Read Northwest Gbaya TƆRA-BÍÍ 27 Bible Online

TƆRA-BÍÍ 27 - Northwest Gbaya bible

TƆRA-BÍÍ 27

¹Nɛ mɔ'ɔ nɛ o boko-bem ko Selofehad hɔa. Wa so nɛ o ŋma bíí tɛ ŋma nú-gara ko Manase, bem ko Jozɛf, wen nɛ́ Manase a̧ koo Makir, ɓɛɛ Makir ko Galad; Galad tɛɛ ko Efɛr, ɓɛɛ sɛka Efɛr ko Selofehad, dáà ko o boko-bem nɔ'ɔ. Nin-wa nɛ Mala, Nɔa, Ogla, Milka in Tirsa.

²Wa tɛa yor ti Moisɛ in ti wi-ɗafi-sɔ̧ Eleazar ká bá nɛ̀ o gasawi Israɛl lɛŋ sɛn nú Tua-kpa-ŋmaa,

³ɓɛɛ wa tɔ̧: «Dáà k’ɛɛ fea so ŋga-gbárà mɛ; bo nɛ a̧ duka so mgbara o bíí ko Kore nɛ kura so in GASA WAN na. A̧ fee nɛ́ fio ɗaŋmɔ kɔ̧-a̧. A̧ ko so be-wiwii, kóó kpɔk na fe nɛnɛ.

⁴Dáà k’ɛɛ nɛ mɔ'ɔ nɛ ko be-wiwii na, ɓɛɛ nin-a tɛ bi nú-gara kɔ̧-a̧ wen ge? Ɛ̀nɛ̀ há̧ ŋma nù h’ɛ́ɛ́ mgbara o dáà k’ɛɛ.»

⁵Moisɛ nɛɛ tɔ̧ wen'i ha̧ GASA WAN,

⁶ɓɛɛ GASA WAN tɔ̧ ha̧ Moisɛ:

⁷«O boko-bem ko Selofehad tɔ̧ɔ̧ kpasawen. Mɛ tɛ ha̧ nù ha̧ wa hee ko o nya dáà kɔ-wa ga, in mɛ tɛ ha̧ mɔɔ-oi dáà kɔ-wa ha̧ wa.

⁸Mɛ̀ tɔ̧́ ha̧ o be Israɛl nde, kà ŋma bíí nɛ́ fea, kà a̧ nɛ́ bòó nɛ̀ be-wiwii na, ɓɛɛ wa a̧ ha̧ mɔɔ-oi-aa lɛŋ ha̧ boko-bem kɔ̧-a̧.

⁹Kà a̧ nɛ́ bòó nɛ̀ boko-bem na, ɓɛɛ wa a̧ ha̧ mɔɔ-oi-aa lɛŋ ha̧ o nya-a̧.

¹⁰Kà a̧ nɛ́ bòó nɛ̀ o nya-a̧ na, ɓɛɛ wa a̧ ha̧ ha̧ o nya dáà kɔ̧-a̧.

¹¹Kà dáà kɔ̧-a̧ nɛ́ bòó nɛ̀ nya na, ɓɛɛ wa a̧ ha̧ ha̧ ŋma mgbák bíí kɔ̧-a̧. Mɔɔ nɔ‘i tɛ duk nɛ́ ko wi’ɛi. Mɔ‘i tɛ duk nɛ heembea ko o be Israɛl hee mɔ'ɔ nɛ GASA WAN baa tɔ̧ so ha̧ Moisɛ ga.»

¹²GASA WAN tɔ̧ɔ̧ ha̧ Moisɛ: «Mɛ̀ dáŋ zu kaya Abarim a̧ mɛ̀ zɔ́k nù n'am ha̧ ha̧ o be Israɛl.

¹³Mɛ tɛ zɔk kaɗi, ɓɛɛ mɛ tɛ fe hee nya-mɛ Arɔŋ ga.

¹⁴Wen sɛn ŋga-gbárà Sin, ŋgimbi nɛ o bíí kia so nɛ wen in am, ɛnɛ dee ŋgazu tɛ wen n'am tɔ̧ɔ̧ so h’ɛ́nɛ́ ndé, ɛ̀nɛ̀ úsí gasamɔ kɔ‘m ha̧ mɛ duk ɓɔn yí o be Israɛl tɛ dea-a ha̧ yì mɛ gbo.» Mɔ n'aa tɔ̧ nɛnɛ‘i nɛ yí Mɛriba sɛn Kadɛs, sɛn ŋga-gbárà Sin mɛ.

¹⁵Ɓɛɛ Moisɛ tɔ̧ ha̧ GASA WAN:

¹⁶«GASA WAN, Sɔ̧, ɛ́nɛ́ nɛ̀ ɔmi ko mɔ lɛŋ a̧a̧ er'nɛ́, ɛ̀nɛ̀ é ŋma bíí ha̧ mɛ duk zu wi nɔ'ɔ,

¹⁷ha̧ mɛ duk ti, mɛ mgbɔ wa siti in mgbɔɔ wa piiɗoŋ mbɛt, wen ká dukbíí ko GASA WAN tɛɛ ya hee o mɔ-dai nɛ wi-dai-a bo na ga.»

¹⁸GASA WAN kifa nú ha̧ Moisɛ: «Josue bem ko Nun nɛ́ ŋma bíí nɛ̀ taamɔ kɔ‘m duk tɛ a̧; mɛ̀ sá a̧, ɓɛɛ mɛ̀ é er-mɛ zu a̧.

¹⁹Mɛ̀ mgbɔ́ a̧ e ti wi-ɗafi-sɔ̧ Eleazar in ti o dɔka bíí lɛŋ, ɓɛɛ mɛ̀ é tom er-a nɛ yí-wa.

²⁰Mɛ tɛ ha̧ ŋma ŋgai kɔ-mɛ ha̧ a̧, wen ha̧ o be Israɛl mɛ mbo zu ha̧ a̧.

²¹A̧ tɛ nɛ tɛ wi-ɗafi-sɔ̧ Eleazar, ɓɛɛ nɛ́ Eleazar a̧ tɛ zɔk Urim ha̧‘m mɛ usi mɔ nɛ o be Israɛl tɛ de; ɓɛɛ nɛ́ tɛ mɔ n'am tɛ usi'i a̧ wa tɛ de nɛ mɔ kɔ-wa lɛŋ.»

²²Moisɛ mboo zu tɛ wen ko GASA WAN, ɓɛɛ mgbɔ Josue tɛ́ɛ̀ e ti wi-ɗafi-sɔ̧ Eleazar in ti o bíí lɛŋ.

²³A̧ ee er zu a̧, ɓɛɛ a̧ e tom lɛŋ er a̧, hee mɔ'ɔ nɛ GASA WAN tɔ̧ɔ̧ so ha̧ a̧ ga.