Read Northwest Gbaya EZEKIƐL 20 Bible Online

EZEKIƐL 20 - Northwest Gbaya bible

EZEKIƐL 20

¹Tɛ mɔɔrɔ-ɗoŋ-yiitoo pɛ-bara, tɛ-ɔɔ zɛ ɓu ko fio-zɛ, o ŋma gasawi mgbara o be Israɛl tɛ̀ɛ́ tɛ‘m mɛ ak mɔ nɛ Sɔ̧ kɔ̧a̧.

³«Mɛ́ bíí, mɛ̀ tɔ̧́ ha̧ o gasawi ko o be Israɛl‘e nde, mɛ nɛ mi GASA WAN Sɔ̧ a̧ tɔ̧ wen’ɛ ha̧ wa: Ɛ́nɛ́ tɛ̀ɛ̀ mɛ́ ìŋ mɔ n'am kɔ̧a̧ nde? Hee mɔ'ɔ n'am duk kpasa ga, mi kana mɔ‘e mi beka e h’ɛ́nɛ́ mɛ ak am na. Mi GASA WAN Sɔ̧ tɔ̧ɔ̧ hegɔ.

⁴«Bo nɛ mɛ nyɛma mɛ gɔn kita zu o wi nɔ'ɔ na nde? Mɛ́ bíí, mɛ nyɛma dea-a hegɔ; mɛ̀ mbáŋ tɛ-wa zu o ɗaŋmɔ ko o daa kɔ-wa.

⁵Mɛ̀ tɔ̧́ ha̧ wa'e, nɛ mi GASA WAN Sɔ̧ a̧ tɔ̧ wen’ɛ ha̧ wa. Wese n'am hoka nɛ Israɛl, mi nɔɔ tɔk in o bezaŋ Jakob kan nɛ mɔ, ɓɛɛ nɛ mɔ'ɔ n'am usa tɛ‘m ha̧ wa sɛn nu Egiptɛ tɔ̧ nɛnɛ ha̧ wa'e, ‹Mi nɛ GASA WAN Sɔ̧ k’ɛ́nɛ́.›

⁶Kale wese'i, mi kana mɔ‘e, mi tɛ kai wa gbonɛ nɛ nu Egiptɛ si nu n'am hoka ha̧ wa, gba de nu nɛ gana o ŋma nu lɛŋ nɛ de-a, nɛ duna nɛ yibere in gɔrɔ,

⁷ɓɛɛ mi tɔ̧ ha̧ wa mɛ kai o ɗaŋ ndiŋ mɔɔ-nyɛr mgbara wa yinɛ, ká wa ɗaŋ tɛ-wa nɛ o géé-sɔ̧ mɛ Egiptɛ na. Mi nɛ GASA WAN Sɔ̧ k’ɛ́nɛ́.

⁸«Nɛ mɔ'ɔ nɛ wa dee ŋgazu in am, ɓɛɛ wa bɛ̧ zia wen nú‘m mbɛt. Wa kai o ɗaŋ ndiŋ mɔɔ-nyɛr yinɛ na, wa e gasa o géé-sɔ̧ ko o be Israɛl duk na. Nɛ mɔ'ɔ n'am taa mɛ gbai nyimsea kɔ‘m a zu wa ɓɔn nu Egiptɛ mɛ.

⁹Ɓɛɛ mi de hegɔ na, wen ká nin-am tɛɛ ɗaŋ mgbara o tugun bíí nɛ wa duk mgbara wa. Mi dee ha̧ o be Israɛl mɛ iŋ am ŋgimbi n'am gboo nɛ wa nu Egiptɛ mɛ nɛ̀ yí o tugun bíí nɔ‘i.

¹⁰«Mi kaia wa gbonɛ nɛ nu Egiptɛ, ɓɛɛ mi kai wa si ŋga-gbárà mɛ.

¹¹Mi ha̧a̧ o geŋa kɔ‘m ha̧ wa, usi nɛ yuwar duka-a ha̧ wa, wen ha̧ kóó o nde mgbara wa mɛ kasi yuwar'i duk nɛnɛ nɛ de-a.

¹²Mi ha̧a̧ wese-ɔm-tɛ ha̧ wa nɛ mɔɔ-usi-mɔ tɛ nɔɔ-tɔk mgbara yɛ in wa, wen ha̧ wa mɛ iŋ‘e nde, nɛ mi GASA WAN a̧ dee ha̧ wa mɛ duk nɛ kɔ‘m.

