Read Northwest Gbaya AMƆS 7 Bible Online

AMƆS 7 - Northwest Gbaya bible

AMƆS 7

¹Mɔ nɛ GASA WAN Sɔ̧ kɔ‘m usa ha̧‘m tɛ hɔɔ-zu nɛ mɔ'ɔ. A̧ dee ha̧ o gii gba-dɔya mɛ tik, ŋgimbi nɛ mbɔɗi zɔ̧ ku̧u̧ naŋ ɓɔa-a, ɗoŋ nɛ‘i gɔna zɔ̧-hoe ha̧ wannu kaɗi.

²Hee mɔ'ɔ nɛ o gba-dɔya nɔ‘i nyɔŋa zɔ̧ tɛ nu'i lɛŋ yinɛ ga, mi tɔ̧a̧: «GASA WAN Sɔ̧ kɔ‘m, mi aia nú h’ɛ́nɛ́, ɛ̀nɛ̀ é ɗaŋmɔ ko nutua ko Jakob ha̧ a̧, wen kà bó hegɔ na, a̧ nyɛma so mɛ kpasi nde, a̧ n'aa duk kɔ̧-a̧ hee obem ga’ɛ?»

³GASA WAN kpaia taamɔ kɔ‘i, ɓɛɛ tɔ̧: «Mi beka de mɔ‘i ɓɔna.»

⁴Mɔ nɛ GASA WAN Sɔ̧ kɔ‘m usa ha̧‘m tɛ hɔɔ-zu nɛ mɔ'ɔ. A̧ gɔna kita nɛ wee. Wee'i kpa̧i̧a̧ yi ɗɔɔ nu ɔ̧sa̧, ɓɛɛ ku̧ naŋ dea-a ha̧ mɔ mɛ zu nu mɛ kor mbɛt,

⁵ɓɛɛ mi tɔ̧: «GASA WAN Sɔ̧ kɔ‘m, mi aia nú h’ɛ́nɛ́, ɛ̀nɛ̀ yór, wen kà bó hegɔ na, nutua ko Jakob nyɛma so mɛ kpasi nde, a̧ n'aa duk kɔ̧-a̧ hee obem ga’ɛ?»

⁶GASA WAN Sɔ̧ kɔ‘m kpaia taamɔ kɔ‘i, ɓɛɛ tɔ̧: «Mi beka de mɔ‘i ɓɔna mbɛt.»

⁷Mɔ nɛ GASA WAN Sɔ̧ kɔ‘m usa ha̧‘m mɛ zɔk woyo nɛ mɔ'ɔ. A̧ kura yor zu ŋgeŋ ndɛrɛ[5], a̧ kasa ŋma ndɛrɛ er-a mbɛt.

⁸A̧ aka'm: «Ge a̧ mɛ zɔk ge, Amɔs?» Mi kifa nú: «Nɛ ndɛrɛ a̧‘m zɔk.» Ɓɛɛ GASA WAN kɔ‘m tɔ̧ ha̧‘m: «Mi tɛ mɛ pi̧ ndɛrɛ mgbara dukbíí kɔ‘m Israɛl; mi beka kpe yí zu ɗaŋmɔ kɔ̧-a̧ woyo ɓɔna.

⁹Mi tɛ ɗaŋ o fara ɗafi géé-sɔ̧ ko Izak lɛŋ; o sa̧a̧ fara Israɛl tɛ kifi nɛ bɛɛ-oi. Mi tɛ gɔm o bíí nutua ko Jeroboam nɛ gba-paa gbɛ lɛŋ.»

¹⁰Amasia wi-ɗafi-sɔ̧ sɛn Bɛtɛl pi̧i̧ tom tɔ̧ ha̧ Jeroboam wannu Israɛl hee mɔ'ɔ ga: «Amɔs ɗaŋ nɛ wen-tɛ‘nɛ́ sɛn nu tua Israɛl. Nu nɛ oi-aa nyɛm mɛ kpɛk wen kɔ̧-a̧ ɓɔna.

¹¹Wen n'aa tɔ̧ nɛ mɔ'ɔ: ‹Jeroboam tɛ fe nɛ fio gba-paa; ɓɛɛ wa tɛ kai o be Israɛl nɛ bara-biro yaknɛ nɛ nyɛi̧a-a nɛ nu kɔ-wa.› »

¹²Nɛ mɔ'ɔ nɛ Amasia tɔ̧ɔ̧ ha̧ Amɔs: «Wi-zɔk-mɔ, ɛ̀nɛ̀ yák hɛ̧ɛ̧, ɛ̀nɛ̀ nɛ́ɛ̀ tɔ̧́ wen oi nú Sɔ̧ si nu Juda mɛ, kii nɛ mɔɔ-nyɔŋ si hi̧i̧.

¹³K’ɛ́nɛ́ tɔ̧ wen oi nú Sɔ̧ sɛn Bɛtɛl hɛ̧ɛ̧ woyo ɓɔna, wen ɛ̧ɛ̧ nɛ sa̧a̧ fara ko wannu, fara n'aa gasi Sɔ̧ sɛnɛ.»

¹⁴Ɓɛɛ Amɔs kifi nú ha̧ Amasia: «Mi bó só nɛ́ wi-tɔ̧-wen oi nu Sɔ̧, kóó ŋma bezaŋ wi-tɔ̧-wen oi nu Sɔ̧ na; mi duka so kɔ‘m nɛ wi-dai-sami, ɗafi nɛ o te-mbɔra,

¹⁵ɓɛɛ nɛ GASA WAN a̧ saa'm ɗoŋ mɔ-dai kɔ‘m, tom nɛ‘m'e a̧‘m nɛ́ɛ̀ tɔ̧́ wen oi nú-wi ha̧ Israɛl, dukbíí kɔ‘i.

¹⁶Mɛ‘e ká‘m tɔ̧ wen oi nú Sɔ̧ zu Israɛl na, ká‘m bur zɔm wen zu nutua ko Izak na. Ɓɛɛ kinii, mɛ̀ zíí wen ko GASA WAN,

¹⁷wen n'aa tɔ̧ nɛ mɔ'ɔ: ‹Kóò kɔ-mɛ tɛ kifi duk nɛ kó-de-mɔ nɛ mbɔɗɔnu saaye, gba-paa tɛ kum o bem kɔ-mɛ mɛ́ be-wiwii-a in be-okoo-a. Wa tɛ we nu kɔ-mɛ kɛ̧ nɛnɛ. Mɛ́ nɛ̀ zu mɛ‘i, mɛ tɛ nɛ̀ɛ́ fe tɛ ŋma gɔni nu, fara nɛ o bíí ɗafi o géé-sɔ̧ sɛnɛ, ɓɛɛ wa tɛ kai o be Israɛl nɛ bara-biro yaknɛ nyɛi̧ nɛ nu kɔ-wa.› »