Read Northwest Gbaya EZEKIƐL 21 Bible Online

EZEKIƐL 21 - Northwest Gbaya bible

EZEKIƐL 21

¹Nɛ mɔ'ɔ nɛ GASA WAN tɔ̧ɔ̧ ha̧‘m:

²«Mɛ́ bíí, mɛ̀ zík tɛ-mɛ si war ká̧-zan-mɛ́-ɗɔɔ mɛ, ɓɛɛ mɛ̀ tɔ̧́ wen si mɛ; mɛ̀ tɔ̧́ wen a zu kombo Nɛgɛb.

³Mɛ̀ tɔ̧́ ha̧ kombo Nɛgɛb'e: Ɛ̀nɛ̀ zíí mɔ nɛ GASA WAN tɔ̧ h’ɛ́nɛ́'ɛ, mi tɛ e wee tɛ-mɛ, ɓɛɛ wee'i tɛ dɔ o kora te gu nɛ o tɔr te lɛŋ. Wee'i nɛ́ ŋma kpɔra wee nɛ beka bi na, a̧ tɛ dɔ o mɔ lɛŋ fa̧a̧fi̧i̧-fa̧a̧fi̧i̧ nɛ Nɛgɛb hɔ nɛnɛ ká̧-zan-mɛ́-ŋgɔn mɛ.

⁴O bíí lɛŋ tɛ zɔk'e, nɛ mi GASA WAN a̧ pi̧i̧ wee'i, ɓɛɛ ŋma bíí mɛ bi a̧ yinɛ, bo na.»

⁵Nɛ mɔ'ɔ n'am tɔ̧a̧‘e: «Ho! GASA WAN Sɔ̧, wa tɛ tɔ̧ ha̧‘m'e, wen n'am tɔ̧'ɛ lɛŋ nɛ gee tua-wen!»

⁶Nɛ mɔ'ɔ nɛ GASA WAN tɔ̧ɔ̧ ha̧‘m woyo:

⁷«Mɛ́ bíí, mɛ̀ zík tɛ-mɛ si Jerusalɛm, mɛ̀ tɔ̧́ ŋga wen a zu o sa̧a̧-fara kɔ-wa, ɓɛɛ mɛ̀ tɔ̧́ wen a zu nu Israɛl mbɛt.

⁸Mɛ̀ tɔ̧́ ha̧ o bíí nu Israɛl lɛŋ‘e nde, mɛ nɛ mi GASA WAN a̧ tɔ̧ wen’ɛ ha̧ wa. Kinii, mi baa zu duk nɛ ɛnɛ kaɗi, mi tɛ dak gba-paa kɔ‘m kɔ̧ koɓo-a mɛ gɔm nɛ ɛnɛ a nu gbuluduk, o wi-de-mɔ nɛ yuwar-a gu nɛ o wi-ɗaŋ lɛŋ.

⁹Mɛ nɛ wen gbɛɛ o wi-de-mɔ nɛ yuwar-a gu nɛ o wi-ɗaŋ a̧ gba-paa kɔ‘m tɛ gbo nɛnɛ kɔ̧ koɓo-a'i. Gba-paa kɔ‘m tɛ gbɛ mɔ nɛ‘i sa'e, o bíí lɛŋ nɛ Nɛgɛb hɔ nɛnɛ ká̧-zan-mɛ́-ŋgɔn mɛ.

¹⁰Ɓɛɛ tɛ mɔ‘i, o bíí lɛŋ tɛ iŋ‘e, kɔ‘m GASA WAN, mi daka gba-paa kɔ‘m kɔ̧ koɓo-a kaɗi, n'aa beka si ɗoŋ ye kɔ̧ koɓo-a gee ɓɔna.

¹¹«Ɓɛɛ kɔ-mɛ, mɛ́ bíí, mɛ̀ gɔ́fí mɔ see-mɛ'ɛ ŋman, mɛ̀ dé ko nɛ tɛ-mɛ, gɔfi nɛ mɔ nɛ ŋgaya-a ɓɔn yí-wa.