¹³Nɛ mɔ'ɔ nɛ wa dee ŋgazu in am sɛn ŋga-gbárà; wa nɛ nɔ nyɛm nɛ ɗoŋ heembea kɔ‘m na, wa siŋa yuwar duka-a kɔ‘m nɛ kpasi wi nɛ mbo zu sɛnɛ, pi̧ taŋ. Wa duka tɛ fɛŋa wese-ɔm-tɛ, ɓɛɛ nɛ mɔ'ɔ n'am taa mɛ tik zu wa tɛ ŋga nyimsea kɔ‘m, mɛ kum wa yinɛ gbuɗuk sɛn ŋga-gbárà mɛ.

¹⁴Ɓɛɛ mi de hegɔ na, wen ká nin-am tɛ̀ɛ́ ɗaŋ yi o tugun bíí nɛ baa zɔk'e mi gboo wa nu Egiptɛ.

¹⁵Sɛn ŋga-gbárà mi kana mɔ ha̧ wa woyo'e, mi beka kai wa sitɛ nu n'am ha̧a̧ so ha̧ wa, gba de nu nɛ duna nɛ yibere in gɔrɔ nɛ dee gan o ŋma nu lɛŋ‘i ɓɔna.

¹⁶Mi kana mɔ, wen wa pi̧i̧ yuwar geŋa kɔ‘m taŋ, ɓɛɛ wa gbin heembea kɔ‘m, fɛŋ nɛ wese-ɔm-tɛ, wen see-wa duk ɓɔn tɛ o géé-sɔ̧ kɔ-wa.

¹⁷«Mi dee ko ha̧ wa, mi kum wa ɓɔn ŋga-gbárà mɛ na.

¹⁸Nɛ mɔ'ɔ n'am tɔ̧ɔ̧ ha̧ o bezaŋ-wa ŋga-gbárà mɛ‘e: ‹K’ɛ́nɛ́ zɔk ɗoŋ yuwar deemɔ in o heembea ko o dáà k’ɛ́nɛ́ de nɛ mɔ na, k’ɛ́nɛ́ ɗaŋ war-tɛ‘nɛ́ tɛ o géé-sɔ̧ kɔ-wa na mbɛt.

¹⁹Mi nɛ GASA WAN Sɔ̧ k’ɛ́nɛ́. Ɛ̀nɛ̀ mbó zu tɛ o geŋa in o heembea kɔ‘m kasi nɛnɛ.

²⁰Ɛ̀nɛ̀ zɔ́k o wese-ɔm-tɛ kɔ‘m nɛ de-a, wen ha̧ wese'i mɛ duk nɛ mɔɔ-usi-mɔ zu nɔɔ-tɔk kɔ‘m in'nɛ̀ɛ́. Ɓɛɛ tɛ‘nɛ́ a̧ mbaŋ ɗoŋ-aa'e, mi nɛ GASA WAN Sɔ̧ k’ɛ́nɛ́.›

²¹«Ɓɛɛ nɛ mɔ'ɔ nɛ o bezaŋ-wa dee ŋgazu in am mbɛt, wa de mɔ nyɛm nɛ ɗoŋ o heembea kɔ‘m na, wa kasi o yuwar-duka-a nɛ wa nyɛma so mɛ kasi wen duka-a nɛ de-a na. Wa fɛŋa o wese-ɔm-tɛ kɔ‘m. Nɛ mɔ'ɔ n'am taa mɛ tik zu wa tɛ ŋga nyimsea kɔ‘m mɛ kum wa ɓɔn ŋga-gbárà mɛ.

²²Ɓɛɛ mi de hegɔ na, wen ká nin-am tɛ́ɛ̀ fɛŋa mgbara o tugun bíí nɛ zɔka'e mi kaia wa gbonɛ nu Egiptɛ.

²³Sɛn ŋga-gbárà mɛ, mi kana mɔ ha̧ wa woyo'e, mi tɛ pɛsi wa sót-sót mgbara o tugun bíí.

²⁴Mi dee hegɔ wen wa kasi o yuwar-duka-a kɔ‘m na, wa mbo zu tɛ o heembea kɔ‘m na. Wa fɛŋa o wese-ɔm-tɛ kɔ‘m, ɓɛɛ wa ɗafi o géé-sɔ̧ nɛ dáà kɔ-wa duka so ɗafi mbɛt.

