Read Northwest Gbaya EZEKIƐL 30 Bible Online

EZEKIƐL 30 - Northwest Gbaya bible

EZEKIƐL 30

¹Nɛ mɔ'ɔ nɛ GASA WAN tɔ̧ɔ̧ ha̧‘m:

²«Mɛ́ bíí, mɛ tɔ̧ wen ha̧ o bíí‘e, nɛ mi GASA WAN a̧ tɔ̧ wen’ɛ nde: Ɛ̀nɛ̀ hí̧í̧ tɛ‘nɛ́ wen wese bɔnɛ nɛ tɛ‘i!

³Wese ko GASA WAN hɛɗa kaɗi, wese ko GASA WAN hɔɔ zu be gete kaɗi. Wese'i, tu̧-zan tɛ kpe yiwese; nɛ ŋgimbi nɛ o tugun bíí tɛ tik zu ŋmaa.

⁴Gba-paa tɛ kum o be Egiptɛ, ɓɛɛ bele tɛ zar o bíí Etiopii a nu. Ŋgimbi nɛ wɔr bíí be tɛ̀ɛ́ a nu nú Egiptɛ mɛ‘i, nɛ̀ wa be tɛ̀ɛ́ kai o mbɔi kɔ-wa yaknɛ, nɛ́ wese'i a̧ ŋgai kɔ-wa tɛ tik nu.

⁵Etiopii, o bíí Put, Lud in o wan mɛ nu Arabii lɛŋ, bíí in o nu nɛ nɔɔ tɔk in Egiptɛ tɛ kum nu gba-paa.»

⁶Ɓɛɛ GASA WAN tɔ̧: «Gbakamɔ-biro ko o ŋma bíí ha̧ Egiptɛ tɛ tik nu mbulɛɛ gu nɛ ŋgayamɔ kɔ̧-a̧ n'aa gasi zu sɛnɛ‘i mbɛt. O bíí Migdɔl tɛ kum nu gba-paa hɔ Asuan nɛ war ká̧-zan-mɛ́-ɗɔɔ. GASA WAN tɔ̧ɔ̧ hegɔ.

⁷Egiptɛ tɛ duk nɛ ŋga-gbárà kotoro, o ye mɛ nu kɔ̧-a̧ tɛ ya nɛ o gee bɛɛ-oi.

⁸Ŋgimbi n'am be tɛ̀ɛ́ dɔ Egiptɛ nɛ wee, ɗaŋ nɛ o wi-yor-ɗoŋ-aa mbɛt, wa tɛ iŋ‘e, mi nɛ GASA WAN.

⁹«Wese'i, mi tɛ tom o betom kɔ‘m nɛ kombon mɛ nɛ̀ɛ́ sakali Etiopii mɛ pi̧ bele tɛ-wa nɛ oi ee-ta kɔ-wa nɛ tɛ-wa'e ŋma mɔɔ-de-wi bo na wo'i. Kíì tɛ ba o bíí nɛ ŋgaya-a, wese ɗaŋa-a ko Egiptɛ; wese'i hɛɗa dɔ̧ɔ̧ kaɗi!»

¹⁰Ɓɛɛ GASA WAN Sɔ̧ tɔ̧‘e: «Mi tɛ tom Nabukɔdɔnɔsɔr wannu Babilɔŋ mɛ nɛ̀ɛ́ kum gba dukbíí Egiptɛ gbuɗuk a nu.

¹¹A̧ tɛ kur in o bíí kɔ̧-a̧, o gba ŋga ɗaŋ wi-de-saka-yí mgbara o tugun bíí, mɛ́ nɛ̀ɛ́ ɗaŋ nu Egiptɛ lɔkɔti-lɔkɔti yinɛ. Wa tɛ nɛ̀ɛ́ kum o bíí Egiptɛ nɛ gba-paa a nu, ɓɛɛ wɔr o bíí tɛ dam fara lɛŋ zaŋnu'i.

¹²Mi tɛ de ha̧ Nil mɛ ɔ̧sa̧ kor kútú-kútú, ɓɛɛ mi tɛ e nu'i er o wi-ɗaŋ; mi tɛ de ha̧ o gɔni bíí mɛ ɗaŋ nu'i nɛ oi o mɔ mɛ zaŋ-aa lɛŋ. Mi GASA WAN tɔ̧ɔ̧ hegɔ.»

