Wan.

²⁵Azaria yora poo wee, ɓɛɛ kɔfi Sɔ̧, hee mɔ'ɔ ga:

²⁶«De zɔnamɔ h’Ɛ́nɛ́, Gasa Wan, Sɔ̧ ko o zɔmdáà k’ɛ́ɛ́. Nin-‘Nɛ́ a hu̧r nɛ dea kpoo nɛ kpoo!

²⁷Wen Ɛ́nɛ́ dea mɔ lɛŋ nɛ yuwar-a. O tom k’Ɛ́nɛ́ lɛŋ nɛ́ kpasa tom, o yuwar k’Ɛ́nɛ́ lɛŋ ɔ tana, o gɔnakita k’Ɛ́nɛ́ lɛŋ nɛ́ kpasaá.

²⁸Ɛ́nɛ́ gɔna kita nɛ yuwar-a nɛ mbetɛ, tɛ usa bɔnɛ h’ɛ́ɛ́ in ha̧ Jerusalɛm sa̧-a̧ ye ko o zɔmdáà k’ɛ́ɛ́. Wen, tɛ usa o bɔnɛ nɔ‘i h’ɛ́ɛ́ wen zu o ɗaŋmɔ k’ɛ́ɛ́, Ɛ́nɛ́ dea mɔ nɛ wara in nɛ kpasaa.

²⁹Wen ɛ́ɛ́ dea ɗaŋmɔ, ɛ́ɛ́ dea yɔɔmɔ, hɔ tɛ kɛ̧a tɛ-ɛ́ɛ́ nɛ Ɛ́nɛ́; ii, ɛ́ɛ́ dea ɗaŋmɔ batɛ tɛ mɔ lɛŋ.

³⁰Ɛ́ɛ́ mbo zu-yɛ ha̧ o heembea k’Ɛ́nɛ́ na; ɛ́ɛ́ kasi wa na; mɔ n’Ɛ́nɛ́ tɔ̧a̧ h’ɛ́ɛ́ mɛ de wen h’ɛ́ɛ́ mɛ kpa demɔ, ɛ́ɛ́ de na.

³¹Nɛ mbetɛ, o bɔnɛ n’Ɛ́nɛ́ usa h’ɛ́ɛ́ lɛŋ, o mɔ n’Ɛ́nɛ́ dea in yɛ lɛŋ, Ɛ́nɛ́ dea nɛ yuwar-a.

³²Ɛ́nɛ́ ee yɛ er o wisɛn nɛ iŋ‘Nɛ́ na, er o ɗaŋ wi-ŋgazu, er wannu nɛ demɔ nɛ yuwar-a na, ɓɛɛ nɛ dúk nɛ sɔŋkur ɗaŋwi zu nu’ɛ̧.

³³Ɓɛ́ kinii, ɛ́ɛ́ o widetom k’Ɛ́nɛ́ in o wi-gasi-‘Nɛ́, ɛ́ɛ́ kpa nú-yɛ ɓɔ na: foe in búú baa yɛ.

³⁴Ɓɛɛ, wen zu hu̧ra nin-‘Nɛ́, k’ɛ́nɛ́ e yɛ duk wen ɓɔnsɛnɛ na, k’Ɛ́nɛ́ gbin nɔɔtɔk k’Ɛ́nɛ́ in yɛɛ na.

³⁵K’Ɛ́nɛ́ kaɗi dee ko h’ɛ́ɛ́, wen zu Abraham sɛm k’Ɛ́nɛ́, Izaak widetom k’Ɛ́nɛ́ in Israɛl sa̧a̧wi k’Ɛ́nɛ́ na;

³⁶Ɛ́nɛ́ ha̧so nú ha̧ wa nde o bezaŋ-wa tɛ nyɛɓi hee o sɔra yiwese, kóó hee nyɛmɛ ka̧ zaŋ gbatɔp ga.

³⁷Gasa Wan, Ɛnɛ zɔ́k, ɛ́ɛ́ kifa nɛ́ sɔŋkur geɗɛk dukbii zaŋnu lɛŋ, ɓɛɛ sɔsɔɔ‘i mbɛt, wa ee bùk ndáà-yɛ nɛ yi bi lɛŋ wen zu o ɗaŋmɔ k’ɛ́ɛ́.

³⁸Kinii, ɛ́ɛ́ bo nɛ ŋma be-wan, kóó witɔ̧wen oi nú ‘Nɛ́, kóó wannu ɓɔ na; dɔɔ kpoo h’Ɛ́nɛ́, ɗafa'Nɛ́, ha̧a̧ mɔ h’Ɛ́nɛ́, in dɔɔ fuu-nyama h’Ɛ́nɛ́ bó na; fara-ɗafi-‘Nɛ́ in fara-kpa-deako k’Ɛ́nɛ́ bó ɓɔna mbɛt.

