Read Northwest Gbaya TƆRA-BÍÍ 20 Bible Online

TƆRA-BÍÍ 20 - Northwest Gbaya bible

TƆRA-BÍÍ 20

¹O be Israɛl lɛŋ hɔɔ ŋga-gbárà Sin tɛ kuti fio-zɛ; wa ɔɔ sɛn Kadɛs. Nɛ mɔ'ɔ nɛ Mariama fea, ɓɛɛ wa gun a̧ hi̧i̧.

²Yì bo so wen o bíí na, ɓɛɛ nɛ mɔ'ɔ nɛ wa kura zu Moisɛ in Arɔŋ.

³O bíí kia wen in Moisɛ tɔ̧ nɛnɛ‘e: «Gana ɛ̀ɛ̀ fé so hee mɔ'ɔ nɛ o nya-yɛ fee so nɛnɛ ti GASA WAN’ɛ ga!

⁴Wen ge s’ɛnɛ kaia o bíí ko GASA WAN pii ŋga-gbárà hɛ̧ɛ̧ h’ɛ́ɛ́ mɛ fe, ɛɛ in o mɔ-dai k’ɛɛ ge?

⁵Wen ge ɛ́nɛ́ kaia yɛ nɛ̀ Egiptɛ tɛ́ɛ̀ a fara-bɔnɛ nɛ̀ bo nɛ́ fara-dɛm-nyɔnɔ na’ɛ ge? Te-mbɔra bo na, waya-nyak-dɔ̧ɔ̧ bo na, waya kóɓò[5] bo na, kóó nɛ yí-nɔ bo na mbɛt.»

⁶Nɛ mɔ'ɔ nɛ Moisɛ in Arɔŋ ee o giiwi duk, ɓɛɛ wa yak si nú Tua-kpa-ŋmaa, wa guu nù, ɓɛɛ wa zɔk gasamɔ ko GASA WAN.

⁷GASA WAN tɔ̧ɔ̧ ha̧ Moisɛ:

⁸«Mɛ̀ bá dɔra kɔ-mɛ, ɓɛɛ mɛ̀ sá o bíí lɛŋ, mɛ in nya-mɛ Arɔŋ; ɛ̀nɛ̀ tɔ̧́ wen ha̧ ta nɛ yí-wa, ɓɛɛ ta tɛ ha̧ yì h’ɛ́nɛ́. Mɛ tɛ de ha̧ yì mɛ gbo nɛ zaŋ ta'i ha̧ wa mɛ nɔ in o mɔ-dai kɔ-wa.»

⁹Hee mɔ'ɔ nɛ Moisɛ kpaa ha̧a̧nú‘i ga, a̧ nɛɛ ba dɔra kɔ̧-a̧ nɛ duka ti GASA WAN.

¹⁰Moisɛ in Arɔŋ saa o bíí pii ká̧ ta'i, ɓɛɛ tɔ̧ ha̧ wa: «O wi-ŋgazu nɔ'ɔ, ɛnɛ zii! Ɛɛ nyɛma mɛ de ha̧ yì mɛ gbo nɛ zaŋ ta’ɛ h’ɛ́nɛ́ nde?»

¹¹Moisɛ baa dɔra nɛ ŋgɔn ɓɛɛ gusi ta war yiitoo, ɓɛɛ yì suli nɛ zaŋ ta gbonɛ nɛ dɔka-a; o bíí nɔɔ yì‘i in o mɔ-dai kɔ-wa mbɛt.

¹²GASA WAN tɔ̧ɔ̧ ha̧ Moisɛ in Arɔŋ: «Hee mɔ'ɔ n’ɛnɛ e ta nɛ‘m h’ɛ́nɛ́ mɛ de ha̧ gasamɔ kɔ‘m mɛ duk ɓɔn yí o be Israɛl na ga, ɛnɛ beka mgbɔ wa ye nɛ fara n'am ha̧ ha̧ wa na.»

¹³Mɛ nɛ wen zu mɔ‘i a̧ wa sa nɛ nin yi'i Mɛriba, nɛ mɔ nɛ tɔ̧ «Kpɛri», wen nɛ́ fara'i a̧ o be Israɛl kia nɛ nú GASA WAN, ɓɛɛ a̧ duk war-a usi nɛnɛ‘e wi nɛ sa̧a̧ bíí.

¹⁴Moisɛ toma o betom nɛ Kadɛs ha̧ wannu Edɔm tɔ̧ nɛnɛ: «Ɛ̀nɛ̀ zíí wen nɛ o nya'nɛ́ o be Israɛl tɔ̧ h’ɛ́nɛ́'ɛ. Ɛnɛ iŋa o ŋgamɔ lɛŋ nɛ kpaa yɛ.

