Read Northwest Gbaya DANIƐL 7 Bible Online

DANIƐL 7 - Northwest Gbaya bible

DANIƐL 7

¹Tɛ kuti pɛ-wan ko Baltazar wannu Babilɔŋ, Daniɛl ɔɔ zu ɓɔn gɔn gado kɔ‘i, ɓɛɛ a̧ yɔr zu'i, we nɛ ɗoŋ-aa mbɛt

²hee mɔ'ɔ ga: «Mɛ zɛ'ɛ, mi ɔɔ zu zɔk nɛ gba-búk-mgbiizan naar nɛ ɓoɓa gba-tɔp,

³ɓɛɛ o ŋma zɔm saɗi naar nɛ hɔ ŋmaa na gbo nɛ ɗɔɔ gba-tɔp'i.

⁴Kuti saɗi hɔɔ ŋmaa in dila nɛ ɓaa-a hee ɓaa zua ga; ŋgimbi n'am zɔk nɛ mɔ‘i, wa ŋmana ɓaa-a yinɛ, ba a̧ e ŋgɔn, a̧ yora zu naŋ-a yiitoo hee bíí ga, ɓɛɛ wa ha̧ taamɔ ko bíí ha̧ a̧.

⁵«Yiitoo saɗi hɔɔ ŋmaa in baŋgiiɗoŋ,[6] nɛ yor ŋgɔn nɛ wɛra-a, ɓɛɛ o gba̧a̧ ŋgazi taar a̧a̧ kɔ̧ nú-a. Wa tɔ̧ɔ̧ ha̧ a̧: ‹Mɛ̀ kúr mɛ̀ nyɔ́ŋ zɔm mur.›

⁶«Hɔ-ɗoŋ i̧i̧, mi zɔka mɔ, ɓɛɛ mi zɔk ŋma saɗi woyo nɛ hɔɔ ŋmaa in gɔ̧ nɛ a̧a̧ nɛ wɔr-ɓaa naar hee ko nɔ̧́í̧ ga sɛn ɗoŋ, in zu naar, ɓɛɛ wa ha̧ mɔɔ-wan ha̧ a̧.

⁷«Tɛ zu n'am ɔɔ mɛ zɛ‘i, mi zɔka naar saɗi nɛ̀ bó nɛ́ mɔɔ tɔ̧ na: nɛ́ zɔm mɔɔ-gɔn-hiɗi-wi, nɛ̀ a̧a̧ nɛ ŋgai nyɛmna. Gba̧a̧ nin-a lɛŋ nɛ boi, a̧ nyɔŋ nɛ mɔ nɛ ŋgai, a̧k nɛnɛ a nu, i̧si̧ nɛnɛ. Zak-a a̧a̧ so sɛnɛ ɓu, ɓɛɛ a̧ hɔ ŋmaa in o kuti saɗi na.

⁸Ŋgimbi n'am mbaɗi nɛ o zak nɔ‘i, ŋma geɗek-a sɔia mgbara o dɔka-a, ɓɛɛ gbin o ŋma taar a nu. Gbaayí a̧a̧ so tɛ be zak'i hee gbaayí bíí ga, ɓɛɛ nú-a a̧a̧ so sɛnɛ mbɛt nɛ tɔ̧ nɛ kpoko-wen.

⁹«Mi zɔk so nɛ mɔ, ɓɛɛ wa kai o damti tɛnɛ a nu, ɓɛɛ ŋma sɔkawi duk nu zu-a: laa kɔ̧-a̧ ɔ ndáká-ndáká, mui̧-zu-a ɔ fɛŋa hee buma sami ga, damti kɔ̧-a̧ nɛ leɓe-wee, o zika naŋ damti ɔ yoŋgoŋgo.

¹⁰Ŋma zɔm wee gbo nɛ tɛ-a hee nana-yì a̧ fok ga. O bíí zu ŋmaa booro nɛ booro ya de nɛ tom ha̧ a̧; ɓɛɛ bíí booro-ɓu war booro-ɓu a̧a̧ so ti a̧. Wa hu̧i̧a̧ kalata, ɓɛɛ kita ku̧ naŋ.

¹¹«Mi duka zii nɛ o kpoko-wen nɛ zak saɗi'i tɔ̧‘i, ɓɛɛ ŋgimbi n'am zɔk nɛ saɗi'i, wa gbɛɛ a̧; ɓɛɛ wa a̧k a̧ kai a tɛ wee.

¹²Wa dora ɔɔ-wan ko o dɔka saɗi, ɓɛɛ wa e ha̧ wa mɛ ya kpasa siti hɔ tɛ ŋma ŋgimbi nɛ‘i gɔna ha̧ wa.

¹³«Tɛ zu n'am ɔ mɛ zɛ‘i, mi zɔka ŋma bíí nɛ zir nɛ yiwese nɛ mgbara bu-zan hee Bem ko bíí ga; a̧ nɛ̀ɛ̀ si ti damti, ɓɛɛ wa mgbɔ a̧ e ti sɔkawi'i.

