Read Northwest Gbaya EZEKIƐL 33 Bible Online

EZEKIƐL 33 - Northwest Gbaya bible

EZEKIƐL 33

¹Nɛ mɔ'ɔ nɛ GASA WAN tɔ̧ɔ̧ ha̧‘m:

²«Mɛ́ bíí, mɛ̀ tɔ̧́ wen’ɛ ha̧ o be Israɛl: Ŋgimbi n'am be tɛ̀ɛ́ tom gba-paa kɔ‘m mɛ bi ŋma nu, o bíí nu'i tɛ hok ŋma bíí mɛ duk wi-pɛm-mɔ.

³Kà wi-pɛm-mɔ nɛ zɔka'e, biro a̧ tɛ mɛ bi nu kɔ-wa'i, ɓɛɛ a̧ tɛ dɔm zak mɛ mbaŋ tɛ o bíí.

⁴Ŋma bíí nɛ́ zia dɔma zak'i nɛ ɗoŋ zer, ɓɛɛ kà a̧ ta mɔ zu-a na, nɛ mɔ'ɔ nɛ biro tɛ̀ɛ́ ba a̧ gbɛ, tɔk tɛ wi’ɛi tɛ si ɗoŋ zu a̧ nɛ tɛ-a.

⁵A̧ zia dɔma zak, ɓɛɛ a̧ yu mɔ yak mɛ kpasi na; tɔk tɛ-a tɛ si ɗoŋ zu a̧ nɛ tɛ-a. Ɓɛɛ wi nɛ zia dɔma mɔ, nɛ mɔ'ɔ n'aa yuu mɔ yak tɛ kpasi kɔ‘i.

⁶Ɓɛɛ kà bó nɛ́ wi-pɛm-mɔ a̧ zɔka biro fara tɛa-a, ɓɛɛ nɛ mɔ'ɔ n'aa mbaŋ tɛ o bíí na, kà biro'i ba ŋma bíí gbɛ, wi’ɛi tɛ fe wen nɛ wi-pɛm-mɔ mbaŋ tɛ-a na, ɓɛɛ wen fio ko wi’ɛi tɛ tik zu wi-pɛm-mɔ.

⁷«Hegɔ, mɛ mbɛt, mɛ́ bíí, mi ee mɛ nɛ̀ wi-pɛm o be Israɛl. Ŋgimbi nɛ mɛ zii wen nú‘m, ɓɛɛ mɛ̀ tɔ̧́ mbɔrɔ ha̧ wa.

⁸Kà‘m nɛ tɔ̧ɔ̧ ha̧ wi-ɗaŋ‘e: ‹Wi-ɗaŋ, mɛ tɛ fe,› ɓɛɛ kà mɛ tɔ̧ wen'i ha̧ wi-ɗaŋ‘i mɛ kpai er deemɔ kɔ‘i na, a̧ tɛ fe wen ɗaŋmɔ kɔ̧-a̧, ɓɛɛ tɔk tɛ-a tɛ tik zu mɛ.

⁹Ɓɛɛ kà mɛ nɛ tɔ̧ɔ̧ mbɔrɔ ha̧ wi-ɗaŋ wen ha̧ a̧ mɛ e ɗaŋ yuwar deemɔ duk, ɓɛɛ ka a̧ kɔ̧ mɛ kpai duka-a kɔ̧-a̧ na, a̧ tɛ fe wen ɗaŋmɔ kɔ̧-a̧, ɓɛɛ kɔ-mɛ, mɛ tɛ kpasi zu-mɛ.»

¹⁰«Mɛ́ bíí, mɛ zii; mɛ̀ tɔ̧́ ha̧ o be Israɛl, ɛ́nɛ́ duk tɛ tɔ̧a̧-a̧‘e: ‹O ɗaŋmɔ in o yɔɔ-kaya k’ɛɛ dita zu yɛ. Mɛ nɛ wen zu o mɔɔ nɔ‘i nɛ mɔ'ɔ n’ɛɛ ya kum nɛnɛ'ɛ; ɛ́ɛ́ tɛ̀ɛ́ kpasi so ɓɔ?›

¹¹Mɛ tɔ̧ ha̧ wa'e, mi kana mɔ nɛ tɛ‘m, hee mɔ'ɔ nɛ mi GASA WAN Sɔ̧ duk kpasa ga; fio ko wi-ɗaŋ de tɛ‘m na. Mɔ n'am kɔ̧a̧ mɛ nɛ wen ha̧ wi-ɗaŋ mɛ kpai yuwar duka-a kɔ‘i, ɓɛɛ a̧ a̧ kpasi. Ɛ̀nɛ̀ píí ɗoŋ tɛ‘m, ɛ̀nɛ̀ é o ɗaŋ yuwar deemɔ k’ɛ́nɛ́ duk. Ɛ́nɛ́ kíí mɛ kum wen ge nde, o be Israɛl?