¹³GASA WAN tɔ̧a̧: «Mi tɛ ɗaŋ o géé-sɔ̧ kɔ-wa, ɓɛɛ mi tɛ gbin o géé-sɔ̧ Mɛmfis yinɛ. Be-wan beka bó nú Egiptɛ ɓɔna. Mi tɛ pi̧ bele zaŋ o bíí nu Egiptɛ.

¹⁴Mi tɛ ɗaŋ Patros yinɛ, mi tɛ pi̧ wee zu Sɔaŋ, mi tɛ usi bɔnɛ ha̧ Tɛb.

¹⁵Nyimsea kɔ‘m tɛ kur zu Sin ŋga fara-pɛm-mɔ ko o bíí Egiptɛ. Mi tɛ kum gba dukbíí Tɛb lɛŋ.

¹⁶Mi tɛ pi̧ wee zu Egiptɛ bíí a nu gbuɗuk; dita-see tɛ tik zu Sin nɛ ɗaŋ-a, o bíí tɛ gbin garo Tɛb a nu, ɓɛɛ o wisɛn ko Mɛmfis tɛ kpe a̧ e nu.

¹⁷Gba-paa tɛ tir o be-ŋgai Ɔn in Pi-Bɛsɛt a nu, ɓɛɛ wa tɛ kai o okoo yaknɛ nɛ bara-biro.

¹⁸Ɓɛɛ nɛ war ko Dafne, wese tɛ daŋ hɔ̧ɔ̧ na, ɓɛɛ ká‘m gbina so ŋgai ko Egiptɛ yinɛ kaɗi; mi tɛ de ha̧ ŋgai ko Dafne n'aa duk nɛ tɛ-a'i mɛ kaɗi; tum tu̧-zan tɛ kpe zu a̧ wese'i, ɓɛɛ wa tɛ kai o boko-bem kɔ̧-a̧ nɛ bara-biro yaknɛ si ŋma nu.

¹⁹Nɛ hegɔ a̧‘m tɛ usi nɛ bɔnɛ ha̧ Egiptɛ ha̧ o bíí mɛ iŋ‘e mi nɛ GASA WAN.»

²⁰Tɛ ɔɔ-zɛ mɔɔrɔ-ɗoŋ-yiitoo tɛ kuti zɛ tɛ pɛ ɓu-zua-kpɔk ɗoŋ kaia o bíí yaknɛ nɛ bara-biro, GASA WAN tɔ̧ɔ̧ ha̧‘m:

²¹«Mɛ́ bíí, mi gbina ɓaa wannu Egiptɛ, ɓɛɛ ŋma bíí mɛ hɛr ɓaa-a'i, kà bó nɛ̀ aa nyina yi da̧i̧ ɓaa-a'i wen ha̧ a̧ mɛ kpa ŋgai mɛ ba gba-paa bo na.

²²Mɛ nɛ sɛn zu mɔ‘i a̧ GASA WAN Sɔ̧ tɔ̧a̧‘e, mi baa zu duk nɛ wannu Egiptɛ, mi tɛ gbin o gba̧a̧ ɓaa-a yiitoo lɛŋ, wan mɛ de-a in wan nɛ gbina'i mbɛt; ɓɛɛ mi tɛ de ha̧ gba-paa mɛ tik nù kɔ̧ er-a.

²³Mi tɛ pɛsi o be Egiptɛ dam mgbara o tugun bíí, mi tɛ pɛsi wa dam zaŋnu,

²⁴mi tɛ de ha̧ ɓaa wannu Babilɔŋ mɛ ŋgai, ɓɛɛ mi tɛ ba gba-paa kɔ‘m e kɔ̧ er-a. Mi tɛ gbin o ɓaa wannu Egiptɛ, ɓɛɛ a̧ tɛ gɔfi mɔ-fio ti o wisɛn kɔ̧-a̧.

²⁵Mi tɛ de ha̧ ɓaa wannu Babilɔŋ mɛ ŋgai, ɓɛɛ ha̧ war ko wannu Egiptɛ mɛ mɔk. Ŋgimbi n'am be tɛ̀ɛ́ e gba-paa kɔ‘m er wannu Babilɔŋ, ɓɛɛ ká a̧ be tɛ̀ɛ́ ba gba-paa'i nɛ ŋgɔn mɛ nak bɛl-bɛl si nu Egiptɛ mɛ, wa tɛ iŋ‘e, mi nɛ GASA WAN.

²⁶Mi tɛ pɛsi o be Egiptɛ dam mgbara o tugun bíí, mi tɛ pɛsi wa dam zaŋnu, ɓɛɛ wa tɛ iŋ‘e, mi nɛ GASA WAN.»