Read Northwest Gbaya OSEE 5 Bible Online

OSEE 5 - Northwest Gbaya bible

OSEE 5

¹Ɛnɛ o wi-ɗafi-sɔ̧, ɛ̀nɛ̀ zíí wen n'am tɔ̧'ɛ: Nutua ko Israɛl, ɛ̀nɛ̀ dúk kéɗéŋ; ɛnɛ o bíí nutua-wan mbɛt, ɛ̀nɛ̀ yéŋ zer'nɛ́ nɛ de-a. Ɛ́nɛ́ nɛ̀ kita tɛ tik'nɛ́, wen ɛnɛ so nɛ o wi-gɔn-kita nɛ duka nɛ pɛr-ba-naŋ sɛn Mispa, in yɔk-ba-wi zu kaya Tabɔr.

²Ɛnɛ yee tɛ yɔɔ-kaya bɔr ger'nɛ́. Wen zu mɔ‘i, mi tɛ usi bɔnɛ h’ɛ́nɛ́, ɛnɛ lɛŋ.

³Mi iŋa ndaa Efraim lɛŋ; ɓɛɛ ŋma mɔ ko Israɛl nɛ yɔa'm bo na mbɛt. Efraim, mɛ yee tɛ dee dàlà, ɓɛɛ búù-a ba Israɛl.

⁴Wa nyɛm mɛ si ɗoŋ tɛ Sɔ̧ kɔ-wa na wen zu deemɔ kɔ-wa. Wɔ dee dàlà ɔ ŋgaia tɛ wa, ɓɛɛ wa iŋ GASA WAN ɓɔna.

⁵Ŋmaŋa-tɛ ko Israɛl de nɛ sedaako zu a̧; Efraim in Israɛl tir nɛ yɔɔ ɗaŋmɔ kɔ-wa, ɓɛɛ Juda tira yɔɔ-aa mbɛt in wa.

⁶Nɛ̀ oi sami in ndai kɔ-wa nɛ wa kai nɛnɛ mɛ kii nɛ GASA WAN'i, wa beka kpa a̧ na, wen a̧ yuu mgbara wa!

⁷Wa dee mɔ ba tɛ GASA WAN, wen o bem nɛ wa koa nɛ o be-dàlà. Wen zu mɔ‘i, tɛ mbe-yi-zɛ wi beka iŋ oi wa gu nɛ o fɔ kɔ-wa ɓɔna.

⁸Ɛ̀nɛ̀ dɔ́m zak sɛn Gibea, ɛ̀nɛ̀ dɔ́m mbia sɛn Rama, ɛ̀nɛ̀ gbár biro ha̧ o wi Bɛt-Avɛn.[10] O be Bɛnjamin, mɔ a̧ hai'nɛ́ nɛ ɗoŋ tɛnɛ‘i!

⁹Efraim tɛ kifi bɛɛ-oi wese nɛ gasa bɔnɛ tɛ tik zu wa. Wen’ɛ n'am tɔ̧ mgbara o duk be Israɛl'ɛ, nɛ kpasawen!

¹⁰O be-wan Juda nɛ o wi-ɗɔŋ-gbisi; nyimsea kɔ‘m tɛ kai wa yaknɛ hee mbɛŋ ga.

¹¹Kita tika Efraim ɓɛɛ mɔ ba tɛ-a, wen a̧ e ndaka ɗoŋ o gee tum mɔ duk na.

¹²Wen zu mɔ‘i, mi tɛ duk hee zɛmɛ nɛ tɛ ɗaŋ Efraim ga, ɓɛɛ mi duka hee dadaka nɛ tɛ ɗaŋ nutua ko Juda ga.

¹³Efraim zɔka zɛ́ɛ́ kɔ‘i, ɓɛɛ Juda zɔk da̧i̧ kɔ‘i mbɛt; nɛ mɔ'ɔ nɛ Efraim nɛ̀ɛ́ sitɛ Asirii, ɓɛɛ tom o betom sitɛ gasa wannu. Ɓɛɛ gasa wannu'i beka ha̧ daama h’ɛ́nɛ́ na, kóó dea-a ha̧ da̧i̧ k’ɛ́nɛ́ mɛ wii na mbɛt.

¹⁴Wen nɛ́ mi GASA WAN a̧ tik zu Efraim hee dila ga, ɓɛɛ mi tika zu nutua ko Juda hee daŋa-dila ga mbɛt; mi tɛ a̧k kpoo-tɛ-wa a nù pɛ́sɛ́-pɛ́sɛ́, ɓɛɛ mi yaka kɔ‘m. Mɔ n'am baa kaɗi, wi-ɓara-a er-am yinɛ, bo na.

¹⁵Mi tɛ yak mɔ kɔ‘m siɗoŋ si tɛ kɔ‘m, hɔ ŋgimbi nɛ wa tɛ iŋ‘e wa dee ɗaŋmɔ ha̧ wa mɛ kii am woyo, wen mɛ nɛ zu bɔnɛ‘i a̧ wa tɛ kii nɛ‘m.