Read Northwest Gbaya EZEKIƐL 23 Bible Online

EZEKIƐL 23 - Northwest Gbaya bible

EZEKIƐL 23

²«Mɛ́ bíí, mɛ zii: O ŋma okoo yaa so yiitoo; wa nɛ o gbo-ɗoŋ-ŋmaa.

³Nɛ mɔ'ɔ nɛ wa gasa de zɔŋa sɛn nu Egiptɛ, ɓɛɛ wa e ha̧ o wiwii mɛ vati ber-wa, de nɛ saa; ɓɛɛ nɛ́ ŋgimbi'i a̧ wa kifa nɛ o boko be-de-mɔ nɛ mbɔɗɔnu.

⁴Nin kaya-wi nɛ Ohola ɓɛɛ nin be-ɗoŋ nɛ Oholiba. Mi baa wa yiitoo lɛŋ ko nɛ bem, o be-wiwii in o be-okoo mbɛt. Ohola'i nɛ Samarii, ɓɛɛ Oholiba nɛ Jerusalɛm.

⁵Ɓɛɛ nɛ mɔ'ɔ nɛ Ohola duka ɓɔn er-am de nɛ dàlà nɛ mbɔɗɔnu, ɓɛɛ see-aa gɔn duk tɛ o dàlà kɔ̧-a̧ o be Asirii, nù mɛ katɛ a̧.

⁶Wa nɛ o yaa-pi̧ gba de dap laa, wen wa so nɛ o gasawi zu zika-nù in o be-wan; wa lɛŋ nɛ o gba de daŋa ŋgai-ɔr-zɔŋa, o ŋgai-daŋ-nyaŋa.

⁷Nɛ mɔ'ɔ n'aa ee see-aa tɛ sii ɗoŋ o gba de ŋgai Asirii, ɓɛɛ nɛ́ ŋgimbi n'aa ee nɛ see-aa tɛ wa'i, a̧ a̧ fɛŋa nɛ tɛ-a gasi nɛ o géé-sɔ̧ kɔ-wa.

⁸A̧ e yuwar dàlà n'aa ku̧u̧ so naŋ dea-a sɛn Egiptɛ mɛ‘i duk na, ŋgimbi nɛ wa duka so vati nɛ ber-aa ɔ nɛnɛ in a̧ nɛ zɔŋa mɛ‘i.

⁹Mɛ nɛ mɔ‘i ɓɛɛ sa'm e a̧ ha̧ o wiwii n'aa nɛ ɗoŋ wa, o be Asirii nɛ see-aa duk ɓɔn tɛ wa'i.

¹⁰Nɛ́ o wi nɔ‘i a̧ kpɔ̧i̧a̧ laa tɛ a̧ yinɛ, e a̧ nɛ sɔŋgɔɗɔ, ɓɛɛ wa kai o bem kɔ̧-a̧ a zu-a nɛ́ɛ̀ gɔm nɛ gba-paa a nu gbuɗuk. O okoo tɔ̧ɔ̧ nyɛrɛ mɔ‘i dam fara lɛŋ.

¹¹«Nya-a̧ Oholiba zɔka o mɔɔ nɔ‘i nɛ dea'i lɛŋ, ɓɛɛ mɔ kɔ̧-a̧ n'aa tɛ̀ɛ̀ dé tɛ̀ɛ̀ ɗaŋ gan ko dàà kɔ̧-a̧.

¹²See-aa gɔna duk tɛ o be-ŋgai Asirii, nù nɛ a̧a̧ katɛ a̧, o yaa-pi̧ gba de dap laa-wan, o gasawi zu nu, ká bá nɛ̀ o be-wan. Wa lɛŋ nɛ o gba de daŋa ŋgai-ɔr-zɔŋa, o ŋgai-daŋ-nyaŋa.

¹³Ɓɛɛ mi zɔka nɛ a̧ mbɛt yɔɔ war-tɛ-a, nɛ yuwar kɔ-wa in dàà kɔ̧-a̧ nyɛma ŋmaa.

