Read Northwest Gbaya TƆRA-BÍÍ 8 Bible Online

TƆRA-BÍÍ 8 - Northwest Gbaya bible

TƆRA-BÍÍ 8

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ Arɔŋ‘e, ŋgimbi n'aa tɛ e wee tɛ o lamba, a̧ a̧ e ha̧ o lamba nɔ‘i mɔɔrɔ-ɗoŋ-yiitoo'i mɛ nyɛk sɛn ti dek-e-wee.»

³Arɔŋ dee hegɔ, ɓɛɛ a̧ a o lamba ha̧ mɛ nyɛk ti dek-e-wee hee mɔ'ɔ nɛ GASA WAN tɔ̧ɔ̧ so ha̧ Moisɛ ga.

⁴Wa duia so dek-e-wee nɛ lɔr nɛ ɗɔɔ hɔ ŋgɔn nyɛm nɛ ɗoŋ mɔ nɛ GASA WAN usa so ha̧ Moisɛ.

⁵GASA WAN tɔ̧ɔ̧ ha̧ Moisɛ:

⁶«Mɛ̀ káí o be Levii yinɛ mgbara o be Israɛl, ɓɛɛ mɛ̀ ɗáfí war-tɛ-wa.

⁷Mɛ̀ zɔ́k mɔ nɛ mɛ tɛ de ha̧ mɛ mɛ ɗafi nɛ war-tɛ-wa: mɛ tɛ misi̧ yì-zɔra-gaŋmɔ a tɛ-wa. Wa tɛ kpui buma tɛ-wa lɛŋ; wa tɛ fɔr o laa kɔ-wa, ɓɛɛ war-tɛ-wa sa̧a̧.

⁸Wa tɛ ba wiwii ndai kpɔk gbam nɛ fuu nɛ‘i vai̧a nɛ nɔ̧́ nɛ wa tɛɛ́ ha̧ so kànà. Ɓɛɛ mɛ tɛ ba ŋma wiwii ndai kpɔk woyo wen ɗafa sɔ̧ wen kpaa ea-ɗaŋmɔ.

⁹Mɛ tɛ kai o be Levii tɛnɛ pii nú Tua-kpa-ŋmaa, ɓɛɛ mɛ mɔi̧a o be Israɛl lɛŋ.

¹⁰Mɛ tɛ kai o be Levii pii nú tua'i nɛk ti GASA WAN, ɓɛɛ o be Israɛl ee er zu-wa.

¹¹Arɔŋ tɛ ha̧ o be Levii ha̧ GASA WAN nɛ ha̧a̧mɔ nɛ nin o be Israɛl, wen ha̧ wa mɛ ya kɔ-wa wen dee tom ha̧ GASA WAN.

¹²O be Levii tɛ e er zu o wiwii ndai. Mɛ tɛ ba ndai kpɔk ɗafi nɛ sɔ̧ wen kpaa ea-ɗaŋmɔ, ɓɛɛ ɓii-aa mɛ tɛ dɔ nɛ kpoo-sɔ̧ ha̧ mɛ mɛ de do-mɔ zu o be Levii mɛ usi'e wa kpaa ea-ɗaŋmɔ.

¹³«Mɛ tɛ kai o be Levii a ti Arɔŋ in o bem kɔ‘i, ɓɛɛ mɛ tɛ ha̧ wa ha̧ GASA WAN nɛ ha̧a̧mɔ.

¹⁴Nɛ́ hegɔ a̧ mɛ tɛ kɛ̧ nɛ mgbara o be Levii in o be Israɛl ha̧ wa mɛ ya nɛ́ kɔ‘m.

¹⁵Ɗoŋ mɔ‘i, o be Levii tɛ́ tɛ̀ mɛ de tom kɔ̧ Tua-kpa-ŋmaa. Nɛ hegɔ a̧ mɛ tɛ́ de nɛnɛ ha̧ war-tɛ-wa mɛ sa̧, ɓɛɛ mɛ tɛ́ hà̧ wa há̧ GASA WAN nɛ ha̧a̧mɔ,

¹⁶wen nɛ‘i hà̧á̧ wa ha̧‘m nɛ kɔ‘m mgbara o be Israɛl. Mi tɛ kai wa e nɛtɛ wen ha̧ wa mɛ ya nɛ kɔ‘m oi nú o be Israɛl lɛŋ,

¹⁷wen kaya o be Israɛl in kaya o mɔ-dai lɛŋ nɛ́ kɔ‘m. Mi kaia so wa e nɛ kɔ‘m, ŋgimbi n'am gbɛɛ so nɛ o kaya-bem nú Egiptɛ mɛ.

¹⁸Ɓɛɛ mi kpɛka o be Levii oi nú o kaya-bem ko o be Israɛl lɛŋ.

¹⁹Mi ha̧a̧ wa ha̧ Arɔŋ in o bem kɔ‘i. Mi kaia wa mgbara o be Israɛl yinɛ, wen ha̧ wa mɛ de tom kɔ̧ Tua-kpa-ŋmaa oi nú o be Israɛl, in ha̧ wa mɛ de do-mɔ nɛ usi'e Sɔ̧ ee ɗaŋmɔ ko o be Israɛl ha̧ wa. Hegɔ, kóó o be Israɛl tɛ̀ɛ̀ pii ká̧ sa̧a̧-fara, ŋgamɔ beka kpa wa na.»

²⁰Mɔ nɛ Moisɛ, Arɔŋ in o be Israɛl lɛŋ dee in o be Levii nɛ mɔ‘i. Wa dee kànà mgbák mɔ nɛ GASA WAN tɔ̧ɔ̧ so ha̧ Moisɛ mɛ de.

²¹O be Levii ɗafa war-tɛ, ɓɛɛ wa fɔr o laa kɔ-wa. Hegɔ Arɔŋ hà̧á̧ wa há̧ GASA WAN nɛ ha̧a̧mɔ, ɓɛɛ a̧ de do-mɔ zu wa nɛ usa wa kpaa ea-ɗaŋmɔ.

²²Ɗoŋ mɔ‘i, o be Levii tɛ̀ɛ̀ pii kɔ̧ Tua-kpa-ŋmaa mɛ de tom nɛ yí Arɔŋ in o bem kɔ‘i. Wa dee mɔ in o be Levii hee mɔ'ɔ nɛ GASA WAN bàá tɔ̧ so ha̧ Moisɛ mɛ de wen wa ga.

²³GASA WAN tɔ̧ɔ̧ ha̧ Moisɛ:

²⁴«Ɛ̧ɛ̧ nɛ́ heembea nɛ duk wen o be Levii. Kà ŋma be Levii nɛ́ kpaa pɛ ɓu-yiitoo-zua-mɔɔrɔ kaɗi, a̧ tɛ de kànà tom kɔ̧-a̧ sɛn kɔ̧ Tua-kpa-ŋmaa.

²⁵Kà a̧ nɛ́ kpaa pɛ ɓu-mɔɔrɔ kaɗi, a̧ beka de tom ɓɔna.

²⁶Mɔ kpɔk, a̧ tɛ duk gbak nɛ o nya-a̧ tɛ tom kɔ̧ Tua-kpa-ŋmaa, ɓɛɛ a̧ beka de kɔ̧-a̧ tom na. Yuwar mɔ nɛ mɛ tɛ de wen tom ko o be Levii nɛ mɔ‘i.»