Read Northwest Gbaya TƆRA-BÍÍ 13 Bible Online

TƆRA-BÍÍ 13 - Northwest Gbaya bible

TƆRA-BÍÍ 13

¹GASA WAN tɔ̧ɔ̧ ha̧ Moisɛ:

²«Mɛ̀ tóm o bíí ha̧ wa mɛ nɛ̀ɛ́ zɔk nú Kanaŋ n'am ha̧ ha̧ o be Israɛl. Mɛ̀ tóm bíí nɛ zuduk kpɔk kpɔk, mɛ tom nɛ o gasawi nutua ko o be Israɛl.»

³Moisɛ toma o gasawi nɔ‘i nyɛm nɛ ɗoŋ tɔ̧ɔ̧-wen ko GASA WAN, nɛ ŋga-gbárà Paraŋ yaknɛ. O wi nɔ‘i lɛŋ nɛ o gasawi mgbara o be Israɛl.

⁴Nin-wa nɛ mɔɔ nɔ'ɔ: tɛ zuduk ko Rubɛn nɛ́ Samua, bem ko Zakur, a̧ wa toma.

⁵Tɛ zuduk ko Simɛɔŋ nɛ́ Safat bem ko Ori;

⁶tɛ zuduk ko Juda nɛ́ Kalɛb bem ko Yefunɛ;

⁷tɛ zuduk ko Isakar nɛ́ Yigɛal bem ko Jozɛf;

⁸tɛ zuduk ko Efraim nɛ́ Ozea bem ko Nun;

⁹tɛ zuduk ko Bɛnjamin nɛ́ Palti, bem ko Rafu;

¹⁰tɛ zuduk ko Zabulɔŋ nɛ́ Gadiɛl, bem ko Sodi;

¹¹tɛ zuduk ko Jozɛf nɛ̀ ɗoŋ Manase, nɛ́ Gadi, bem ko Susi;

¹²tɛ zuduk ko Dan nɛ́ Amiɛl bem ko Gemali;

¹³tɛ zuduk ko Asɛr nɛ́ Setur bem ko Mikaɛl;

¹⁴tɛ zuduk ko Nɛftalii nɛ́ Nabi bem ko Vopsi;

¹⁵ɓɛɛ tɛ zuduk ko Gad nɛ́ Geuɛl, bem ko Maki.

¹⁶Nin o bíí nɛ Moisɛ toma wen kpee naŋ nù‘i nɛ mɔɔ nɔ‘i. Nɛ mɔ'ɔ nɛ Moisɛ aa nin Josue ha̧ Ozea bem ko Nun.

¹⁷Ŋgimbi nɛ Moisɛ toma nɛ wa mɛ nɛ̀ɛ́ kpe nɛ naŋ mɔ tɛ nú Kanaŋ‘i, a̧ tɔ̧ɔ̧ ha̧ wa: «Ɛ̀nɛ̀ nɛ́ nɛ Nɛgɛb, ɓɛɛ ɛ̀nɛ̀ dáŋ zu kaya,

¹⁸wen zɔka nù‘i in o bíí nɛ ya sɛnɛ, kà wa nɛ́ bòò nɛ́ o ŋga-wi, kóó o ɓɔsa-wi, kà wa nɛ́ dɔka, kóó kà wa dɔk na.

¹⁹Ɛ̀nɛ̀ zɔ́k nù‘i nɛ wa ɔ sɛnɛ‘i, kà nɛ́ bòò nɛ́ de nù, kóó nɛ́ ɗaŋ nù, in kà o ye nɛ yaa géè, kóó kà wa nɛ́ mboo nɛ garo zik nɛnɛ;

²⁰kà nɛ́ bòó nɛ̀ nú-dɛm-nyɔnɔ, kóó nyɔnɔ beka dɛm sɛnɛ na, kà o te a̧ boo hi̧i̧, kóó bo na nde. Ɛ̀nɛ̀ nɔ́ ŋgiɗi, ɓɛɛ ɛ̀nɛ̀ káí o ŋma waya-te nù‘i piinɛ.» Ŋgimbi'i duka so nɛ ŋgimbi ku̧u̧naŋ-waia-a ko o nyak-dɔ̧ɔ̧.

²¹Nɛ mɔ'ɔ nɛ wa yaka mɛ nɛ̀ɛ́ zɔk nù‘i, ku̧u̧naŋ-a nɛ ŋga-gbárà Sin hɔ nɛnɛ Rehob sɛn ká̧ Lebo-Hamat.

