Read Northwest Gbaya TƆRA-BÍÍ 15 Bible Online

TƆRA-BÍÍ 15 - Northwest Gbaya bible

TƆRA-BÍÍ 15

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ wen’ɛ ha̧ o be Israɛl: ŋgimbi n’ɛnɛ tɛ hɔ tɛ nù n’ɛnɛ tɛ duk sɛnɛ, nɛ duk nɛ nù n'am tɛ ha̧ h’ɛ́nɛ́,

³ŋgimbi n’ɛnɛ tɛ tɛ mɛ ha̧ nyɔŋmɔ ha̧ GASA WAN, kóó nɛ dɔɔ-kpoo-sɔ̧, kóó nɛ ɗafa-sɔ̧ nɛ gasa mɔ-dai, kóó nɛ geɗek mɔ-dai oi ha̧a̧nú, kóó wen ha̧a̧mɔ nɛ ta-tɛ, kóó wen wese yɔyɛ k’ɛ́nɛ́; ŋgimbi n’ɛnɛ tɛ ha̧ nɛ de pɛr-aa ha̧ GASA WAN,

⁴wi nɛ tɛ ha̧ mɔ ha̧ GASA WAN'i tɛ ha̧ kilo fuu taar nɛ‘i zaŋa nɛ litrɛ nɔ̧́ kpɔk nɛ reeta.

⁵Ɓɛɛ ko dɔ̧ɔ̧, mɛ tɛ ha̧ nɛ litrɛ kpɔk nɛ reeta wen tɛna-a a nù in dɔɔ-kpoo-sɔ̧, kóó in ha̧a̧mɔ, kà ha̧a̧mɔ‘i nɛ́ bòò nɛ́ be-sami.

⁶Kà á̧ boo nɛ vala sami, mɛ tɛ ha̧ nɛ kilo fuu mɔɔrɔ-ɗoŋ-kpɔk nɛ‘i zaŋa nɛ ŋmaa in litrɛ nɔ̧́ yiitoo.

⁷Mɛ tɛ ha̧ litrɛ dɔ̧ɔ̧ yiitoo wen tɛna-a a nù. Mɛ tɛ ha̧ o mɔɔ nɔ‘i nɛ pɛr-aa ɔ dee ha̧ GASA WAN.

⁸Kà mɛ nɛ́ ha̧a̧ nɛ wiwii ndai wen dɔa-a ha̧ GASA WAN, kóó wen ɗafa-sɔ̧ oi ha̧a̧nú, kóó wen ɗafa-sɔ̧-gaŋmɔ,

⁹mɛ tɛ ha̧ kilo fuu mɔɔrɔ-ɗoŋ-naar nɛ‘i vata nɛ nɔ̧́ tɛ litrɛ taar e zu wiwii ndai'i.

¹⁰Ɓɛɛ ko dɔ̧ɔ̧, mɛ tɛ ha̧ nɛ litrɛ taar wen tɛna-a a nù; mɔɔ nɔ‘i tɛ ya nɛ nyɔŋmɔ nɛ pɛr-aa ɔ dee tɛ GASA WAN.

¹¹«Mɛ nɛ kpɔk kalemɔ‘i a'i tɛ de ŋgimbi nɛ‘i ha̧ nɛ wiwii ndai, vala sami, be-sami, koo gbadua.

¹²Ɛnɛ tɛ de kànà nɛ kpɔk mɔ‘i tɛ ha̧a̧mɔ lɛŋ nyɛm nɛ ɗoŋ dɔka mɔ-dai n’ɛnɛ tɛ ha̧ lɛŋ.

¹³O bíí k’ɛ́nɛ́ lɛŋ tɛ de kànà nɛ́ kpɔk mɔ‘i, ŋgimbi nɛ wa tɛ ha̧ nɛ nyɔŋmɔ nɛ pɛr-aa ɔ dee ha̧ GASA WAN.

¹⁴Kà ŋma gɛnɛ nɛ́ yee mgbara'nɛ́, kóó kà tugun-aa nɛ́ dee ye in'nɛ̀ɛ́ ɗoŋ-aa nyɛi̧, kà a̧ nɛ́ ha̧a̧ nyɔŋmɔ nɛ pɛr-aa ɔ dee ha̧ GASA WAN, a̧ tɛ de kànà nɛ́ kpɔk mɔ‘i hee ɛnɛ ga.

