Read Northwest Gbaya EZEKIƐL 45 Bible Online

EZEKIƐL 45 - Northwest Gbaya bible

EZEKIƐL 45

¹«Ŋgimbi n’ɛnɛ be tɛ̀ɛ́ kɛ̧ nu wen ha̧ o bíí tɛ zuduk kpɔk kpɔk mɛ kpa war nu kɔ‘i, ɛ̀nɛ̀ gɔ́n ŋma nu e nɛtɛ wen GASA WAN, zi̧a̧-a̧ kilomɛtrɛ ɓu-zua-yiitoo nɛ reeta, in pɛsa-a kilomɛtrɛ ɓu. Ɓɛɛ nu'i a̧ duk nɛ oi-aa lɛŋ ha̧ GASA WAN.

²Ɛ̀nɛ̀ wé mɔ see nu'i e wen Tua ko Sɔ̧ tɛ mɛtrɛ gɔmŋmaa-yiitoo-nɛ-ɓu-mɔɔrɔ, zi̧a̧-a̧ in pɛsa-a hee ŋmaa ga, ɓɛɛ ɛnɛ gɔn ŋma be fara zik ɗoŋ-aa kpa nu ŋmaa tɛ mɛtrɛ ɓu-yiitoo-zua-mɔɔrɔ.

³Ɛnɛ we gbaagur fara'i, zi̧a̧-a̧ kilomɛtrɛ ɓu-zua-yiitoo nɛ reeta, pɛsa-a kilomɛtrɛ mɔɔrɔ, ɓɛɛ nɛ́ sɛn fara'i a̧ Tua ko Sɔ̧ nɛ duk nɛ sa̧a̧ fara nyɛmna tɛ duk sɛnɛ.

⁴Gɔna nu'i tɛ duk nɛ mɔ ko Sɔ̧ nɛ tɛ duk wen o wi-ɗafi-sɔ̧ nɛ de tom kɔ̧ Tua ko Sɔ̧; hegɔ, wa tɛ kpa mgbák fara mɛ de tua kɔ-wa sɛnɛ, ɓɛɛ oi gbaagur nu'i tɛ duk wen Tua ko Sɔ̧.

⁵Ɛnɛ gɔn gbaagur nu'i, zi̧a̧-a̧, kilomɛtrɛ ɓu-zua-yiitoo nɛ reeta, pɛsa-a; kilomɛtrɛ mɔɔrɔ e wen o be Levii nɛ de tom kɔ̧ Tua ko Sɔ̧; nɛ́ fara'i a̧ wa tɛ de ye kɔ-wa sɛnɛ.[29]

⁶«Ɛ́nɛ́ tɛ gɔn ŋma nu woyo, zi̧a̧-a̧ kilomɛtrɛ ɓu-zua-yiitoo nɛ reeta, pɛsa-a kilomɛtrɛ yiitoo nɛ reeta, ká̧ nu n’ɛnɛ gɔna ha̧ GASA WAN'i, ɓɛɛ fara'i tɛ duk wen o be Israɛl lɛŋ.

⁷«Ɓɛɛ nɛ̀ war ko o be-wan, ɛ̀nɛ̀ gɔ́n nù ha̧ wa nɛ war ká̧ nu Tua ko Sɔ̧, in nɛ war ká̧ nù ko o gee bíí mbɛt, nɛ war yee-wese hɔ nu Gba-tɔp, in nɛ war daŋa-wese hɔ mgbara nu ko Israɛl, ɓɛɛ zi̧a̧-a̧ tɛ nyɛm ŋmaa in nu ko o dɔka bíí.

⁸Gbaagur nu'i tɛ duk nɛ war fara ko o be-wan nu Israɛl. Hegɔ, wa beka nukuri dukbíí kɔ‘m ɓɔna, ɓɛɛ nu Israɛl tɛ duk nɛ nu ko o be nutua ko Israɛl nyɛm nɛ ɗoŋ zuduk kɔ-wa.»

