Read Northwest Gbaya EZEKIƐL 29 Bible Online

EZEKIƐL 29 - Northwest Gbaya bible

EZEKIƐL 29

¹Pɛ ɓu yaka ɗoŋ kaia o bíí yaknɛ nɛ bara-biro, tɛ ɔɔ-zɛ ɓu-zua-yiitoo, tɛ ɓu fio-zɛ, ɓɛɛ GASA WAN tɔ̧ ha̧‘m:

²«Mɛ́ bíí, mɛ̀ zík tɛ-mɛ sitɛ wannu Egiptɛ, ɓɛɛ mɛ̀ tɔ̧́ wen a zu a̧ in zu nu Egiptɛ lɛŋ.

³Mɛ̀ tɔ̧́ ha̧ a̧‘e nde, mɛ nɛ mi GASA WAN Sɔ̧ a̧ tɔ̧ wen’ɛ ha̧ a̧. Mi tɛ ba zu'm duk nɛ mɛ kinii, mɛ wannu Egiptɛ, mɛ zɔm ndiɓa ɗɔɔ Nil’ɛ. Mɛ tɔ̧a̧‘e, Nil nɛ yì kɔ‘i, nɛ wi a̧ dee a̧.[21]

⁴«Mi tɛ e o gake-boi kɔ̧ zaɗa-mɛ, mi tɛ sɔk o zoro ɗɔɔ Nil sɛn ɗɔɔ kɔk-saɗa-mɛ, ɓɛɛ mi tɛ dak mɛ pi̧ zan ɗɔɔ Nil kɔ-mɛ nɛ oi zoro tɛ-mɛ‘i.

⁵Mi tɛ pi̧ mɛ ŋga-gbárà mɛ nɛ oi o zoro ɗɔɔ Nil kɔ-mɛ. Mɛ tɛ tik nu fe zan, ŋma bíí mɛ ba mɛ, kà bó nɛ̀ guna mɛ mbɛt, bo na; wɔr-mɛ tɛ duk nɛ mɔɔ-nyɔŋ ko o nɔ̧́í̧ in o saɗi-zaŋbɛɛ,

⁶ha̧ o bíí Egiptɛ lɛŋ mɛ iŋ‘e, mi nɛ GASA WAN, wen mɛ yora ɗoŋ o be Israɛl, hee gee kan-toro ga.

⁷Kà wa ba mɛ, mɛ gbina ɓɔn kɔ̧ er-wa, ɓɛɛ mɛ yura ɓaa-wa sar. Kà wa ɛk tɛ nɛ mɛ, mɛ gbina, ɓɛɛ gɛ̧ɛ̧mɔ baa wa.

⁸Mɛ nɛ wen mɔ‘i sa GASA WAN tɔ̧‘e nde, wi tɛ tom o bíí mɛ nɛ̀ɛ́ kum'nɛ́ a nu nɛ gba-paa, gu nɛ o mɔ-dai k’ɛ́nɛ́ lɛŋ.

⁹Nú Egiptɛ tɛ kifi gee ŋga-gbárà puturu hee bɛɛ-oi ga nɛ̀ bíí beka duk sɛnɛ na, ɓɛɛ wa tɛ iŋ‘e, mi nɛ GASA WAN. «Wannu Egiptɛ tɔ̧ɔ̧ so'e, Nil nɛ mɔ kɔ‘i, nɛ wi'i dee a̧.

¹⁰Wen hegɔ, mi tɛ ba zu duk nɛ mɛ nɛ oi Nil kɔ-mɛ‘i mbɛt. Mi tɛ de ha̧ nú Egiptɛ mɛ kifi bɛɛ-oi, gee ŋga-gbárà nɛ bíí beka duk sɛnɛ na, nɛ̀ Migdɔl nɛ̀ war ká̧-zan-mɛ́-ŋgɔn hɔ Asuan, hɔ nɛnɛ mgbara nu Etiopii nɛ war ká̧-zan-mɛ́-ɗɔɔ.

¹¹Naŋ bíí kà bó nɛ̀ naŋ saɗi beka i̧si̧ nu Egiptɛ ɓɔna ndo-ndo-ndo. Bíí beka de ye tɛ nu'i na tɛ pɛ ɓu-naar.