¹⁵O dɔka bíí lɛŋ tɛ de kànà nɛ́ kpɔk mɔ hee ɛnɛ ga, kóó nɛ́ gɛnɛ nɛ duk mgbara'nɛ́ mbɛt. Nɛ́ heembea nɛ tɛ duk ɓɔnsɛnɛ kpoo nɛ kpoo wen'nɛ́ in wen o gɛnɛ nɛ ya mgbara'nɛ́.

¹⁶Heembea k’ɛ́nɛ́ in yuwar deemɔ k’ɛ́nɛ́ tɛ duk nɛ kpɔk mɔ in o gɛnɛ nɛ ya mgbara'nɛ́.»

¹⁷GASA WAN tɔ̧ɔ̧ ha̧ Moisɛ:

¹⁸«Mɛ tɔ̧ wen’ɛ ha̧ o be Israɛl‘e: k’ɛ̀nɛ̀ nɛ́ hɔɔ fara n'am mgbɔ‘nɛ́ nɛnɛ sɛnɛ‘i kaɗi,

¹⁹ŋgimbi n’ɛnɛ tɛ ku̧ naŋ nyɔŋa mɔɔ-nù‘i, ɛnɛ tɛ ha̧ zu-nyɔŋmɔ‘i ha̧ GASA WAN.

²⁰Ɛnɛ tɛ ha̧ kuti-brɛt n’ɛnɛ tɛ dɔ hee zu-nyɔŋmɔ ga ha̧‘m. Ɛnɛ tɛ de mɔ‘i hee mɔ'ɔ nɛ‘i de nɛnɛ tɛ ŋgimbi mɔi̧a-nyɔnɔ ga.

²¹Ɛnɛ in o bezaŋ‘nɛ́ kpoo nɛ kpoo, ɛnɛ tɛ ha̧ kuti zu-nyɔŋmɔ k’ɛ́nɛ́ ha̧ GASA WAN.»

²²«K’ɛ̀nɛ̀ nɛ́ gbina ŋma heembea mgbara o dɔka-a nɛ GASA WAN ha̧a̧ h’ɛ́nɛ́ nɛ nú Moisɛ tɛ wese n'aa ha̧a̧ nɛnɛ hegɔɔ hɔ nɛnɛ tɛ o bezaŋ‘nɛ́ mɛ ɗoŋ,

²⁴k’ɛ̀nɛ̀ nɛ́ dee mɔ‘i, nɛ̀ bo nɛ́ o bíí a̧ kɔ̧ɔ̧ hegɔ na, o wi nɔ‘i tɛ ha̧ wiwii ndai in dɔ̧ɔ̧ nɛ‘i tɛ ha̧ kànà nyɛm nɛ ɗoŋ yuwar deemɔ; wa tɛ ha̧ vala gbadua ɗafi nɛ sɔ̧ wen kpaa ea-ɗaŋmɔ mbɛt.

²⁵Wi-ɗafi-sɔ̧ tɛ de do-mɔ nɛ usi'e, o be Israɛl lɛŋ kpaa ea-ɗaŋmɔ, ɓɛɛ Sɔ̧ tɛ e ɗaŋmɔ kɔ-wa ha̧ wa, wen ɗaŋmɔ nɛ wa dea'i, bo nɛ wa á̧ kɔ̧ɔ̧ mɛ de na. Zu-a'i, wa tɛ dɔ kpoo-sɔ̧ ha̧ GASA WAN, ɓɛɛ wa ɗafa sɔ̧ wen kpaa ea-ɗaŋmɔ nɛ wa dea nɛ wa iŋ na.

²⁶Ɓɛɛ GASA WAN tɛ e ɗaŋmɔ ko o be Israɛl lɛŋ ha̧ wa, in gɛnɛ nɛ ɔ ye in wa mbɛt, wen ɗaŋmɔ‘i nɛ ɗaŋmɔ ko o bíí lɛŋ, ɓɛɛ bo nɛ wa kɔ̧ɔ̧ so mɛ de na.

²⁷«Kà á̧ boo nɛ bíí kpɔk a̧ dee ɗaŋmɔ, nɛ̀ bo nɛ a̧ a̧ kɔ̧ɔ̧ mɛ de na, a̧ tɛ ha̧ nɛ gbadua nɛ a̧a̧ nɛ pɛ kpɔk, ɗafi nɛ sɔ̧ wen kpaa ea-ɗaŋmɔ.

