Read Northwest Gbaya JƆNAS 4 Bible Online

JƆNAS 4 - Northwest Gbaya bible

JƆNAS 4

¹Mɔ‘i ɗaŋa see Jɔnas nyɛmna, ɓɛɛ see-aa nyim.

²A̧ wora GASA WAN ɓɛɛ a̧ tɔ̧: «Oo hegɔ wo, GASA WAN; mɔ n'am taa so nù kɔ‘m mɛ‘i, bo nɛ mɔ‘i ɛ́nɛ́ dea’ɛ na? Nɛ́ mɔ‘i a̧ dee so ha̧‘m mɛ yu mɔ yak si Tarsis mɛ, wen mi iŋa'e ɛnɛ nɛ yaa-de-demɔ, wan-de-ko ha̧ bíí; ɛnɛ nɛ Sɔ̧ nɛ de nyimsea nɛ haya-a na; kɔ̧ɔ̧mɔ k’ɛ́nɛ́ ɔ dɔka, ɓɛɛ ɓɔnsɛnɛ ɛnɛ kɔ̧ mɛ de ŋgamɔ in bíí na.

³Kinii, GASA WAN, ɛ̀nɛ̀ gbɛ́‘m yinɛ ha̧‘m ɔm wen fea-a dee gan duka-kpasa!»

⁴Ɓɛɛ GASA WAN Sɔ̧ kífí nú ha̧ a̧: «Mɔ nɛ see-mɛ nyim zu-a tɛ mɔ'ɔ nɛ́ ge?»

⁵Jɔnas gboo saaye yak nɛ́ɛ̀ duk nɛ war daŋa-wese ɓɛɛ ŋgazi gbáksák, duk ti ɗɔɔ-aa ha̧ a̧ mɛ zɔk mɔ nɛ tɛ hɔ zu ye'i.

⁶Nɛ́ mɔ'ɔ nɛ GASA WAN Sɔ̧ dee ha̧ ŋma nyak mɛ hɔ, ɓɛɛ daŋ zu gbáksák'i, de gi̧ɔ̧ kpe zu Jɔnas ha̧ see-aa mɛ ga̧. Jɔnas kpaa desee nyɛmna tɛ gi̧ɔ̧ nyak'i.

⁷Mɛ bin tɛ gɔna ndaa-zan, Sɔ̧ dee ha̧ ŋma be dɔk mɛ nyɔŋ gun nyak'i ɓir, ɓɛɛ nyak'i kor.

⁸Ɓɛɛ nɛ̀ wese daŋa, Sɔ̧ dee ha̧ ŋma kpɔra búk mɛ́ daŋa-wese hee wee ga mɛ ufi nɛ mɛ tɛnɛ. Nɛ́ mɔ'ɔ nɛ wese dɔɔ zu Jɔnas nɛ ŋgaya-a, ɓɛɛ tɛ-a mɔk hee a̧ tɛ fe fee ga; ɓɛɛ a̧ kɔfi fio'e, fea-a dee gan duka-kpasa.

⁹Ɓɛɛ Sɔ̧ tɔ̧ ha̧ a̧: «Mɔ nɛ see-mɛ ɗaŋ zu-a wen nyak’ɛ nɛ́ ge?» Ɓɛɛ Jɔnas kífí nú: «See-am beka ɗaŋ bɔɔ na hee ge? See-am tu̧u̧ hɔ tɛ fio gɔ!»

¹⁰Nɛ́ mɔ'ɔ nɛ GASA WAN tɔ̧ɔ̧ ha̧ a̧: «Kɔ-mɛ see-mɛ ɗaŋa wen nyak’ɛ nɛ mɛ de ŋma tom wen-aa na’ɛ, bo nɛ mɛ a̧ dee ha̧ a̧ mɛ gasi na mbɛt. Nɛ́ a̧ a̧ hɔɔ mɔ kɔ̧-a̧ gasi kpɔk wese, ɓɛɛ fe kana kpɔk wese'i mbɛt.

¹¹Ɓɛɛ nɛ̀ kɔ‘m, ko beka de'm wen zu gasa ye Ninivɛ na nde? Wen o bíí tɛ ye'i ɔ dɔka tɛ bíí booro-gɔmŋmaa-nɛ-booro-ɓu-yiitoo nɛ iŋ wiiko in gale na, in mɔ-dai kɔ-wa ɔ dɔka nyɛmna mbɛt.»