Read Northwest Gbaya EZEKIƐL 34 Bible Online

EZEKIƐL 34 - Northwest Gbaya bible

EZEKIƐL 34

¹GASA WAN tɔ̧ɔ̧ ha̧‘m:

²«Mɛ́ bíí, mɛ̀ tɔ̧́ ŋga wen zu o wi-dai Israɛl. Mɛ̀ tɔ̧́ ha̧ wa'e nde, ɛ́nɛ́ o wi-dai-sami, mɔ nɛ GASA WAN tɔ̧ɔ̧ ha̧‘m mɛ tɔ̧ h’ɛ́nɛ́ nɛ mɔ'ɔ: Ɛ́nɛ́ tɛ zɔk bɔnɛ, ɛ́nɛ́ o wi-dai Israɛl nɛ dai nɛ tɛ‘nɛ́. Bó nɛ́ tom ko wi-dai-mɔ nɛ́ daia o mɔ-dai na nde?

³Ɓɛɛ k’ɛ́nɛ́, ɛ́nɛ́ iŋa nɛ nyɔŋa nɔ-kpoo o sami, pi̧ nɛ o laa-buma-a tɛ‘nɛ́, gbɛ nɛ ŋmaŋa be-a, ɗafi nɛ sɔ̧ mbɛt, ɓɛɛ ɛnɛ dai wa de na.

⁴Ɛnɛ bɛ̧ɛ̧ gbaka o sami wan nɛ ziɓa, ɛnɛ de nyina ha̧ o wan nɛ ɔ zɛɛ na, kà bó nɛ̀ ɓara nyina a yi da̧i̧ ko o wan nɛ baa da̧i̧ na mbɛt. Ɛnɛ nɛ ɗoŋ o wan nɛ yɔɔ ɓɔŋ zaŋbɛɛ wen mgbɔɔ wa pii ɗoŋ saaye na, ɓɛɛ ɛnɛ usi nɛ bɔnɛ ha̧ wa nɛ saka-yí de nɛ ŋgamɔ in wa.

⁵Dee ŋgamɔ k’ɛ́nɛ́ in wa dee ha̧ wa mɛ gba pɛsi a zaŋbɛɛ sót-sót, ɓɛɛ nɛ mɔ'ɔ nɛ o saɗi-zaŋbɛɛ tik nɛ zu wa nyɔŋ nɛ kɔ‘i.

⁶O mɔ-dai kɔ‘m yambala dam fara lɛŋ, nɛ zu o kaya in o zu-tɔ̧́ nɛnɛ; mɔ-dai kɔ‘m pɛsa dam zu nu sót-sót. Ŋma bíí mɛ pɛm wa kà bó nɛ̀ nɛ́ɛ̀ ɗoŋ wa mɛ kai wa pii ɗoŋ bo na.

⁷«Ɛ́nɛ́ o wi-dai Israɛl, ɛ̀nɛ̀ zíí mɔ nɛ GASA WAN tɔ̧ h’ɛ́nɛ́'ɛ.

⁸GASA WAN Sɔ̧ tɔ̧a̧, hee mɔ'ɔ n'am duk kpasa ga, mi kana mɔ wen zu o mɔ-dai kɔ‘m nɛ pɛsi nɛ tɛ o mɔ nɛnɛ, o saɗi-zaŋbɛɛ nyɔŋ nɛ kɔ‘i, wen o wi-dai-wa de mɔ de na, wen wa zɔk duk o sami kɔ‘m nɛ de-a na; o wi-dai-sami dai nɛ tɛ-wa nɛ tɛ-wa, nɛ̀ bó nɛ́ wa dai nɛ o sami kɔ‘m na.

⁹O wi-dai-sami, ɛ̀nɛ̀ zíí wen nɛ GASA WAN tɔ̧ h’ɛ́nɛ́.

