Read Northwest Gbaya TƆRA-BÍÍ 1 Bible Online

TƆRA-BÍÍ 1 - Northwest Gbaya bible

TƆRA-BÍÍ 1

¹GASA WAN tɔ̧ɔ̧ wen ha̧ Moisɛ sɛn ŋga-gbárà Sinai kɔ̧ Tua-kpa-ŋmaa tɛ kuti wese tɛ yiitoo fio-zɛ ɗoŋ gboa-a nɛ Egiptɛ, ká dee pɛ yiitoo kaɗi. A̧ tɔ̧a̧:

²«Ɛ̀nɛ̀ tɔ́r nin o wiwii dam lɛŋ.

³Ɛ̀nɛ̀ tɔ́r o be Israɛl nɛ a̧a̧ nɛ pɛ ɓu-yiitoo in wan nɛ gana pɛ ɓu-yiitoo mbɛt nɛ nyɛma mɛ bi biro nyɛm nɛ ɗoŋ duk-wi-biro. Ɛ̀nɛ̀ tɔ́r wa, mɛ in Arɔŋ.

⁴Gasawi tɛ zuduk kpɔk kpɔk nɛ̀ dúk nɛ́ gasawi nutua tɛ duk in'nɛ̀ɛ́.

⁵Nin o wi nɛ tɛ gbak'nɛ́ nɛ mɔ'ɔ: zuduk ko Rubɛn nɛ Elisur, bem ko Sedeur.

⁶Ko Simɛɔŋ nɛ Selumiɛl, bem ko Surisadai.

⁷Ko Juda nɛ Nasɔŋ, bem ko Aminadab.

⁸Ko Isakar nɛ Nɛtanɛl, bem ko Suar.

⁹Ko Zabulɔŋ nɛ Eliab, bem ko Elɔŋ.

¹⁰Ko o bem ko Jozɛf in o bem ko Efraim nɛ Elisama, bem ko Amihud; ko bem ko Manase nɛ Gamaliɛl, bem ko Pedasur.

¹¹Ko Bɛnjamin nɛ Abidaŋ, bem ko Gideoni.

¹²Ko Dan nɛ Ahiezɛr, bem ko Amisadai.

¹³Ko Asɛr nɛ Pagiɛl, bem ko Okraŋ.

¹⁴Ko Gad nɛ Eliasaf, bem ko Deuɛl.

¹⁵Ko Nɛftalii nɛ Ahira, bem ko Enaŋ.»

¹⁶O wi nɔ‘i nɛ́ o wi nɛ‘i hoka mgbara o bíí. Wa yaa so nɛ o gasawi nutua kɔ-wa; wa nɛ o gasawi zu duk-wi-biro Israɛl.

¹⁷Moisɛ in Arɔŋ mɔi̧a o wi nɛ wa hoka'i a ká̧ tɛ.

¹⁸Wa mɔi̧a o giiwi lɛŋ. Tɛ kuti wese tɛ yiitoo fio-zɛ, o be Israɛl ku̧u̧ naŋ tɔra bíí nɛ nú-gara in nutua yɔr nɛ nin bíí nɛ a̧a̧ nɛ pɛ ɓu-yiitoo in wi nɛ gana mbɛt.

¹⁹Moisɛ yɔra nin wa sɛn ŋga-gbárà Sinai hee mɔ'ɔ nɛ GASA WAN baa tɔ̧ so ha̧ a̧ ga.

²⁰Ŋgimbi nɛ wa tɔra o bezaŋ Rubɛn, kaya-bem ko Israɛl, nɛ nú-gara kɔ-wa in nɛ nutua kɔ-wa kpɔk kpɔk, o wiwii nɛ a̧a̧ nɛ pɛ ɓu-yiitoo in o wan nɛ gana pɛ‘i mbɛt nɛ nyɛma mɛ bi biro,

²¹wa lɛŋ yaa nɛ bíí 46.500.

²²Ŋgimbi nɛ wa tɔra o bezaŋ Simɛɔŋ nɛ nú-gara kɔ-wa in nɛ nutua kɔ-wa kaɗi, o wiwii nɛ a̧a̧ nɛ pɛ ɓu-yiitoo in o wan nɛ gana pɛ‘i nɛ nyɛma mɛ bi biro,

²³wa lɛŋ yaa nɛ bíí 59.300.

²⁴Ŋgimbi nɛ wa tɔra o bezaŋ Gad nɛ nú-gara kɔ-wa in nɛ nutua kɔ-wa kpɔk kpɔk, o wiwii nɛ a̧a̧ nɛ pɛ ɓu-yiitoo, in o wan nɛ gana pɛ‘i, nɛ nyɛma so mɛ bi biro,

²⁵wa lɛŋ yaa nɛ bíí 45.650.

²⁶Ŋgimbi nɛ wa tɔra o bezaŋ Juda nɛ nú-gara kɔ-wa in nɛ nutua kɔ-wa kpɔk kpɔk, o wi nɛ a̧a̧ nɛ pɛ ɓu-yiitoo in o wan nɛ gana pɛ‘i, nɛ nyɛma so mɛ bi biro,

²⁷wa lɛŋ yaa nɛ bíí 74.600.

²⁸Ŋgimbi nɛ wa tɔra o bezaŋ Isakar nɛ nú-gara kɔ-wa in nɛ nutua kɔ-wa kpɔk kpɔk, o wi nɛ a̧a̧ nɛ pɛ ɓu-yiitoo in o wan nɛ gana pɛ‘i mbɛt, nɛ nyɛma mɛ bi biro,

²⁹wa lɛŋ yaa nɛ bíí 54.400.

