Read Northwest Gbaya EZEKIƐL 18 Bible Online

EZEKIƐL 18 - Northwest Gbaya bible

EZEKIƐL 18

¹Nɛ mɔ'ɔ nɛ GASA WAN tɔ̧ɔ̧ ha̧‘m:

²«Wen ge s’ɛnɛ duk tɛ tɔ̧ɔ̧ tua-wen’ɛ‘e, ‹O dáà nyɔŋa mbui waya nyak-dɔ̧ɔ̧, ɓɛɛ nɛ mɔ'ɔ nɛ nin o bem kɔ-wa fee gbílílí› sɛn nu Israɛl siti ge?

³«Hee mɔ'ɔ n'am GASA WAN duk kpasa ga, ɛnɛ beka tɔ̧ pɛrti tua-wen hegɔ‘i mgbara o be Israɛl ɓɔna.

⁴Wen nɛ mi'i kasi duka-kpasa ko bíí lɛŋ, duka-kpasa ko dáà in duka-kpasa ko bem lɛŋ duk kɔ̧ er-am. Wi nɛ de ɗaŋmɔ, kana nɛ wi’ɛi a̧ tɛ fe oi ɗaŋmɔ kɔ‘i.

⁵«De bíí nɛ́ wi-de-mɔ nɛ yuwar-a, nɛ duk tɛ dee mɔ nyɛm sɛnɛ.

⁶Wi’ɛi nyɔŋ mɔɔ-ɗafi o géé-sɔ̧ mɛ zu kaya mɛ na, a̧ zɔk mɔ sitɛ o géé-sɔ̧ ko o be Israɛl na mbɛt, a̧ ba kóò ko ŋma-a ɔ nɛnɛ na, a̧ ɔ in okoo tɛ ŋgimbi zɔka-zɛ na mbɛt;

⁷a̧ ɔr mɔ, bá nɛ̀ mɔ er ŋma-a, kà bó nɛ̀ dee ŋgamɔ in ŋma-a na, a̧ dor ziŋina ko wan-gbo-nyamandoi ɓɔn er-a na, a̧ nɛ wi-ha̧-nyɔŋmɔ ha̧ o wi-kɔsa, ɓɛɛ a̧ pi̧i̧ laa tɛ o wi nɛ ya nɛ gee tɛ mbɛt.

⁸A̧ ha̧ nyamandoi ha̧ o bíí wen kpaa yi-mɔ er wa na, a̧ ye tɛ ɔra mɔ na, ɓɛɛ a̧ gɔn nɛ kita nɛ yuwar-a.

⁹Wi’ɛi kasi heembea kɔ‘m e nɛ see tɛ o geŋa kɔ‘m, tɛ dee mɔ nɛ yuwar-a. O pɛrti bíí hegɔ‘i nɛ o wi-de-mɔ nɛ yuwar-a nɛ mbetɛ, wa tɛ kpasi. Nɛ GASA WAN Sɔ̧ a̧ tɔ̧ hegɔ.

¹⁰«Ɓɛɛ kà wi’ɛi ko ŋma be ŋgazu, nɛ de nɛ ŋgamɔ, zu̧ nɛ mɔ, gbɛ nɛ bíí nɛnɛ, de nɛ o pɛrti mɔ nɛ dáà kɔ̧-a̧ de so na, nɛ mɔ'ɔ n'aa duk nyɔŋ nɛ mɔɔ-ɗafi o géé-sɔ̧, ba nɛ kóò ko ŋma-a ɔ nɛnɛ mbɛt,

¹²ɔr nɛ o wi-kɔsa in o wi-bɔnɛ kai nɛ mɔ er-wa, ɓar nɛ mɔ ko o bíí, dor nɛ ziŋina nɛ wan-gbo-nyamandoi gboa ɓɔn er-a, ɗafi nɛ o géé-sɔ̧, de nɛ ndiŋmɔ nɛnɛ,

¹³ha̧ nɛ nyamandoi ha̧ o bíí wen kpaa yi-a, kii nɛ war mɔ kɔ̧-a̧ nɛ tɛ-a; pɛrti bíí hegɔ‘i tɛ kpasi nde? Bíí hegɔ beka kpasi na ndo ndo ndo; a̧ tɛ fe wen o ɗaŋmɔ n'aa dea, ɓɛɛ tɔk tɛ-a tɛ tik zu a̧ nɛ tɛ-a siɗoŋ.