¹⁰GASA WAN Sɔ̧‘e nde: Mi tɛ paŋ in o wi-dai Israɛl; mi tɛ kai o sami kɔ‘m yinɛ er-wa, wa beka dai o mɔ-dai kɔ‘m ɓɔna. Hegɔ, o wi-dai-sami beka kpa mɔɔ-dai-tɛ ɓɔna. Mi tɛ ɓar o sami kɔ‘m kɔ̧ nú-wa yinɛ, wen ká wa tɛ́ɛ̀ kpa mɛ nyɔŋ siti.»

¹¹Ɓɛɛ nɛ mɔ'ɔ nɛ GASA WAN Sɔ̧ tɔ̧a̧‘e, «Kinii, mi nɛ tɛ‘m tɛ zɔk o mɔ-dai kɔ‘m nɛ de-a, mi tɛ pɛm wa nɛ de-a.

¹²Hee mɔ'ɔ nɛ wi-dai-sami yor nɛ nɔa-a ŋgimbi n'aa duk mgbara o sami nɛ kɔ̧ɔ̧ mɛ pɛsi ga, mɛ nɛ hegɔ a̧‘m tɛ yor nɛnɛ zu o sami kɔ‘m mbɛt. Mi tɛ kii wa dam fara lɛŋ, ɓɛɛ mi tɛ kai wa piinɛ ɗoŋ nɛ fara nɛ wa pɛsa so si sɛnɛ wese zɔm kutu in tum.

¹³Mi tɛ kai wa yinɛ mgbara o dukbíí nɛ wa duk sɛnɛ. Mi tɛ mɔi̧ wa nɛ gɔni nu, ɓɛɛ mi tɛ kai wa siɗoŋ nu kɔ-wa. Mi tɛ nɛ̀ɛ́ dai wa sɛn zu o kaya Israɛl, nɛ kɔ̧ ɗɔŋgɔ dam fara lɛŋ tɛ nu'i.

¹⁴Mi tɛ dai wa tɛ de fara mbɔɗi zɔ̧, ɓɛɛ wa tɛ mɔi̧ ŋmaa ɔ zu kaya Israɛl. Nɛ́ hi̧i̧ a̧ wa tɛ ɔm tɛ-wa sɛnɛ. Wa tɛ nyɔŋ de o mbɔɗi zɔ̧ zu kaya Israɛl.

¹⁵Nɛ́ mi nɛ tɛ‘m a̧ tɛ dai o sami kɔ‘m, nɛ́ mi'i tɛ ha̧ ɔma-tɛ ha̧ wa mbɛt; GASA WAN Sɔ̧ tɔ̧ɔ̧ hegɔ.

¹⁶«Mi tɛ kii wan nɛ yɔa; mi tɛ mgbɔ wan nɛ yambala pii ɗoŋ, mi tɛ hɛr naŋ wan nɛ naŋ-a gbina, ɓɛɛ mi dee nyina ha̧ wan nɛ tɛ̀ nyim. Ɓɛɛ mi tɛ gbɛ o ŋmaŋa-a in o ŋgaŋa-a. Mi tɛ dai duk sami kɔ‘m nɛ yuwar-a.

¹⁷«Ɓɛɛ nɛ̀ k’ɛ́nɛ́, o sami kɔ‘m, mɔ nɛ GASA WAN Sɔ̧ tɔ̧ h’ɛ́nɛ́ nɛ mɔ'ɔ: Mi tɛ kɛ̧ mgbara o sami in o ŋmaa. Mi tɛ kɛ̧ mgbara o vala sami in vala gbadua.

¹⁸Ɛ́nɛ́ kpa desee tɛ nyɔŋa o gba de mbɔɗi zɔ̧ na, ɓɛɛ s’ɛnɛ i̧si̧ oi-aa i̧si̧ nɛ naŋ‘nɛ́'ɛ nde? Ɛ́nɛ́ kpa desee tɛ nɔɔ de gɛɗa yi na, ɓɛɛ s’ɛnɛ ɓuti yi nɛ naŋ‘nɛ́'ɛ nde?

¹⁹Ɓɛɛ nɛ hegɔ‘i a̧ o sami kɔ‘m nyɔŋ nɛ o zɔ̧ n’ɛnɛ i̧sa, nɔ nɛ yi nɛ naŋ‘nɛ́ ɓuta mbɛt.

