Read Northwest Gbaya EZEKIƐL 14 Bible Online

EZEKIƐL 14 - Northwest Gbaya bible

EZEKIƐL 14

¹O ŋma gasawi mgbara o be Israɛl tɛ̀ɛ́ tɛ‘m, ɓɛɛ wa ya nu katɛ‘m.

²Nɛ mɔ'ɔ nɛ GASA WAN tɔ̧ɔ̧ ha̧‘m:

³«Mɛ́ bíí, see o wi nɔ'ɔ biti duk tɛ o géé-sɔ̧ kɔ-wa, ɓɛɛ mɔ‘i duk nɛ mɔɔ-kɔ̧-naŋ nɛ tɛ de ha̧ wa mɛ de ɗaŋmɔ. Wa taa mi tɛ̀ɛ́ e so ha̧ wa mɛ ak mɔ pii tɛ‘m?

⁴«Hegɔ, kinii'i, mɛ̀ tɔ̧́ ha̧ wa'e, nɛ mi GASA WAN Sɔ̧ a̧ tɔ̧ wen’ɛ ha̧ wa. Mɔ nɛ‘i saa'e o be nutua ko Israɛl lɛŋ biti e see tɛ géé-sɔ̧, ɓɛɛ nɛ̀ dúk tɛ̀ nɛ̀ mɔ nɛ tɛ de ha̧ wa mɛ de ɗaŋmɔ, kà pɛrti bíí hegɔ nɛ́ tɛa tɛ wi-tɔ̧-wen oi nú Sɔ̧ mɛ ak mgbara mɔ, ɓɛɛ nɛ́ mi GASA WAN nɛ tɛ‘m a̧ tɛ kifi nú zu dɔka gasa géé-sɔ̧ kɔ-wa,

⁵wen ha̧ wen kɔ‘m mɛ ba see o be Israɛl nɛ zika ɗoŋ e ha̧‘m wen o géé-sɔ̧ nɔ‘i, wen ha̧ wa mɛ pii ɗoŋ tɛ‘m.»

⁶Hegɔ mɛ tɛ tɔ̧ ha̧ o be nutua ko Israɛl'e nde: «Mɛ nɛ mi GASA WAN Sɔ̧ a̧ tɔ̧ wen’ɛ. Ɛ̀nɛ̀ píí ɗoŋ tɛ‘m, ɛ̀nɛ̀ é o géé-sɔ̧ k’ɛ́nɛ́ duk, ɛ̀nɛ̀ é o ndiŋ yuwar deemɔ k’ɛ́nɛ́ lɛŋ duk.

⁷«Ɓɛɛ ɛ̀nɛ̀ íŋ‘e, kóó nɛ ŋma be nutua ko Israɛl, kóó so nɛ ŋma gɔni-duk a̧ gbina pii zu'nɛ́, ɓɛɛ nɛ mɔ'ɔ n'aa ea'm duk wen ee see tɛ o géé-sɔ̧, e nɛ see tɛ yuwar nɛ tɛ de ha̧ a̧ mɛ de ɗaŋmɔ, ɓɛɛ kà wi’ɛi nɛ́ tɛ wi-tɔ̧-wen oi nú Sɔ̧ mɛ ak mɔ, ɓɛɛ mɛ̀ nɛ̀ mi GASA WAN a̧ tɛ́ kifi nú ha̧ wi’ɛi nɛ̀ tɛ‘m.

⁸Mi tɛ de ŋmaa in wi’ɛi, mi tɛ de ha̧ a̧ mɛ duk nɛ tua-wen ko o bíí, ɓɛɛ mi tɛ ba a̧ yinɛ mgbara dukbíí kɔ‘m. Mɛ nɛ hegɔ ɛ̀nɛ̀ tɛ iŋ nɛnɛ‘e, mi nɛ GASA WAN.

⁹«Kà ŋma wi-tɔ̧-wen oi nú Sɔ̧ gɔn ta tɔ̧ nɛ gee yɔka wen, ɓɛɛ ɛ̀nɛ̀ íŋ‘e mɛ nɛ mi GASA WAN a̧ ɔra wi-tɔ̧-wen oi nú Sɔ̧‘i. Ɓɛɛ mi tɛ de ŋmaa in wi’ɛi ba nɛ a̧ yinɛ mgbara o be nutua ko Israɛl.

¹⁰Mi tɛ pi̧ bɔnɛ zu wa yiitoo lɛŋ: wi-tɔ̧-wen oi nú Sɔ̧ in wi nɛ tɛɛ tɛ-a mbɛt.

¹¹Tɛ mɔ‘i, ɓɛɛ o be Israɛl beka e'm duk mɛ e see-wa tɛ ndiŋmɔ kɔ-wa na. Wa tɛ ya nɛ dukbíí kɔ‘m, ɓɛɛ mi tɛ duk nɛ Sɔ̧ kɔ-wa. Mɛ nɛ mi GASA WAN Sɔ̧ a̧ tɔ̧ wen’ɛ.»

