Read Northwest Gbaya MICHEE 2 Bible Online

MICHEE 2 - Northwest Gbaya bible

MICHEE 2

¹Bɔnɛ a̧a̧ zu o wi nɛ ta mɛ de ŋgamɔ, nɛ̀ ba nɛ keta ɗaŋmɔ sɛn gɔn gado kɔ‘i. Kà wese ba kaɗi, ɓɛɛ wa dee mɔ‘i nɛ wa taa'i, wen wa a̧a̧ nɛ ŋgai mɛ de mɔ‘i.

²Kà wa á see fɔ ko ŋma bíí, ɓɛɛ wa nɛ̀ɛ́ ba fɔ‘i; kà wa á see o tua, ɓɛɛ wa nɛ̀ɛ́ ba o tua nɔ‘i mbɛt, ɓɛɛ wa baa wan-tua in tua kɔ‘i mbɛt, wan-mɔ in o bem kɔ‘i mbɛt.

³Nɛ́ mɔ‘i sa GASA WAN tɔ̧‘e: «Mi tɛ tom bɔnɛ pii zu o pɛrti bíí nɔ‘i, wa beka wɛr ger-wa yinɛ ɗɔɔ-aa na. Ɛnɛ beka ba zu'nɛ́ nɛ ŋgɔn na, wen ŋgimbi'i tɛ duk nɛ ŋgimbi bɔnɛ.

⁴Wese'i, wa tɛ tɔ̧ wen’ɛ h’ɛ́nɛ́, wa tɛ hi̧i̧ kɔ̧a̧ ai nɛ nú wa, tɔ̧ nɛnɛ‘e: ‹Wa kaia mɔ k’ɛɛ lɛŋ yinɛ; mɔɔ-oi ko dukbíí ko GASA WAN yaka si er o mbe bíí. Wa tɛ ba mɔ‘i yinɛ er-am hee ge? Wa kɛ̧ɛ̧ nù k’ɛɛ ha̧ o wisɛn.›

⁵Ɓɛɛ ŋma bíí mgbara'nɛ́ nɛ tɛ pi̧ tani mɛ kɛ̧ nɛ nù ha̧ dukbíí ko GASA WAN beka bo ɓɔna.»

⁶«Ɓɛɛ wa zɛkɛɗ‘am tɔ̧ nɛnɛ‘e: ‹Ká nú‘nɛ́ dui na, ká nú-wí dui hee mɔ‘i ga na, GASA WAN beka de pɛrti mɔ hegɔ na.

⁷Fom so nutua ko Jakob nde? Nɔɔ-ŋgiɗi ko GASA WAN kaɗa nde? Deemɔ kɔ̧-a̧ so hegɔ nde? O wen kɔ̧-a̧ bo nɛ o de wen ha̧ o bíí nɛ̀ nɛ́ nɔ̀ nɛ̀ yuwar-a na nde?› »

⁸GASA WAN tɔ̧a̧: «Ɛ́nɛ́ tik nɛ zu dukbíí kɔ‘m hee o wisɛn ga. Ɛ́nɛ́ kii nɛ wen in o wi nɛ pii nɛ yí biro h’ɛ́nɛ́ mɛ kai o gba-laa kɔ-wa.

⁹Ɛnɛ ndaka o kóò ko dukbíí kɔ‘m kɔ̧ tua kɔ-wa nɛ wa kɔ̧a̧, ɛnɛ dee ha̧ o bem kɔ‘m mɛ kpa mɔɔ-oi kɔ‘m na ɓɔnsɛnɛ.

¹⁰Ɛ̀nɛ̀ kúr ɛ̀nɛ̀ yák, ŋgimbi-ɔm-tɛ bo a̧‘i na! Ɛ́nɛ́ daka ɗaŋmɔ pi̧ nù nɛ dee ndiŋmɔ k’ɛ́nɛ́, ɓɛɛ ɗaŋmɔ tɛ duk nɛ ŋgaya-a nyɛmna.

¹¹«Ɛnɛ kɔ̧ɔ̧ nɛ wi-tɔ̧-wen oi nú Sɔ̧ wan mɛ ndela nɛ tɔ̧‘e: ‹Dɔ̧ɔ̧ in ŋga mɔɔ-nɔ tɛ fok kana nɛ foka-a ɓɔnsɛnɛ h’ɛ́nɛ́.› »

¹²«Mi tɛ mɔi̧ o bíí nutua ko Jakob lɛŋ piinɛ ɗoŋ, mi tɛ mɔi̧ oi o be Israɛl a kpɔk fara hee o sami Bosra ga, hee o mɔ-dai nɛ mɔi̧ ŋmaa ya kpɔk fara-nyɔŋ-mɔ'ɛ ga, ɓɛɛ gitimɔ ko o bíí tɛ dɔk zu nù.»

¹³GASA WAN gboo wa tɛ bara; wa hu̧i̧a̧ ŋgeŋ, wa ɓira yak nu tua kpɔk, wa gboo nɛ hi̧i̧, wannu kɔ-wa yaka ti ha̧ wa. Mɛ nɛ GASA WAN a̧ duk ti ha̧ wa.