²⁰«Ɓɛɛ sa GASA WAN Sɔ̧ tɔ̧‘e, mi tɛ kɛ̧ mgbara o ŋmaŋa sami in o ɔ̧ka̧-a̧,

²¹wen ɛ́nɛ́ gusa zu goto o wan nɛ ɔ̧ka̧, koŋgó ɓaa-wa in zak-wa mbɛt, ɓɛɛ ɛ́nɛ́ ndak wa mgbara o dɔka-a yinɛ.

²²Mi tɛ tɛ mɛ kpasi o sami kɔ‘m, nɛ o ŋma bíí beka de ŋgamɔ in wa ɓɔna, ɓɛɛ mi tɛ kɛ̧ mgbara o sami in ŋmaa.

²³Mi tɛ e ŋma bíí kpɔk mɛ dai wa, wi’ɛi nɛ David wi-de-tom kɔ‘m; mɛ nɛ a̧‘i a̧ tɛ duk wi-dai-wa.

²⁴Mi GASA WAN tɛ duk nɛ Sɔ̧ kɔ-wa, ɓɛɛ wi-de-tom kɔ‘m David tɛ duk nɛ be-wan mgbara wa. Mɔ nɛ mi GASA WAN tɔ̧a̧ a̧‘i.

²⁵Mi tɛ nɔ tɔk in wa ha̧ wa mɛ ya tɛ ga̧a̧mɔ ɓɔnsɛnɛ; mi tɛ kum o ɗaŋ boko-nam nù kɔ-wa yinɛ lɛŋ, wen ha̧ o mɔ-dai kɔ‘m mɛ yar nɛ zaŋbɛɛ, ɔ nɛ kɔ̧ kombo nɛ fee-see.

²⁶«Mi tɛ e ha̧ wa mɛ yar zik ká̧ naŋ sa̧a̧ kaya kɔ‘m, ɓɛɛ mi tɛ de ha̧ kórò mɛ hɔ tɛ ŋgimbi-a; kórò‘i tɛ duk nɛ kórò de sɔnti.

²⁷O te tɛ gasi mɛ wai nɛ de-a, nyɔnɔ tɛ dɛm, ɓɛɛ o bíí kɔ‘m tɛ ya nɛ fee-see zu nu kɔ-wa, ŋgimbi n'am be tɛ̀ɛ́ gbin kpáŋá ger o bíí kɔ‘m, ha̧‘m mɛ gbo wa yinɛ er o wi nɛ de wa nɛ bara, ɓɛɛ o bíí tɛ iŋ‘e, mi nɛ GASA WAN.

²⁸Dukbíí kɔ‘m beka duk nɛ mɔɔ-ɓar kai yaknɛ ko o tugun bíí ɓɔna, wa beka duk nɛ́ nyɔŋmɔ ko o boko-nam ɓɔna mbɛt. Wa tɛ ya fara kɔ-wa nɛ fee-see nɛ bíí mɛ nukuri wa beka bo na.

²⁹Mi tɛ de ha̧ nyɔnɔ mɛ dɛm kpɛɛfɔ kɔ-wa,[24] kaɓa beka ba nu kɔ-wa na, gɔni bíí beka zɛkɛɗi wa ɓɔna mbɛt,

³⁰ɓɛɛ wa tɛ iŋ‘e, mi nɛ GASA WAN Sɔ̧ kɔ-wa, wan nɛ yor ɗoŋ wa, ɓɛɛ wa nɛ o be Israɛl nɛ duk nɛ dukbíí kɔ‘m. GASA WAN Sɔ̧ a̧ tɔ̧ɔ̧ hegɔ.

³¹«Ɓɛɛ k’ɛ́nɛ́, o bíí kɔ‘m, ɛnɛ nɛ duk sami kɔ‘m n'am dai; mi nɛ Sɔ̧ k’ɛ́nɛ́; GASA WAN Sɔ̧ tɔ̧ɔ̧ hegɔ.»