Read Northwest Gbaya TƆRA-BÍÍ 31 Bible Online

TƆRA-BÍÍ 31 - Northwest Gbaya bible

TƆRA-BÍÍ 31

²«Mɛ̀ nɛ́ɛ̀ usi bɔnɛ ha̧ o be Madiaŋ wen ɗaŋmɔ nɛ wa dee in o be Israɛl, ɓɛɛ ɗoŋ mɔ‘i mɛ tɛ si ɗoŋ tɛ o dáà kɔ-mɛ.»

³Moisɛ tɔ̧ɔ̧ ha̧ dukbíí: «O ŋma bíí mgbara'nɛ́ a̧ kai o boi-biro kɔ‘i, ɓɛɛ wa a̧ nɛ́ɛ̀ bi o be Madiaŋ; wa a̧ kifi er ha̧ wa oi nú GASA WAN.

⁴Ɛ̀nɛ̀ káí o bíí booro kpɔk kpɔk dam zuduk o be Israɛl ɓu-zua-yiitoo lɛŋ ha̧ wa mɛ nɛ biro.»

⁵Wa hoka bíí booro tɛ zuduk kpɔk kpɔk; bíí lɛŋ nɛ kaia boi mɛ nɛ biro nɛ booro-bu-zua-yiitoo.

⁶Nɛ mɔ'ɔ nɛ Moisɛ toma wa yaknɛ mɛ nɛ̀ɛ́ bi biro. Wi-ɗafi-sɔ̧ Pinas, bem ko Eleazar duka kɔ‘i nɛ wi-tui o sa̧a̧ nyɛk in o mɔɔ-dɔm wen dɔma-a ku̧ nɛ biro.

⁷Wa kaia ŋmaa yak mɛ bi o be Madiaŋ hee mɔ'ɔ nɛ GASA WAN baa tɔ̧ ha̧ Moisɛ ga, ɓɛɛ wa kum o wiwii lɛŋ.

⁸Zu o bíí nɛ wa kuma'i, wa gbɛɛ o wannu ko o be Madiaŋ mɔɔrɔ mbɛt. Nɛ́ Evi, Rɛkɛm, Sur, Hur in Rɛva. Wa gbɛɛ Balam, bem ko Bɛɔr mbɛt nɛ gba-paa.

⁹Wa kaia o kóò in o bem ko o be Madiaŋ nɛ bara yaknɛ; wa kaia o saɗi-tui-mɔ, o gii mɔ-dai in o mbɔi kɔ-wa mbɛt.

¹⁰Wa dɔɔ o ye gu nɛ o gbagari kɔ-wa a nù,

¹¹ɓɛɛ wa kai mbɔi, o bíí in o saɗi nɔ‘i n'aa baa so'i yaknɛ.

¹²Wa kaia o mɔɔ nɔ‘i lɛŋ yaknɛ si kɔ̧ gbagari nɛ a̧a̧ kɔ̧ ɗɔŋgɔ Mɔab, sɛn ká̧ Jurdɛn nɛ duk tan nɛ Jeriko, wen usa-a ha̧ Moisɛ in wi-ɗafi-sɔ̧ Eleazar gu nɛ o be Israɛl lɛŋ.

¹³Ɓɛɛ Moisɛ in wi-ɗafi-sɔ̧ Eleazar ká bá nɛ̀ o gasawi zu be Israɛl lɛŋ nɛɛ mɛ we ti o wi-biro Israɛl si ɗoŋ gbagari mɛ.

¹⁴See Moisɛ nyima in o gasa wi-biro, o wi-duk-zu o bíí booro, ká bá nɛ̀ o wi-duk-zu o bíí gɔmŋmaa nɛ pia nɛ fara-biro.

¹⁵A̧ tɔ̧ɔ̧ ha̧ wa: «Wen ge s’ɛnɛ gbɛ o okoo nɔ'ɔ lɛŋ na ge?

¹⁶Bo nɛ wa a̧ zia so wen ko Balam, ɓɛɛ ka wa ɔr o be Israɛl mɛ de nɛ ŋgazu in GASA WAN sɛn Pɛɔr, ha̧ ŋgamɔ mɛ tik nɛnɛ zu o bíí ko GASA WAN’ɛ na nde?

¹⁷Ɛ̀nɛ̀ gbɛ́ o be-wiwii lɛŋ in o okoo nɛ iŋa tɛ in wiwii kaɗi,

¹⁸ɓɛɛ nɛ̀ ko o be-zɔŋa nɛ tɛ iŋ tɛ na, k’ɛ́nɛ́ gbɛ wa na, wa nɛ́ k’ɛ́nɛ́.

