Read Northwest Gbaya TƆRA-BÍÍ 35 Bible Online

TƆRA-BÍÍ 35 - Northwest Gbaya bible

TƆRA-BÍÍ 35

¹GASA WAN tɔ̧ɔ̧ ha̧ Moisɛ sɛn bɔkɔ-nú Mɔab ká̧ Jurdɛn nyɛm nɛ Jeriko mɛ:

²«Mɛ̀ tɔ̧́ ha̧ o be Israɛl mɛ kɛ̧ ŋma nù kɔ-wa ha̧ o be Levii. Ɛnɛ tɛ ha̧ nɛ o ŋma ye ha̧ wa mɛ ya sɛnɛ, ɓɛɛ ɛnɛ ha̧a̧ ŋma nù ɗoŋ ye ha̧ wa mbɛt.

³O ye tɛ ya nɛ fara ɔɔ kɔ-wa; o nù tɛ duk wen o mɔ-dai kɔ-wa, in wen o saɗi kɔ-wa lɛŋ.

⁴O nù ɗoŋ ye n’ɛnɛ tɛ ha̧ ha̧ o be Levii'i tɛ ndaɗi o garo kɔ-wa zik nɛ ye e see-a, hee mɛtrɛ gɔmŋmaa-mɔɔrɔ ga.

⁵Ɛnɛ tɛ we pɛsa-a nɛ war daŋa-wese tɛ mɛtrɛ booro, nɛ war ká̧-zan-mɛ́-ɗɔɔ, mɛtrɛ booro mbɛt; ye tɛ duk kɔ‘i mgbák see-a, ɓɛɛ nù nɛ tɛ zik ye kɔ-wa kpa'i, nɛ́ mɔ‘i.

⁶O ye n’ɛnɛ tɛ ha̧ ha̧ o be Levii nɛ́ ye mɔɔrɔ-ɗoŋ-kpɔk, wen hu̧sa̧-a̧ ko o wi nɛ gbɛ zu nɛ hɔɔ-kɔ-mɔ. Ɛnɛ tɛ ha̧ o mbe-a ɓu-naar-zua-yiitoo ha̧ wa e zu-a.

⁷O ye n’ɛnɛ tɛ ha̧ ha̧ o be Levii lɛŋ nɛ ye ɓu-naar-zua-mɔɔrɔ-ɗoŋ-kpɔk, in o nù ká̧ a̧ mbɛt.

⁸Hee mɔ'ɔ nɛ wa tɛ ba o ye nɔ‘i mgbara o ye ko o be Israɛl ga, o zuduk nɛ a̧a̧ nɛ ye nɛ dɔka-a tɛ ha̧ ye nɛ dɔka-a; ɓɛɛ o wan nɛ bo nɛnɛ dɔk na, beka ha̧ o ye nɛ dɔka-a na mbɛt. Zuduk kpɔk kpɔk tɛ ha̧ ye ha̧ o be Levii nyɛm nɛ o dɔka ye nɛ wa kpaa.»

⁹GASA WAN tɔ̧ɔ̧ ha̧ Moisɛ:

¹⁰«Mɛ̀ tɔ̧́ ha̧ o be Israɛl hegɔ. Ŋgimbi n’ɛnɛ tɛ ku Jurdɛn mɛ ye nú Kanaŋ,

¹¹ɛnɛ tɛ hok o ŋma ye nɛ tɛ ya nɛ fara-hu̧si-sɛnɛ. Kà ŋma bíí gbɛ zu nɛ hɔɔ-kɔ-mɔ, a̧ tɛ hu̧si sɛn hi̧i̧.

¹²O ye nɔ‘i tɛ ya nɛ fara-hu̧si wen o wi-kifi-er; kà wi-gbɛ-zu nɛ́ hu̧sa̧ hi̧i̧, wi beka gbɛ a̧ nɛti ha̧ o bíí mɛ gɔn kita zu a̧ na.

¹³Mgbara o ye n’ɛnɛ tɛ ha̧ ha̧ o be Levii, nɛ́ ye mɔɔrɔ-ɗoŋ-kpɔk a̧ tɛ ya nɛ o fara-hu̧si sɛnɛ.

¹⁴Ɛnɛ tɛ e ye taar nɛ kur Jurdɛn, in taar sɛn Kanaŋ wen hu̧sa̧-a̧.

¹⁵O ye nɔ‘i mɔɔrɔ-ɗoŋ-kpɔk nɔ‘i tɛ ya wen o be Israɛl, kóó wen ŋma gɛnɛ, kóó wen ŋma bíí nɛ ɓir ɓir yak. Wi nɛ gbɛ̀ɛ́ zu nɛ hɔɔ-kɔ-mɔ tɛ hu̧si hi̧i̧.

¹⁶«Kà a̧ nɛ́ gusa bíí nɛ boi gbɛ, a̧ nɛ wi-gbɛ-zu, ɓɛɛ wa tɛ gbɛ wi’ɛi yinɛ.

¹⁷Kà a̧ nɛ́ yoo bíí nɛ ta gbɛ, a̧ nɛ wi-gbɛ-zu, ɓɛɛ wa tɛ gbɛ a̧ yinɛ.

