Read Northwest Gbaya EZEKIƐL 37 Bible Online

EZEKIƐL 37 - Northwest Gbaya bible

EZEKIƐL 37

¹Ŋgai ko GASA WAN yee tɛ‘m, ɓɛɛ ɔmi kɔ̧-a̧ mgbɔ‘m yaknɛ nɛ́ɛ̀ e'm mgbara ŋma ɗɔŋgɔ nɛ duna nɛ o gba̧a̧ fio.

²Nɛ mɔ'ɔ n'aa mgbɔɔ am yar zik nɛ kɔ̧ ɗɔŋgɔ‘i kpa nu ŋmaa, ɓɛɛ zɔm gba̧a̧ fio bíí nɛ kora sɔgbɔrɔ nɛ mɔ'ɔ nɛ gbìsì'ɛ.

³Ɓɛɛ a̧ tɔ̧ ha̧‘m: «Mɛ́ bíí, o gba̧a̧ fio nɔ'ɔ tɛ kpasi woyo nde?» Ɓɛɛ mi kifi nú ha̧ a̧‘e: «GASA WAN Sɔ̧, nɛ́ ɛnɛ'ɛ tɛ iŋ i̧i̧ kifa nú‘i.»

⁴Sa a̧ tɔ̧ ha̧‘m: «Mɛ̀ tɔ̧́ wen sitɛ o gba̧a̧ fio nɔ‘i ai. Mɛ̀ tɔ̧́ ha̧ wa'e: ‹ɛ́nɛ́ o kora gba̧a̧ fio nɔ'ɔ, ɛ̀nɛ̀ zíí wen nɛ GASA WAN tɔ̧ h’ɛ́nɛ́'ɛ.

⁵GASA WAN Sɔ̧ tɔ̧a̧‘e nde: Mi tɛ ɔm ɔmi kɔ‘m a tɛ‘nɛ́, ɓɛɛ ɛ́nɛ́ tɛ kpasi.

⁶Mi tɛ a o ɗaɗi in mur-tɛ‘nɛ́ siɗoŋ tɛ‘nɛ́, ɓɛɛ ndàrá-tɛ‘nɛ́ kpee tɛ‘nɛ́ woyo. Mi tɛ ɔm a zu'nɛ́, ɓɛɛ ɛ́nɛ́ tɛ kpasi; ɓɛɛ nɛ tɛ mɔ‘i ɛ̀nɛ̀ tɛ iŋ'ɛ, mi nɛ GASA WAN.› »

⁷Nɛ mɔ'ɔ n'am tɔ̧ɔ̧ wen nyɛm nɛ ɗoŋ mɔ n'aa tɔ̧ɔ̧ ha̧‘m. Ŋgimbi n'am ɓɔna fara tɔ̧ɔ̧ wen'i, mi zia ŋma gba gitimɔ nɛ nɔi̧a, ɓɛɛ nɛ́ o gba̧a̧ fio a̧ ɗɔli duk nu ŋmaa ɗɛ́kɛ́t ɗɛ́kɛ́t.

⁸Kà‘m tɛ zɔk mɔ wó, ɓɛɛ ɗaɗi ká bá nɛ̀ mur in ndara tɛ-wi nɛ mɔ'ɔ nɛ kpee tɛ bíí kpɔk kpɔk ɓɔn yí‘m’ɛ. Ɓɛɛ ɔmi bo tɛ-wa na.

⁹Nɛ mɔ'ɔ nɛ GASA WAN tɔ̧ɔ̧ ha̧‘m woyo: «Mɛ́ bíí, mɛ̀ tɔ̧́ wen sitɛ ɔmi. Mɛ̀ tɔ̧́ ha̧ ɔmi'e nde, nɛ́ GASA WAN a̧ tɔ̧ ha̧ a̧ mɛ yu tɛnɛ nɛ mgbii-zan naar lɛŋ mɛ ye tɛ o wɔr o wi nɔ'ɔ ha̧ wa kpasi.»

¹⁰Mi tɔ̧ɔ̧ wen hee mɔ'ɔ nɛ GASA WAN tɔ̧ɔ̧ ha̧‘m ga. Ɔmi yee tɛ wa; wa kpasa, ɓɛɛ wa dik gɛrɛm kur yor, ɓɛɛ nɛ́ gba duk o wi-biro nɛ‘i nyɛm mɛ tɔr pi̧ nu na.

¹¹Ɓɛɛ GASA WAN tɔ̧ ha̧‘m'e: «Mɛ́ bíí, o gba̧a̧ fio nɔ'ɔ nɛ o be nutua ko Israɛl. Wa tɔ̧ kɔ-wa'e wi kora kɔ‘i kor kaɗi, ŋma mɔɔ-e-nɛ ta zu duka-a kɔ‘i siti bo ɓɔna.

¹²Hegɔ, mɛ̀ tɔ̧́ wen ha̧ wa'e nde, wen nɛ GASA WAN Sɔ̧ tɔ̧ɔ̧ nɛ mɔ'ɔ: Mi tɛ nɛ̀ɛ́ aŋ o pɛsi-fio k’ɛ́nɛ́ dukbíí kɔ‘m gbonɛ a zan, ɓɛɛ mi tɛ kai'nɛ́ si ɗoŋ nu Israɛl.

¹³Ŋgimbi n'am be tɛ̀ɛ́ a̧ŋ o pɛ̀sì mɛ kai wɔr'nɛ́ nɛ wa guna so a zan, a̧ ɛ́nɛ́ dukbíí kɔ‘m tɛ iŋ nɛnɛ‘e, mi nɛ GASA WAN.