¹⁴Wa ee a̧ tɛ wan, ha̧ nɛ gasamɔ in mɔɔ-wan ha̧ a̧, ɓɛɛ o zuduk bíí, in o tugun bíí nɛ tɔ̧ nú nɛtɛ nɛtɛ de tom ha̧ a̧. Ɔɔ-wan kɔ̧-a̧ beka kaɗi na kpoo nɛ kpoo; ŋma mɔɔ-ɗaŋ mɔɔ-wan kɔ̧-a̧ yinɛ bo na mbɛt.

¹⁵«War kɔ‘m Daniɛl, see-am ŋmana, kíì dea'm nyɛmna tɛ zu'i n'am ɔɔ tɛ‘m'i.

¹⁶Mi ɗɔla pii katɛ o ŋma bíí nɛ yaa so hi̧i̧, ɓɛɛ mi ak ŋma kpɔk mɛ tɔ̧ gba̧a̧ mɔɔ nɔ‘i ha̧‘m. A̧ kɔ̧ɔ̧ ɗɔɔ-aa, ɓɛɛ a̧ tɔ̧ gba̧a̧ o mɔɔ nɔ‘i n'am zɔka'i ha̧‘m hee mɔ'ɔ ga:

¹⁷‹O zɔm saɗi naar nɔ‘i nɛ o gasa wannu naar nɛ tɛ kur zu nu’ɛ;

¹⁸ɓɛɛ o sa̧a̧-bíí ko Wan nɛ duk ŋgɔn mɛ tɛ ɔ wan, ɓɛɛ wan'i tɛ duk er-wa kpoo nɛ kpoo hegɔ ɓɔnsɛnɛ.›

¹⁹«Mi aka mɔ woyo zu sɔŋkur naar ŋga saɗi nɛ hɔ ŋmaa in o dɔka-a na, nɛ gba̧a̧-nin-a nɛ boi, nɛ sɔ̧ɔ̧-er-a nɛ ndɛrɛ, nɛ nyɔŋ mɔ nɛ ŋgai, a̧k nɛnɛ a nu, i̧si̧ nɛnɛ‘i;

²⁰mi tɔ̧ɔ̧ ha̧ wa mɛ we ɗoŋ mɔ zu zak ɓu nɛ a̧a̧ zu saɗi'i, ɓɛɛ ká ŋma kpɔk sɔi gbonɛ ɓɛɛ gbin o ŋma kuti-a taar a nu, nɛ a̧a̧ so nɛ gbaayí yiitoo in nú nɛ duk so tɔ̧ nɛ zɔm kpoko-wen'i; duk so hee zak'i gana o dɔka-a ga.

²¹«Mi zɔka so zak'i fara dee biro in sa̧a̧-bíí, ɓɛɛ a̧ gan wa lɛŋ nɛ ŋgai,

²²hɔ ŋgimbi nɛ sɔkawi hɔɔ ɓɛɛ wa gɔn kita nɛ de-a zu sa̧a̧-bíí ko Wan nɛ duk ŋgɔn mɛ ha̧ nɛ wan ha̧ wa.

²³«Wi’ɛi tɔ̧a̧: ‹Naar saɗi nɛ́ naar wan zu nu’ɛ, nɛ̀ tɛ duk kɔ‘i nɛtɛ mgbara o dɔka wan lɛŋ. A̧ tɛ nyɔŋ mɔ nɛ duk zu nu lɛŋ, a̧k nɛnɛ a nu, i̧si̧ nɛnɛ.

²⁴War ko o zak ɓu, mɛ nɛ o wannu ɓu nɛ tɛ ba wan nɛ ɗoŋ, ɓɛɛ ŋma mbe-a tɛ ba wan nɛ ɗoŋ woyo; a̧ beka duk hee o kuti-a ga na, ɓɛɛ a̧ gbɛɛ wannu taar a nu.

²⁵A̧ tɛ tɔ̧ ɗaŋ wen ha̧ Wan nɛ duk ŋgɔn mɛ, usi nɛ bɔnɛ ha̧ o sa̧a̧-bíí kɔ̧-a̧; a̧ tɛ kii mɛ kpai ŋgimbi in heembea, ɓɛɛ o sa̧a̧-bíí tɛ ya kɔ̧ er-a sɛn tɛ pɛ taar nɛ reeta.

²⁶Wa tɛ ɓa kita, ba nɛ wan yinɛ er-a, ɓɛɛ wa ɗaŋa a̧ fo nɛ a̧ yinɛ kpoo nɛ kpoo.

²⁷Nɛ̀ war ko wan, mɔɔ-wan in gasamɔ zaŋnu’ɛ lɛŋ, wa tɛ ha̧ há̧ o sa̧a̧-bíí ko Wan nɛ duk ŋgɔn mɛ. Wan kɔ̧-a̧ tɛ duk kpoo nɛ kpoo; o dɔka wan lɛŋ tɛ de tom mbo nɛ zu ha̧ a̧.›

²⁸«Wee-ɗoŋ-mɔ kɔ‘m kaɗa hɛ̧ɛ̧. «War kɔ‘m Daniɛl, mi taa mɔ ɓɛɛ mi sakali nɛ dɔka-a, yí‘m kpaia, ɓɛɛ mi e mɔ‘i kɔ̧ see-am.»