Read Northwest Gbaya JƆNAS 1 Bible Online

JƆNAS 1 - Northwest Gbaya bible

JƆNAS 1

¹Ŋma wese, GASA WAN tɔ̧ɔ̧ ha̧ Jɔnas, bem ko Amitai:

²«Mɛ̀ kúr, mɛ̀ nɛ́ sɛn Ninivɛ, gasa ye’ɛ; mɛ̀ tɔ̧́ ha̧ o bíí saaye'i'e, ɗaŋmɔ kɔ-wa daŋa hɔ tɛ‘m.»

³Ɓɛɛ Jɔnas bɛ̧, kur kɔ‘i mɛ yu mɔ yak si Tarsis mɛ, nyɛi̧ nɛ GASA WAN. A̧ zira hɔ Jope, ɓɛɛ a̧ kpa ŋma gasa kombon nɛ de mɛ nɛ si Tarsis. A̧ yoɓa mɛ nɛ in wa wen yuu mɔ yak nyɛi̧ nɛ GASA WAN.

⁴Nɛ́ mɔ'ɔ nɛ GASA WAN toma ŋma ŋga hara-búk pi̧ zu wa, ɓɛɛ yi ɓoɓi kombon hee tɛ mbaŋ mbaŋ a nu ga.

⁵Kíì dee o wi-ba-kombon nyɛmna ɓɛɛ kóó o ndé ai nɛ nú ha̧ sɔ̧ kɔ‘i. Wa pɛɛ tui a ɗɔɔ yi wen ka kombon diti. Ŋgimbi'i, Jɔnas zira so kɔ‘i si ndaa kombon ɓɛɛ tik kɔ‘i ya mɛ kat.

⁶Wan-kombon hɔɔ kpa a ɓɛɛ tuɓi in a̧: «Nɛ́ ya ge a̧ mɛ ɔ kɔ-mɛ hegɔ'ɛ ge? Mɛ kur! Mɛ̀ áí nú ha̧ sɔ̧ kɔ-mɛ gbakna a̧ kpasa yɛ!»

⁷Ɓɛɛ o wi-ba-kombon tɔ̧ ha̧ o ŋmaa: «Ɛ̀ɛ̀ pí̧ tani, ɛ̀ɛ̀ zɔ́k wi nɛ ŋgamɔ'ɛ tɛ wen zu a̧!» Wa tana mɔ ɓɛɛ tani ba nɛ Jɔnas.

⁸Ɓɛɛ wa tɔ̧ ha̧ a̧: «Mɛ̀ tɔ̧́ mgbara-a h’ɛ́ɛ́ zii! Mɛ tɛ nɛ de? Ye kɔ-mɛ a̧a̧ de? Mɛ nɛ ge duk ge?»

⁹Ɓɛɛ a̧ kifi nú ha̧ wa: «Mi nɛ be hébreu; ɓɛɛ Sɔ̧ kɔ‘m n'am gasi nɛ GASA WAN mɛ yiwese nɛ dee yì in nù.»

¹⁰Ŋga kíì baa o wi-ba-kombon ɓɛɛ wa ak a̧: «Mɛ dee bɔɔ nɛ ge?» Ɓɛɛ nyɛm nɛ ɗoŋ mɔ n'aa wee ɗoŋ-aa ha̧ wa, wa iŋa'e a̧ yu nɛ mɔ nyɛi̧ nɛ GASA WAN.

¹¹Nɛ́ mɔ'ɔ nɛ wa tɔ̧ɔ̧ ha̧ a̧: «Nɛ́ ge ɛɛ tɛ de nɛ mɛ ha̧ yi’ɛ mɛ ga̧ h’ɛ́ɛ́ ge?» Wen wa zɔka'e yi pɛŋi pɛŋi nɛ ŋgaya-a gan kuti-a.

¹²Ɓɛɛ a̧ kifi nú ha̧ wa: «Ɛ̀nɛ̀ pí̧ nɛ‘m ɗɔɔ yi ɓɛɛ ha̧ yi ga̧ h’ɛ́nɛ́, wen mi iŋa mɛ nɛ wen zu'm a̧ ŋga búk’ɛ de nɛ ŋmaa in'nɛ̀ɛ́.»

¹³O wi-ba-kombon gaia kombon ha̧ wa mɛ hɔ nu ŋgere wo, takaɗi; yì pɛŋi kana pɛŋi nɛ ŋgaya-a gan kuti-a.

¹⁴Nɛ́ mɔ'ɔ nɛ wa aia nú ha̧ GASA WAN, ɓɛɛ wa tɔ̧: «Wen ge nde, GASA WAN? K’ɛ́nɛ́ de h’ɛ́ɛ́ mɛ fe wen zu dáa-wan’ɛ n’ɛɛ tɛ ba pi̧ ɗɔɔ yì'ɛ na. Kóó a̧ nɛ de bíí, kóó a̧ nɛ ɗaŋ bíí nde, ɛɛ iŋ na, ɓɛɛ k’ɛ́nɛ́ de ha̧ wen-fio kɔ̧-a̧ mɛ tik zu yɛ na. GASA WAN, ɛ̧ɛ̧ mɔ'ɔ nɛ dea’ɛ nɛ́ ɛnɛ'ɛ kɔ̧a̧.»

¹⁵Nɛ́ mɔ'ɔ nɛ wa baa Jɔnas pi̧ ɗɔɔ yì, ɓɛɛ yì ga̧ dezeŋ.

¹⁶Tɛ mɔ‘i, wa yuu GASA WAN, wa ɗafa a̧, ɓɛɛ wa ha̧ nú wen mboo zu ha̧ a̧ ɓɔnsɛnɛ.