¹²Kà wa ak mɛ‘e, gba ɛ̧ɛ̧ gɔfamɔ nɛ mɛ gɔfi’ɛ nɛ wen ge nde? Ɓɛɛ mɛ̀ kífí nú ha̧ wa'e nde, ‹Mɛ nɛ wen mi zia ŋma ɗaŋ nyɛrɛmɔ nɛ tɛ hɔ gba̧a̧, nɛ tɛ de ha̧ see o bíí mɛ ŋman; er'nɛ́ tɛ mɔk, ɛnɛ beka nɔ ŋgiɗi na, ɓɛɛ zugur'nɛ́ tɛ mbali ŋmaa. Zɔk, mɔ‘i a̧ de tɛnɛ‘i, GASA WAN Sɔ̧ tɔ̧ɔ̧ hegɔ.› »

¹³Nɛ mɔ'ɔ nɛ GASA WAN tɔ̧ɔ̧ ha̧‘m:

¹⁴«Mɛ́ bíí, mɛ̀ tɔ̧́ mɔ nɛ tɛ‘i ha̧ wa. Mɛ̀ tɔ̧́ ha̧ wa'e, nɛ mi GASA WAN a̧ tɔ̧ wen’ɛ: Gba-paa, gba-paa a̧ tɛ‘i, wi bɛŋa nú-a sa̧ pɛ́ɗɛ́ŋ-pɛ́ɗɛ́ŋ.

¹⁵Wi bɛŋa nú-a wen gbɛɛ bíí; wi sɔ̧ɔ̧ yi-a wen ha̧ a̧ mɛ tok hee pi̧i̧-kórò ga.

¹⁶Wi bɛŋa nu gba-paa'i kà bé dè ɓɛɛ ka'i dee nɛ tom; wi bɛŋa nú-a, wa sɔ̧ɔ̧ yi-a mbɛt mɛ e er wi-gbɛ-bíí.

¹⁷Mɛ́ bíí, mɛ̀ híɗí mɔ, wen gba-paa'i tɛ̀ɛ̀ zu dukbíí kɔ‘m, gu nɛ o be-wan Israɛl lɛŋ. Wa tɛ kum nɛ oi gun. Mɛ̀ mbɛ́r yí-ŋguɗi-mɛ!

¹⁸GASA WAN Sɔ̧ tɔ̧ɔ̧‘e: mɔ'ɔ nɛ ŋgamɔ a̧ kpaa wa; kà bó só nɛ o be-wan gasi zu nɔ'ɔ na, ɓɛɛ ŋma mɔ tɛ̀ɛ́ hɔ so zu wa nde?[18]

¹⁹Mɛ́ bíí, mɛ̀ tɔ̧́ mɔ nɛ tɛ hɔ ha̧ wa; ɓɛɛ mɛ̀ mbɛ́r er-mɛ. Gba-paa tɛ gɔm o bíí dali ɗoŋ ŋmaa war yiitoo kóó taar mbɛt.

²⁰Mi ee gba-paa nu tua ko o bíí kpɔk kpɔk mɛ pi̧ kíì tɛ wa, ha̧ wɔr mɛ dɔk mbɛt; mi sɔ̧ɔ̧ yi gba-paa'i ha̧ yi-a mɛ tok hee pi̧i̧-kórò ga, ɓɛɛ tom kɔ̧-a̧ nɛ kuma bíí.

²¹Mɛ, tɔ̧ɔ̧-nú gba-paa’ɛ, mɛ̀ pɔ́í mɔ si war wii-er, mɛ̀ pɔ́í mɔ si war gale mbɛt; mɛ̀ gɔ́m mɔ zik katɛ mɛ lɛŋ!

²²«Mi tɛ mbɛr er-am, ɓɛɛ nyimsea kɔ‘m tɛ tik zu wa. Mi GASA WAN tɔ̧ɔ̧ hegɔ.»

²³Ɓɛɛ GASA WAN tɔ̧ ha̧‘m woyo:

²⁴«Mɛ́ bíí, mɛ̀ pí̧ mbe war yiitoo kà bé dè, ɓɛɛ ká gba-paa ko wannu Babilɔŋ yaka nɛnɛ. O yuwar nɔ‘i yiitoo lɛŋ tɛ gbo nɛ tɛ kale kpɔk nù, ɓɛɛ mɛ̀ dé ŋma mɔɔ-usi-mɔ e sasa-war mɛ usi yuwar sitɛ o gasa ye nɔ‘i.

²⁵«Mɔɔ-usi-mɔ‘i tɛ usi war ha̧ gba-paa mɛ ba si Raba, ye ko o be Amɔŋ, in si ŋga ye Jerusalɛm, nu Juda mɛ.

²⁶Wannu Babilɔŋ yora ɓɔn sasa-war fara nɛ o yuwar gbaa sɛnɛ‘i mɛ pi̧ tani, ha̧ a̧ mɛ iŋ mgbák yuwar n'aa tɛ ba; a̧ ŋmasa góò, ɓɛɛ zɔk mɔ tɛ o géé-sɔ̧ kɔ̧-a̧, zɔk nɛ́ mɔ nɛ̀ see saɗi mbɛt.

²⁷Ɓɛɛ tani mɛ war wii er-a usa nɛ yuwar Jerusalɛm; ɓɛɛ a̧ tɔ̧: wa a̧ ɛk mɔɔ-gbin-mɔ zaŋ garo, wa a̧ gai mɔ biro, wa a̧ tik biro, wa a̧ kai mɔɔ-gbin-garo a nu garo, ɓɛɛ wa a̧ mbo kusa mɔ in za̧a̧ ŋgárá mbɛt.

