Read Northwest Gbaya EZEKIƐL 41 Bible Online

EZEKIƐL 41 - Northwest Gbaya bible

EZEKIƐL 41

¹Wi’ɛi mgbɔa'm si kɔ̧ gasa bɛr-tua ko Sɔ̧, ɓɛɛ a̧ we gasa fara'i. Ndota o mbiŋ-tua ká̧ fara-ye-mɔ nɛ mɛtrɛ taar,

²pɛsa fara-ye-mɔ duka nɛ mɛtrɛ yiitoo nɛ reeta, ndota o ŋgeŋ fara'i duka nɛ mɛtrɛ yiitoo nɛ reeta mbɛt. A̧ wee zi̧a̧ bɛr-tua'i, mɛtrɛ ɓu-yiitoo in pɛsa-a mɛtrɛ ɓu.

³Ɓɛɛ a̧ ye si kɔ̧ bɛr-tua mɛ ndaa-a mɛ. Zi̧a̧ fara-ye-mɔ si hi̧i̧ duka nɛ mɛtrɛ kpɔk, pɛsa-a nɛ mɛtrɛ taar, ɓɛɛ ndota o ŋgeŋ fara'i nɛ mɛtrɛ taar mbɛt.

⁴A̧ wee kiitɛ bɛr-tua'i mbɛt, zi̧a̧-a̧ nɛ mɛtrɛ ɓu in pɛsa-a nɛ mɛtrɛ ɓu mbɛt, ɓɛɛ a̧ tɔ̧ ha̧‘m: «Fara’ɛ nɛ sa̧a̧ fara nyɛmna.»

⁵A̧ wee ndota ŋgeŋ Tua ko Sɔ̧, mɛtrɛ taar, in pɛsa o bɛr-tua nɛ zik ɗoŋ Tua ko Sɔ̧ nɛ war zan, pɛsa-a mɛtrɛ yiitoo yiitoo.

⁶O bɛr-tua nɔ‘i duka zu ŋmaa taar, ɓɛɛ o tua nɔ‘i zu ŋmaa taar'i, o bɛr-tua ɓu-taar ɓu-taar a̧a̧ kɔ̧ a̧ dam wa lɛŋ. O bɛr-tua nɔ‘i ndaɗa ŋgeŋ Tua ko Sɔ̧ nɛ war zan, ɓɛɛ bo nɛ wa mboo wa zaŋ ŋgeŋ na.

⁷Wa nyɛkɛ̧ɗa so ŋgeŋ Tua ko Sɔ̧ nɛ ɗɔɔ daŋnɛ zik nɛ ɗoŋ-aa kpa nu ŋmaa; hegɔ, kà'ì daŋ si ŋgɔn, ɓɛɛ pɛsa o bɛr-tua nɔ‘i gasi gasi siti siti zu ŋmaa hɔ nɛnɛ tɛ sɔŋkur-aa mɛ. Wi daŋ so nɛ̀ kɔ̧ bɛr-tua mɛ ɗɔɔ hɔ tɛ wan mɛ see-a kaɗi, ɓɛɛ sɛka'i hɔɔ tɛ wan mɛ zu-a.

⁸Mi zɔka wa mboo naŋ o bɛr-tua nɔ‘i zik Tua ko Sɔ̧ kpa nu ŋmaa, kusa-a nɛ mɛtrɛ taar.

⁹Ndota ŋgeŋ o be bɛr-tua mɛ zan duka nɛ mɛtrɛ yiitoo nɛ reeta. Pɛsa fara nɛ duka mgbara o bɛr-tua nɛ ndaɗa Tua ko Sɔ̧

¹⁰in o bɛr-tua wan mɛ zan duka nɛ mɛtrɛ ɓu, zik Tua ko Sɔ̧ kpa nu ŋmaa. Fara'i duka nɛ fara-yar-sɛnɛ ko o wi-ɗafi-sɔ̧.

¹¹Nú o be bɛr-tua nɛ ndaɗa Tua ko Sɔ̧ duka zɔk mɔ si be fara-yar-nɛnɛ kɔ-wa'i. Nu tua kpɔk zɔka mɔ si war ká̧-zan-mɛ́-ŋgɔn, ɓɛɛ kpɔk zɔk mɔ si war ká̧-zan-mɛ́-ɗɔɔ. Ndota ŋgeŋ nɛ kpee ɗoŋ fara-yar-sɛnɛ‘i duka nɛ mɛtrɛ yiitoo nɛ reeta.

¹²Ŋma tua duka ɗoŋ Tua ko Sɔ̧ nɛ war yee-wese, ɓɛɛ nú-a zɔk mɔ si fara-yar-sɛnɛ‘i; zi̧a̧ tua'i nɛ mɛtrɛ ɓu-naar-zua-mɔɔrɔ, pɛsa-a nɛ mɛtrɛ ɓu-taar-zua-mɔɔrɔ, ɓɛɛ ndota ŋgeŋ-a nɛ mɛtrɛ yiitoo nɛ reeta.

¹³Wi’ɛi wee Tua ko Sɔ̧ mbɛt, ɓɛɛ zi̧a̧-a̧ duka nɛ mɛtrɛ ɓu-mɔɔrɔ; pɛsa fara-yar-sɛnɛ in tua nɛ a̧a̧ si yee-wese ká bá nɛ̀ o ŋgeŋ-a mbɛt nɛ mɛtrɛ ɓu-mɔɔrɔ.

