Read Northwest Gbaya TƆRA-BÍÍ 23 Bible Online

TƆRA-BÍÍ 23 - Northwest Gbaya bible

TƆRA-BÍÍ 23

¹Balam tɔ̧ɔ̧ ha̧ Balak: «Mɛ mbó fara-ɗafi-sɔ̧ ha̧‘m hɛ̧ɛ̧ mɔɔrɔ-ɗoŋ-yiitoo. Mɛ̀ há̧ wiwii ndai ha̧‘m mɔɔrɔ-ɗoŋ-yiitoo in vala sami mɔɔrɔ-ɗoŋ-yiitoo mbɛt.»

²Nɛ mɔ'ɔ nɛ Balak dee hee mɔ'ɔ nɛ Balam tɔ̧ɔ̧ ha̧ a̧ mɛ de ga, ɓɛɛ wa yiitoo lɛŋ gɔn wiwii ndai kpɔk in vala sami kpɔk ɗafi nɛ sɔ̧ zu fara-ɗafi-sɔ̧ kpɔk kpɔk.

³Balam tɔ̧ɔ̧ ha̧ Balak: «Mɛ̀ yór ká̧ dɔɔ kpoo-sɔ̧ kɔ-mɛ, ha̧‘m yor kɔ‘m nyɛi̧ nɛ mɛ; ŋmafara GASA WAN tɛ tɛ tɛ‘m. Wen n'aa tɛ tɔ̧ ha̧‘m, kóó nɛ́ ge wen ge, mi tɛ we ɗoŋ-aa ha̧ mɛ.» Ɓɛɛ a̧ yak si yuwar.

⁴Sɔ̧ tɛɛ ɓɛɛ Balam tɔ̧ ha̧ a̧: «Mi mboo fara-ɗafi-sɔ̧ mɔɔrɔ-ɗoŋ-yiitoo, ɓɛɛ mi dɔɔ wiwii ndai in vala sami zu wa kpɔk kpɔk kaɗi.»

⁵Nɛ mɔ'ɔ nɛ GASA WAN ee wen nú Balam, ɓɛɛ tɔ̧ ha̧ a̧: «Mɛ̀ sí ɗoŋ si katɛ Balak, ɓɛɛ mɛ̀ tɔ̧́ wen'i ha̧ a̧.»

⁶Nɛ mɔ'ɔ nɛ Balam sii ɗoŋ nɛ́ɛ̀ kpa Balak fara yora-a ká̧ dɔɔ kpoo-sɔ̧ kɔ‘i in o dita-bíí Mɔab lɛŋ,

⁷ɓɛɛ a̧ tɔ̧ wen hee mɔ'ɔ ga: «Balak dee ha̧‘m mɛ tɛ nɛ Aram; wannu Mɔab saa'm tɛnɛ nɛ mgbara o kaya daŋa-wese; à̧‘m tɛ́, à̧‘m tɔ̧́ ɗaŋ wen zu Jakob ha'i; à̧‘m dé ha̧ ŋgamɔ mɛ kpa Israɛl.

⁸Hee ge a̧‘m tɛ fom nɛ bíí nɛ GASA WAN fom na ge? Hee ge mi tɛ de ha̧ ŋgamɔ mɛ kpa bíí nɛ GASA WAN de ŋgamɔ in a̧ na ge?

⁹Kà‘m duk zu kusa kam-ta zɔk nɛ wa, kà‘m duk zu kaya zɔk nɛ wa, ɓɛɛ mi zɔka ŋma dukbíí nɛ ya nɛtɛ, nɛ‘i tɔr wa mgbara o dɔka dukbíí na.

¹⁰Nɛ́ o'o nyɛma mɛ tɔr o gii be Israɛl o? Nɛ́ o'o nyɛma mɛ tɔr o gii bezaŋ Jakob o? Mi kɔ̧ɔ̧ mɛ fe nɛ fio ko wi-de-mɔ nɛ yuwar-a, ha̧ sɔŋkur mɔ kɔ‘m mɛ duk hee kɔ-wa ga!»

¹¹Balak tɔ̧ɔ̧ ha̧ Balam: «Nɛ ge a̧ mɛ dee in am ge? Mi saa mɛ ha̧ mɛ mɛ fom o wisɛn kɔ‘m, ɓɛɛ mɛ tok kɔ-mɛ nɛ de yoŋgo zu wa?»

¹²Balam kifa nú ha̧ a̧: «Ŋgimbi n'am tɔ̧ wen, bo nɛ mi tɛ yor nɛ zu mɔ nɛ GASA WAN e nú‘m na nde?»

¹³Balak tɔ̧ɔ̧ ha̧ Balam woyo: «Mɛ̀ tɛ́ ɛ̀ɛ̀ nɛ́ si ŋma fara nɛ mɛ tɛ zɔk dukbíí‘i nɛ de-a, wen mɛ zɔk so kɔ-mɛ nɛ be reeta-a; mɛ zɔk so wa lɛŋ na. Sɛn fara'i, mɛ̀ fóm wa ha̧‘m.»