²⁸Ɓɛɛ o bíí Jerusalɛm ee tani'i tɛ geemɔ, wen ŋma nɔɔ-tɔk a̧a̧ so mgbara wa. Zu mɔ‘i, wa tɛ kai o bíí Jerusalɛm yaknɛ nɛ bara-biro ha̧ tɛ-wa mɛ mbaŋ ɗoŋ yɔɔ-kaya kɔ-wa.

²⁹Mɛ nɛ wen mɔ‘i a̧ GASA WAN Sɔ̧ tɔ̧ nɛnɛ‘e nde: Dee ŋgazu k’ɛ́nɛ́ gboo zan; hegɔ‘i, ɛ́nɛ́ dee ha̧ o bíí mɛ zik tɛ sitɛ‘nɛ́ mɛ iŋ ndaa o ɗaŋ deemɔ k’ɛ́nɛ́ lɛŋ. Hegɔ, ɛ́nɛ́ dee ha̧ tɛ‘m mɛ mbaŋ ɗoŋ ɗaŋmɔ k’ɛ́nɛ́, ha̧‘m mɛ pi̧‘nɛ́ er o wisɛn k’ɛ́nɛ́.

³⁰«Ɓɛɛ kɔ-mɛ, be-wan Israɛl, mɛ yaa-wi-ɗaŋ'ɛ! Wi-ɗɔ-wi’ɛ! Nduti dee ɗaŋmɔ kɔ-mɛ nɛ bɔnɛ nɛ tɛ tik zu mɛ'ɛ!

³¹GASA WAN a̧ tɔ̧ wen’ɛ: Wa a̧ ba laasɔ̧i̧-wan zu mɛ yinɛ in mɛtɛwol mbɛt! Mɔ kpaia kaɗi! Mɔ nɛ duka so nɛ faɓa mɔ tɛ duk nɛ kpasa mɔ kinii, ɓɛɛ mɔ nɛ duka so nɛ kpasa mɔ tɛ kifi nɛ faɓa mɔ.

³²Mi tɛ ɗaŋ ye k’ɛ́nɛ́ lɔkɔti lɔkɔti, ɓɛɛ mɔ‘i beka de kinii na hɔ ŋgimbi nɛ wan n'am ee tom kita ye'i er-a'i tɛ hɔ sɛ.

³³«Ɓɛɛ kɔ-mɛ, mɛ́ bíí, mɛ̀ tɔ̧́ wen a zu o be Amɔŋ. Mɛ̀ wé ɗoŋ mɔ nɛ mi GASA WAN Sɔ̧ tɔ̧ zu wa, zu dara nɛ wa da̧ nɛ o be Israɛl. Mɛ̀ tɔ̧́ ha̧ wa'e: ‹Gba-paa nɛ‘i daka kɔ̧ koɓo-a'i duk mɛ gbɛ bíí! Wi bɛŋa nú-a tɔ̧ hɛ́ɗɛ́ŋ-hɛ́ɗɛ́ŋ mɛ gbɛ bíí, yi-a sa̧a̧ palala ɓɛɛ tok hee pi̧i̧-kórò ga.›

³⁴«Hɔɔ-zu nɛ hɔɔ ha̧ wa'i nɛ gee tum-mɔ; o mɔɔ-zap nɛ wa zɔk'i nɛ o zap ndela: gba-paa tɛ gɔn ger o ɗaŋwi nɔ‘i gbɛ a nu, ɓɛɛ nduti dee ɗaŋmɔ kɔ-wa nɛ bɔnɛ nɛ tɛ tik zu wa'i!

³⁵‹Mɛ̀ pí̧ gba-paa kɔ̧ koɓo-a, mi tɛ gɔn kita zu mɛ ɓɔn fara n'am dee mɛ sɛn tɛ nu nɛ‘i koo mɛ sɛnɛ.

³⁶Ŋga nyimsea kɔ‘m tɛ tik zu mɛ, wee ɗaŋsee kɔ‘m tɛ gbɔsi ba mɛ. Mi tɛ pi̧ mɛ er ŋga wi-ɗaŋ mɛ gbɛ mɛ yinɛ.

³⁷Wee tɛ bìì‘nɛ́ gbuɗuk, ɓɛɛ tɔk tɛ‘nɛ́ tɛ fok dam zaŋnu k’ɛ́nɛ́ lɛŋ; ŋma mɔɔ oi'nɛ́ nɛ tɛ duk bo na. Nɛ mi GASA WAN a̧ tɔ̧ hegɔ.› »