³⁹Ɛnɛ zɔ́k ŋmana-see k’ɛ́ɛ́ in dukaa k’ɛ́ɛ́ si ɗɔɔ, ɓɛɛ Ɛnɛ kpɛ́k yɛ, hee mɔ'ɔ n’Ɛ́nɛ́ kpɛk nɛ o vala-sami, o wiwii-ndai in o gba gii maŋa be-sami, nɛ wa dɔ h’Ɛ́nɛ́ ga.

⁴⁰Hegɔ, Ɛnɛ kpɛ́k ɗafa'Nɛ́ n’ɛɛ́ ɗafi sɔsɔɔ‘i; ɓɛɛ Ɛnɛ dé h’ɛ́ɛ́ mɛ ndak pata'Nɛ́ nɛ kpasaá, wen foe beka ba wi nɛ e ta nɛ Ɛ́nɛ́ na.

⁴¹Ɓɛɛ kinii ɛ́ɛ́ nɛ ɗoŋ‘Nɛ́ nɛ see-yɛ lɛŋ, ɛɛ yu kii tɛ-‘Nɛ́, ɛ́ɛ́ kii nɛ saŋayi'Nɛ́.

⁴²K’Ɛ́nɛ́ pi̧ foe tɛ yɛ na, ɓɛɛ Ɛnɛ dé mɔ in yɛ, nɛ kɔ̧ɔ̧mɔ in gasa deako k’Ɛ́nɛ́.

⁴³Gasa Wan, Ɛnɛ kpási yɛ nɛ zɔm ŋgai k’Ɛ́nɛ́, ɓɛɛ Ɛnɛ dáà ha̧ nin-‘Nɛ́ mɛ hu̧r, Gasa Wan!

⁴⁴Foe a bá o wideɗaŋmɔ sitɛ o widetom k’Ɛ́nɛ́, ɓɛɛ búú a bá wa; K’Ɛnɛ é ha̧ wa mɛ kpa ŋgai in mɛ ɔ wan zu o bii na, ɓɛɛ Ɛnɛ gbin ŋgai-tɛ-wa.

⁴⁵Wa'a iŋ nde Ɛ́nɛ́ nɛ́ kpɔk Gasa Wan Sɔ̧, nɛ gasamɔ k’Ɛ́nɛ́ dama zu nu lɛŋ.

⁴⁶O widetom ko wannu nɛ pi̧i̧ so o wi nɔ‘i yi-wee'i kaɗi tusa wee siti nɛ yi-lamba, sɔ̧ɔ̧-te, nɔ̧ in gua na.

⁴⁷Leɓe-wee ɓoɓa daŋ nɛ kɔ gbamgba-wee'i, kusa-a ko leɓe-wee'i wi nyɛm mɛ tɔ̧ na;

⁴⁸a pɛsa yak zu gbamgba'i, ɓɛɛ dɔ o ŋma be-Kaldee n'aa kpaa ka̧ tɛ-a mbɛt.

⁴⁹Ɓɛɛ betom ko Sɔ̧ zir so kpɔk in Azaria in o gbamayari kɔ̧-a̧ si kɔ gbamgba wee'i, ɓɛɛ a̧ fo leɓe-wee yinɛ si zan.

⁵⁰A̧ ufa de ga̧-a̧ búk-dɔmbɔrɔ a zaŋ gara-gbamgba'i; hegɔ, wee ndɔ gee ndɔɔ wa na. Wee usi bɔnɛ ha̧ wa ká dea nɛ ŋma ɗaŋmɔ in wa na mbɛt.

⁵¹Ɓɛɛ wa taar lɛŋ a nú-wa kpɔk, de nɛ osoko ha̧ Sɔ̧, gasi nɛ A̧, zɔn nɛ A̧ kɔ gbamgba-wee mɛ, tɔ̧ nɛnɛ‘e:

⁵²«Ɛɛ zɔ́n'Nɛ́, Gasa Wan Sɔ̧ ko o zɔmdáà k’ɛ́ɛ! Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ! Ɛɛ zɔ́n sa̧a̧ nin-‘Nɛ́ tɛ gasamɔ k’Ɛ́nɛ́! Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

⁵³Ɛɛ zɔ́n'Nɛ́ sɛn kɔ̧ sa̧-a̧ Tua Gasamɔ k’Ɛ́nɛ́! Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

⁵⁴Ɛɛ zɔ́n'Nɛ́ zu kiti-wan k’Ɛ́nɛ́! Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

⁵⁵Ɛɛ zɔ́n'Nɛ́, n’Ɛnɛ duk zu o keribim zɔk nɛ́ mɔ hɔ tɛ o ɗuka ndaa kɔ̧! Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

⁵⁶Ɛɛ zɔ́n'Nɛ́ yizan ŋgɔn mɛ! Nyɛma ha̧‘i mɛ zɔn'Nɛ́ in mɛ gasi'Nɛ́ ɓɔnsɛnɛ!

