Read Northwest Gbaya EZEKIƐL 22 Bible Online

EZEKIƐL 22 - Northwest Gbaya bible

EZEKIƐL 22

¹Nɛ mɔ'ɔ nɛ GASA WAN tɔ̧ɔ̧ ha̧‘m:

²«Mɛ́ bíí, mɛ tɛ gɔn kita zu ye’ɛ nɛ duna nɛ gbɛɛ-zu’ɛ. Mɛ̀ mbáŋ tɛ-wa zu o gasa ndiŋmɔ nɛ wa dea.

³Mɛ tɔ̧ ha̧ wa'e nde, mɛ nɛ mi GASA WAN Sɔ̧ a̧ tɔ̧ wen’ɛ ha̧ wa. Hee mɛ kuma o bíí kɔ-mɛ nɛ dɔka-a, in mɛ ɗaŋa tɛ-mɛ tɛ mboo o géé-sɔ̧ mbɛt ga, sɔŋkur mɔ kɔ-mɛ a̧ tɛ‘i.

⁴Simbo a̧a̧ zu'nɛ́ wen tɔk-tɛ o bíí n’ɛnɛ gbɛa, ɓɛɛ ɛ́nɛ́ fɛ́ŋ tɛ‘nɛ́ tɛ o géé-sɔ̧ n’ɛnɛ kaia a ŋgɔn, hegɔ ŋgimbi k’ɛ́nɛ́ a̧ tɛ‘i; sɔŋkur ŋgimbi k’ɛ́nɛ́ hɛɗa zu be gete kaɗi. Mɛ nɛ zu o mɔɔ nɔ‘i n’ɛnɛ dea'i, a̧ dee ha̧‘m mɛ pi̧ búù zu'nɛ́ ti o tugun bíí in o bíí nɛ ya zik'nɛ́ mɛ zɛkɛɗi'nɛ́.

⁵O nu nɛ ya katɛ‘nɛ́'ɛ in o wan mɛ nyɛi̧a fara tɛ zɛkɛɗi'nɛ́, wen nin ye k’ɛ́nɛ́ faɓa tɛ deemɔ k’ɛ́nɛ́ nɛ nú-tum.

⁶«O be-wan Israɛl duk-tɛ nɛ ŋga tɛ-wi kum nɛ o bíí.

⁷Ɛnɛ fɛŋa o dáà in o naa k’ɛ́nɛ́ gu zu te, usi nɛ bɔnɛ ha̧ o gɔni-duk nɛ gbin pii zu'nɛ́, de nɛ ŋgamɔ in o ko-gera ká bá nɛ̀ o be-oi.

⁸Ɛ́nɛ́ tu̧ tɛ Tua kɔ‘m na, ɛ́nɛ́ kasi wese-ɔm-tɛ kɔ‘m na mbɛt.

⁹O ŋma bíí mgbara'nɛ́ e nɛ ɗɔra tɛ o ŋmaa gbɛ nɛ ŋmaa. O ŋma mgbara'nɛ́ nyɔŋ kɔ‘i nɛ o kam-ɗafi-sɔ̧ zu kaya mɛ, o ŋma de kɔ‘i nɛ o ndiŋmɔ.

¹⁰O ŋma ɔɔ in kóò ko dáà kɔ‘i, o ŋma bá nɛ́ okoo ɔ nɛnɛ ŋgimbi zɔka-zɛ kɔ-wa.

¹¹O ŋma ba kɔ-wa nɛ kóò ko ŋma-wa ɔ nɛnɛ, o ŋma fɛŋ nɛ zu ɔr nɛ o be for-wi ɔ nɛnɛ in wa, ɓɛɛ o ŋma baa kɔ‘i nɛ boko-nya-wi, dáà kpɔk a̧r nɛ naa, ɔ nɛnɛ.

¹²Ɛnɛ yee o bíí mɛ gbɛ o ŋma bíí wen kpaa mɔ, ɛnɛ kii mɛ kpa yi-mɔ zu nyamandoi n’ɛnɛ ha̧ ha̧ o bíí, ɛnɛ dee ŋgamɔ in o ŋma'nɛ kai nɛ mɔ kɔ-wa mbɛt. Ɓɛɛ war kɔ‘m, tɛ‘nɛ́ bìí ɗoŋ am. Mi GASA WAN Sɔ̧ tɔ̧ɔ̧ hegɔ.

¹³«Mi tɛ mbɛr er-am zu'nɛ́, zu zuzu in gbɛɛ-zu k’ɛ́nɛ́.

¹⁴Ɛnɛ tɛ nɔ ŋgiɗi mɛ yor ti'm ha̧ er'nɛ́ mɛ kasi mɔ nɔ sɛn wese n'am tɛ kur mɛ de ŋmaa in'nɛ̀ɛ́ nde? Kà mi GASA WAN tɔ̧ wen, ɓɛɛ mi dee mɔ-aa mbɛt.

¹⁵Mi tɛ pɛsi'nɛ́ dam mgbara o dukbíí in o tugun bíí, ɓɛɛ mi tɛ gɔn ndaa dee ndiŋmɔ k’ɛ́nɛ́.

¹⁶Mɛ fɛŋ nɛ tɛ-mɛ ti o ŋma tugun bíí, ɓɛɛ mɛ tɛ iŋ‘e mi nɛ GASA WAN.»