¹⁴«Ɓɛɛ kà wi’ɛi tɛ́ɛ̀ ko bem nɛ zɔka ɗaŋmɔ lɛŋ nɛ dáà kɔ̧-a̧ dea, ɓɛɛ nɛ mɔ'ɔ n'aa ndak ɗoŋ deemɔ ko dáà kɔ̧-a̧ na,

¹⁵a̧ gasi o géé-sɔ̧ ko o be Israɛl, nyɔŋ nɛ mɔɔ-ɗafi-sɔ̧ mɛ zu kaya mɛ na, a̧ ba kóò ko ŋma-a ɔ nɛnɛ na,

¹⁶a̧ ɔr mɔ ba nɛ mɔ er ŋma-a, kà bó nɛ̀ dee ŋgamɔ in ŋma-a na; a̧ dor ziŋina ko wan-gbo-nyamandoi ɓɔn er-a na, a̧ nɛ wi-ha̧-nyɔŋmɔ ha̧ o wi-kɔsa in wi-pi̧-laa tɛ o wi nɛ ya nɛ gee tɛ;

¹⁷a̧ ye tɛ ɔramɔ na, a̧ ha̧ nyamandoi ha̧ bíí wen kpaa yi-a na; a̧ kasi yuwar kɔ‘m nɛ de-a, nyɛm nɛ ɗoŋ yuwar geŋa kɔ‘m; wi’ɛi beka fe wen zu ɗaŋmɔ ko dáà kɔ-i na, a̧ tɛ kpasi kɔ̧-a̧.

¹⁸Ɓɛɛ dáà kɔ̧-a̧ nɛ duka de nɛ ŋgamɔ, ɓar nɛ mɔ er o nya-wi nɛ ŋgai, de nɛ ɗaŋmɔ mgbara dukbíí kɔ̧-a̧‘i, tɛ fe oi ɗaŋmɔ kɔ‘i.

¹⁹«Ɛnɛ tɛ ak mɔ‘e nde, ‹Wen ge sa bem nyɛm mɛ zɔk bɔnɛ oi ɗaŋmɔ ko dáà kɔ‘i na ge?› Kifa-nú nɛ mɔ'ɔ: wen nɛ bem dee mɔ nɛ yuwar-a, in a̧ mboo zu tɛ o heembea kɔ‘m lɛŋ, a̧ tɛ kpasi kɔ̧-a̧.

²⁰Ɓɛɛ wi nɛ de ɗaŋmɔ, kana nɛ wi’ɛi a̧ tɛ fe. Bem beka fe wen zu ɗaŋmɔ ko dáà na, in dáà beka fe wen zu ɗaŋmɔ ko bem na mbɛt. Wi nɛ de mɔ nɛ yuwar-a tɛ kpa nɛ demɔ oi deemɔ nɛ yuwar-a kɔ‘i, ɓɛɛ wi-ɗaŋ tɛ kpa kana nɛ ɗaŋmɔ oi ɗaŋ kɔ‘i.

²¹«Ɓɛɛ kà ŋma wi-ɗaŋ e yuwar dee ɗaŋmɔ kɔ‘i duk, mɛ ndak nɛ pata heembea kɔ‘m, ɓɛɛ kà a̧ de mɔ nɛ de-a in nɛ yuwar-a, a̧ tɛ kpasi nɛ mbetɛ, a̧ beka fe na.

²²Tɛ-wi tɛ bi ɗoŋ o ŋgazu kɔ̧-a̧ lɛŋ, ɓɛɛ deemɔ-a̧ nɛ yuwar-a tɛ kpas'a.

²³Ɛ́nɛ́ tá k’ɛ́nɛ́‘e, mi duk nɛ desee zu fio ko wi-ɗaŋ? Mɛ nɛ mi GASA WAN Sɔ̧ a̧ tɔ̧ wen’ɛ. Mɔ n'am kɔ̧a̧, mɛ nɛ wen ha̧ wi-ɗaŋ mɛ kpa mbe ta, ɓɛɛ ha̧ a̧ mɛ kpasi.