²²Wa nɛɛ́ nɛ̀ Nɛgɛb hɔ Ekrɔŋ, fara nɛ o bezaŋ Anak, Ahiman, Sesai in Tolman ɔɔ so sɛnɛ. Wa mboo so Hebrɔŋ pɛ mɔɔrɔ-ɗoŋ-yiitoo nɛti ha̧ ye Tanis sɛn Egiptɛ.

²³Wa hɔɔ kɔ̧ ɗɔŋgɔ Ɛskɔl, ɓɛɛ wa ɓir ŋma gbaa-er nyak-dɔ̧ɔ̧ nɛ oi waya-a, hɛr tɛ te gɔ nɛnɛ. Wa ɓii o gbɛ̧ waya-te nɛ hɔɔ ŋmaa in waya kóɓò nɛ‘i sa'e grenad in o mbɔra mbɛt.

²⁴Nɛ mɔ'ɔ nɛ wa saa nin fara'i'e kɔ̧-ɗɔŋgɔ Ɛskɔl,[2] wen o be Israɛl gɔma so sikila waya-nyak-dɔ̧ɔ̧ hi̧i̧.

²⁵O wi-kpe-naŋ-mɔ dee zɛ ɓu-naar, ɓɛɛ wa pii ɗoŋ tɛ naŋanɔ kɔ-wa.

²⁶Wa hɔɔ ɓɛɛ wa nɛ tɛ Moisɛ in Arɔŋ in o be Israɛl lɛŋ sɛn Kadɛs ŋga-gbárà Paraŋ. Wa wee ɗoŋ o mɔ nɛ wa zɔka lɛŋ ha̧ o bíí, ɓɛɛ wa usi o waya-te-nù‘i ha̧ o bíí mbɛt.

²⁷Mɔ nɛ wa tɔ̧ɔ̧ ha̧ Moisɛ nɛ mɔ'ɔ: «Ɛɛ nɛɛ hɔ fara n’ɛnɛ toma yɛ si sɛnɛ. Yibere in gɔrɔ fok fok hi̧i̧ nɛ mbetɛ, ɛ̀nɛ̀ zɔ́k o waya-te n’ɛɛ kaia piinɛ.

²⁸Mɔ kpɔk, o bíí nù‘i nɛ o ŋga-wi, o ye ɔ gasa nyɛmna, ɓɛɛ wa mboo garo mboo zik nɛnɛ lɛŋ; ɛɛ kpaa o bezaŋ Anak hi̧i̧ mbɛt.

²⁹O be Amalɛk ɔ kɔ‘i nú gbara Nɛgɛb; o be Hit in o be Jebus ká bá nɛ̀ o be Amɔr ɔ kɔ-wa zu kaya; ɓɛɛ o be Kanaŋ ɔ kɔ-wa mgbák ká̧ gba-tɔp in nɛ ká̧ zaŋ Jurdɛn.»

³⁰Kalɛb kpee nú o bíí nɛ yaa ku̧i̧ nɛ mɔ katɛ Moisɛ, a̧ tɔ̧a̧: «Ɛɛ nɛ! Ɛ̀ɛ̀ bí o ye nɔ‘i! Ɛɛ nyɛma mɛ ba nù‘i.»

³¹Ɓɛɛ o bíí nɛ nɛɛ in a̧ tɔ̧: «Ɛɛ bo nɛ̀ ŋgai mɛ bi o wi nɔ‘i na, wen wa ŋgaia gan yɛ.»

³²Wa ku̧u̧ naŋ tɔ̧ɔ̧ wen nù nɛ wa zɔka'i ha̧ o be Israɛl. Wa tɔ̧a̧: «Nù n’ɛɛ zɔka'i nɛ nù nɛ biro a̧a̧ sɛnɛ, ɓɛɛ o bíí n’ɛɛ zɔka nɛ o ŋga-wi nɛ a̧a̧ nɛ̀ kpoo-tɛ, nɛ̀ kusi.

³³Ɛɛ kpaa o bezaŋ Anak, nɛ tugun-wa nɛ o gba-tɛ-bíí nɛ̀ kusi. Ɛɛ yaa ti wa hee o dɔya ga, ɓɛɛ wa zɔka so ɛɛ hee o géé dɔya ga mbɛt.»