Read Northwest Gbaya NAHUM 1 Bible Online

NAHUM 1 - Northwest Gbaya bible

NAHUM 1

¹Ŋga wen ko Sɔ̧ zu Ninivɛ nɛ mɔ'ɔ. Kalata’ɛ usi nɛ mɔ nɛ Nahum be Ɛlkos zɔka tɛ ŋgimbi'i.

²GASA WAN de gɔya tɛ bíí dee; a̧ kifi er ɗaŋmɔ kifi. GASA WAN kifi er ɗaŋmɔ kifi; see-aa nyim ɗaŋ de na. GASA WAN kifi er ɗaŋmɔ kifi ha̧ o wi-kur-zu-a; a̧ e kiri ee in o wisɛn kɔ̧-a̧.

³GASA WAN de nyimsea nɛ haya-a na, ɓɛɛ mɔ kpɔk, ŋgai kɔ̧-a̧ bo nɛ mɔɔ-tɔ̧-na; a̧ e wi-de-ɗaŋmɔ gee na ndóndóndó. Fara-nɛɛ kɔ̧-a̧ nɛ ti kóró-ɓɔrɔ in búk-kórò; tura-zan nɛ kutumu̧i̧ naŋ-a.

⁴Kà a̧ tɔ̧ wen nɛ nyimsea ha̧ gba-tɔp, ɓɛɛ gba-tɔp'i ɔ̧sa̧ ndaɗi ta̧i-ta̧i̧. Nɛ a̧ a̧ de ha̧ o nana-yì lɛŋ mɛ ɔ̧sa̧; nu Basaŋ in nu Karmɛl kora, ɓɛɛ o ɓɔɔ-te nu Libaŋ fe lɛsuu.

⁵O gasa kaya nak nak sɛn ti GASA WAN; o zu-tɔ̧́ yeli yeli, ɓɛɛ nu bin bin ti a̧ nɛ oi bíí in o mɔ nɛ ya sɛnɛ lɛŋ.

⁶Nɛ o'o tɛ yor ŋgimbi ŋga nyimsea kɔ̧-a̧ o? Nyimsea kɔ̧-a̧ kpɔra hee wee ga, ɓɛɛ kam-ta kifi geemɔ mbulɛɛ ti a̧.

⁷GASA WAN nɛ gba de-wi; a̧ nɛ fara-hu̧si-tɛ wese ŋga bɔnɛ. A̧ yor ɗoŋ o wi-e-ta nɛ a̧,

⁸ɓɛɛ a̧ kpasa wa ŋgimbi ha̧a̧-yì. A̧ kum nɛ o wi-de-ŋgazu in a̧, ɓɛɛ a̧ ndaka o wisɛn kɔ̧-a̧ a ti tum mbɛt.

⁹Nɛ ge ɗaŋ keta ge ɛ̀nɛ̀ ba zu GASA WAN’ɛ ge? A̧ tɛ yai o mɔɔ nɔ‘i lɛŋ a nu; ŋga bɔnɛ beka pii ɗoŋ war yiitoo ɓɔna.

¹⁰Koo wa yaa so kaɓali ŋmaa hee da̧a̧-tɛn ga, nɔ nɛ dɔ̧ɔ̧ kɔ-wa gbɛ nɛnɛ, wa tɛ bíí wee lɛŋ hee kora zɔ̧ ga.

¹¹Ninivɛ, wi nɛ taa so mɛ de ɗaŋmɔ in GASA WAN gboo nɛ tɛ mɛ. A̧ duka so nɛ wi-ba-ɗaŋ keta nyɛmna.

¹²Wen nɛ GASA WAN tɔ̧ ha̧ o be Juda nɛ mɔ'ɔ: «Koo wa ŋgaia so nyɛmna, koo wa dɔka so nyɛmna mbɛt, wa tɛ kum gbuɗuk. Mi pi̧i̧ so buu zu'nɛ́, ɓɛɛ mi beka de hegɔ woyo ɓɔna.

¹³Kinii, mi tɛ ba kpáŋá ko Asirii ger'nɛ́ yinɛ, ɓɛɛ mi ŋmana nyak-zɔɓɔ kɔ-wa tɛ‘nɛ́ yinɛ mbɛt.»

¹⁴Ninivɛ, war wen kɔ-mɛ nɛ GASA WAN tɔ̧ nɛ mɔ'ɔ: «O ŋma bezaŋ-mɛ nɛ tɛ gbar nin-mɛ siti, beka bo ɓɔna. Mi tɛ kai o sɔ̧ nɛ mɛ duia in o sɛka-mɔ nɛ ya kɔ̧ tua ko sɔ̧ kɔ-mɛ a taŋ; mi za̧ nɛ kɔ̧-fio kɔ-mɛ wen gba̧a̧ mɔ mɛ tɛ-mɛ bo na.»