²⁵«Ɓɛɛ tɛ mɔ‘i, mi ha̧a̧ o ɗaŋ heembea ha̧ wa in o ɗaŋ yuwar-duka-a nɛ beka kpasi wa na.

²⁶Mi dee ha̧ wa mɛ ɗaŋ tɛ-wa tɛ yuwar ɗafa o géé-sɔ̧ kɔ-wa, nɛ wa gbɛ nɛ o kaya-bem kɔ-wa ɗafi nɛnɛ‘i. Mi dee mɔ‘i hegɔ wen ha̧‘m mɛ usi bɔnɛ ha̧ wa in ha̧ wa mɛ iŋ‘e, mi nɛ GASA WAN.

²⁷«Hegɔ, mɛ́ bíí, mɛ̀ tɔ̧́ ha̧ o be nutua ko Israɛl‘e nde, nɛ mi GASA WAN a̧ tɔ̧ wen’ɛ ha̧ wa: ‹O dáà k’ɛ́nɛ́ tu̧u̧ see-am tɛ dee ŋgazu in am.

²⁸Mi kaia wa nɛ́ɛ̀ ye nɛ nu n'am baa kan so mɔ zu-a ha̧ wa. Ɓɛɛ nɛ̀ wa hɔɔ hi̧i̧ kaɗi, wa zɔka o zɔm kusa kaya in o gba da̧a̧ wa̧a̧-te, ɓɛɛ wa si tɛ ɗafa o géé-sɔ̧; wa tu̧u̧ see-am tɛ o ha̧a̧mɔ nɛ wa ha̧a̧ ha̧ o géé-sɔ̧, dɔ nɛ fuu-nyama, a nɛ zɛzɛ nu zik wa'i.›

²⁹Mi aka wa'e nde, ‹Kusa-fara n’ɛnɛ nɛ sɛnɛ'ɛ nɛ ge fara ge nde?› Hegɔ hɔ kinii wa ɓɔna sa nin fara'i nɛ kusa-fara.

³⁰Kinii, mɛ tɔ̧ ha̧ o be Israɛl‘e nde, mɛ nɛ mi GASA WAN a̧ tɔ̧ wen’ɛ ha̧ wa: ‹Wen ge s’ɛnɛ ɗaŋ tɛ‘nɛ́ tɛ kale ɗaŋ ndiŋ mɔɔ-nyɛr nɛ o dáà k’ɛ́nɛ́ dee so tɛ nɛ́ɛ̀ ɗoŋ o géé-sɔ̧ ge nde?

³¹Hegɔ kinii, ɛ́nɛ́ ɓɔna tɛ ɗaŋa tɛ‘nɛ́ tɛ gbɛɛ o bem k’ɛ́nɛ́ ɗafi nɛ o géé-sɔ̧. Hee ge a̧‘m tɛ kpɛk bɔɔ h’ɛ́nɛ́ mɛ tɛ̀ɛ́ ak am ge? Hee mɔ'ɔ n'am duk kpasa ga, mi kana mɔ‘e mi beka kpɛk h’ɛ́nɛ́ mɛ tɛ̀ɛ́ ak am ɓɔna.

³²Ɛ́nɛ́ kɔ̧ɔ̧ mɛ ya hee o ŋma tugun bíí ga, ɛnɛ kɔ̧ɔ̧ mɛ hɔ ŋmaa in o ŋma nú-gara tɛ o ŋma gɔni nu nɛ ya ɗafi nɛ o te in o kam-ta’ɛ ga. Ɓɛɛ mɔ n’ɛnɛ kii'i tɛ ba tɛ‘nɛ́ géè.›

³³«GASA WAN'e, hee mɔ'ɔ n'am duk kpasa ga, mi tɛ ɔ wan zu'nɛ́ tɛ ŋgayamɔ in tɛ ŋga nyimsea kɔ‘m.

³⁴Mi tɛ usi ŋgayamɔ in ŋga nyimsea kɔ‘m zu'nɛ́ ŋgimbi n'am be tɛ̀ɛ́ mɔi̧‘nɛ́ ha̧ wa mɛ kai'nɛ́ pii ɗoŋ nɛ tɛ o gɔni nu n’ɛnɛ pɛsa so dam sɛnɛ nɛti'i.