¹⁴Pɛsa ti ɗɔɔ Tua ko Sɔ̧ nɛ nú-a a̧a̧ si daŋa-wese in o fara-yar-sɛnɛ mɛ ká̧ a̧ mbɛt duka nɛ mɛtrɛ ɓu-mɔɔrɔ.

¹⁵A̧ wee zi̧a̧ tua nɛ duk ɗoŋ Tua ko Sɔ̧ in o yuwar nɛ ɓir nɛ ká̧ a̧ nɛ mgbɔɔr nɛ mgbɔɔr, mɛtrɛ ɓu-mɔɔrɔ mbɛt.

¹⁶O ŋgeŋ mɛ fara-ye-mɔ si kɔ̧ Tua ko Sɔ̧, o wan mɛ gasa bɛr Tua ko Sɔ̧, in o wan mɛ bɛr-tua mɛ ndaa-a mɛ,

¹⁷wa kpee ɗoŋ o ŋgeŋ nɔ‘i lɛŋ nɛ de yɔka te nɛ ɗɔɔ daŋnɛ hɔ nɛnɛ tɛ o woi-tua zik kpa nu ŋmaa. Wa kpee ká̧ nu o woi-tua, in o ŋgeŋ wan mɛ o bɛr-tua nɛ zika ɗoŋ Tua ko Sɔ̧ nɛ war zan hee mɔ‘i ga mbɛt, ɓɛɛ wa fan gba de yɔka mbaŋa-te ye ŋmaa zɛk-zɛk kpe nɛ o woi-tua. Wa gɔna so dap o keribim in o wa̧a̧ ndɛŋgɛ zaŋ ŋgeŋ nɛ war kɔ̧ a̧ in nɛ zan mbɛt, ku̧u̧naŋa-a nɛ nu Tua ko Sɔ̧ mɛ hɔ nɛnɛ kɔ̧ bɛr-tua mɛ ndaa-a mɛ. Wa gɔna dap keribim mgbara o wa̧a̧ ndɛŋgɛ yiitoo ɗoŋ ŋmaa, ɗoŋ ŋmaa hegɔ zik nɛ ɗoŋ ŋgeŋ kpa nu ŋmaa.

¹⁹Kpɔk nɛ saŋa-yí bíí, ɓɛɛ ɓii-aa nɛ saŋa-yí dila. Saŋa-yí bíí zɔka mɔ sitɛ ɛ̧ɛ̧ wa̧a̧ ndɛŋgɛ'ɛ; ɓɛɛ saŋa-yí dila zɔk kɔ‘i mɔ sitɛ ɓii wa̧a̧ ndɛŋgɛ‘i hegɔ zik bɛr-tua kpa nu ŋmaa.

²⁰Wa gɔna dap o keribim in o wa̧a̧ ndɛŋgɛ zaŋ ŋgeŋ nɛ ɗɔɔ daŋnɛ hɔ zu nu tua.

²¹O ká̧ nu tua-ye si gasa bɛr-tua a̧a̧ so nɛ mgbii-aa naar. Ɓɛɛ ŋma mɔ nɛ hɔɔ ŋmaa in

²²fara-ɗafi-sɔ̧ nɛ‘i dee nɛ te duka nú sa̧a̧-fara; kusa-a duka nɛ mɛtrɛ kpɔk nɛ reeta, ɓɛɛ pɛsa-a nɛ mɛtrɛ kpɔk. O mgbii-aa, gun-aa in ká̧ yi-a lɛŋ, wa dee nɛ te. Ɓɛɛ wi’ɛi tɔ̧ ha̧‘m: «Ɛ̧ɛ̧ hɛ̧ɛ̧ nɛ taŋge nɛ duk ti GASA WAN.»

²³Kpar-nú tua ye si kɔ̧ gasa bɛr-tua in sa̧a̧ fara duka zu ŋmaa yiitoo nɛ‘i hú̧í̧ ndaɗi ŋgeŋ.

²⁴Kpar-nú tua nɔ‘i duka katɛ ŋmaa yiitoo nɛ‘i hú̧í̧ nɛtɛ nɛtɛ.

²⁵Wa gɔna so dap o keribim in o wa̧a̧ ndɛŋgɛ ɗoŋ o kpar-nú tua-ye si kɔ̧ gasa bɛr-tua hee mɔ'ɔ nɛ wa gɔna so nɛnɛ zaŋ o ŋgeŋ ga. Wa dee so ŋma zala nɛ o gba de yɔka te ti ɗɔɔ nu tua sa̧a̧-fara nɛ war ɗoŋ-aa nɛ zan.

²⁶O woi-tua nɛ wa fana so mɔ kpe nɛnɛ in o gɔna dap wa̧a̧ ndɛŋgɛ a̧a̧ so zaŋ o ŋgeŋ mɛ fara-ye-mɔ, ká bá nɛ̀ nu zala, in zaŋ ŋgeŋ wan mɛ o bɛr-tua nɛ yaa zik Tua ko Sɔ̧ nɛ war zan mbɛt.