¹⁴«Ɓɛɛ war ko wɔ-wiwii tɛ Oholiba gana kuti-a; ŋma wese a̧ zɔka o ŋma gi̧ɔ̧-bíí nɛ wa dee e zaŋ ŋgeŋ nɛ gbɛ̧-a̧, nɛ hɔɔ ŋmaa in o gasawi nu Babilɔŋ, nɛ gba de pɛsa kanda guntir, ká bá nɛ̀ de mɛtɛwol zu wa; sɔnti-wa duk tok nɛnɛ hee sɔnti o be-wan ga, ɓɛɛ saŋa-yi-wa duk hee saŋa-yí o be-ŋgai Babilɔŋ nɛ ya Kaldee mɛ ga.

¹⁵

¹⁶Baa yi-a n'aa baa e tɛ-wa hegɔ, ɓɛɛ ɗɛɗɛ-a ŋmaŋ duk tɛ wa, ɓɛɛ a̧ tom o betom sitɛ wa sɛn Babilɔŋ mɛ.

¹⁷Nɛ mɔ'ɔ nɛ o be-ŋgai Babilɔŋ nɔ‘i tɛ̀ɛ̀ ɔ́ in a̧, ɓɛɛ a̧ yɔ war-tɛ-a tɛ deemɔ‘i, ɓɛɛ wɔ-tɛ-wa busi tɛ a̧.

¹⁸Nɛɛ ɗoŋ o wiwii kɔ̧-a̧ yaka zale; mɔ‘i dee ha̧ dɔka bíí mɛ ɔ in a̧, ɓɛɛ mɔ‘i dea ha̧ wɔ-tɛ-a mɛ busi tɛ‘m, hee mɔ'ɔ nɛ dee so tɛ ŋgimbi ko dàà kɔ̧-a̧ ga.

¹⁹Ɓɛɛ nɛ mɔ'ɔ n'aa duka tɛ dee dàlà dam nu gan kuti-a, hee ŋgimbi n'aa duka so nɛ zɔŋa de nɛnɛ sɛn nu Egiptɛ mɛ‘i ga.

²⁰See-aa kura duk tɛ o wii-dàlà kɔ̧-a̧ nɛ̀ zim-tɛ-wa duk hee ko tuifuu, koo ko nyaŋa ga.

²¹«Kinii, mɛ́ sìí ɗoŋ tɛ dàlà nɛ mɛ duka so de tɛ ŋgimbi zɔŋa, ɓɛɛ ká mɛ e nɛ ber-mɛ ha̧ o be-ŋgai Egiptɛ vati nɛnɛ, nukuri nɛ kɔ-wa’ɛ ga.

²²Kinii, Oholiba, GASA WAN tɔ̧ wen ha̧ mɛ zu mɔ‘i'e nde: Mi tɛ de ha̧ see o dàlà kɔ-mɛ nɛ mɛ ee duk mɛ kur zu mɛ, wa tɛ kɛr mɛ dam fara lɛŋ.

²³Mi tɛ mɔi̧ o be Babilɔŋ in o be Kaldee, o bíí Pɛkod, Soa in Koa, ká bá nɛ̀ o be Asirii lɛŋ. Wa lɛŋ nɛ o gba de be ŋgaiwi, o wan, o gasawi duk zu nu, in o kuti-wi; o wi nɔ‘i lɛŋ nɛ o ŋgai-daŋ-nyaŋa.

²⁴Wa tɛ tik zu mɛ nɛ war ká̧-zan-mɛ́-ŋgɔn, wa tɛ kai gba duk wi-biro kɔ-wa in o keekee-nyaŋa tɛnɛ mɛ tɛ̀ɛ́ kɛr mɛ kpe e nu. Mi ee kita er wa, wa a̧ tɛ gɔn kita zu mɛ nyɛm nɛ ɗoŋ o heembea kɔ-wa.

²⁵See-am ɗaŋa zu mɛ; hegɔ mi tɛ de ha̧ wa mɛ de ŋmaa in mɛɛ tɛ ŋga nyimsea kɔ-wa; wa tɛ ɓir zɔ̧ɔ̧-mɛ gu nɛ o zer-mɛ mbɛt yinɛ, ɓɛɛ wa tɛ kum o bíí kɔ-mɛ lɛŋ. Wa tɛ kai o bem kɔ-mɛ dɔ nɛ zu kpasa.

