Read Northwest Gbaya TƆRA-BÍÍ 4 Bible Online

TƆRA-BÍÍ 4 - Northwest Gbaya bible

TƆRA-BÍÍ 4

²«Ɛ̀nɛ̀ tɔ́r o bem ko Kehat mgbara o be Levii, nɛ̀ nú-gara, in nɛ̀ nutua kɔ-wa.

³Ɛ̀nɛ̀ tɔ́r o wan nɛ a̧a̧ nɛ pɛ ɓu-taar, hɔ tɛ pɛ ɓu-mɔɔrɔ nɛ nyɛma mɛ de tom kɔ̧ Tua-kpa-ŋmaa.

⁴Tom nɛ o bem ko Kehat tɛ de sɛn kɔ̧ Tua-kpa-ŋmaa nɛ mɔ'ɔ: mɛ̀ nɛ́ zɔka o mɔ nɛ ɔ sa̧a̧ nyɛmna.

⁵«Ŋgimbi gbina-a yak, Arɔŋ in o bem kɔ‘i tɛ ba babir-laa yinɛ, ɓɛɛ wa nɛɛ kpe nɛ zu Kuɓa nɔɔ-tɔk.

⁶Wa tɛ kpe zu a̧ nɛ ŋga ndàrá, wa baa gasa laa nɛ gbɛ̧-a̧ bereŋ gu ɗoŋ-aa, ɓɛɛ wa aa o te-gɔa-a sɛnɛ.

⁷«Wa tɛ tati zɔ̧ laa nɛ gbɛ̧-a̧ bereŋ sɛn zu fara-a-nyɔŋmɔ, ɓɛɛ wa aa o tasi-nyɔŋ-mɔ, o be tasi-nɔ-mɔ, o be yèé-nɔ-mɔ, in o be yèé-a-zɛzɛ sɛnɛ. Brɛt tɛ duk zu fara-a-nyɔŋmɔ‘i ɓɔnsɛnɛ.

⁸Wa tɛ kpe zu o mɔɔ nɔ‘i lɛŋ nɛ gbɛ̧ laa zóŋ-zóŋ, wa baa ŋga ndàrá yuɓuri nɛ ɗoŋ-aa lɛŋ, ɓɛɛ wa aa o te-gɔa-a sɛnɛ.

⁹«Wa tɛ ba gbɛ̧ laa bereŋ kpe nɛ zu dek-e-wee; o lamba kɔ̧ a̧, o mɔɔ-ɓam-mɔ, o mɔɔ-a-bùk, ká bá nɛ̀ o nyɛk-a-nɔ̧́ nɛ‘i de nɛ tom-aa.

¹⁰Wa tɛ ba ŋga ndàrá gu zu-a in o nyɛk-a, ɓɛɛ wa baa a̧ e zu mɔɔ-gɔa-a.

¹¹«Wa tɛ ba gbɛ̧ laa bereŋ kpe nɛ zu fara-ɗafi-sɔ̧ nɛ‘i dee nɛ lɔr; wa tɛ ba ŋga ndàrá gu zu a̧, ɓɛɛ wa aa o te-gɔa-a sɛnɛ.

¹²Wa tɛ kai o nyɛk lɛŋ nɛ‘i de nɛ tom-ɗafa-sɔ̧ kɔ̧ sa̧a̧-fara a kɔ̧ ŋma gbɛ̧ laa bereŋ, wa tɛ ba ŋga ndàrá gu zu a̧, ɓɛɛ wa baa e zu mɔɔ-gɔa-a.

¹³Wa tɛ kai bùk fara-dɔ-kpoo-sɔ̧ yinɛ, ɓɛɛ wa kpee zu a̧ nɛ gbɛ̧ laa soi-soi.

¹⁴Wa tɛ kai o nyɛk nɛ‘i de nɛ tom sɛnɛ lɛŋ a zu a̧: o mɔɔ-aŋ-wee, o mɔɔ-fo-wee, o mɔɔ-ɗu-bùk, ká bá nɛ̀ o kpoŋgo, wa tɛ gu zu a̧ nɛ ŋma ŋga ndàrá, ɓɛɛ wa aa o te-gɔa-a sɛnɛ.

¹⁵Ŋgimbi nɛ Arɔŋ in o bem kɔ‘i tɛ kaɗi hɛra o sa̧a̧ nyɛk nɔ‘i in o mɔɔ-de-tom lɛŋ, wen gbina ye yak, o bem ko Kehat tɛ tɛ kɔ‘i wen tuia-a, ɓɛɛ mɔ kpɔk, wa beka fo o sa̧a̧ nyɛk nɔ‘i na, wen ká wa tɛɛ fe. War mɔ nɛ o bem ko Kehat tɛ tui sɛn kɔ̧ Tua-kpa-ŋmaa nɛ mɔ‘i.

