Read Northwest Gbaya JƆƐL 1 Bible Online

JƆƐL 1 - Northwest Gbaya bible

JƆƐL 1

¹Wen nɛ GASA WAN tɔ̧ɔ̧ ha̧ Jɔɛl bem ko Pɛtuɛl nɛ mɔ'ɔ.

²Ɛnɛ o kuti-wi, ɛ̀nɛ̀ zíí wen’ɛ; ɛnɛ o bíí nu Juda lɛŋ, ɛ̀nɛ̀ yéŋ zer'nɛ́. Pɛrti mɔ hegɔ hɔɔ tɛ ŋgimbi k’ɛ́nɛ́, kóó tɛ ŋgimbi ko o zɔmdáa k’ɛ́nɛ́ nɛti kaɗi?

³Ɛ̀nɛ̀ tɔ̧́ nyɛrɛ mɔ'ɔ ha̧ o bem k’ɛ́nɛ́, ɓɛɛ o bem k’ɛ́nɛ́ tɔ̧ɔ̧ kɔ‘i ha̧ o bezaŋ-wa, ɓɛɛ o bezaŋ tɔ̧ɔ̧ ha̧ o bezaŋ mɛ ɗoŋ.

⁴Mɔ nɛ nàá-dɔɔsɔ̧ɔ̧ ea, nàá-wazala nyɔŋa. Mɔ nɛ nàá-wazala ea, nɛ́ gba-dɔya a̧ nyɔŋa; mɔ nɛ gba-dɔya ea, nɛ́ ndondo-gba-dɔya a̧ nyɔŋa yinɛ lɛŋ.

⁵Ɛ̀nɛ̀ tún, o wi-gbɛ-dɔ̧ɔ̧, ɛ̀nɛ̀ hí̧í̧ kɔ̧a̧; ɛnɛ o wi-nɔ-dɔ̧ɔ̧ lɛŋ, ɛ̀nɛ̀ áí nú‘nɛ́ wen nɛ̀ mbe dɔ̧ɔ̧ bo h’ɛ́nɛ́ mɛ nɔ ɓɔna.

⁶O gii gba-dɔya bi nɛ nu kɔ‘m, wa ɔ ŋgaya, wi nyɛm mɛ tɔr wa na; gba̧a̧-nin-wa nɛ́ nin dila, o goko-wa nɛ́ goko nana dila.

⁷Wa dee ha̧ fɔ-nyak-dɔ̧ɔ̧ kɔ‘m mɛ kifi geemɔ, wa ɓira o te-mbɔra kɔ‘m a nu sɛ́kɛ́ɗɛ́-sɛ́kɛ́ɗɛ́. Wa ɗaŋa mɔ hús-hús, ɓɛɛ gbaa-er-te fɛŋ buu.

⁸Ɛ̀nɛ̀ pɛ́ see'nɛ́ hee be-zɔŋa nɛ pi̧i̧ laa-zim-fio hi̧i̧ nɛ fio wii-zɔŋa kɔ̧-a̧ ga.

⁹Aa-zɛzɛ nu in ha̧a̧mɔ kɔ̧ Tua ko GASA WAN bo ɓɔna, ɓɛɛ o wi-ɗafi-sɔ̧ nɛ ya nɛ o wi-de-tom ko GASA WAN hi̧i̧ nɛ fio.

¹⁰Wa ɗaŋa o fɔ lɛŋ, nù hí̧í̧ nɛ́ fio. Wa ɗaŋa alkamaari, mbe dɔ̧ɔ̧ bo ɓɔna, mbe nɔ bo ɓɔna mbɛt.

¹¹Ɛ̀nɛ̀ yá nɛ ɗaŋsee, ɛnɛ o wi-wa-fɔ, ɛ̀nɛ̀ áí nú‘nɛ́ o wi-gun-waya-te wen zu alkamaari in be-fon. Nyɔnɔ sɛn kpɛɛfɔ ɗaŋa lɛŋ.

¹²Nyak-dɔ̧ɔ̧ kora lɛŋ, do te-mbɔra ɗaŋa ai a nu, kóɓò, ndɛŋgɛ, ndìà, o te kpɛɛfɔ lɛŋ kora; desee bo mgbara bíí ɓɔna.

¹³O wi-ɗafi-sɔ̧, ɛ̀nɛ̀ pí̧ laa-zim-fio, ɛ̀nɛ̀ hí̧í̧ fio; o wi-de-tom zu fara-dɔ-kpoo-sɔ̧, ɛ̀nɛ̀ áí nú‘nɛ́. Ɛnɛ, o wi-de-tom ko Sɔ̧ kɔ‘m, ɛ̀nɛ̀ gáɓí tɛ‘nɛ́ nɛ bufu duk nɛnɛ mɔ sa̧, wen ha̧a̧mɔ in aa-zɛzɛ bo kɔ̧ Tua ko Sɔ̧ k’ɛ́nɛ́ ɓɔna.

¹⁴Ɛ̀nɛ̀ hé mbéá wen zima yi, ɛ̀nɛ̀ sá sara mɔi̧a-a wen gasa Sɔ̧, ɛ̀nɛ̀ mɔ́í̧ o kuti-wi in o bíí nu’ɛ lɛŋ si kɔ̧ Tua ko Sɔ̧ k’ɛ́nɛ́, ɓɛɛ ɛ̀nɛ̀ áí nú sitɛ GASA WAN Sɔ̧ k’ɛ́nɛ́.

¹⁵Wese ko GASA WAN hɛɗa kaɗi, wese nɛ Wan nɛ a̧a̧ nɛ ŋgayamɔ lɛŋ tɛ ba ɗaŋamɔ tɛnɛ. Oee ɗaŋ wese kíì wa!

¹⁶Bo nɛ nyɔŋmɔ ɓana nɛ yí yɛ na nde? Bo nɛ tortɛ in nyɛŋɛ kaɗa kɔ̧ Tua ko GASA WAN nɛ yi yɛ mbɛt na nde?

¹⁷O nyɔnɔ lɛŋ fee ɗɔɔ ŋga kora nu; o fara-a-nyɔnɔ ɗaŋa, o dam gbina wen alkamaari bo ɓɔna.

¹⁸Ɛ̀nɛ̀ zíí gee dɔma-a nɛ o mɔ-dai dɔm; ndai zɔk nɛ bɔnɛ wen wa bó nɛ̀ nyɔŋmɔ ɓɔna; bɔnɛ tika zu o sami mbɛt.

¹⁹Mi ai nɛ nú sitɛ‘nɛ́, GASA WAN, wen wee dɔ nɛ zɔ̧ fara nɛ o ndai nyɔŋ mɔ sɛnɛ; leɓe-wee dɔɔ o te zaŋbɛɛ lɛŋ a nu.

²⁰O saɗi-zaŋbɛɛ zik nɛ tɛ pii tɛ‘nɛ́; foka-yì ɔ̧sa̧ gɔn mgbót-mgbót. Zɔ̧ fara nɛ o ndai nyɔŋ mɔ sɛnɛ bia wee lɛŋ.