²⁶Wa tɛ kpɔ̧i̧ o laa tɛ-mɛ, ɓɛɛ wa kaia o mbɔi tɛ-mɛ yaknɛ mbɛt.

²⁷Mi tɛ de ha̧ yuwar dàlà nɛ mɛ ku̧u̧ so naŋ dea-a nɛ Egiptɛ mɛ‘i, mɛ hɔ nduti, mɛ beka zɔk mɔ sitɛ o wi-de-dàlà nɔ‘i kɔ-mɛ‘i ɓɔna, tɛ-mɛ beka mbaŋ ɗoŋ Egiptɛ ɓɔna mbɛt.

²⁸«Nɛ mɔ‘i, ɓɛɛ sa GASA WAN tɔ̧‘e nde, mi tɛ e mɛ er o wi nɛ wɔ tɛ-wa busa tɛ-mɛ, nɛ mɛ ee duk.

²⁹Wa tɛ sɛn mɛ, ɓɛɛ wa tɛ kai o demɔ kɔ-mɛ lɛŋ yinɛ er mɛ, e mɛ nɛ sɔŋgɔɗɔ. Hegɔ, ndaa deemɔ nɛ mbɔɗɔnu kɔ-mɛ‘i tɛ gbo zan.

³⁰Mɔɔ nɔ‘i lɛŋ tɛ tik zu mɛ, wen zu dee dàlà kɔ-mɛ, fɛŋ nɛ tɛ-mɛ tɛ ɗafa o géé-sɔ̧ ko o tugun bíí.

³¹Mɛ baa nɛ kpɔk yuwar deemɔ ko dàà kɔ-mɛ; kpɔk ɗele n'aa nɔɔ so nyimsea kɔ̧ a̧‘i a̧‘m tɛ ha̧ nɛnɛ ha̧ mɛ mbɛt.

³²«Nɛ mɔ'ɔ nɛ GASA WAN tɔ̧a̧: ‹Mɛ tɛ nɔ mɔ kɔ̧ kpɔk pɛsa ɗuka ɗele ko dàà kɔ-mɛ‘i; o bíí tɛ zɛkɛɗi mɛ, mam nɛ mɛ yaknɛ, wen ɗele bɔnɛ kɔ-mɛ‘i duna hɔ nú-a zɛ́rɛ́rɛ́.

³³Mi tɛ pi̧ bɔnɛ zu mɛ ha̧ zu-mɛ zik; ɗele-nɔ-mɔ ko dàà kɔ-mɛ Samarii'i duna nɛ mɔɔ-kíì in bɔnɛ.

³⁴Mɛ tɛ nɔ mɔ‘i lɛŋ wɛlɛk, ɓɛɛ mɛ ɗoŋ, mɛ tɛ nyɔŋ ɗele'i gba a nu ɗɛsɛ-ɗɛsɛ, ɓɛɛ mɛ tɛ e da̧i̧ zu ber-mɛ nɛ o gbaa-ɗele'i. Mi, GASA WAN Sɔ̧ tɔ̧ɔ̧ hegɔ!

³⁵« ‹Mɛ nɛ wen mɔ‘i a̧ GASA WAN Sɔ̧ tɔ̧‘e nde: Hee mɔ'ɔ nɛ tɛ-mɛ bìí ɗoŋ-am, ɓɛɛ ká mɛ zik ɗoŋ e ha̧‘m ga, mɛ tɛ zɔk bɔnɛ deemɔ nɛ mbɔɗɔnu in mɔɔ-oi ndiŋmɔ kɔ-mɛ.› »

³⁶Nɛ mɔ'ɔ nɛ GASA WAN tɔ̧ɔ̧ ha̧‘m: «Mɛ́ bíí, mɛ tɛ gɔn kita zu Ohola in Oholiba. Mɛ̀ tɔ̧́ ŋga wen a zu wa zu ndiŋmɔ kɔ-wa.

³⁷Wa dee dàlà, tɔk a̧a̧ er-wa'i; ɓɛɛ nɛ mɔ'ɔ nɛ wa dee dàlà tɛ nɛa-a ɗoŋ o géé-sɔ̧, gbɛ nɛ o bem nɛ wa koa ha̧‘m, ɗafi nɛ o gee sɔ̧ kɔ-wa nɔ‘i.