¹⁹K’ɛ́nɛ́ n’ɛnɛ gbɛɛ bíí, kóó n’ɛnɛ foo wɔr nɛ er'nɛ́, ɛ̀nɛ̀ nɛ́ɛ̀ ɔ ɗoŋ gbagari tɛ zɛ mɔɔrɔ-ɗoŋ-yiitoo, ɓɛɛ ɛ̀nɛ̀ ɗáfí war-tɛ‘nɛ́ tɛ taar ɔɔ-zɛ in tɛ mɔɔrɔ-ɗoŋ-yiitoo ɔɔ-zɛ, ɛnɛ in o kó-bara k’ɛ́nɛ́.

²⁰Kale-a mbɛt, ɛ̀nɛ̀ ɗáfí war o laa lɛŋ, o mɔ lɛŋ nɛ‘i dee nɛ ndàrá, o laa nɛ‘i dee nɛ buma gbadua, ká bá nɛ̀ o mɔ nɛ‘i dee nɛ te lɛŋ mbɛt.»

²¹Wi-ɗafi-sɔ̧ Eleazar tɔ̧ɔ̧ ha̧ o wi nɛ nɛɛ so biro: «O heembea nɛ GASA WAN baa tɔ̧ so ha̧ Moisɛ nɛ mɔɔ nɔ'ɔ:

²²Lɔr, bu-mbɔi, ndɛrɛ, boi in tuŋgu,

²³o mɔ lɛŋ nɛ bíí we na, ɛ̀nɛ̀ nɔ̧́í̧ wa ha̧ wa mɛ duk nɛ sa̧a̧-a̧, ɓɛɛ ɛ̀nɛ̀ á wa ɗɔɔ yì-zɔra mbɛt ha̧ wa mɛ duk nɛ sa̧a̧-a̧. O mɔ lɛŋ nɛ bíí wee bìí, ɛnɛ tɛ fɔr wa nɛ yì ɓɛɛ.

²⁴Ɛnɛ tɛ fɔr laa k’ɛ́nɛ́ tɛ mɔɔrɔ-ɗoŋ-yiitoo ɔɔ-zɛ, h’ɛ́nɛ́ mɛ ya nɛ sa̧a̧-a̧; ɓɛɛ sɛk’ɛnɛ pia ɗoŋ pii kɔ̧ gbagari.»

²⁵GASA WAN tɔ̧ɔ̧ ha̧ Moisɛ:

²⁶«Mɛ in wi-ɗafi-sɔ̧ Eleazar ká bá nɛ̀ o gasawi Israɛl lɛŋ, ɛ̀nɛ̀ tɔ́r o mɔ n’ɛnɛ kaia, o bíí in o mɔ-dai lɛŋ.

²⁷Mɛ̀ kɛ̧́ o mɔ n’ɛnɛ kaia tɛ fara yiitoo, war ko o wi-biro in war ko o dɔka bíí.

²⁸Mɛ tɛ ba zu-mɔ er o wi-biro yoɓi ha̧ GASA WAN; zu o bíí gɔmŋmaa-mɔɔrɔ, mɛ tɛ ba kpɔk; zu o ndai 500, mɛ tɛ ba kpɔk; zu o tuifuu gɔmŋmaa-mɔɔrɔ, mɛ tɛ ba kpɔk; zu o sami in o gbadua gɔmŋmaa-mɔɔrɔ, mɛ tɛ ba kpɔk mbɛt.

²⁹Mɛ tɛ kai o mɔɔ nɔ‘i nɛnɛ ha̧ wi-ɗafi-sɔ̧ Eleazar hee yoɓamɔ ha̧ GASA WAN ga.

³⁰Mgbara mɔ ko o be Israɛl nɛ mɛ tɛ kɛ̧ ha̧ wa'i, zu o bíí ɓu-mɔɔrɔ, mɛ tɛ ba kpɔk kpɔk; zu o ndai ɓu-mɔɔrɔ, mɛ tɛ ba kpɔk kpɔk; zu o tuifuu ɓu-mɔɔrɔ, mɛ tɛ ba kpɔk; zu o sami in o gbadua ɓu-mɔɔrɔ, mɛ tɛ ba kpɔk; zu o dɔka saɗi lɛŋ, mɛ tɛ ba kpɔk. Mɛ tɛ ha̧ o mɔɔ nɔ‘i ha̧ o be Levii nɛ de tom fara-duk ko GASA WAN.»

