Read Northwest Gbaya EZEKIƐL 25 Bible Online

EZEKIƐL 25 - Northwest Gbaya bible

EZEKIƐL 25

¹Nɛ mɔ'ɔ nɛ GASA WAN tɔ̧ɔ̧ ha̧‘m:

²«Mɛ́ bíí, mɛ̀ zík tɛ-mɛ sitɛ o be Amɔŋ, ɓɛɛ mɛ̀ tɔ̧́ ŋga wen a zu wa.

³Mɛ̀ tɔ̧́ ha̧ wa'e: Ɛ̀nɛ̀ zíí mɔ nɛ GASA WAN tɔ̧ h’ɛ́nɛ́'ɛ. Hee mɔ'ɔ nɛ mɛ zɛkɛɗa Tua kɔ‘m nɛ o bíí fɛŋa kifi geemɔ, in nu Israɛl nɛ wa bia ɗaŋ o mɔ zaŋ-aa lɔkɔti-lɔkɔti, ká bá nɛ̀ o be nutua ko Juda nɛ wa kaia yaknɛ, mam nɛnɛ'ɛ ga,

⁴mi ee mɛ er o bíí mɛ si daŋa-wese; wa tɛ ba gbagari-biro, ɗafi nɛ fara-duk kɔ-wa sɛn nu kɔ-mɛ, ɓɛɛ wa tɛ nyɔŋ o waya-te k’ɛ́nɛ́, nɔ nɛ yibere k’ɛ́nɛ́ mbɛt.

⁵Mi tɛ de Raba nɛ fara dai o ŋgeloba, ɓɛɛ mi tɛ de o gasa ye ko be Amɔŋ nɛ ɓoramɔ ko o sami; hegɔ ɛnɛ tɛ iŋ‘e, mi nɛ GASA WAN.

⁶«Wen nɛ mi GASA WAN tɔ̧ nɛ mɔ'ɔ: Hee mɛ mbɛra er kpíɗí de nɛ nyɛŋɛ zu bɔnɛ ko o be Israɛl, fɛŋ nɛ nù kɔ-wa ga,

⁷mi tɛ ba zu'm duk nɛ mɛ. Mi tɛ de ha̧ o tugun bíí mɛ bi mɛ, mɛ kai o mɔ kɔ-mɛ yaknɛ; mi tɛ bi mɛ yinɛ mgbara o dukbíí nɛ‘i beka iŋ oi-mɛ ɓɔna, ɓɛɛ nù kɔ-mɛ tɛ kifi geemɔ. Hegɔ mɛ tɛ iŋ‘e nde, mi nɛ GASA WAN.»

⁸Nɛ mɔ'ɔ nɛ GASA WAN tɔ̧ɔ̧ ha̧ Mɔab: «Hee mɔ'ɔ nɛ o Mɔab in Sɛir tɔ̧a̧‘e,

⁹duka-a ko o be nutua ko Juda yak ŋmaa in duka-a ko o ŋma tugun bíí na ga, mi tɛ di̧ o ye zu kaya nu Mɔab lɛŋ yinɛ; mi tɛ ɗaŋ o gba de ye ko o bíí tɛ nu'i yinɛ: Bɛt-Yɛsimot, Bal-Mɛɔŋ gu nɛ Kiriataim mbɛt.

¹⁰Mi tɛ fo o be-nu mɛ daŋa-wese pi̧ zu wa mɛ kum wa yinɛ lɛŋ, hee mɔ'ɔ nɛ dee so in o be Amɔŋ ga, hegɔ wi beka iŋ oi gun wa mgbara o tugun bíí ɓɔna.

¹¹Nɛ hegɔ a̧‘m tɛ gusi nɛ Mɔab, ɓɛɛ wa tɛ iŋ‘e nde, mi nɛ GASA WAN.»

¹²Nɛ mɔ'ɔ nɛ GASA WAN tɔ̧a̧: «Hee mɔ'ɔ nɛ Edɔm kunda ari ha̧ o be Juda nɛ ɗaŋ-a, ɓɛɛ nɛ̀ wen-aa a̧a̧ zu wa ga, ŋgamɔ tɛ tik zu wa oi kifa-er'i,

¹³ɓɛɛ sa GASA WAN Sɔ̧ tɔ̧, mi tɛ ba zu'm duk nɛ Edɔm, ɓɛɛ mi tɛ kum o mɔ-dai gu nɛ kiitɛ wa mbɛt. Mi tɛ de ha̧ Edɔm mɛ kifi nɛ gee bɛɛ-oi puturu; mi tɛ kum o bíí nɛ̀ Teman mɛ hɔ nɛnɛ Dedaŋ nɛ̀ gba-paa.

¹⁴Mi tɛ de ha̧ dukbíí kɔ‘m o be Israɛl mɛ kifi er ari ha̧ Edɔm. Wa tɛ dikiɗi wa nyɛm nɛ ɗoŋ ŋga nyimsea kɔ‘m, ɓɛɛ wa tɛ zɔk mgbák kifa-er ari kɔ‘m. Mi GASA WAN Sɔ̧ tɔ̧ɔ̧ hegɔ.»

¹⁵GASA WAN tɔ̧a̧: «Hee mɔ'ɔ nɛ o be Filistii kifa er ari nɛ ɗaŋ-a fɛŋ nɛ o bíí kɔ‘m, de nɛ ŋgamɔ in wa mɛ kum wa a nu gbuɗuk tɛ ŋga sɛnmɔ ga,

¹⁶mi GASA WAN Sɔ̧ tɔ̧a̧: Mi tɛ ba zu'm duk nɛ o be Filistii; mi tɛ kum o be Kɛrɛt, ɓɛɛ mi tɛ ɗaŋ oi ndaa o bíí nɛ ya zik wa.

¹⁷Mi tɛ kundi ari ha̧ wa nɛ ɗaŋ-a, tɛ pi̧i̧ ŋga bɔnɛ zu wa, ɓɛɛ nɛ́ hi̧i̧ a̧ wa tɛ iŋ nɛnɛ‘e, mi nɛ GASA WAN.»