⁹GASA WAN Sɔ̧ tɔ̧a̧: «O be-wan Israɛl, deemɔ k’ɛ́nɛ́ yaka zale! Ɛ̀nɛ̀ é ŋgamɔ n’ɛnɛ nukuri nɛ dukbíí kɔ‘m duk. Ɛ̀nɛ̀ dé nɛ mɔ in wa nɛ yuwar-a, k’ɛ́nɛ́ wuti wa, ɓar nɛ mɔ er-wa na. Nɛ mi GASA WAN Sɔ̧ a̧ tɔ̧ wen’ɛ h’ɛ́nɛ́!

¹⁰«Ɛ̀nɛ̀ é ha̧ o mɔɔ-we-mɔ mɛ duk kana nɛ mgbák mɔɔ-we-mɔ: efa a̧ duk nɛ efa, ɓɛɛ bat a̧ duk kana nɛ bat.

¹¹Ɛnɛ tɛ we o gba̧a̧ mɔ nɛ efa, ɓɛɛ ɛnɛ wee o yi-mɔ nɛ bat. Wa yiitoo lɛŋ nyɛma ŋmaa; efa ɓu kóó bat ɓu de nɛ homɛr kpɔk, nɛ̀ duk nɛ́ gun yuwar-wee-mɔ.

¹²Ɓɛɛ nɛ̀ war ko sede, siklɛ kpɔk ba nɛ gɛra ɓu-yiitoo, ɓɛɛ siklɛ ɓu-mɔɔrɔ-ɗoŋ-kpɔk de nɛ minɛ kpɔk.

¹³«Ɓɛɛ o mɔ n’ɛnɛ tɛ he mbéá-a ha̧ o bíí mɛ ha̧ zu-a ha̧ Sɔ̧ nɛ mɔ'ɔ: Kà wa nɛ mɔi̧a gba̧a̧ alkamaari dun daaro ɓu-mɔɔrɔ-ɗoŋ-kpɔk, wa tɛ ha̧ daaro kpɔk ha̧ Sɔ̧.

¹⁴K’ɛ̀nɛ̀ nɛ kpaa dak nɔ gɔmŋmaa, ɛ́nɛ́ tɛ ha̧ ɓu ha̧ Sɔ̧. Ɛ́nɛ́ tɛ we nɔ̧́ nɛ bat, ɓɛɛ bat ɓu tɛ de homɛr kpɔk, kóó nɛ́ kɔr kpɔk mbɛt.[30]

¹⁵Tɛ duk sami gɔmŋmaa-yiitoo nɛ ya fara-nyɔŋ-mɔ kɔ-wa, ɛnɛ tɛ ba zu-a, sami kpɔk. O zu-mɔ lɛŋ n’ɛnɛ tɛ ba'i, ɛnɛ tɛ ha̧ nɛ̀ ha̧a̧mɔ-zu-nyɔnɔ, nɛ kpoo-sɔ̧, nɛ mɔɔ-ɗafi-sɔ̧-gaŋmɔ, in wan mɛ ea-ɗaŋmɔ. Nɛ GASA WAN Sɔ̧ a̧ tɔ̧ɔ̧ hegɔ.

¹⁶«O bíí tɛ nu’ɛ lɛŋ a̧ kai o zu-mɔ kɔ-wa nɛnɛ ha̧ be-wan Israɛl.

¹⁷Nɛ́ be-wan a̧ tɛ ha̧ kpoo-sɔ̧, in ha̧a̧mɔ-zu-nyɔnɔ, in tɛna zu o mɔɔ-nɔ a nu wese-yɔyɛ-gasi-sɔ̧, wese gbaŋa mbe-yi-zɛ, o gbaŋa wese-ɔm-tɛ, gu nɛ oi o gbaŋa ko o be nutua ko Israɛl lɛŋ. Nɛ́ be-wan a̧ tɛ ha̧ mɔɔ-ɗafi-sɔ̧ wen zu ɗaŋmɔ, ha̧a̧mɔ-zu-nyɔnɔ, in kpoo-sɔ̧, gu nɛ mɔɔ-ɗafi-sɔ̧-gaŋmɔ ha̧ o be Israɛl mɛ kpa ea-ɗaŋmɔ.»