³¹Moisɛ in Eleazar dee mɔ hee mɔ'ɔ nɛ GASA WAN tɔ̧ɔ̧ ha̧ Moisɛ ga.

³²O mɔɔ-oi-biro nɛ o wi-biro kaia piinɛ lɛŋ nɛ ɓɔna nɛ o sami 675.000;

³³o ndai 72.000,

³⁴in o tuifuu 61.000.

³⁵War ko o be-zɔŋa nɛ tɛ iŋ tɛ in wiwii na lɛŋ nɛ 32.000.

³⁶War ko o wi-biro nɛ wa kɛ̧ɛ̧ ha̧ wa nɛ́ sami in gbadua 337.500.

³⁷War ko GASA WAN nɛ wa yoɓa ha̧ a̧ nɛ sami in gbadua 675.

³⁸Ndai ko o wi-biro nɛ 36.000; war ko GASA WAN nɛ ɓu-mɔɔrɔ-ɗoŋ-yiitoo-zua-yiitoo.

³⁹Tuifuu ko o wi-biro nɛ 30.500; war ko GASA WAN nɛ ɓu-mɔɔrɔ-ɗoŋ-kpɔk-zua-kpɔk.

⁴⁰O bíí nɛ wa kɛ̧ɛ̧ ha̧ o wi-biro nɛ bíí 16.000; war ko GASA WAN nɛ́ ɓu-taar-zua-yiitoo.

⁴¹Nɛ mɔ'ɔ nɛ Moisɛ kaia o mɔɔ nɔ‘i ha̧ ha̧ wi-ɗafi-sɔ̧ Eleazar nɛ̀ yoɓamɔ ha̧ GASA WAN, nyɛm nɛ ɗoŋ wen nɛ GASA tɔ̧ɔ̧ ha̧ Moisɛ.

⁴²War reeta mɔ nɛ Moisɛ kaia er o wi-biro kɛ̧ ha̧ o be Israɛl nɛ sami in gbadua 337.500,

⁴⁷Ɓɛɛ Moisɛ ba bíí kpɔk mgbara o bíí ɓu-mɔɔrɔ, in saɗi kpɔk zu saɗi ɓu-mɔɔrɔ, zu mɔɔ-oi-biro ko o be Israɛl ha̧ o be Levii nɛ de tom fara-duk ko GASA WAN, nyɛm nɛ ɗoŋ mɔ nɛ GASA WAN tɔ̧ɔ̧ ha̧ a̧.

⁴⁸O gasawi nɛ duka zu o wi-biro booro in o wi-biro gɔmŋmaa tɛɛ pii katɛ Moisɛ,

⁴⁹ɓɛɛ wa tɔ̧ ha̧ a̧: «Ɛɛ o wi-de-tom k’ɛ́nɛ́, ɛɛ tɔra o wi-biro n’ɛɛ yaa zu wa lɛŋ, ŋma bíí kpɔk fe na.

⁵⁰Ɓɛɛ kinii, ɛɛ kai nɛ o mɔ nɛ‘i dee nɛ lɔr, o kana-pi̧-er, o wele, o mɔɔ-pi̧-zer in o mɔɔ-a-ger nɛ kóó o ndé kpaa tɛnɛ, nɛ̀ ha̧a̧mɔ ha̧ GASA WAN, wen ha'i mɛ de do-mɔ zu yɛ nɛ usi'e ɛɛ kpaa ea-ɗaŋmɔ.»

⁵¹Moisɛ in Eleazar kaia o mɔɔ nɔ‘i nɛ wa dee nɛ lɔr'i; duka so nɛ o mbɔi-tɛ.

⁵²Dita lɔr lɛŋ nɛ o gasa wi-duk-zu o wi-biro booro in o wi-biro gɔmŋmaa ha̧a̧ ha̧ GASA WAN nɛ kilo gɔmŋmaa-nɛ-ɓu-mɔɔrɔ-ɗoŋ-yiitoo.

⁵³War ko o wi-biro, kóó o ndé kaia nɛ mɔ kɔ̧-a̧ n'aa baa yí biro mɛ.

⁵⁴Moisɛ in wi-ɗafi-sɔ̧ Eleazar kaia o lɔr nɛ o gasa wi-biro nɔ‘i kaia tɛnɛ‘i nɛnɛ si kɔ̧ Tua-kpa-ŋmaa wen ha̧ tɛ GASA WAN mɛ mbaŋ ɗoŋ o be Israɛl.