Read Northwest Gbaya AMƆS 8 Bible Online

AMƆS 8 - Northwest Gbaya bible

AMƆS 8

¹Mɔ nɛ GASA WAN Sɔ̧ usa ha̧‘m tɛ hɔɔ-zu duka nɛ gɛsɛ gbɛ̧ waya-te.

²Nɛ mɔ'ɔ n'aa aka'm hee mɔ'ɔ ga: «Ge a̧ mɛ zɔk ge, Amɔs?» Mi kifa nú‘e: «Mi zɔk nɛ gɛsɛ gbɛ̧ waya-te.» Ɓɛɛ GASA WAN tɔ̧ ha̧‘m: «Dukbíí kɔ‘m Israɛl sɔka hee waya-te ga kaɗi. Mi beka kpe yi zu ɗaŋmɔ kɔ̧-a̧ woyo ɓɔna.

³Wese'i,[6] o kó-bii-gima kɔ̧ tua-wan tɛ bìì gima-aia-nú, o wɔr tɛ gbisi nɛ mbɔɗɔnu sinɛ, ɓɛɛ mɔ lɛŋ tɛ duk selele.»

⁴Ɛnɛ o wi nɛ de ŋgamɔ in o wisan, nɛ fo o ga̧a̧-wi yinɛ tɛ nu’ɛ, ɛnɛ zii.

⁵Wen n’ɛnɛ tɔ̧ nɛ mɔ'ɔ: «Gbaŋa mbe-yi-zɛ a̧ kaɗi bee h’ɛ́ɛ́ ɗɔr alkamaari k’ɛɛ! Wese-ɔm-tɛ a̧ yak bee h’ɛ́ɛ́ hú̧í̧ nu o dam k’ɛɛ, h’ɛ́ɛ́ we mɔ nyɛm sɛnɛ na, h’ɛ́ɛ́ kpai mɔɔ-we-dita-mɔ k’ɛɛ ká tɛɛ yor tan na,

⁶h’ɛ́ɛ́ ɗɔr alkamaari nɛ oi pumyulu-a ha̧ o wi-hi̧fi̧-mɔ er yɛ, ɓɛɛ ɛ́ɛ́ hi̧fa wi-kɔsa in wisan mbɛt nɛ kpa sede mɛ yoɓi nɛ ndárà nɛ wa kaia nɛ nyamandoi er yɛ na!»

⁷GASA WAN kana mɔ nɛ tɛ-wi hee mɔ'ɔ ga: «Mí nɛ̀ Jakob duk nɛ̀ tɛ'ɛ, tɛ‘m beka bi ɗoŋ deemɔ k’ɛ́nɛ́ na ɓɔnsɛnɛ!

⁸Mɛ nɛ wen zu mɔ‘i sa nu tɛ nak, ɓɛɛ o bíí zu nu lɛŋ tɛ zim mɔ. Nu tɛ kur nɛ oi-aa, ɓɛɛ gbɔsa si ɗɔɔ hee mɔ'ɔ nɛ nana-yì Nil sɛn Egiptɛ ha̧ nɛnɛ ɓɛɛ ɔ̧sa̧ nɛnɛ mbɛt’ɛ ga.»

⁹Nɛ GASA WAN Sɔ̧ kɔ‘m a̧ tɔ̧ wen’ɛ: «Nɛ bu-wese kerere a̧ wese tɛ ye nɛnɛ wese'i, ɓɛɛ tum baa nɛ nu mbɛt.

¹⁰Mi tɛ kpai o dee nyɛŋɛ tɛ ŋmaa k’ɛ́nɛ́ nɛ hi̧a̧-fio, in o gima k’ɛ́nɛ́ lɛŋ nɛ̀ aia-nú. Bíí lɛŋ tɛ mar nɛ bufu zim nɛ mɔ, ɛnɛ tɛ kpui zu'nɛ́ lɛŋ, hee mɔ'ɔ nɛ‘i de nɛnɛ tɛ fio ko kpɔk bem’ɛ ga. Wese'i, mɔ lɛŋ tɛ duk nɛ mɔɔ-tu̧u̧-see.»

¹¹Nɛ GASA WAN Sɔ̧ kɔ‘m a̧ tɔ̧ wen’ɛ: «Ŋma wese tɛ hɔ n'am tɛ pi̧ kaɓa zu nu; wɔ nɛ tɛ gbɛ o bíí‘i, bó nɛ́ wɔ nyɔŋmɔ, kóó wɔ yi na, ɓɛɛ mɛ nɛ wɔ zia wen ko GASA WAN Sɔ̧ a̧ tɛ gbɛ wa.

¹²Wa tɛ yambali nɛnɛ, nɛ ká̧-zan-mɛ́-ɗɔɔ si yee-wese, nɛ ká̧-zan-mɛ́-ŋgɔn si daŋa-wese kii nɛ wen ko GASA WAN mɛ zii, ɓɛɛ wa beka kpa na.

¹³«Wese'i, wɔ yi tɛ de ha̧ o de be-zɔŋa in o be-ŋgaiwi mɛ ziɓi,

¹⁴ɓɛɛ o bíí lɛŋ nɛ kan mɔ nɛ nin géé-sɔ̧ Samarii tɔ̧ nɛnɛ‘e: ‹Nɛ̀ nin sɔ̧ kɔ-mɛ Dan!› kóó: ‹Nɛ̀ nin Berseba!› tɛ yo nu, ɓɛɛ wa beka kur ɓɔna.»