¹²«Mɛ́ bíí, mɛ̀ tɔ̧́ ha̧ o be Israɛl dukbíí kɔ‘m'e nde, kà ŋma wi-de-mɔ nɛ yuwar-a de mɔ nɛ ɗaŋ-a, deemɔ n'aa duka so mɛ de nɛ yuwar-a'i beka kpas'a na; kà wi-ɗaŋ e yuwar deemɔ kɔ‘i nɛ ɗaŋ-a duk, ɓɛɛ ɗaŋ deemɔ n'aa duka so de'i beka de ha̧ a̧ mɛ yɔ na mbɛt. Á̧ kà wi-de-mɔ nɛ yuwar e deemɔ nɛ yuwar-a duk mɛ de mɔ nɛ ɗaŋ-a, ɓɛɛ ká à̧ ta'e wen tɛ nyaŋ zu a̧ wen demɔ n'aa duka so mɛ de'i na.

¹³Ɓɛɛ kà‘m nɛ tɔ̧ɔ̧ ha̧ wi-de-mɔ nɛ yuwar-a'e: ‹Mɛ tɛ kpasi,› ɓɛɛ nɛ mɔ'ɔ nɛ wi-de-mɔ nɛ yuwar-a'i tika tɛ dee ɗaŋmɔ, wi beka iŋ oi deemɔ n'aa duka so de nɛ yuwar-a'i ɓɔna, ɓɛɛ wi’ɛi tɛ fe wen ɗaŋmɔ n'aa dea'i.

¹⁴Ɓɛɛ kà‘m nɛ tɔ̧ɔ̧ ha̧ wi-ɗaŋ‘e: ‹Mɛ tɛ fe,› ɓɛɛ kà wi-ɗaŋ‘i kpai er deemɔ kɔ‘i mɛ e yuwar deemɔ nɛ ɗaŋ-a duk, de nɛ mɔ nɛ yuwar-a nɛ de-a,

¹⁵kà a̧ nɛ ha̧a̧ ziŋina siɗoŋ ha̧ wi-ea-a, in kà a̧ nɛ baa mɔ n'aa zu̧u̧ so siɗoŋ ha̧ o wan-aa, kà a̧ nɛ nɛ̀ɛ́ ɗoŋ o heembea nɛ kpasi bíí, e nɛ yuwar ɗaŋmɔ duk, ɓɛɛ wi’ɛi tɛ kpasi, a̧ beka fe na.

¹⁶Tɛ-wi tɛ bi ɗoŋ ɗaŋmɔ lɛŋ n'aa dee so; hee mɔ'ɔ n'aa duk tɛ kpasa yuwar deemɔ nɛ de-a, de nɛ mɔ nɛ yuwar-a ga, a̧ tɛ kpasi.

¹⁷«O be-nu ko dukbíí kɔ-mɛ tɔ̧‘e: ‹Yuwar mɔ nɛ GASA WAN de in yɛɛ'ɛ nyɛm yi-mɔ na,› ɓɛɛ nɛ́ yuwar deemɔ k’ɛ́nɛ́ a̧ nyɛm yi-mɔ na ɛ̧.

¹⁸Kà wi-de-mɔ nɛ yuwar-a a̧ ee deemɔ kɔ‘i nɛ yuwar-a duk mɛ de nɛ ɗaŋmɔ, a̧ tɛ fe wen ɗaŋmɔ‘i.

¹⁹Ɓɛɛ kà wi-ɗaŋ e dee ɗaŋmɔ duk mɛ de mɔ nɛ yuwar-a, a̧ tɛ kpasi wen mɔ‘i.

²⁰Ɓɛɛ ɛ́nɛ́ tɔ̧́‘e, ‹Mɔ nɛ GASA WAN de’ɛ nyɛm yi-mɔ na.› Mi tɛ gɔn kita zu'nɛ́, nyɛm nɛ ɗoŋ deemɔ k’ɛ́nɛ́, o be nutua ko Israɛl lɛŋ!»

²¹Pɛ n’ɛɛ duka nɛ bara-biro sɛn nu Babilɔŋ dee ɓu-zua-yiitoo, ɓɛɛ tɛ ɔɔ-zɛ ɓu-zua-mɔɔrɔ ko sɔŋkur zɛ tɛ pɛ‘i, a̧ bíí kpɔk mgbara o wi nɛ mɔ hɔɔ yɔɔ zu wa maa nɛ yi hɔ tɛ‘m, ba nɛ nyɛrɛ tika-a ko Jerusalɛm tɛnɛ ha̧‘m.

²²Ŋgai ko GASA WAN yee tɛ‘m nɛ ga̧a̧mɔ nɛti hɔa-a ko wi-ba-nyɛrɛmɔ tɛnɛ. GASA WAN hu̧i̧a̧ nú‘m nɛ kpee so'i, ɓɛɛ mi ku̧ naŋ tɔ̧ɔ̧ wen nɛti kaɗi sɛka wi-ba-nyɛrɛmɔ tɛnɛ‘i biti hɔ tɛ‘m.