¹⁶«Eleazar, bem ko Arɔŋ tɛ zɔk kɔ‘i nɛ nɔ̧́-lamba, fuu-nyama wen dɔa-a, ha̧a̧mɔ nɛ̀ nyɔnɔ nɛ‘i ha̧ dam ɗoŋ wese lɛŋ ká bá nɛ̀ nɔ̧́-wan; nɛ́ a̧ a̧ tɛ zɔk sa̧a̧-fara in o mɔ nɛ a̧a̧ kɔ̧ a̧ lɛŋ.»

¹⁷Nɛ mɔ'ɔ nɛ GASA WAN tɔ̧ɔ̧ ha̧ Moisɛ in Arɔŋ:

¹⁸«K’ɛ́nɛ́ de ha̧ nú-gara ko o bezaŋ Kehat mɛ yu mgbara o be Levii na.

¹⁹Ɛ̀nɛ̀ zɔ́k mɔ n’ɛnɛ tɛ de wen wa, ká wa tɛɛ tɛ pii katɛ sa̧a̧-fara, ká wa fe. Arɔŋ in o bem kɔ‘i tɛ tɛ mɛ e wa kpɔk kpɔk zu tom kɔ-wa in ká̧ tui-nyɛk nɛ wa tɛ ba.

²⁰Hegɔ, wa beka ye fara-ɗafi-sɔ̧ ha̧ wa mɛ pi̧ yí-wa zɔk nɛ o sa̧a̧ nyɛk na, wen ká wa tɛɛ fe.»

²¹GASA WAN tɔ̧ɔ̧ ha̧ Moisɛ:

²²«Mɛ̀ tɔ́r o bem ko Gɛrsɔŋ nɛ nú-gara in nɛ nutua kɔ-wa.

²³Mɛ̀ tɔ́r o bíí lɛŋ nɛ a̧a̧ nɛ pɛ ɓu-taar hɔ tɛ pɛ ɓu-mɔɔrɔ nɛ nyɛma mɛ de tom kɔ̧ Tua-kpa-ŋmaa.

²⁴Tom ko o bezaŋ Gɛrsɔŋ nɛ mɔ'ɔ. Mɔ nɛ wa tɛ de in mɔ nɛ wa tɛ tui nɛ mɔ'ɔ.

²⁵Wa tɛ tui o laa-ɓor-tua, o wan mɛ zan, o wan mɛ kɔ̧ a̧, ŋga ndàrá mɛ zu a̧, laa nú Tua-kpa-ŋmaa,

²⁶laa-kpe-ɗoŋ zala nɛ zika fara-duk ko GASA WAN in fara-ɗaf'aa, laa-kpe-nú-zala, ká bá nɛ̀ o nyak-aa in o nyɛk-a lɛŋ. O bezaŋ Gɛrsɔŋ tɛ de tom o mɔɔ nɔ‘i lɛŋ.

²⁷O bezaŋ Gɛrsɔŋ tɛ de tom nyɛm nɛ ɗoŋ ha̧a̧nú ko Arɔŋ in o bem kɔ‘i tɛ tuia tui in yuwar tom kɔ-wa. Ɛnɛ tɛ usi tom nɛ wa tɛ de in tui nɛ wa tɛ tui ha̧ wa.

²⁸Tom ko o be nú-gara ko Gɛrsɔŋ nɛ tɛ de tɛ Tua-kpa-ŋmaa nɛ mɔ‘i. Nɛ́ Itamar, wi-ɗafi-sɔ̧, bem ko Arɔŋ a̧ tɛ duk zu wa.»

²⁹«Ɓɛɛ nɛ war ko o bezaŋ Mɛrari, mɛ̀ tɔ́r wa nɛ nú-gara in nɛ nutua kɔ-wa.

³⁰Mɛ tɛ tɔr o wiwii lɛŋ nɛ a̧a̧ nɛ pɛ ɓu-taar hɔ tɛ pɛ ɓu-mɔɔrɔ nɛ nyɛma mɛ de tom kɔ̧ Tua-kpa-ŋmaa.