¹⁷Ɓɛɛ GASA WAN tɔ̧ ha̧‘m:

¹⁸«Mɛ́ bíí, o be nutua ko Israɛl duk yí‘m hee ɗɔr-boi ga. Wa duk hee ɗɔr bu-mbɔi, kóó tuŋgu in ndɛrɛ, kóó o ŋga boi nɛ‘i nɔ̧́í̧ tɛ wee-dɔra, ɓɛɛ ká ɗɔr-aa gboa’ɛ ga.

¹⁹Hegɔ kinii, mi GASA WAN tɔ̧ ha̧ wa'e nde, hee mɔ'ɔ nɛ wa kifa nɛ ndiŋ boi ga, mi tɛ mɔi̧ wa lɛŋ e tɛ kpɔk ye Jerusalɛm.

²⁰Hee mɔ'ɔ nɛ‘i mɔi̧ nɛ o bu-mbɔi, ndɛrɛ, tuŋgu in o ŋga boi a kɔ̧ lɔk, ɓɛɛ wi nɔi̧a yeli’ɛ ga, mɛ nɛ hegɔ a̧‘m tɛ mɔi̧ nɛ ɛnɛ tɛ ŋga nyimsea kɔ‘m, ɓɛɛ mi aa'nɛ kɔ̧ lɔk h’ɛ́nɛ́ mɛ yeli.

²¹Mi tɛ mɔi̧‘nɛ́, mi tɛ ufi wee nyimsea kɔ‘m a zu'nɛ́, ɓɛɛ ɛnɛ tɛ yeli mgbara o bíí Jerusalɛm.

²²Ɛnɛ tɛ yeli mgbara o bíí Jerusalɛm hee mɔ'ɔ nɛ boi yeli nɛnɛ kɔ̧ wee dɔra’ɛ ga, ɓɛɛ ɛnɛ tɛ iŋ‘e nde, mɛ nɛ mi GASA WAN a̧ gbaia nyimsea kɔ‘m a zu'nɛ́.»

²³Nɛ mɔ'ɔ nɛ GASA WAN tɔ̧ɔ̧ ha̧‘m woyo:

²⁴«Mɛ́ bíí, mɛ̀ tɔ̧́ ha̧ o be Israɛl‘e nde, nù kɔ-wa hɔɔ ŋmaa in ŋma nu nɛ kórò hɔ sɛnɛ na. Nù kɔ-wa tɛ ɗaŋ ɗɔɔ nyimsea kɔ‘m hee mɔ'ɔ nɛ nu mbaŋ nɛnɛ ŋgimbi kaara’ɛ ga.

²⁵O be-wan mgbara'nɛ́ ya hee o dila nɛ sati zu wɔr saɗi’ɛ ga. Wa kuma o bíí kai nɛ mbɔi in o demɔ kɔ-wa, ɓɛɛ wa de ha̧ o ko-gera mɛ dɔk mgbara wa mbɛt.

²⁶O wi-ɗafi-sɔ̧ kɔ-wa gbina heembea kɔ‘m, ɓɛɛ wa fɛŋ Tua kɔ‘m wen wa iŋ kɛ̧ɛ̧ mgbara sa̧a̧ fara in gee fara na; wa kasi wese-ɔm-tɛ kɔ‘m na mbɛt, ɓɛɛ nɛ mɔ‘i a̧ wa fɛŋa nɛ‘m sɛnɛ.

²⁷O gasawi kɔ-wa duka hee o gboo nɛ zin saɗi nɛ er ŋmaa ga, kum nɛ o bíí wen zu o demɔ kɔ-wa.

²⁸O wi-tɔ̧-wen oi nú sɔ̧ kɔ-wa kpe nɛ zu gbɛɛ-zu tɔ̧ nɛ gee tum-wen ɔr nɛ wa, tɔ̧ nɛnɛ‘e, ‹Mɔ nɛ GASA WAN Sɔ̧ tɔ̧a̧ nɛ mɔ'ɔ;› ɓɛɛ mɔ‘i hegɔ‘i, GASA WAN tɔ̧ kɔ‘i ŋma wen ha̧ wa na.

²⁹O bíí nu’ɛ de nɛ ŋgamɔ in o bíí tɛ kaia mɔ er o gɔni bíí nɛ ŋgai, nukuri nɛ o wisan in o wi-kɔsa, de nɛ ŋgamɔ in o gɔni-duk nɛ duk mgbara wa.

³⁰Ɓɛɛ nɛ mɔ'ɔ n'am pi̧i̧ yí‘m mgbara wa, gbakna mi kpaa bíí nɛ tɛ mbo ŋgárá mɛ yor ɗoŋ-aa sɛn ti'm mɛ am mɔ, wen ka'm tɛ̀ɛ́ ɗaŋ nu kɔ-wa wo, ɓɛɛ mi kpa wi-a na.

³¹Ɓɛɛ nɛ mɔ'ɔ n'am ɗaŋa wa yinɛ; mi kuma wa nɛ wee ŋga nyimsea kɔ‘m. Mi dee ha̧ ɗaŋ deemɔ kɔ-wa mɛ tik zu wa. Mi GASA WAN Sɔ̧ tɔ̧ɔ̧ hegɔ.»