³⁵Mi tɛ kai'nɛ́ si gee ŋga-gbárà fara nɛ o bíí bo na, ɓɛɛ mi tɛ gɔn kita zu'nɛ́ ɓɔn yí‘nɛ́.

³⁶GASA WAN tɔ̧a̧‘e, kinii, mi tɛ gɔn kita zu'nɛ́ nɛ kpasa-a hee mɔ'ɔ n'am gɔna nɛ kita zu o dáà k’ɛ́nɛ́ ŋga-gbárà Sinai mɛ‘i ga.

³⁷«Mi tɛ kɔr'nɛ́ hee gii mɔ-dai ga, wen h’ɛ́nɛ́ mɛ ndaɗi tɛ nɔɔ-tɔk k’ɛɛ in'nɛ̀ɛ́.

³⁸Mi tɛ kai o wi-ŋgazu in o wi-ɗaŋ yinɛ mgbara'nɛ́. Mi tɛ kai wa yinɛ tɛ nu, fara nɛ wa ya sɛnɛ kinii'i, ɓɛɛ mi beka e ha̧ wa mɛ si ɗoŋ tɛ nu ko o be Israɛl woyo ɓɔna mbɛt. Mɛ nɛ hi̧i̧ ɛ̀nɛ̀ tɛ iŋ‘e, mi nɛ GASA WAN.

³⁹«Ɓɛɛ war k’ɛ́nɛ́ o be Israɛl, ɛ̀nɛ̀ dúk tɛ ɗafa o géé-sɔ̧ k’ɛ́nɛ́ siti, ɓɛɛ nɛ́ ɗoŋ ŋgimbi'i, ɛ̀nɛ̀ tɛ mbo zu ha̧‘m nɛ doole, n’ɛnɛ beka fɛŋ nin-am tɛ ɗafa o géé-sɔ̧ k’ɛ́nɛ́ ha̧ nɛ mɔ ha̧ wa siti ɓɔna.

⁴⁰GASA WAN tɔ̧a̧, mɛ nɛ sɛn tɛ nu'i zu sa̧a̧ kaya kɔ‘m, zu kusa kaya ko Israɛl a̧ o bíí nutua ko Israɛl lɛŋ nɛ ya tɛ nu'i tɛ gas'am. Ɓɛɛ mi tɛ kpɛk'nɛ́ gu nɛ o zu-mɔ in o gba de ha̧a̧mɔ n’ɛnɛ tɛ ba tɛnɛ ha̧‘m.

⁴¹Mi tɛ kai'nɛ́ yinɛ mgbara o dukbíí, mi tɛ mɔi̧‘nɛ́ nɛ̀ fara n’ɛnɛ pɛsa so dam sɛnɛ‘i, ɓɛɛ mi kpɛka'nɛ́ kpɔk in de dɔɔ pɛr nyama k’ɛ́nɛ́. Hegɔ ɓɛɛ o tugun bíí tɛ iŋ‘e mi nɛ Sɔ̧ nɛ ɔ sa̧a̧.

⁴²Kà‘m be tɛ̀ɛ́ kai'nɛ́ si ɗoŋ tɛ nu ko Israɛl, nu n'am baa so er-am nɛ ŋgɔn kan nɛ mɔ mɛ ha̧ ha̧ o dáà k’ɛ́nɛ́ kaɗi'i, nɛ hi̧i̧ ɛ̀nɛ̀ tɛ iŋ nɛnɛ‘e, mi nɛ GASA WAN.

⁴³Nɛ tɛ ŋgimbi'i a̧ tɛ‘nɛ́ tɛ mbaŋ nɛ ɗoŋ yuwar duka-a in o ɗaŋ deemɔ lɛŋ n’ɛnɛ dee so fɛŋ nɛ tɛ‘nɛ́, ɓɛɛ foe tɛ ba'nɛ́ zu o mɔɔ nɔ‘i n’ɛnɛ duka so de'i.

⁴⁴Hegɔ ɛnɛ o be nutua ko Israɛl tɛ iŋ‘e, mi nɛ GASA WAN tɛ mɔ n'am dee in'nɛ̀ɛ́. Mi dee mɔ‘i ha̧ nin-am mɛ hu̧r, ɓɛɛ bo nɛ wen ndaka ɗoŋ ɗaŋmɔ in ɗaŋ yuwar deemɔ k’ɛ́nɛ́ na. Mi GASA WAN Sɔ̧ a̧ tɔ̧ɔ̧ hegɔ.»