³⁸Ɓaa mɔ nɛ wa dea, bo nɛ mɔ‘i ɓɛɛ na. Wa pi̧i̧ búù zu Tua kɔ‘m wese'i, fɛŋ nɛ wese-ɔm-tɛ n'am ha̧a̧ ha̧ wa mbɛt.

³⁹Ɗoŋ gbɛɛ o bem kɔ‘m ɗafi nɛ o géé-sɔ̧ kɔ-wa'i, wa nɛ̀ɛ́ ye Tua kɔ‘m nɛ oi simbo wese'i, yɔ nɛ war Tua kɔ‘m. Mɔ nɛ wa dee in Tua kɔ‘m a̧‘i.

⁴⁰«Sii ɗoŋ woyo, wa toma o betom nɛ́ɛ̀ sa o bíí mɛ nyɛi̧a fara mɛ tɛnɛ, ɓɛɛ o wi nɔ‘i hɔ; ɓɛɛ nɛ mɔ'ɔ nɛ mɛ zuia yi, pi̧ finaari yí-mɛ, ɓɛɛ ɗafi tɛ-mɛ nɛ de-a wen wa.

⁴¹Mɛ duka zu gba de kiti nɛ‘i ee fara-nyɔŋ-mɔ ti a̧, ɓɛɛ mɛ e fuu-nyama in nɔ̧́ kɔ‘m zu a̧.

⁴²Wi zia hiɗimɔ-nyɛŋɛ ko o giiwi nɛ wa saa tɛnɛ nɛ war ŋga-gbárà mɛ‘i, ɓɛɛ nɛ mɔ'ɔ nɛ o wi nɔ‘i aa kana yi er okoo, ɓɛɛ hɛr gba de kalaafi ko ko-wan zu wa.

⁴³Ɓɛɛ sa'm ak tɛ‘m'e, ‹o koo’ɛ nɛ ziɓa wen zu dee mɔ nɛ mbɔɗɔnu kɔ‘i’ɛ, nɛ mɔ'ɔ nɛ tɛɛ pi̧ tɛ-wi sɛnɛ woyo’ɛ nde?›

⁴⁴O bíí biti mɔi̧ sitɛ a̧ hee ŋma kó-de-mɔ nɛ mbɔɗɔnu ga; mɛ nɛ hegɔ a̧ wa mboɗi nɛnɛ ɗoŋ Ohola in Oholiba; o ko-ndɔ-ari nɔ'ɔ.

⁴⁵Zu-a'i, o wi-de-mɔ nɛ yuwar-a tɛ gɔn kita dàlà in gbɛɛ-zu zu wa, wen wa dee dàlà hɔ tɛ gbɛɛ-zu nɛ tɔk-aa a̧a̧ er wa!»

⁴⁶GASA WAN Sɔ̧ tɔ̧a̧: «Ɛ̀nɛ̀ mɔ́í̧ gba giiwi pii zu wa, wa a̧ tik wa, ɓɛɛ wa a̧ ɓar o mɔ kɔ-wa lɛŋ kai yaknɛ.

⁴⁷O giiwi a̧ yo wa nɛ ta, wa a̧ kum wa nɛ gba-paa a nu, wa a̧ gbɛ o bem kɔ-wa, ɓɛɛ wa a̧ a wee tɛ tua kɔ-wa ha̧ bíí wee yinɛ ɗiloŋ-ɗiloŋ.

⁴⁸Mi tɛ de ha̧ ndaa dee-mɔɔ-búù mɛ kaɗi zaŋnu’ɛ; mɔ nɛ hɔɔ zu'nɛ́ tɛ duk nɛ mɔɔ-usi-mɔ ha̧ o oi okoo, nɛ wa beka de kalemɔ n’ɛnɛ dea'i ɓɔna.

⁴⁹Wi tɛ de ha̧ ɗaŋmɔ k’ɛ́nɛ́ mɛ tik zu'nɛ́ woyo, ɓɛɛ nɛ́ ɛnɛ'ɛ tɛ tui ndiŋmɔ n’ɛnɛ dee so tɛ ɗafa o géé-sɔ̧; hegɔ ɛnɛ tɛ iŋ‘e, mi nɛ GASA WAN Sɔ̧.»