¹⁴A̧ mgbɔɔ a̧ nɛnɛ tɛ ŋma fara-zɔk-mɔ sɛn zu kaya Pisga. A̧ mboo fara-ɗafi-sɔ̧ mɔɔrɔ-ɗoŋ-yiitoo, ɓɛɛ a̧ dɔ wiwii ndai kpɔk in vala sami kpɔk zu wa kpɔk kpɔk.

¹⁵Balam tɔ̧ɔ̧ ha̧ Balak: «Mɛ̀ dúk ká̧ dɔɔ kpoo-sɔ̧ kɔ-mɛ ha̧‘m nɛ́ɛ̀ pɛm mɔ mɛ‘i sɛ.»

¹⁶Nɛ mɔ'ɔ nɛ GASA WAN tɛɛ pii tɛ Balam, e wen nú-a, ɓɛɛ tɔ̧: «Mɛ̀ sí ɗoŋ si katɛ Balak, ɓɛɛ mɛ̀ tɔ̧́ wen'i ha̧ a̧.»

¹⁷Balam sii ɗoŋ nɛ́ɛ̀ kpa Balak fara yora-a ká̧ dɔɔ kpoo-sɔ̧ in o dita-bíí Mɔab lɛŋ, ɓɛɛ Balak ak a̧: «GASA WAN tɔ̧ɔ̧ bɔɔ ha̧ mɛ hee ge?»

¹⁸Ɓɛɛ Balam tɔ̧ wen hee mɔ'ɔ ga: «Mɛ̀ kúr, mɛ zii, Balak; mɛ̀ yéŋ zer-mɛ, bem ko Sipɔr.

¹⁹Sɔ̧ bó nɛ́ bíí kà de ndela na; a̧ bo nɛ bezaŋ Adam ka a̧ kpai taamɔ kɔ̧-a̧ na. Kà a̧ tɔ̧ wen, ɓɛɛ a̧ beka de mɔɔ-a na? Kà a̧ ha̧ nú, a̧ beka de ha̧ mɔ‘i mɛ hɔ gba̧a̧ na nde?

²⁰Mi kpɛka mɛ tok de yoŋgo zu wi nɔ'ɔ; GASA WAN toka de yoŋgo zu wa, ɓɛɛ mi nyɛm mɛ kpai ŋma mɔ sɛnɛ na.

²¹Wi zɔk ŋma ɗaŋmɔ ko Jakob na, wi zɔk ŋma bɔnɛ ko Israɛl na. GASA WAN Sɔ̧ kɔ̧-a̧ a̧a̧ in a̧; sumbura mɔɔ-wan wen-aa duk nú-wa.

²²Sɔ̧ dee ha̧ wa mɛ gbo nɛ Egiptɛ, a̧ ha̧a̧ ŋgai ha̧ wa hee bara-nam ga.

²³Zɔkamɔ bo tɛ Jakob na, aa-ŋgala bo sɛn Israɛl na. Mɔ nɛ GASA WAN de lɛŋ, wa iŋa tɛ ŋgimbi-a.

²⁴Dukbíí'ɛ kur hee boko-nam ga, a̧ misi̧ hee dila ga; a̧ nyɔŋa kpoo ndai n'aa baa, nɔ tɔk-aa kaɗi, ɓɛɛ yak nɛ́ɛ̀ ɔ nù.»

²⁵Nɛ mɔ'ɔ nɛ Balak tɔ̧ɔ̧ ha̧ Balam: «Kà mɛ nɛ́ foma wa na, ɓɛɛ ká mɛ tok de yoŋgo zu wa na mbɛt.»

²⁶Ɓɛɛ Balam kifi nú ha̧ a̧: «Bo nɛ mi tɔ̧ɔ̧ ha̧ mɛ‘e nde, mi tɛ de mɔ lɛŋ nɛ GASA WAN tɛ tɔ̧ ha̧‘m mɛ de na nde?»

²⁷Balak tɔ̧ɔ̧ ha̧ Balam: «Mɛ̀ tɛ́ ha̧‘m mgbɔ mɛ si mbe fara; ŋmafara Sɔ̧ tɛ e ha̧ mɛ mɛ duk hi̧i̧ fom nɛ wa ha̧‘m.»

²⁸Balak mgbɔɔ Balam si ɓɛ̧i̧a zu kaya Pɛɔr nɛ duk tan nɛ ŋga-gbárà.

²⁹Nɛ mɔ'ɔ nɛ Balam tɔ̧ɔ̧ ha̧ Balak: «Mɛ̀ mbó fara-ɗafi-sɔ̧ mɔɔrɔ-ɗoŋ-yiitoo sɛn hɛ̧ɛ̧ ha̧‘m, a̧ mɛ̀ káí o wiwii ndai mɔɔrɔ-ɗoŋ-yiitoo in o vala sami mɔɔrɔ-ɗoŋ-yiitoo tɛnɛ ha̧‘m mbɛt.»

³⁰Balak dee hee mɔ'ɔ nɛ Balam tɔ̧ɔ̧ ha̧ a̧ ga. A̧ dɔɔ wiwii-ndai kpɔk in vala sami kpɔk zu fara-ɗafi-sɔ̧ kpɔk kpɔk.