¹⁸Kà a̧ nɛ́ gusa bíí nɛ te gbɛ, a̧ nɛ wi-gbɛ-zu, ɓɛɛ wa tɛ gbɛ a̧ yinɛ mbɛt.

¹⁹Nɛ́ wi-kifi-er a̧ tɛ gbɛ wi-gbɛ-zu'i, ŋgimbi n'aa tɛ kpa nɛ a̧.

²⁰«Kà bíí nɛ́ gbɛɛ bíí nɛ̀ kiri, kóó kà a̧ pi̧ nɛ mɔ nɛ ɗaŋsee tok nɛ a̧ gbɛ,

²¹kà a̧ nɛ sɔma nɛ a̧ nɛ tu̧u̧-see gbɛ, wa tɛ gbɛ wi’ɛi yinɛ, wen a̧ nɛ wi-gbɛ-zu. Nɛ́ wi-kifi-er a̧ tɛ gbɛ wi-gbɛ-zu'i ŋgimbi n'aa tɛ kpa nɛ a̧.

²²«Kà ŋma bíí nɛ́ gbɛɛ zu nɛ hɔɔ-kɔ-mɔ, nɛ̀ bó nɛ́ nɛ̀ tu̧u̧-see na, kóó kà a̧ nɛ́ pi̧i̧ nɛ mɔ sitɛ a̧ nɛ̀ bò nɛ́ nɛ̀ sɛnmɔ na,

²³kóó a̧ nɛ́ zɔka so wi’ɛi na pi̧ nɛ ta yo nɛ a̧ gbɛ, nɛ̀ bó nɛ́ wi’ɛi nɛ́ wisɛn kɔ̧-a̧ na, nɛ̀ bó nɛ́ a̧ a̧ kɔ̧ɔ̧ mɛ de ɗaŋmɔ in wi’ɛi nɛti na,

²⁴o bíí tɛ ndak nɛ ɗoŋ heembea nɛ nyɛma ɗoŋ mɔ nɛ dea'i, gɔn nɛ kita mgbara-a in wi-kifi-er.

²⁵O bíí tɛ kpasi wi’ɛi er wi-kifi-er, ɓɛɛ wa mgbɔɔ a̧ sinɛ ɗoŋ saaye fara n'aa hu̧sa̧ so sɛnɛ. A̧ tɛ duk hi̧i̧ hɔ wese nɛ wan-ɗafi-sɔ̧ nɛ wa tɛna nɔ̧́ a zu-a fee kaɗi sɛ.

²⁶Kà wi-gbɛ-zu'i kur tɛ ye n'aa hu̧si sɛnɛ‘i yak si ŋma fara,

²⁷kà wi-kifi-er kpa a̧ nɛ zan, kà a̧ gbɛ a̧, bo nɛ wi tɛ tɔ̧‘e, wi-kifi-er'i gbɛɛ nɛ zu na.

²⁸Wi-gbɛ-zu tɛ duk kànà fara-hu̧si kɔ‘i hɔ fara nɛ wan-ɗafi-sɔ̧ tɛ fe sɛka a̧ sii ɗoŋ si saaye kɔ̧-a̧.

²⁹Mɔ‘i tɛ duk nɛ heembea wen'nɛ́ in o bezaŋ‘nɛ́ kpoo nɛ kpoo fara lɛŋ n’ɛnɛ tɛ nɛ sɛnɛ.

³⁰«Sɛn tɛ gbɛɛ-zu, mɛ nɛ wen ko o wi-sedaako a̧ tɛ de ha̧ kita-fio mɛ tik wi-gbɛ-zu, ɓɛɛ bo nɛ wen ko wi-sedaako kpɔk ɛ̀nɛ̀ a̧ tɛ de ha̧ kita-fio mɛ tik wi-gbɛ-zu na.

³¹Ɛnɛ beka ba mbɔi er wi-gbɛ-zu wen ha̧ a̧ mɛ duk kpasa na. A̧ tɛ fe kànà oi ɗaŋmɔ kɔ̧-a̧.

³²Ɛnɛ beka ba mbɔi kɔ̧-a̧, mɛ e ha̧ a̧ mɛ yu mɔ si ŋma ye fara-hu̧si sɛnɛ na, kóó pia ɗoŋ pii fara kɔ̧-a̧, pɛm nɛ fea-a ko wan-ɗafi-sɔ̧ na.

³³K’ɛ́nɛ́ de ha̧ nù n’ɛnɛ duk sɛnɛ mɛ ɗaŋ na, wen gbɛɛ-zu nɛ mɔ nɛ ɗaŋ war-nù ɗaŋ. Wi nɛ de ha̧ tɔk-tɛ bíí mɛ a nù, wi tɛ de kànà ha̧ tɔk tɛ-a mɛ a nù mbɛt, sɛka war-nù sa̧a̧.

³⁴Ɛnɛ beka de ha̧ war-nù n’ɛnɛ ɔ sɛnɛ, n'am duk sɛnɛ mbɛt, mɛ ɗaŋ na, wen mi nɛ GASA WAN ɓɛɛ mi duk mgbara'nɛ́ o be Israɛl.»