²⁸Wi-ɗafi-sɔ̧ tɛ de do-mɔ nɛ yí GASA WAN nɛ usi'e wi’ɛi kpaa ea-ɗaŋmɔ tɛ mɔ n'aa dea n'aa iŋ na'i. Wi-ɗafi-sɔ̧ tɛ de do-mɔ‘i zu wi’ɛi, ɓɛɛ GASA WAN ee ɗaŋmɔ ko wi’ɛi ha̧ a̧.

²⁹Heembea'i tɛ duk nɛ kpɔk mɔ wen bíí nɛ de ŋma ɗaŋmɔ, nɛ̀ bó nɛ́ a̧ a̧ kɔ̧ɔ̧ na, kóó nɛ be Israɛl, kóó nɛ gɛnɛ nɛ ɔ ye in wa.

³⁰«Ɓɛɛ bíí nɛ̀ dee ɗaŋmɔ nɛ saka-yí, kóó wi’ɛi nɛ́ be Israɛl, kóó nɛ gɛnɛ mgbara wa, wi’ɛi dee nɛ ɗaŋmɔ in GASA WAN. Wa tɛ fo a̧ yinɛ mgbara o bíí kɔ̧-a̧.

³¹Hee mɔ'ɔ n'aa ee wen ko GASA WAN tɛ geemɔ, ɓɛɛ a̧ gbin heembea kɔ̧-a̧ ga, wa tɛ fo a̧ yinɛ mgbara wa, ɓɛɛ ɗaŋmɔ kɔ̧-a̧ tɛ tik zu a̧.»

³²Ŋgimbi'i, ká o be Israɛl ɓɔna ŋga-gbárà, ɓɛɛ wa kpa ŋma bíí fara kii gua wese-ɔm-tɛ.

³³O wi nɛ kpaa a̧‘i mgbɔɔ a̧ nɛ́ɛ̀ kpa nɛ Moisɛ, Arɔŋ ká bá nɛ̀ o be Israɛl lɛŋ.

³⁴Wa pɛma a̧ nɛ de-a wen wa tɛ iŋ mɔ nɛ wa tɛ de nɛ a̧ hɔ̧ɔ̧ na.

³⁵Nɛ mɔ'ɔ nɛ GASA WAN tɔ̧ɔ̧ ha̧ Moisɛ: «Ɛ̀nɛ̀ gbɛ́ wi’ɛ yinɛ, o bíí lɛŋ à̧ nɛ́ɛ̀ yó a̧ nɛ ta gbɛ ɗoŋ ye mɛ.»

³⁶Ɓɛɛ o bíí lɛŋ mgbɔ a̧ gbonɛ si ɗoŋ ye, ɓɛɛ wa yo a̧ nɛ ta gbɛ, nyɛm nɛ ɗoŋ mɔ nɛ GASA WAN tɔ̧ɔ̧ ha̧ Moisɛ.

³⁷GASA WAN tɔ̧ɔ̧ ha̧ Moisɛ:

³⁸«Mɛ tɔ̧ ha̧ o be Israɛl ha̧ wa mɛ sik mɔɔ-naŋ-laa kɔ-wa nɛ tɛ ga̧i̧ mbɛlɛ-mbɛlɛ, wa in o bezaŋ wa mbɛt; wa a̧ fur tu̧ garaazi tɛ o sika mɔɔ nɔ‘i.

³⁹Ɛ́nɛ́ tɛ tok o sika mɔɔ nɔ‘i nu laa k’ɛ́nɛ́, ɓɛɛ ŋgimbi n’ɛnɛ tɛ zɔk wa, tɛ‘nɛ́ tɛ mbaŋ ɗoŋ o heembea ko GASA WAN lɛŋ. Ɛnɛ tɛ kasi wa nɛ de-a, ɓɛɛ ɛnɛ beka ndak ɗoŋ mɔ nɛ see'nɛ́ kɔ̧ɔ̧ na, in o mɔ nɛ yí‘nɛ́ zɔk na mbɛt, wen k’ɛ́nɛ́ tɛɛ e'm duk.

⁴⁰Hegɔ, ɛnɛ tɛ ta mɔ wen kasa o heembea kɔ‘m lɛŋ nɛ de-a, ɓɛɛ yuwar deemɔ k’ɛ́nɛ́ tɛ sa̧ yi Sɔ̧ k’ɛ́nɛ́.

⁴¹Mi nɛ GASA WAN Sɔ̧ k’ɛ́nɛ́, nɛ kaia'nɛ́ gbonɛ nɛ nú Egiptɛ, mɛ duk nɛ Sɔ̧ k’ɛ́nɛ́. Mi nɛ GASA WAN Sɔ̧ k’ɛ́nɛ́.»