Read Northwest Gbaya TƆRA-BÍÍ 9 Bible Online

TƆRA-BÍÍ 9 - Northwest Gbaya bible

TƆRA-BÍÍ 9

¹GASA WAN tɔ̧ɔ̧ wen ha̧ Moisɛ sɛn ŋga-gbárà Sinai, sɛn tɛ kuti fio-zɛ tɛ yiitoo pɛ, ɗoŋ gboa-a kɔ-wa nú Egiptɛ. A̧ tɔ̧a̧:

²«O be Israɛl a̧ de gbaŋa Paska nɛ ŋgimbi-a.

³Ɛnɛ tɛ de gbaŋa'i sɛn tɛ ɓu-zua-naar ɔɔ-zɛ tɛ fio-zɛ‘i mɛ ga̧a̧mɔ. Ɛnɛ tɛ de gbaŋa'i nyɛm nɛ ɗoŋ heembea in yuwar-a.»

⁴Ɓɛɛ Moisɛ tɔ̧ ha̧ o be Israɛl mɛ de gbaŋa'i.

⁵Wa dee gbaŋa'i tɛ ɓu-zua-naar ɔɔ-zɛ tɛ kuti fio-zɛ mɛ ga̧a̧mɔ sɛn ŋga-gbárà Sinai. O be Israɛl dee mɔ nyɛm nɛ ɗoŋ mɔ nɛ GASA WAN tɔ̧ɔ̧ so ha̧ Moisɛ.

⁶O ŋma bíí nɛ dɔka-a nyɛm so mɛ de gbaŋa'i na, wen nɛ wa tama so wɔr nɛ er-wa wese'i, ɓɛɛ wa nɛ tɛ Moisɛ in Arɔŋ.

⁷Wa aka mɔ: «War-tɛ-ɛɛ sa̧ na, wen ɛɛ foo wɔr nɛ er yɛ. Wen ge sɛk’ɛɛ beka nyɛm mɛ ha̧ mɔ k’ɛɛ ha̧ GASA WAN tɛ ŋgimbi-a hee o dɔka be Israɛl lɛŋ na ga ge?»

⁸Moisɛ kifa nú ha̧ wa: «Ɛ̀nɛ̀ yór ha̧‘m zii mɔ nɛ GASA WAN tɛ tɔ̧ ha̧‘m zu mɔ k’ɛ́nɛ́‘i sɛ.»

⁹GASA WAN tɔ̧ɔ̧ ha̧ Moisɛ:

¹⁰«Mɛ̀ tɔ̧́ wen’ɛ ha̧ o be Israɛl. Kà ŋma bíí mgbara'nɛ́ kóó mgbara o bezaŋ‘nɛ́ nɛ́ tama wɔr, ɗaŋ nɛ war-tɛ, kóó a̧ nɛɛ́ nɛ́ gɛnɛ nɛ nyɛi̧a-a, a̧ tɛ de gbaŋa Paska tu̧ nɛ tɛ GASA WAN.

¹¹Ɓɛɛ wa tɛ de kɔ-wa gbaŋa'i tɛ ɓu-zua-naar ɔɔ-zɛ, tɛ yiitoo fio-zɛ, mɛ ga̧a̧mɔ. Wa tɛ nyɔŋ nɛ be-sami in brɛt nɛ hao bo sɛnɛ na sɛka o paŋ wa̧a̧-kpoo.

¹²Wa beka e oi-aa ŋgɔn na, in wa beka gbin gba̧a̧ na. Wa tɛ de gbaŋa'i nyɛm nɛ ɗoŋ o heembea-a.

¹³Kà ŋma bíí nɛ̀ war-tɛ duk nɛ sa̧a̧-a̧ nɛ́ bɛ̧ɛ̧ dee gbaŋa Paska, nɛ̀ bó nɛ́ a̧ nɛɛ́ nɛ́ nɔ̀ na mbɛt, wa tɛ fo a̧ yinɛ mgbara o bíí kɔ̧-a̧, wen a̧ ha̧ mɔ ha̧ GASA WAN tɛ ŋgimbi-a na, ɓɛɛ a̧ tɛ zɔk bɔnɛ ɗaŋmɔ kɔ̧-a̧.

¹⁴«Kà ŋma gɛnɛ nɛ́ hɔɔ mgbara'nɛ́, kà a̧ nɛ́ dee gbaŋa Paska tu̧ nɛ tɛ GASA WAN in'nɛ̀ɛ́, a̧ tɛ de kànà nyɛm nɛ ɗoŋ heembea-a in yuwar-a. Yuwar deemɔ‘i tɛ duk nɛ kpɔk wen gɛnɛ nɛ tɛ́ tɛ‘nɛ́ in ɛ́nɛ́ nɛ̀ kiitɛ‘nɛ́ mbɛt.»

¹⁵Ŋgimbi nɛ wa baa nɛ tua nɛ Kuɓa nɔɔ-tɔk duk sɛnɛ e ŋgɔn, tura-zan kpee zu fara-duk ko Sɔ̧. Mɛ ga̧a̧mɔ, tura-zan'i duka hee wee ga sɛn zu tua'i hɔ nɛnɛ sa̧a̧mɔ nɛ tutuyɛ.

¹⁶Dee kànà hegɔ siti ɓɔnsɛnɛ; tura-zan'i kpe nɛ zu fara-duk ko Sɔ̧ nɛ wese, ɓɛɛ mɛ zɛ a̧ duka hee wee ga.

¹⁷Ŋgimbi nɛ tura-zan kur zu tua, ɓɛɛ o be Israɛl gbina yak; kà a̧ nɛɛ́ yor ŋma fara, ɓɛɛ o be Israɛl baa gbagari fara'i.

¹⁸Kà GASA WAN ha̧ nú, ɓɛɛ o be Israɛl gbina yak; kà a̧ ha̧ nú, ɓɛɛ wa baa gbagari mbɛt. Ŋgimbi nɛ tura-zan ɓɔn nɛnɛ zu fara-duk ko Sɔ̧, o be Israɛl ɓɔna kànà kpɔk oi.

¹⁹Ŋgimbi nɛ tura-zan ɓɔn kana ɗoŋ-aa nyɛi̧ zu tua'i, o be Israɛl ɓɔn kànà hi̧i̧ nyɛm nɛ ɗoŋ tɔ̧ɔ̧-wen ko GASA WAN, wa yak na.

²⁰Ŋma ŋgimbi ɓɛɛ tura-zan duk zɛ dɔk na; kà GASA WAN ha̧ nú, ɓɛɛ wa yaa kànà oi wa. Kà GASA WAN há̧ nú, ɓɛɛ wa gbina yak.

²¹Ŋma wese tura-zan duk nɛ́ mɛ́ ga̧a̧mɔ hɔ mɛ tuyɛ, ɓɛɛ kà a̧ kur mɛ tuyɛ, ɓɛɛ wa gbina yak.

²²Kà tura-zan nɛ́ ɓɔna zu tua, kóó zɛ yiitoo, kóó fio-zɛ kpɔk, kóó ɗoŋ-aa nyɛi̧ mbɛt, o be Israɛl tɛ ɔ kànà hi̧i̧, wa beka gbin yak na.

²³Nɛ́ tɛ tɔ̧ɔ̧-wen ko GASA WAN a̧ o be Israɛl ba nɛ gbagari, kóó a̧ wa gbin nɛnɛ yak mbɛt. Wa duka so de nɛ tom ko GASA WAN, nyɛm nɛ ɗoŋ o heembea nɛ GASA WAN ha̧a̧ ha̧ wa nɛ nú Moisɛ.