¹⁵O zɔmdáa k’ɛɛ zira so si Egiptɛ, ɓɛɛ nɛ́ hi̧i̧ a̧ ɛɛ yaa sɛnɛ nɛ dɔka zɛ. Nɛ mɔ'ɔ nɛ o be Egiptɛ usa bɔnɛ h’ɛ́ɛ́ in o dáà k’ɛɛ.

¹⁶Ɛɛ aia nú ha̧ GASA WAN, ɓɛɛ a̧ zii aia-nú k’ɛɛ. A̧ toma betom kɔ̧-a̧ mɛ gbo yɛ. Kinii ɛɛ a̧a̧ Kadɛs, ye nɛ duk ká̧ nù k’ɛ́nɛ́.

¹⁷Ɛ̀nɛ̀ é h’ɛ́ɛ́ ɓir yak nɛ̀ tɛ nù k’ɛ́nɛ́. Ɛɛ beka a̧r ye kpɛɛfɔ k’ɛ́nɛ́ na, kóó poo fɔ-nyak-dɔ̧ɔ̧ k’ɛ́nɛ́ na; ɛɛ beka nɔ o gɔna-yì k’ɛ́nɛ́ na mbɛt. Ɛɛ tɛ ba nɛ gasa war, ɛɛ beka nɛ si wiiko kóó si gale na mbɛt hɔ ŋgimbi n’ɛɛ tɛ gbo nɛnɛ nù k’ɛ́nɛ́ yak.»

¹⁸Ɓɛɛ wannu Edɔm kifi nú: «Ɛnɛ beka ɓir nɛ tɛ nù kɔ‘m yak na; k’ɛ̀nɛ̀ ɓir nɛ tɛ nù kɔ‘m, mi tɛ ba biro duk nɛ̀ ɛ́nɛ́.»

¹⁹O be Israɛl tɔ̧ɔ̧ ha̧ a̧: «Ɛɛ tɛ ba k’ɛɛ nɛ gasa war ɓir nɛnɛ yak. K’ɛ̀ɛ̀ nɔ yì k’ɛ́nɛ́ in o mɔ-dai k’ɛɛ, ɛɛ tɛ yoɓi. Ɓɛɛ mɔ n’ɛɛ kɔ̧a̧, nɛ́ ɓira-a yak ɓɛɛ.»

²⁰Wannu Edɔm kifa nú: «Ɛnɛ beka ɓir yak na.» A̧ kaia o ŋga wi-biro kɔ̧-a̧ nɛ dɔka-a gɔn nɛ ti wa.

²¹A̧ kpee yuwar ha̧ o be Israɛl, ɓɛɛ wa ba nɛ ŋma war yak nɛnɛ.

²²O be Israɛl kura sɛn Kadɛs, ɓɛɛ wa hɔ ká̧ kaya Ɔr.

²³Nɛ mɔ'ɔ nɛ GASA WAN tɔ̧ɔ̧ wen ha̧ Arɔŋ in Moisɛ ká̧ naŋ kaya Ɔr nyɛm nɛ gbìsì nù ko Edɔm; wen n'aa tɔ̧ɔ̧ nɛ mɔ'ɔ:

²⁴«Arɔŋ tɛ si ɗoŋ tɛ o dáà kɔ‘i; a̧ beka ye tɛ nù n'am ha̧ ha̧ o be Israɛl na, wen n’ɛnɛ mbo so zu ha̧‘m nú yí Mɛriba na.

²⁵Mɛ̀ mgbɔ́ Arɔŋ in bem kɔ̧-a̧ Eleazar si zu kaya Ɔr.

²⁶Mɛ tɛ kpɔ̧i̧ laa tɛ Arɔŋ yinɛ pi̧ tɛ bem kɔ̧-a̧ Eleazar, wen Arɔŋ tɛ fe kɔ‘i hi̧i̧.»

²⁷Moisɛ dee hee mɔ'ɔ nɛ GASA WAN tɔ̧ɔ̧ ha̧ a̧ ga. Wa taar daŋa nɛ yí bíí lɛŋ si zu kaya Ɔr.

²⁸Moisɛ kpɔ̧i̧a̧ laa tɛ Arɔŋ, ɓɛɛ pi̧ laa'i tɛ Eleazar bem ko Arɔŋ, ɓɛɛ Arɔŋ fe ɓɔn zu kaya'i. Nɛ mɔ'ɔ nɛ Moisɛ in Eleazar zira nɛ̀ zu kaya pii ɗoŋ.

²⁹O bíí lɛŋ iŋa'e Arɔŋ fea kaɗi, ɓɛɛ wa lɛŋ hi̧i̧ a̧ zɛ ɓu-taar.