⁵⁷O mɔ nɛ Gasa Wan dea lɛŋ, ɛnɛ zɔ́n Gasa Wan! Ɛnɛ bii gima ha̧ A̧, gasi nɛ A̧ ɓɔnsɛnɛ!

⁵⁸O betom ko Gasa Wan, ɛnɛ zɔ́n Gasa Wan! Ɛnɛ bii gima ha̧ A̧, gasi nɛ A̧ ɓɔnsɛnɛ!

⁵⁹Yiwese, ɛnɛ zɔ́n Gasa Wan! Ɛnɛ bii gima ha̧ A̧, gasi nɛ A̧ ɓɔnsɛnɛ!

⁶⁰O yì mɛ ɗoŋ yizan lɛŋ, ɛnɛ zɔ́n Gasa Wan! Enɛ bii gima ha̧ A̧, gasi nɛ A̧ ɓɔnsɛnɛ!

⁶¹O ŋgai ko Gasa Wan mɛ ŋgɔn lɛŋ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁶²Wese in yaŋazɛ, ɛnɛ zɔ́n Gasa Wan! Ɛnɛ bii gima ha̧ A̧, gasi nɛ A̧ ɓɔnsɛnɛ!

⁶³O sɔra mɛ yiwese, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁶⁴O koro in o mbɛŋ lɛŋ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁶⁵O búk lɛŋ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁶⁶Wee in gbɛŋmɔ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁶⁷Gɛ̧ɛ̧ in weemɔ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁶⁸O mbɛŋ in ɓɔrɔ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁶⁹Ŋga-gɛ̧ɛ̧ in gɛ̧ɛ̧-ɓɔrɔ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁷⁰O ɓɔrɔ in kutu, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁷¹O zɛ in wese, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁷²Sa̧a̧mɔ in o gba-tum, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁷³O pi̧i̧koro in o turazan, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁷⁴Nù a zɔ́n Gasa Wan! a'a bíí gima ha̧ A̧, gasi nɛ A̧ ɓɔnsɛnɛ!

⁷⁵O kaya in o zutɔ̧, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁷⁶O bɔrmɔ zu nu lɛŋ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁷⁷O kpuput, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁷⁸O gbatɔp in o nanayì, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁷⁹O ŋga saɗi-ɗɔɔ-yì in o mɔ nɛ fo mɔ ɗɔɔ yi lɛŋ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁸⁰O nɔi̧ yiwese lɛŋ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁸¹O saɗi-zaŋbɛɛ in o mɔdai lɛŋ, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁸²Ɛnɛ́ o bem ko o bii, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁸³Israɛl, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁸⁴O wiɗafisɔ̧, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁸⁵O widetom ko Gasa Wan,, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁸⁶O widemɔ nɛ yuwar-a, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁸⁷O sa̧a̧bii in o ga̧-a̧wi, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ!

⁸⁸Anania, Azaria in Misaɛl, ɛnɛ zɔ́n Gasa Wan! Ɛnɛ bíí gima ha̧ A̧, gasi nɛ A̧ ɓɔnsɛnɛ! Wen A̧ gboo yɛ ye-ko-fio yinɛ, ɓɛɛ A̧ kpasi ɛ́ɛ́ ɗɔɔ ŋgai ko fio. A̧ ɓara yɛ yinɛ yi nyɛka-wee, ɓɛɛ A̧ dak yɛ yi leɓɛ-wee yinɛ.

⁸⁹Ɛnɛ dé osoko ha̧ Gasa Wan, wen A̧ ɔ dée, ɓɛɛ kɔ̧ɔ̧mɔ kɔ̧-A̧ duk ɓɔnsɛnɛ.

⁹⁰O wi-yu-kií Gasa Wan lɛŋ, ɛnɛ zɔ́n Sɔ̧ nɛ gana o ŋma sɔ̧ lɛŋ! Ɛnɛ bíí gima ha̧ A̧, ɛnɛ dé osoko ha̧ A̧, wen kɔ̧ɔ̧mɔ kɔ̧-A̧ duk ɓɔnsɛnɛ.