Read Northwest Gbaya EZEKIƐL 35 Bible Online

EZEKIƐL 35 - Northwest Gbaya bible

EZEKIƐL 35

¹Nɛ mɔ'ɔ nɛ GASA WAN tɔ̧ɔ̧ ha̧‘m:

²«Mɛ́ bíí, mɛ̀ zík tɛ-mɛ sitɛ kaya Sɛir, ɓɛɛ mɛ̀ tɔ̧́ ŋga wen zu a̧.

³Mɛ̀ tɔ̧́ ha̧ a̧‘e, mi GASA WAN Sɔ̧ a̧ tɔ̧ wen’ɛ: Mi tɛ ba zu dúk nɛ̀ mɛ, kaya Sɛir, mi tɛ nyɛi̧ er-am si zu mɛ, ɓɛɛ mɛ tɛ kifi gee ŋga-gbárà nɛ‘i beka duk sɛnɛ na.

⁴Mi tɛ ɗaŋ o ye kɔ-mɛ kifi geemɔ, fara kɔ-mɛ tɛ duk nɛ bɛɛ-oi keŋgeŋge; hegɔ mɛ tɛ iŋ‘e, mi nɛ GASA WAN.

⁵«Mɛ duka tɛ kasa sɛnmɔ in o be Israɛl hegɔɔ ɗoŋ-aa nyɛi̧, ɓɛɛ nɛ mɔ'ɔ nɛ mɛ dee ha̧ wa mɛ kum nu gba-paa wese nɛ ŋgamɔ tika nɛnɛ zu wa, ha̧ dee ɗaŋmɔ kɔ-wa mɛ hɔ nɛnɛ nduti.

⁶Hegɔ, hee mɔ'ɔ n'am duk kpasa ga, mi GASA WAN Sɔ̧; mi beka e mɛ géè tɛ mɔ‘i nɛ mɛ dea'i na; mi tɛ kundi ari-a zu mɛ. Mi tɛ de ha̧ tɔk tɛ-wa mɛ pii ɗoŋ zu mɛ, ɓɛɛ tɔk'i tɛ nɛ ɗoŋ mɛ mbɛt.

⁷Mi tɛ de ha̧ kaya Sɛir mɛ kifi gee bɛɛ-oi, ɓɛɛ mi tɛ gbɛ o bíí lɛŋ nɛ tɛ ɓir nɛ fara'i.

⁸Gba-paa tɛ duk ɗoŋ o bíí kɔ-mɛ, ɓɛɛ wɔr tɛ dun nu dam nɛ zu o kaya nɔ'ɔ, in o zu-tɔ̧́ gu nɛ kɔ̧ o ɗɔŋgɔ hɔ nɛnɛ kɔ̧ gboŋgo mɛ lɛŋ.

⁹Mi tɛ de ha̧ fara-duk kɔ-mɛ mɛ kifi gee zaŋbɛɛ kpoo nɛ kpoo; ŋma bíí mɛ duk tɛ o gasa ye kɔ-mɛ beka bo na mbɛt. Mɛ nɛ hi̧i̧ ɛ̀nɛ̀ tɛ iŋ‘e, mi nɛ GASA WAN.

¹⁰«Mɛ tɔ̧a̧‘e, mɛ tɛ kai o be Israɛl in Juda yiitoo lɛŋ a zu mɛ. Ɓɛɛ zu-a'i, mi GASA WAN a̧a̧ hi̧i̧.

¹¹Hee mɔ'ɔ n'am duk kpasa ga, mi GASA WAN Sɔ̧, mi tɛ tik zu mɛ nɛ ŋgaya-a, mi tɛ de mɔ in mɛɛ nyɛm nɛ̀ ɗoŋ ŋga nyimsea in sɛnmɔ kɔ-mɛ nɛ tika zu dukbíí kɔ‘m'i, wen ha̧ wa mɛ iŋ‘e, mi gusi mɛ zu mɔ nɛ mɛ dee in wa.

¹²Ɓɛɛ mɛ nɛ tɛ-mɛ tɛ iŋ‘e, mi nɛ GASA WAN. Mi zia dara lɛŋ nɛ mɛ da̧a̧ nɛ o kaya Israɛl tɔ̧ nɛnɛ‘e: ‹O kaya Israɛl ɗaŋa kaɗi! Ɛ̀ɛ̀ nɛ́ɛ̀ bá k’ɛɛ, ɛ̀ɛ̀ kɛ̧́ nɛ̀ er ŋmaa!›

¹³Mi zia ɗaŋ dara n’ɛnɛ da̧a̧ ŋmaŋ nɛ tɛ‘nɛ́ zu'm'i.

¹⁴«Wen mɔ‘i, GASA WAN Sɔ̧ tɔ̧a̧‘e, wi tɛ ɗaŋ nu k’ɛ́nɛ́ lɔkɔti-lɔkɔti kifi gee zaŋbɛɛ, ɓɛɛ o bíí zaŋnu lɛŋ tɛ ya nɛ tortɛ zu tika-a k’ɛ́nɛ́.

¹⁵Hee mɔ'ɔ nɛ mɛ dee tortɛ zu ɗaŋa-a ko dukbíí ko Israɛl nɛ duk nɛ mɔɔ-oi kɔ‘m nɛ ɗaŋa kifi gee ŋga-gbárà'ɛ ga, mi tɛ de kalemɔ‘i si ɗoŋ ha̧ mɛ. Mɛ kaya Sɛir, mɛ tɛ kifi duk nɛ gee ŋga-gbárà nduu, in nu Edɔm nɛ oi gun mbɛt, ɓɛɛ o bíí tɛ iŋ‘e, mi nɛ GASA WAN.»