¹⁸GASA WAN Sɔ̧ tɔ̧a̧: «Mɛ̀ bá be wiwii ndai nɛ war-tɛ-a ɔ sa̧a̧, ɓɛɛ mɛ̀ gbɛ́ ɗafi nɛ sɔ̧ kuti wese-mbe-yi-zɛ, ga̧ nɛ war-tua ko Sɔ̧.

¹⁹Wi-ɗafi-sɔ̧ tɛ ba ŋma tɔk saɗi-ɗafi-sɔ̧ wen zu ɗaŋmɔ, ɓɛɛ a̧ tɛ sɔ̧ zu nu Tua ko Sɔ̧, dam o mgbii fara-ɗafi-sɔ̧ naar lɛŋ, in nɛ ká̧ nú-garo-ye-mɔ si kɔ̧ bee-gara mɛ kɔ̧ a̧.

²⁰Mɛ tɛ de kale kpɔk mɔ tɛ kuti wese ko mɔɔrɔ-ɗoŋ-yiitoo zɛ zu o bíí nɛ dee ɗaŋmɔ nɛ hɔɔ-kɔ-mɔ, kóó tɛ zɔka tɛ-wi nɛ de-a na. Mɛ nɛ hegɔ a̧ mɛ tɛ de ha̧ war-tua kɔ‘m mɛ sa̧.

²¹«Ɛ́nɛ́ tɛ ku̧ naŋ gbaŋa Paska tɛ ɓu-zua-naar ɔɔ-zɛ ko kuti zɛ; ɛ́nɛ́ tɛ de gbaŋa'i tɛ ɔɔ-zɛ mɔɔrɔ-ɗoŋ-yiitoo, ɓɛɛ k’ɛ́nɛ́ nyɔŋ brɛt nɛ hao a̧a̧ sɛnɛ tɛ ŋgimbi'i na.

²²Wese'i, be-wan tɛ ha̧ wiwii ndai mɛ ɗafi nɛ sɔ̧ wen ɗaŋmɔ kɔ̧-a̧ nɛ tɛ-a in wen ɗaŋmɔ ko o bíí lɛŋ.

²³Ɓɛɛ tɛ ɔɔ-zɛ mɔɔrɔ-ɗoŋ-yiitoo ŋgimbi gbaŋa'i, be-wan tɛ ha̧ o wiwii ndai mɔɔrɔ-ɗoŋ-yiitoo in vala sami mɔɔrɔ-ɗoŋ-yiitoo nɛ war-tɛ-wa ɔ sa̧a̧, dɔ nɛ oi kíí, zu fara-ɗafi-sɔ̧ ha̧ GASA WAN wen zu ɗaŋmɔ. Ɓɛɛ a̧ tɛ gbɛ vala gbadua dam ɗoŋ wese nɔ‘i ɗafi nɛ sɔ̧ mbɛt.

²⁴Ɓɛɛ nɛ ko ha̧a̧mɔ-zu-nyɔnɔ, a̧ tɛ ha̧ kilo fuu alkamaari ɓu-taar in nɔ̧́ tɛ litrɛ mɔɔrɔ-ɗoŋ-kpɔk dam ɗoŋ o wiwii ndai nɔ‘i; kale mɔ wen o vala sami kpɔk kpɔk mbɛt.

²⁵«Tɛ ŋgimbi gbaŋa wan mɛ ɔɔ-zɛ ɓu-zua-mɔɔrɔ ko mɔɔrɔ-ɗoŋ-yiitoo fio-zɛ,[31] be-wan tɛ ha̧ kale kpɔk mɔ mɛ ɗafi nɛ sɔ̧ wen zu ɗaŋmɔ wese kpɔk kpɔk dam ɗoŋ wese nɔ‘i mɔɔrɔ-ɗoŋ-yiitoo'i lɛŋ; kana nɛ o kale kpoo-sɔ̧ a̧ a̧ tɛ ha̧, in ha̧a̧mɔ-zu-nyɔnɔ ká bá nɛ̀ nɔ̧́ mbɛt.»