¹²Mi tɛ ɗaŋ Egiptɛ lɔkɔti-lɔkɔti kifi nɛ gee ŋga-gbárà yaknɛ. Mi tɛ ɗaŋ o gasa ye in o geɗek ye mɛ nu kɔ̧-a̧, ɓɛɛ nu kɔ̧-a̧ tɛ duk nɛ bɛɛ-oi tɛ pɛ ɓu-naar. Mi tɛ pɛsi o be Egiptɛ dam mgbara o tugun bíí nɛnɛ, mi tɛ pɛsi wa dam fara lɛŋ.»

¹³Mɛ nɛ hegɔ ɓɛɛ sa GASA WAN tɔ̧‘e: «Tɛ pɛ ɓu-naar, mi tɛ mɔi̧ o be Egiptɛ nɛ pɛsa so dam mgbara o dukbíí pii ɗoŋ.

¹⁴Mi tɛ kai o be Egiptɛ nɛ wa kaia so nɛ bara-biro si ɗoŋ; mi tɛ de ha̧ wa mɛ pii ɗoŋ duk mgbák nu kɔ-wa woyo, nɛ war ká̧-zan-mɛ́-ɗɔɔ, ɓɛɛ wa tɛ de wan kɔ-wa sɛn hi̧i̧.

¹⁵Mɔ kpɔk, mɔɔ-wan ko Egiptɛ tɛ ziɓi mgbara o tugun bíí; a̧ beka ba zu nɛ ŋgɔn mɛ gan o tugun bíí ɓɔna. Mi tɛ ba ŋgai kɔ̧-a̧ yinɛ wen ká a̧ tɛɛ ɔ wan zu o tugun bíí.

¹⁶Ɓɛɛ o be Israɛl beka e ta nɛ mɔɔ-wan ko o be Egiptɛ, de nɛ ɗaŋmɔ nɔ nɛ tɔk in wa ɓɔna. Hegɔ‘i, wa tɛ iŋ‘e mi nɛ GASA WAN.»

¹⁷Kuti wese, tɛ kuti zɛ, tɛ ɓu-yiitoo-zua-mɔɔrɔ-ɗoŋ-yiitoo pɛ, ɗoŋ kaia bíí yaknɛ nɛ bara-biro, GASA WAN tɔ̧ɔ̧ ha̧‘m:

¹⁸«Mɛ́ bíí, Nabukɔdɔnɔsɔr wannu Babilɔŋ pi̧i̧ ŋga tom ɗafa mɔɔ-biro zu o wi-biro kɔ‘i mɛ nɛ̀ɛ́ bi Tir. Zu o wi-biro kɔ̧-a̧ zuɗi kotoro, zu kóŋgó-ɓaa nika tɛ ŋga tom sɔɔ gee, wa kpa ŋma mɔ oi-aa na, bo nɛ wannu nɛ tɛ-wi na, bo nɛ o wi-biro kɔ̧-a̧ na mbɛt.

¹⁹Mɛ nɛ wen mɔ‘i a̧ GASA WAN tɔ̧a̧‘e nde, mi tɛ de ha̧ nu Egiptɛ mɛ tik er Nabukɔdɔnɔsɔr wannu Babilɔŋ. A̧ tɛ kai o mbɔi tɛ nu'i gu nɛ o mɔ lɛŋ yaknɛ si nu kɔ̧-a̧ mɛ nɛ mɔɔ-oi-biro, ɓɛɛ o mɔɔ nɔ‘i tɛ duk nɛ mɔɔ-oi-tom ko o wi-biro.

²⁰Mi ha̧a̧ Egiptɛ ha̧ a̧ nɛ mɔɔ-oi-tom n'aa dee ha̧‘m tɛ ɗafa mɔ n'aa ɗafa mɛ bi nɛ Tir; nɛ tom kɔ‘m a̧ a̧ dea. GASA WAN Sɔ̧ tɔ̧ɔ̧ hegɔ.

²¹«Wese'i, mi tɛ ha̧ ŋgai ha̧ o be Israɛl, ɓɛɛ mi tɛ ha̧ yuwar ha̧ mɛ mɛ tɔ̧ wen ha̧ wa; ɓɛɛ wa tɛ iŋ‘e, mi nɛ GASA WAN.»