Read Northwest Gbaya JƆƐL 2 Bible Online

JƆƐL 2 - Northwest Gbaya bible

JƆƐL 2

¹Ɛ̀nɛ̀ dɔ́m zak zu sa̧a̧ kaya Siɔŋ mbaŋ nɛ tɛ o bíí; ɛnɛ o bíí nu’ɛ lɛŋ, tɛ‘nɛ́ a̧ nak, wese ko GASA WAN a̧ tɛ‘i, wese'i hɛɗa kaɗi.

²Wese'i nɛ wese ɗuka tum, wese tu̧-zan in zɔm kutu. O gii gba-dɔya a̧ tɛ‘i hee mɔ'ɔ nɛ zɛ de nɛnɛ zu o kaya ga;[1] wa ɔ dɔka in wa ɔ ŋgaya. Wi tɛ zɔk pɛrti mɔ hegɔ nɛti na, in wi beka zɔk hegɔ woyo ɓɔna hɔ nɛnɛ tɛ o bezaŋ mɛ ɗoŋ mɛ.

³Wa ɗaŋ nɛ o mɔ ti wa lɛŋ hee wee nɛ bíí zɔ̧'ɛ ga; nɛ̀ ɗoŋ-wa nɛ́ leɓe-wee a̧ ndar mɔ nɛnɛ. Nɛti hɔa-a kɔ-wa, nu duka so nɛ́ de mbɔŋgi hee Fɔ Edɛn ga; ɗoŋ yaka-a kɔ-wa, nu kifa nɛ gee ŋga-gbárà; ŋma mɔ nɛ wa ee duk bo na.

⁴Wa ya hee o nyaŋa ga; wa ma yi hee o nyaŋa-biro ga.

⁵Wa kpíɗí nɛ o zu kaya nɛnɛ, ɓɛɛ duk hee wi zii nɛ giti o keekee-biro in hee tuɓa-a ko leɓe-wee nɛ bíí kora zɔ̧'ɛ ga. Wa tɛ hee o ŋga dukbíí nɛ nɛka wen biro ga.

⁶Tɛ hɔa-a kɔ-wa, tɛ o dukbíí gbina gbɛlɛsuwɛɛ, ɓɛɛ kíì dee ha̧ sɔnti-wa mɛ kpai.

⁷O gba-dɔya tik biro hee o ŋga-wi ga, wa daŋ garo hee o wi-biro ga, kóó o nde ba nɛ yuwar kɔ‘i; wa a̧r war na.

⁸Wa gɔn ti ŋmaa na; kóó o nde ba nɛ yuwar kɔ‘i tan ti. Kɔ-wa nɛ yaka zu mɔ nɛ gɔn ti wa; ŋma mɔ nyɛm mɛ dor wa na.

⁹Kɔ-wa nɛ pɛsa-a dam saaye, ma nɛ yi nɛ o zu ŋgeŋ, daŋ nɛ o tua, ye nɛnɛ nɛ o woi-aa hee o wi-zuzu ga.

¹⁰Ka wa nɛ siti ɓɛɛ nu nak nak ti wa; duk hee yiwese tɛ bin bin ga. Wese ba ɓɔna, o sɔra in nyaŋa-zɛ tok ɓɔna,

¹¹ɓɛɛ tiger GASA WAN mgbimgbi ti o wi-biro kɔ‘i; o duk wi-biro nɛ zii wen nú-a ɔ dɔka in wa ɔ ŋgaya. Wese ko GASA WAN tɛ duk nɛ ŋga wese nɛ tɛ pi̧ kíì tɛ bíí. Nɛ o'o tɛ kpasi wese'i o?

¹²«Kinii nɛ ŋgimbi h’ɛ́nɛ́ mɛ pii ɗoŋ tɛ‘m. Ɛ̀nɛ̀ píí ɗoŋ nɛ see'nɛ́ lɛŋ. GASA WAN a̧ tɔ̧ wen’ɛ: Ɛ̀nɛ̀ zím yi, ɛ̀nɛ̀ hí̧í̧ kɔ̧a̧; ɛ̀nɛ̀ áí nú ha̧‘m.

¹³A̧ka̧ laa k’ɛ́nɛ́ de ŋma mɔ ha̧‘m na. Ɛ̀nɛ̀ kpáí nɛ duka-a k’ɛ́nɛ́ ɛ̧́.» Ɛ̀nɛ̀ píí ɗoŋ pii tɛ GASA WAN Sɔ̧ k’ɛ́nɛ́; a̧ nɛ́ yaa-de-demɔ in a̧ nɛ wi-de-ko; see-aa nyim nɛ haya-a na in a̧ e ha̧a̧nú kɔ̧-a̧ duk na. Ɓan na a̧ ee dee ŋgamɔ in bíí duk kaɗi.

¹⁴O'o iŋa o, ŋmafara GASA WAN Sɔ̧ k’ɛ́nɛ́ tɛ kpai taamɔ woyo, ɓɛɛ a̧ ha̧a̧ o demɔ h’ɛ́nɛ́; hegɔ ɛnɛ tɛ ha̧ mɔ, ɓɛɛ ɛnɛ aa zɛzɛ ha̧ a̧.

¹⁵Ɛ̀nɛ̀ dɔ́m zak sɛn Siɔŋ; ɛ̀nɛ̀ hé mbéá wen zima yi, ɛ̀nɛ̀ sá sara mɔi̧a-a wen gasa Sɔ̧.