³⁰Ŋgimbi nɛ wa tɔra o bezaŋ Zabulɔŋ tɛ nú-gara kɔ-wa in nɛ nutua kɔ-wa kpɔk kpɔk, o wiwii nɛ a̧a̧ nɛ pɛ ɓu-yiitoo in o wan nɛ gana pɛ‘i nɛ nyɛma mɛ bi biro,

³¹wa lɛŋ yaa nɛ bíí 57.400.

³²War ko o bezaŋ Jozɛf, ŋgimbi nɛ wa tɔra o bezaŋ Efraim nɛ nú-gara kɔ-wa in nɛ nutua kɔ-wa kpɔk kpɔk, o wiwii nɛ a̧a̧ nɛ pɛ ɓu-yiitoo in o wan nɛ gana pɛ‘i mbɛt nɛ nyɛma mɛ bi biro,

³³wa lɛŋ yaa nɛ bíí 40.500.

³⁴Ɓɛɛ ŋgimbi nɛ wa tɔra o bezaŋ Manase nɛ nú-gara kɔ-wa in nɛ nutua kɔ-wa kpɔk kpɔk, o wiwii nɛ a̧a̧ nɛ pɛ ɓu-yiitoo in o wan nɛ gana pɛ‘i mbɛt nɛ nyɛma mɛ bi biro,

³⁵wa lɛŋ yaa nɛ bíí 32.200.

³⁶Ŋgimbi nɛ wa tɔra o bezaŋ Bɛnjamin nɛ nú-gara kɔ-wa in nɛ nutua kɔ-wa, o wiwii nɛ a̧a̧ nɛ pɛ ɓu-yiitoo in o wan nɛ gana pɛ‘i mbɛt nɛ nyɛma mɛ bi biro,

³⁷wa lɛŋ yaa nɛ bíí 35.400.

³⁸Ŋgimbi nɛ wa tɔra o bezaŋ Dan tɛ nú-gara kɔ-wa in nɛ nutua kɔ-wa, o wiwii nɛ a̧a̧ nɛ pɛ ɓu-yiitoo in o wan nɛ gana pɛ‘i mbɛt nɛ nyɛma mɛ bi biro,

³⁹wa lɛŋ yaa nɛ bíí 62.700.

⁴⁰Ŋgimbi nɛ wa tɔra o bezaŋ Asɛr, nɛ nú-gara kɔ-wa in nɛ nutua kɔ-wa, o wiwii nɛ a̧a̧ nɛ pɛ ɓu-yiitoo in o wan nɛ gana pɛ‘i mbɛt nɛ nyɛma mɛ bi biro,

⁴¹wa lɛŋ yaa nɛ bíí 41.500.

⁴²Ŋgimbi nɛ wa tɔra o bezaŋ Nɛftalii nɛ nú-gara kɔ-wa in nɛ nutua kɔ-wa, o wiwii nɛ a̧a̧ nɛ pɛ ɓu-yiitoo in o wan nɛ gana pɛ‘i mbɛt nɛ nyɛma mɛ bi biro,

⁴³wa lɛŋ yaa nɛ bíí 53.400.

⁴⁴O bíí nɛ Moisɛ in Arɔŋ ká bá nɛ̀ o gasawi Israɛl ɓu-zua-yiitoo tɔra lɛŋ tɛ nutua kpɔk kpɔk nɛ mɔɔ nɔ‘i.

⁴⁵O be Israɛl lɛŋ nɛ‘i tɔra nɛ nutua kpɔk kpɔk nɛ a̧a̧ nɛ pɛ ɓu-yiitoo in o wan nɛ gana pɛ‘i mbɛt nɛ nyɛma mɛ bi biro,

⁴⁶wa lɛŋ yaa nɛ bíí 603.550.

⁴⁷Wa tɔr o bezaŋ Levii zaŋ ŋmaa in o dɔka be Israɛl na,

⁴⁸wen GASA WAN tɔ̧ɔ̧ so ha̧ Moisɛ:

⁴⁹«Ká mɛ́ tɔr duk ko Levii na. Ká mɛ́ tɔr wa mgbara o be Israɛl na.

⁵⁰Mɛ̀ yɔ́r nin wa wen ha̧ wa mɛ de tom sɛn kɔ̧ tua kuɓa ha̧a̧nú ha̧ wa mɛ ɗafi mɔ kɔ̧ tua'i lɛŋ, in ha̧ wa mɛ a mɔ kɔ̧ a̧ lɛŋ. Wa tɛ gɔ kuɓa ha̧a̧nú‘i nɛ oi o mɔɔ-aa lɛŋ mbɛt. Kɔ-wa kànà nɛ́ dee tom kɔ̧ tua'i in ɔa-a zik ká̧ tua'i.

⁵¹Ŋgimbi nɛ o bíí tɛ kur mɛ gbin yak, o bezaŋ Levii tɛ yai tua'i, kai yaknɛ; fara nɛ wa tɛ yor sɛnɛ, nɛ́ wa a̧ tɛ ba ger tua'i e ŋgɔn woyo. Kà ŋma gɔni bíí ɗɔl si ká̧ tua'i, wi tɛ gbɛ a̧ yinɛ.

⁵²O be Israɛl tɛ ɔ, kóó o ndé fara kɔ‘i; kóó o ndé tɛ ɔ mgbara duk wi-biro kɔ‘i.

⁵³War ko o bezaŋ Levii, wa tɛ ɔ kɔ-wa zik ká̧ tua kuɓa ha̧a̧nú; hegɔ nyimsea ko GASA WAN beka tik zu o be Israɛl na. O bezaŋ Levii tɛ de tom kɔ̧ tua nɛ kuɓa ha̧a̧nú duk sɛnɛ‘i.»

⁵⁴O be Israɛl dee kànà mɔ nyɛm nɛ ɗoŋ wen ko GASA WAN nɛ tɔ̧ɔ̧ ha̧ Moisɛ.