²³GASA WAN tɔ̧ɔ̧ ha̧‘m:

²⁴«Mɛ́ bíí, o bíí nɛ ɔ bɛɛ-oi nu Israɛl mɛ‘i tɔ̧a̧‘e: ‹Abraham duka so ɛ̀nɛ̀-wí kpɔk ɓɛ̀ɛ̀ zu nu’ɛ, kà bó nɛ̀ gba dɔka ɛɛ'ɛ a̧ beka nyɛm nu'i na?›

²⁵«Mɛ̀ tɔ̧́ ha̧ wa'e nde, mɛ nɛ mi GASA WAN Sɔ̧ a̧ tɔ̧ wen’ɛ. Ɛ́nɛ́ nyɔ́ŋ kpoo nɛ̀ oi tɔk, ɓɛɛ ɛ́nɛ́ baa yí‘nɛ́ sitɛ o gee sɔ̧, gbɛ nɛ o bíí. Mɛ nɛ zu mɔ‘i ɛ̀nɛ̀ ya tɔ̧ nɛnɛ‘e, wi baa nu?

²⁶K’ɛ́nɛ́, ɛ́nɛ́ duk tɛ‘nɛ́ nɛ gba-paa; o okoo, k’ɛ́nɛ́ nɛ dee ndiŋmɔ, o wiwii, k’ɛ́nɛ́ nɛ baa kóò ko ŋma'nɛ ɔ nɛnɛ: Nɛ́ mɔ‘i ɛ́nɛ́ baa nù wen-aa?

²⁷«Mɛ tɔ̧ wen’ɛ ha̧ wa: Mɛ nɛ mi GASA WAN Sɔ̧ a̧ tɔ̧ wen’ɛ. Mi kan mɔ nɛ tɛ‘m, hee mɔ'ɔ n'am duk kpasa ga, gba-paa tɛ kum o bíí nɛ ɓɔna bɛɛ-oi'i. Mi tɛ pi̧ o bíí tɛ o geɗek ye ha̧ o boko-nam mɛ nyɔŋ wa, ɓɛɛ mi tɛ kum o bíí kɔ̧ ta in kɔ̧ di̧i̧ nɛ ŋga zɛɛ-geŋa.

²⁸Mi tɛ de ha̧ ye'i mɛ kifi gee ŋga-gbárà nɛ bíí beka duk sɛnɛ na, ɓɛɛ ŋmaŋa-tɛ zu ŋgai kɔ̧-a̧‘i tɛ hɔ nduti. O kaya nu Israɛl tɛ ya wékéké, naŋ bíí beka ɓir fara'i ɓɔna.

²⁹Ŋgimbi n'am be tɛ̀ɛ́ de ha̧ nu'i mɛ kifi nɛ gee ŋga-gbárà wen zu ɗaŋmɔ nɛ wa dea'i, ɓɛɛ o bíí tɛ iŋ‘e, mi nɛ GASA WAN.

³⁰«Ɓɛɛ kɔ-mɛ, mɛ́ bíí, o bezaŋ dukbíí kɔ-mɛ nɛ mɔ'ɔ nɛ ya nɛ ɗɔɔ wɛɛ-tua in nɛ ká̧ nu tua ba nɛ nin-mɛ nɛnɛ, tɔ̧ nɛ wen ha̧ o ŋmaa'e: ‹Ɛ̀nɛ̀ mɔ́í̧ tɛnɛ ɛ̀ɛ̀ zíí mbe mɔ nɛ GASA WAN tɔ̧ɔ̧ ha̧ a̧ mɛ tɔ̧ h’ɛ́ɛ́'ɛ.›

³¹Ɓɛɛ o wi nɔ‘i tɛ mɔi̧ pii tɛ-mɛ nɛ dɔka-a, ɓɛɛ wa tɛ ya nu ti mɛ zíí nɛ̀ wen nú-mɛ́; wa nɛ dukbíí kɔ‘m, ɓɛɛ wa beka de mɔ nɛ wa zii nú-mɛ́ na. Wa de nɛ mɔ nɛ see-wa kɔ̧a̧, kíí nɛ yi-mɔ kɔ-wa mɛ tɛ-wa.

³²Wa zɔk mɛ hee wi-bii gba de gima in wi-mbɛr de mɔɔ-mbɛr ha̧ wa ga. Wa zii mɔ nɛ mɛ tɔ̧ ha̧ wa zii, ɓɛɛ wa de mɔ nɛ mɛ tɔ̧ ha̧ wa na.

³³Ɓɛɛ ŋgimbi nɛ̀ ŋgamɔ nɛ̀ mɛ tɔ̧ɔ̧ wen-aa be tɛ̀ɛ́ hɔ kaɗi, mɔ‘i nɛ mɔ nɛ tɛ tɛnɛ‘i; ɓɛɛ wa tɛ iŋ‘e nde, wi-tɔ̧-wen oi nú Sɔ̧ duka so mgbara wi.»