³¹Mɔ nɛ mɛ tɛ ha̧ wa mɛ tui tɛ dee tom kɔ-wa kɔ̧ Tua-kpa-ŋmaa nɛ o mɔɔ-tɔn-tua, o mbiŋ, o gun-aa,

³²o mbiŋ zala, in o gun-wa, o te mgboia-a, o nyak-aa, ká bá nɛ̀ o mɔɔ-de-tom-aa lɛŋ. Ɛnɛ tɛ usi tui kɔ-wa nɛ wa tɛ tui kpɔk kpɔk ha̧ wa.

³³O tom nɛ o bíí nú-gara ko o bezaŋ Mɛrari tɛ de sɛn kɔ̧ Tua-kpa-ŋmaa nɛ mɔ‘i. Nɛ́ wi-ɗafi-sɔ̧ Itamar bem ko Arɔŋ a̧ tɛ duk zu wa.»

³⁴Moisɛ in Arɔŋ ká bá nɛ̀ o gasawi saaye tɔra o bem ko Kehat nɛ nú-gara in nɛ nutua kɔ-wa lɛŋ.

³⁵Wa tɔra o bíí nɛ a̧a̧ nɛ pɛ ɓu-taar hɔ tɛ pɛ ɓu-mɔɔrɔ nɛ nyɛma dee tom kɔ̧ Tua-kpa-ŋmaa.

³⁶O bíí nɛ wa tɔra nú-gara kɔ-wa lɛŋ nɛ bíí 2.750.

³⁷O bíí nɛ wa tɔra nú-gara ko bezaŋ Kehat nɛ de tom kɔ̧ Tua-kpa-ŋmaa nɛ mɔ‘i. Nɛ́ Moisɛ in Arɔŋ a̧ tɔra wa nyɛm nɛ ɗoŋ wen nɛ Sɔ̧ tɔ̧ɔ̧ so ha̧ Moisɛ.

³⁸O bezaŋ Gɛrsɔŋ nɛ wa tɔra nɛ nú-gara in o nutua kɔ-wa lɛŋ nɛ mɔ'ɔ.

³⁹Wa tɔra o wiwii nɛ a̧a̧ nɛ pɛ ɓu-taar hɔ tɛ pɛ ɓu-mɔɔrɔ nɛ nyɛma dee tom kɔ̧ Tua-kpa-ŋmaa.

⁴⁰O bíí nɛ wa tɔra nú-gara in nutua kɔ-wa lɛŋ nɛ bíí 2.630.

⁴¹O bíí nɛ wa tɔra nú-gara ko o bezaŋ Gɛrsɔŋ nɛ de tom kɔ̧ Tua-kpa-ŋmaa nɛ mɔ‘i. Nɛ́ Moisɛ in Arɔŋ a̧ tɔra wa nyɛm nɛ ɗoŋ wen nɛ̀ GASA WAN tɔ̧ɔ̧ ha̧ wa.

⁴²O bezaŋ Mɛrari nɛ wa tɔra nɛ nú-gara in nɛ nutua kɔ-wa lɛŋ nɛ mɔ'ɔ.

⁴³Wa tɔra o bíí nɛ a̧a̧ nɛ pɛ ɓu-taar in o wan nɛ a̧a̧ nɛ pɛ ɓu-mɔɔrɔ nɛ nyɛma dee tom kɔ̧ Tua-kpa-ŋmaa.

⁴⁴O bíí nú-gara kɔ-wa lɛŋ nɛ bíí 3.200.

⁴⁵O bíí nɛ Moisɛ in Arɔŋ tɔra nú-gara ko Mɛrari nyɛm nɛ ɗoŋ wen ko GASA WAN ha̧ Moisɛ nɛ mɔ‘i.

⁴⁶O be Levii nɛ Arɔŋ in Moisɛ ká bá nɛ̀ o gasawi ko Israɛl tɔra nɛ nú-gara in nɛ nutua kɔ-wa nɛ mɔ'ɔ.

⁴⁷Wa tɔra o bíí nɛ a̧a̧ nɛ pɛ ɓu-taar hɔ tɛ pɛ ɓu-mɔɔrɔ nɛ nyɛma mɛ de tom baa Tua-kpa-ŋmaa e ŋgɔn in tuia o mɔ-a.

⁴⁸Dɔka o wi nɔ‘i lɛŋ nɛ bíí 8.580.

⁴⁹Wa usa mɔ nɛ bíí kpɔk kpɔk tɛ de in mɔ n'aa tɛ tui nyɛm nɛ ɗoŋ wen ko GASA WAN ha̧ Moisɛ. Bíí kpɔk kpɔk kpaa tom kɔ‘i nyɛm nɛ ɗoŋ mɔ nɛ GASA WAN tɔ̧ɔ̧ ha̧ Moisɛ.