Read Northwest Gbaya TƆRA-BÍÍ 19 Bible Online

TƆRA-BÍÍ 19 - Northwest Gbaya bible

TƆRA-BÍÍ 19

¹GASA WAN tɔ̧ɔ̧ ha̧ Moisɛ in Arɔŋ:

²«O geŋa nɛ GASA WAN yɔra h’ɛ́nɛ́ nɛ mɔ'ɔ: Mɛ tɔ̧ ha̧ o be Israɛl mɛ ba gbɛ̧ ndai nɛ ŋma mɔ ɗaŋ tɛ-a na, nɛ wa tɛ pi̧ kpáŋá ger-a hɔ̧ɔ̧ na tɛnɛ.

³Ɛnɛ tɛ ha̧ a̧ ha̧ wi-ɗafi-sɔ̧ Eleazar; wi tɛ gbur a̧ gbonɛ si ɗoŋ ye, ɓɛɛ wi nɛɛ gɔn a̧ nɛ yí Eleazar.

⁴Wi-ɗafi-sɔ̧ Eleazar tɛ pi̧ ndɔŋ nú-zɔ̧ɔ̧-er ɗɔɔ tɔk-aa, ɓɛɛ misa̧ war mɔɔrɔ-ɗoŋ-yiitoo si war nú Tua-kpa-ŋmaa.

⁵Wa tɛ dɔ ndai'i ti a̧: wa tɛ dɔ ndàrá-a, mur-aa, tɔk-aa ká bá nɛ̀ ɗɔr-aa mbɛt.

⁶Wi-ɗafi-sɔ̧ tɛ ba gua gbatui, gbaa-er be-te[4] ká bá nɛ̀ gbɛ̧ laa zóŋ-zóŋ, ɓɛɛ a̧ aa tɛ wee-ndai'i.

⁷Ɗoŋ-aa'i, wi-ɗafi-sɔ̧ tɛ fɔr o laa kɔ‘i, zuia yi, ɓɛɛ sii ɗoŋ si saaye; mɔ kpɔk, a̧ tɛ duk nɛ́ wi-simbo hegɔ mɔ ga̧ nɛnɛ.

⁸Wi nɛ dɔɔ ndai'i tɛ fɔr o laa kɔ‘i, zuia yi, ɓɛɛ a̧ tɛ duk kànà nɛ́ wi-simbo hegɔ mɔ ga̧ nɛnɛ mbɛt.

⁹Nɛ́ ŋma bíí nɛ̀ duk nɛ sa̧a̧-a̧ a̧ tɛ kai bùk ndai'i nɛ́ɛ̀ a tɛ ŋma sa̧a̧ fara ɗoŋ ye mɛ, ɓɛɛ bùk'i duka hi̧i̧ wen dea-a nɛ zɔra-gaŋmɔ wen o be Israɛl lɛŋ. Mɔ‘i tɛ duk nɛ ɗafa-sɔ̧ wen kpaa ea-ɗaŋmɔ.

¹⁰Wi nɛ kaia bùk ndai'i tɛ fɔr o laa kɔ‘i, ɓɛɛ a̧ duka nɛ́ ndiŋ bíí hɔ ga̧a̧mɔ. Mɔ‘i tɛ duk nɛ heembea nɛ tɛ duk ɓɔnsɛnɛ, wen o be Israɛl in gɛnɛ nɛ a̧a̧ mgbara wa.»

¹¹«Wi nɛ tɛ fo wɔr bíí tɛ duk nɛ́ wi-simbo tɛ zɛ mɔɔrɔ-ɗoŋ-yiitoo.

¹²A̧ tɛ zui yì-zɔra'i tɛ taar zɛ in tɛ mɔɔrɔ-ɗoŋ-yiitoo zɛ, ɓɛɛ war-tɛ-a sa̧a̧. Kà a̧ nɛ zuia yì‘i tɛ taar zɛ, in tɛ mɔɔrɔ-ɗoŋ-yiitoo zɛ na, war-tɛ-a beka sa̧ na.