²⁴«Ɓɛɛ kà ŋma wi-de-mɔ nɛ yuwar-a tɛ́ɛ̀ kifi e deemɔ nɛ yuwar-a duk, ɓɛɛ si ɗoŋ tɛ dee ɗaŋmɔ, zɔk nɛ ɗoŋ dee ndiŋmɔ ko wi-ɗaŋ de nɛ kɔ‘i, wi’ɛi tɛ kpasi nde? Tɛ-wi tɛ bi ɗoŋ deemɔ nɛ yuwar-a n'aa duka so de, ɓɛɛ a̧ tɛ fe wen ŋgazu in ɗaŋmɔ n'aa dea'i.

²⁵«Ɛ́nɛ́ tɔ̧́‘e: ‹Mɔ nɛ GASA WAN Sɔ̧ dee h’ɛ́ɛ́'ɛ, bo nɛ demɔ na.› Ɓɛɛ ɛ́nɛ́ zìì, ɛnɛ o be nutua ko Israɛl, ɛnɛ ta k’ɛ́nɛ́‘e nde, nɛ deemɔ kɔ‘m a̧ de na. Bo hegɔ na. Nɛ deemɔ k’ɛ́nɛ́ a̧ de na ɛ̧!

²⁶Kà ŋma wi-de-mɔ nɛ yuwar-a zik tɛ si ɗoŋ tɛ dee ɗaŋmɔ, ɓɛɛ nɛ mɔ'ɔ n'aa fea, nɛ́ wen ɗaŋmɔ kɔ̧-a̧‘i a̧ a̧ fee wen-aa.

²⁷Ɓɛɛ kà ŋma wi-ɗaŋ zik tɛ tɛ yuwar ɗaŋmɔ n'aa duka so de, ɓɛɛ si ɗoŋ yuwar deemɔ nɛ yuwar-a, wi’ɛi tɛ kpasi kɔ‘i.

²⁸Kà a̧ iŋ nɛ ta-tɛ-a'e, mɔ nɛ‘i de nɛnɛ‘i nɛ ŋgazu a'i de wo, ɓɛɛ nɛ mɔ'ɔ n'aa ee duk, a̧ tɛ kpasi, a̧ beka fe na.

²⁹Ɛnɛ o be nutua ko Israɛl tɔ̧‘e, mɔ nɛ GASA WAN Sɔ̧ de in yɛɛ'ɛ nyɛm yi-mɔ na. Mɛ nɛ deemɔ kɔ‘m in'nɛ̀ɛ́ a̧ nyɛm yi-mɔ na, nde? Bo hegɔ na. Nɛ́ deemɔ k’ɛ́nɛ́ a̧ nyɛm yi-mɔ na ɛ̧!

³⁰«Ɓɛɛ kinii, nɛ́ mi GASA WAN Sɔ̧ a̧ tɔ̧ wen h’ɛ́nɛ́ o be nutua ko Israɛl‘e nde, mi tɛ gɔn kita zu'nɛ́ kpɔk kpɔk, koo o nde nyɛm nɛ ɗoŋ deemɔ kɔ‘i. Ɛ̀nɛ̀ kpá mbe ta, ɓɛɛ ɛ̀nɛ̀ é yuwar ɗaŋmɔ duk, wen ká ɗaŋmɔ k’ɛ́nɛ́ tɛɛ tik zu'nɛ́.

³¹Ɛ̀nɛ̀ yú tɛ ɗaŋmɔ lɛŋ n’ɛnɛ duka so mɛ de sɛn ti'm, ɛ̀nɛ̀ kpá mbe ta, ɛ̀nɛ̀ kpáí taamɔ. Wen ge ɛ́nɛ́ kɔ̧ɔ̧ mɛ fe gee ge, o be nutua ko Israɛl?

³²Mi kɔ̧ kɔ‘m fio ko bíí na. Mɔ nɛ mi GASA WAN Sɔ̧ tɔ̧ h’ɛ́nɛ́, a̧‘i̧. Ɛ̀nɛ̀ é nɛ ɗaŋmɔ duk, ɓɛɛ ɛ̀nɛ̀ kpásí.»