¹⁶Ɛ̀nɛ̀ mɔ́í̧ dukbíí ɛ̀nɛ̀ sá sa̧a̧ giiwi mɛ mɔi̧ wen gasa Sɔ̧ ɛ̀nɛ̀ mɔ́í̧ o gbɛ́rɛ́, o be-ŋgaiwi in o obem nú-bere mbɛt. O wi nɛ baa ŋmaa nɛ mbe-a a̧ e tua-ba-ŋmaa kɔ-wa duk, ɓɛɛ wa a̧ tɛ.

¹⁷O wi-ɗafi-sɔ̧ nɛ de tom ha̧ GASA WAN a̧ hi̧i̧ kɔ̧a̧ kɔ̧ Tua ko GASA WAN, mgbara nú-zala in fara-dɔ-kpoo-sɔ̧, ɓɛɛ wa a̧ ai nú ha̧ Sɔ̧ hee mɔ'ɔ ga: «GASA WAN, ɛɛ nɛ dukbíí k’ɛ́nɛ́, ɛ̀nɛ̀ dé ko h’ɛ́ɛ́! Ɛɛ nɛ mɔɔ-oi k’ɛ́nɛ́, k’ɛ́nɛ́ de ha̧ mɔɔ-búù mɛ tik zu yɛ na! K’ɛ́nɛ́ de ha̧ o ŋma gɔni bíí mɛ mam yɛ tɔ̧ nɛnɛ‘e: ‹Sɔ̧ k’ɛ́nɛ́ a̧a̧ bɔɔ dee nde?› na.»

¹⁸See GASA WAN baa nù kɔ‘i nyɛmna; a̧ dee ko ha̧ dukbíí kɔ̧-a̧,

¹⁹ɓɛɛ a̧ kifi nú ha̧ wa tɛ kɔfa-sɔ̧ kɔ-wa'e: «Mi tɛ ha̧ alkamaari, mbe dɔ̧ɔ̧ in mbe nɔ h’ɛ́nɛ́ woyo; ɛnɛ tɛ kpa o mɔɔ nɔ‘i nɛ dɔka-a. Mi beka de ha̧ búù mɛ ba'nɛ́ ti o gɔni bíí ɓɔna.

²⁰Mi tɛ ndak o gba-dɔya nɛ tɛ tɛ nɛ ká̧-zan-mɛ́-ŋgɔn nɛ nyɛi̧a-a si ŋga-gbárà mɛ. Mi tɛ ndak o wí-nɛ̀-gɔ̀n-zù kɔ-wa a ɗɔɔ gba-tɔp-tɔŋ nɛ war daŋa-wese, ɓɛɛ mi ndaka o wi-kpe-ndaa-gɔtɔ a ɗɔɔ gba-tɔp Tɔŋ nɛ war yee-wese. Pɛ̀r wɔr-wa tɛ nun nɛ ŋgaya-a, ɓɛɛ zaŋa ŋmaa in búk ɓókólók.» Nɛ mbetɛ, wa ɗaŋa so mɔ nyɛmna!

²¹Kɔ-mɛ, nu’ɛ, ká mɛ de kíì na; mɛ̀ kpá desee, mɛ̀ dé nyɛŋɛ wen GASA WAN de nɛ o gasamɔ.

²²Ɛnɛ o saɗi, k’ɛ́nɛ́ de kíì ɓɔna, wen mbɔɗi zɔ̧ ku̧u̧ naŋ ɓɔa-a, o te waia kaɗi, o te-mbɔra in waya-nyak-dɔ̧ɔ̧ yá zúk-zúk gee.

²³Ɛnɛ o wi nɛ ɔ sɛn Siɔŋ, ɛ̀nɛ̀ kpá desee, ɛ̀nɛ̀ dé nyɛŋɛ wen zu GASA WAN Sɔ̧ k’ɛ́nɛ́. A̧ tɛ de ha̧ kórò mɛ hɔ mɛ tiger-bɛɛ wen gbaka'nɛ́; a̧ tɛ de ha̧ kórò tiger-bɛɛ in wan mɛ nu kórò mɛ hɔ nɛ dɔka-a hee nɛti ga.

²⁴O fara-gusi-alkamaari tɛ dun; o gba kpánà tɛ dun nɛ̀ mbe dɔ̧ɔ̧ in mbe nɔ̧́.

²⁵GASA WAN tɔ̧a̧: «Mi tɛ ha̧ mbe mɔ h’ɛ́nɛ́ woyo oi o nyɔnɔ nɛ o ŋga wi-biro kɔ‘m, o nàá-dɔɔsɔ̧ɔ̧, o nàá-wazala, o gba-dɔya in o ndondo-gba-dɔya ɗaŋa, wen nɛ́ mi a̧ toma so wa mɛ bi'nɛ́.

²⁶Ɛnɛ tɛ nyɔŋ mɔ zaŋ‘nɛ́ sur, ɛnɛ tɛ gas'am, mi GASA WAN Sɔ̧ k’ɛ́nɛ́, nɛ dee o gba demɔ wen'nɛ́; hegɔ foe beka de dukbíí kɔ‘m woyo ɓɔna.

²⁷Hegɔ ɛnɛ tɛ iŋ nde, mi a̧a̧ sɛn mgbara'nɛ́, o be Israɛl. GASA WAN Sɔ̧ k’ɛ́nɛ́ nɛ́ mi nɛ zu'm, ŋma bo na. Hegɔ foe beka de dukbíí kɔ‘m woyo ɓɔna.»