¹³Kà ŋma bíí nɛ foo wɔr bíí, kà a̧ nɛ ɗafa war-tɛ-a na, ɓɛɛ a̧ ɗaŋ nɛ war sa̧a̧-fara-duk ko GASA WAN; wa tɛ fo a̧ yinɛ mgbara o be Israɛl. Hee mɔ'ɔ nɛ wa misi̧ yì-zɔra a tɛ-a na ga, a̧ nɛ wi-simbo; war-tɛ-a tɛ sa̧ hɔ̧ɔ̧ na.

¹⁴«Heembea nɛ mɔ'ɔ: kà ŋma bíí nɛ́ fee kɔ̧ ŋma tua-laa, kà ŋma bíí nɛ́ yee kɔ̧ tua'i, kóó kà ŋma bíí nɛ́ duka so kɔ̧ tua'i, wa lɛŋ tɛ ya nɛ́ o wi-simbo tɛ zɛ mɔɔrɔ-ɗoŋ-yiitoo.

¹⁵Mɔɔ kɔ̧ o nyɛk nɛ wa kpe nú-a na tɛ ya nɛ ndiŋ-mɔɔ-simbo mbɛt.

¹⁶Kà ŋma bíí nɛ́ kɔ̧ɔ̧ naŋ nɛ ŋma bíí nɛ wa gbɛɛ nɛ gba-paa, kóó nɛ́ géé wɔr bíí, kóó nɛ́ o gba̧a̧ fio, kóó nɛ́ zu pɛsi-fio, wi’ɛi tɛ duk nɛ́ wi-simbo tɛ zɛ mɔɔrɔ-ɗoŋ-yiitoo.

¹⁷«Wen ɗafa war-tɛ wi’ɛi, wi tɛ ba nɛ bùk-wee-ɗafa-sɔ̧; wen kpaa ea-ɗaŋmɔ, wi tɛ a bùk'i sɛn kɔ̧ nyɛk, ɓɛɛ aa de gɛɗa yi zu a̧.

¹⁸Ŋma bíí nɛ war-tɛ-a ɔ sa̧a̧ tɛ ba gbaa-er be-te pi̧ ɗɔɔ yì-zɔra'i, ɓɛɛ misa̧ a tɛ tua-laa in o nyɛk nɛ ya kɔ̧ a̧ lɛŋ, ká bá nɛ̀ o bíí nɛ ya kɔ̧ a̧, kóó wi nɛ foo gba̧a̧ fio, kóó wi nɛ foo wɔr nɛ wa gbɛɛ so nɛ gba-paa, kóó nɛ wi nɛ foo gee wɔr bíí, kóó pɛsi-fio.

¹⁹Wi nɛ war-tɛ ɔ sa̧a̧‘i tɛ misi̧ yì‘i a tɛ wi-simbo'i tɛ taar zɛ in mɔɔrɔ-ɗoŋ-yiitoo zɛ. Tɛ mɔɔrɔ-ɗoŋ-yiitoo zɛ‘i, war-tɛ wi-simbo'i tɛ sa̧. A̧ tɛ fɔr o laa kɔ̧-a̧, zuia yì mɛ ga̧a̧mɔ, ɓɛɛ war-tɛ-a sa̧a̧.

²⁰«Wi nɛ ɗaŋa war-tɛ, nɛ kɔ̧ mɛ ɗafi na, wa tɛ fo a̧ yinɛ mgbara dɔka o be Israɛl, wen a̧ nyɛma mɛ ɗaŋ war sa̧a̧-fara ko GASA WAN; a̧ ɓɔn kànà nɛ́ wi-simbo wen wa misi̧ yì-zɔra a tɛ-a na.

²¹Mɔ‘i tɛ duk nɛ heembea nɛ tɛ duk ɓɔnsɛnɛ. War ko wi-misi̧ yì-zɔra'i, a̧ a̧ fɔr o laa kɔ̧-a̧, ɓɛɛ wi nɛ tɛ fo yì-zɔra'i tɛ duk nɛ wi-simbo hɔ ga̧a̧mɔ.

²²Mɔ nɛ wi-simbo tɛ fo, tɛ kifi nɛ́ mɔɔ-simbo, ɓɛɛ wi nɛ tɛ fo mɔ‘i tɛ duk nɛ́ wi-simbo mbɛt hɔ ga̧a̧mɔ.»