¹²Nɛ mɔ'ɔ nɛ GASA WAN tɔ̧ɔ̧ ha̧‘m:

¹³«Mɛ́ bíí, kóó nɛ ŋma nù a̧ tu̧u̧ see-am tɛ dee ŋgazu, mi tɛ ɗaŋ o fara-a-nyɔnɔ kɔ-wa, ɓɛɛ mi tɛ tom kaɓa pi̧ zu wa mɛ ɗaŋ wa yinɛ gu nɛ o mɔ-dai kɔ-wa mbɛt.

¹⁴Ɓɛɛ kà o bíí nɔ'ɔ taar’ɛ, Nɔe, Daniɛl in Job a̧ duka tɛ nu'i mbɛt, kana nɛ o wi nɔ‘i taar'i ɓɛɛ a̧ tɛ kpasi wen dee mɔ kɔ-wa nɛ yuwar-a. GASA WAN Sɔ̧ tɔ̧ɔ̧ hegɔ.

¹⁵«Kóó mana mi tɛ tom o ŋga ɗaŋ boko-nam si zu nu'i nɛ tɛ kum o bíí fara'i lɛŋ, ha̧ fara'i mɛ kifi nɛ gee bɛɛ-oi nɛ‘i beka ɓir sɛnɛ ɓɔna.

¹⁶Kóó o wi nɔ'ɔ taar’ɛ a̧ yaa so zaŋnu'i, nɛ o wi nɔ‘i taar'i ɓɛɛ a̧ beka fe na. Nɛ mi GASA WAN Sɔ̧ nɛ duk kpasa a̧ tɔ̧; wa beka kpasi so o mgbák bem kɔ-wa na mbɛt, ɓɛɛ nù kɔ-wa tɛ kifi nɛ gee ŋga-gbárà.

¹⁷«Kóó mana mi tɛ tom nɛ biro pi̧ mgbara o wi nɔ‘i, mi tɛ de ha̧ o wi-biro mɛ ɗaŋ nu'i in ha̧ wa mɛ kum o bíí in o saɗi lɛŋ.

¹⁸Kóó o bíí nɔ‘i taar'i a̧ yaa so tɛ nu'i mbɛt, nɛ́ wa'i a̧ tɛ kpasi ɓɛɛ. Nɛ mi GASA WAN Sɔ̧ nɛ duk kpasa a̧ tɔ̧ hegɔ. Kóó so nɛ o mgbák bem kɔ-wa, wa beka nyɛm mɛ kpasi wa na.

¹⁹«Kóó mi toma nɛ ŋga zɛɛ-geŋa pi̧ zu nu'i, kóó am gbai nɛ ŋga nyimsea kɔ‘m a zu o bíí gu nɛ o saɗi mbɛt,

²⁰kà Nɔe, Daniɛl in Job a̧ a̧a̧ so zu nu'i mgbara o bíí nɔ‘i, deemɔ nɛ yuwar-a kɔ-wa nɛ tɛ-wa tɛ kpasi wa ɓɛɛ; wa beka kpasi so o mgbák bem kɔ-wa na mbɛt. Nɛ mi GASA WAN Sɔ̧ a̧ tɔ̧.»

²¹Mɛ nɛ zu mɔ‘i a̧ GASA WAN tɔ̧a̧‘e: «Kóó mi toma so nɛ o ŋgamɔ naar pii zu Jerusalɛm: biro, kaɓa, boko-nam in zɛɛ-geŋa mɛ kum o bíí in o saɗi mbɛt,

²²o ŋma oi ndaa o bíí tɛ ɓɔn, o okoo in o wiwii. Wi tɛ fo wa gbonɛ saaye, mɛ nɛ̀ɛ́ kpa'nɛ́ tɛ bara, ɓɛɛ k’ɛ̀nɛ̀ be tɛ̀ɛ́ zɔk naŋanɔ kɔ-wa in deemɔ kɔ-wa, ɛ́nɛ́ tɛ kɔ̧ ɗɔɔ ŋgamɔ n'am foo pi̧ zu Jerusalɛm.

²³Ɛnɛ be tɛ̀ɛ́ zɔk wa, ɓɛɛ see'nɛ́ ga̧a̧; k’ɛ̀nɛ̀ be tɛ̀ɛ́ zɔk duka-a in deemɔ kɔ-wa, ɓɛɛ ɛ́nɛ́ iŋa'e, nyɛma so kana ha̧‘m mɛ de mɔ in'nɛ̀ɛ́ hegɔ. Nɛ mi GASA WAN Sɔ̧ a̧ tɔ̧ hegɔ.»