Read Northwest Gbaya EZEKIƐL 19 Bible Online

EZEKIƐL 19 - Northwest Gbaya bible

EZEKIƐL 19

¹Nɛ mɔ'ɔ nɛ GASA WAN tɔ̧ɔ̧ ha̧‘m'e a̧‘m bíí gima-fio’ɛ zu o be-wan Israɛl:

²«Mɛ tɔ̧‘e naa kɔ-mɛ duka so hee ŋma nana-dila nɛ daia so o bem kɔ‘i mgbara o dila ga; a̧ daia so o bem kɔ̧-a̧ mgbara o daŋa-dila.

³A̧ daia nɛ kpɔk mgbara wa nɛ gasa ɓɛɛ kifi daŋa-ŋgai-dila; a̧ yamba baa saɗi in baa bíí.

⁴Tugun bíí mɔi̧a ŋmaa zu a̧, za̧ lim ɓɛɛ a̧ tik; wa pi̧i̧ wóló[17] ger-a, ɓɛɛ ba a̧ yaknɛ si nú Egiptɛ mɛ.

⁵Nɛ̀ nana-dila zɔka'e, mɔ ko ì̧ì̧ bem’ɛi beka hɔ gba̧a̧ ɓɔna, a̧ baa mbe bem e ŋgɔn woyo, ɓɛɛ dai a̧ gasi de daŋa-ŋgai-dila.

⁶Be dila'i gbama yari in o ŋma dila hegɔɔ gasi nɛnɛ de nɛ bao, yambi nɛ baa o saɗi in bíí mbɛt.

⁷A̧ ɗaŋa ŋga tua-wan kɔ-wa gu nɛ o gasa ye kɔ-wa lɛŋ; ŋgimbi nɛ o bíí nu'i zia mgbimgba-a kɔ̧-a̧, ɓɛɛ bele zar wa.

⁸O tugun bíí mɔi̧a nɛ fara lɛŋ mɛ bi a̧, ɓɛɛ wa a yɔk ba a̧.

⁹Wa pi̧i̧ wóló ger-a, ba a̧ pi̧ kɔ̧ gɛsɛ, ɓɛɛ tui a̧ yaknɛ si nu Babilɔŋ, nɛ́ɛ̀ kpe a̧ kɔ̧ ŋga tua nɛ‘i beka zii mgbimgba-a kɔ̧-a̧ zu o kaya Israɛl ɓɔna.

¹⁰«Nàà kɔ-mɛ duka hee ŋma nyak-dɔ̧ɔ̧ nɛ‘i guna ká̧ yì ga; a̧ ɓɔa, gba er, ɓɛɛ wa̧a̧-a̧ da̧ nɛ de-a, wen yì a̧a̧ gun-aa nɛ dɔka-a.

¹¹O gbaa-er-a gasa ŋgai, ɓɛɛ wa kifi dɔ́rá-wan; a̧ gasa kusi gbà mɔ̀ pét-pét. Ɓɛɛ kóó o nde nɛ zɔka ɓɔa-a in kusa-a ko te'i, ɗɛɗɛ-a gɔna nyɛmna.

¹²Nɛ mɔ'ɔ nɛ ŋma bíí tɛ̀ɛ́ zuɗ‘a pi̧ nu, ɓɛɛ búk mɛ daŋa-wese yu, dɔ a̧ kor nɛ oi waya-a. Ɓɛɛ ŋga gbaa-er-a gbin tik nu kor bíí wee.

¹³Kinii, wa tɛ̀ɛ̀ yíŋ a̧, nɛ́ɛ̀ gun ŋga-gbárà tɛ gee kora nu.

¹⁴Nɛ mɔ'ɔ nɛ wee gboo gun-aa, ɓɛɛ dɔ a̧ nɛ oi o waya-a lɛŋ. Gbaa-er-a beka ŋgai mɛ de dɔ́rá-wan ɓɔna.» Gima-fio’ɛ tɛ duk nɛ gima-fio nɛ‘i tɛ bìì yaknɛ sɔ̧i̧i̧.