¹⁴Mi tɛ ɔm ɔmi kɔ‘m a tɛ‘nɛ́, ɓɛɛ ɛnɛ tɛ kpasi. Ɓɛɛ mi tɛ kai'nɛ́ si ɗoŋ nu k’ɛ́nɛ́, ɓɛɛ ɛnɛ tɛ iŋ‘e, mi GASA WAN, wen kɔ‘m tik nu géè na; kà‘m nɛ tɔ̧ɔ̧ wen, ɓɛɛ mi tɛ de kana mɔ‘i hɔ gba̧a̧.»

¹⁵Nɛ mɔ'ɔ nɛ GASA WAN tɔ̧ɔ̧ ha̧‘m:

¹⁶«Mɛ́ bíí, mɛ̀ bá ŋma gbaá-te,[25] ɓɛɛ mɛ̀ yɔ́r mɔ zu a'e, ‹Mɔɔ-wan ko Juda, in o be Israɛl nɛ duk kpɔk in a̧.› Mɛ̀ bá ŋma woyo, ɓɛɛ mɛ̀ yɔ́r mɔ zu a'e, ‹Mɔɔ-wan ko Jozɛf in o be Israɛl nɛ duk in a̧ (mɛ nɛ mɔ nɛ tɔ̧ Efraim).›

¹⁷Mɛ̀ káí o gbaá-te nɔ‘i yiitoo lɛŋ dúk nú ŋmaa, wen ha̧ wa mɛ duk nɛ kpɔk mɔ.

¹⁸Ɓɛɛ ŋgimbi nɛ dukbíí kɔ-mɛ be tɛ̀ɛ́ tɛ mɛ tɔ̧ ha̧ mɛ‘e nde, mɛ̀ wé ɗoŋ mɔ nɛ mɛ kɔ̧ɔ̧ mɛ usi ha̧ wa,

¹⁹mɛ̀ tɔ̧́ ha̧ wa'e, nɛ́ mi GASA WAN Sɔ̧ a̧ tɔ̧ wen’ɛ. Mi tɛ ba gbaá-te kpɔk nɛ duk nɛ Israɛl e kɔ̧ er-am, ɓɛɛ mi baa ɓii gbaá-te nɛ duk nɛ Juda e nú-a, ɓɛɛ wa yiitoo lɛŋ duka nu ŋmaa, ɓɛɛ dee nɛ te kpɔk sɛn kɔ̧ er-am.

²⁰«Mɛ̀ káí o gbaá-te nɔ‘i yiitoo nɛ mɛ baa yɔr mɔ zu wa'i dúk nú ŋmaa e kɔ̧ er-mɛ e ti wa.

²¹Ɓɛɛ mɛ̀ tɔ̧́ ha̧ wa'e nde, mi GASA WAN Sɔ̧ tɛ nɛ mɛ kai o be Israɛl mgbara o tugun bíí pii ɗoŋ mɛ mɔi̧ wa a zu ŋmaa, ɓɛɛ mi kaia wa si ɗoŋ nu kɔ-wa.

²²Mi tɛ mɔi̧ wa a zu ŋmaa wen ha̧ wa mɛ duk nɛ kpɔk dukbíí zu o kaya Israɛl nu kɔ-wa. Nɛ wannu kpɔk a̧ tɛ ɔ wan zu wa lɛŋ; wa beka kɛ̧ nu kà bó nɛ̀ kɛ̧ɛ̧ mɔɔ-wan yiitoo na mbɛt.

²³Wa beka yɔ war-tɛ-wa tɛ gasa o géé-sɔ̧ in dee o ndiŋmɔ ká bá nɛ̀ dee ŋgazu ɓɔna. Mi tɛ fo kita oi dee ŋgazu[26] in ɗaŋmɔ yinɛ zu wa; mi tɛ zui wa ha̧ war-tɛ-wa mɛ sa̧. Wa tɛ ya nɛ dukbíí kɔ‘m, ɓɛɛ mi tɛ duk nɛ Sɔ̧ kɔ-wa.

²⁴Wi-de-tom kɔ‘m David tɛ ɔ wan zu wa, nɛ a̧‘i kpɔk ɓɛɛ a̧ tɛ dai wa; wa tɛ mbo zu tɛ o heembea kɔ‘m, ɓɛɛ wa tɛ de mɔ nyɛm nɛ ɗoŋ yuwar deemɔ kɔ‘m.

²⁵Wa tɛ duk tɛ nu n'am ha̧a̧ so ha̧ Jakob wi-de-tom kɔ‘m, fara nɛ o zɔmdáa kɔ-wa yaa so sɛnɛ. Nu'i tɛ duk nɛ nu kɔ-wa hɔ nɛnɛ tɛ o bezaŋ-wa mɛ, ɓɛɛ nɛ́ wi-de-tom kɔ‘m David a̧ tɛ ɔ wan zu wa kpoo nɛ kpoo.

²⁶Mi tɛ nɔ tɔk in wa ha̧ wa mɛ ya tɛ ga̧a̧mɔ kpoo nɛ kpoo; mi tɛ ha̧ de fara ha̧ wa mɛ ya sɛnɛ, wa tɛ ko dun nu, ɓɛɛ mi tɛ e Tua kɔ‘m mgbara wa kpoo nɛ kpoo.

²⁷Mi tɛ de fara-duk kɔ‘m mgbara wa, mi tɛ duk nɛ Sɔ̧ kɔ-wa, ɓɛɛ wa tɛ duk nɛ dukbíí kɔ‘m.

²⁸Ka'm be tɛ̀ɛ́ e Tua kɔ‘m mgbara o bíí kɔ‘m ha̧ Tua'i mɛ duk mgbara wa kpoo nɛ kpoo, ɓɛɛ o tugun bíí tɛ iŋ‘e, mi GASA WAN ee o be Israɛl nɛ tɛ mɛ duk nɛ mgbák bíí kɔ‘m.»