Read Northwest Gbaya NAHUM 3 Bible Online

NAHUM 3 - Northwest Gbaya bible

NAHUM 3

¹Fom a̧a̧ zu ye nɛ de ha̧ tɔk tɛ bíí mɛ a nu! O bíí ye'i nyɔŋ nɛ yí-bíí zu̧ nɛ mɔ; tom-dee kɔ-wa ɓɔnsɛnɛ nɛ ɓara mɔ er bíí.

²Ɛ̀nɛ̀ zíí nyɔŋa-a nɛ nyasi nyɔŋ! Ɛ̀nɛ̀ zíí giti kɔna ŋmaa nɛ naŋ keekee kɔn nɛnɛ! O nyaŋa nɛ̀ maa yi, o keekee nɛ̀ ndɔra-a,

³o wi-ŋgan-nyaŋa nɛ̀ ŋgana-a, gba-paa nɛ̀ pi̧a̧-a̧ lai-lai, sɛɛ nɛ̀ toka-a zar-zar, baa da̧i̧ a̧ ba'i, fea-a a̧ fe'i, bo nɛ mɔɔ tɔr na; wi i̧si̧ nɛ wɔr yak nɛnɛ.

⁴Ɛ̀nɛ̀ zɔ́k mɔɔ-oi-ɗaŋmɔ ko kó-de-mɔ nɛ mbɔɗɔnu, nɛ ɔr so o tugun bíí nɛ saŋa-yí, nɛ e so bíí tɛ bara tɛ dee mɔɔ-dàlà kɔ‘i, nɛ de so mɔɔ-kifi kai nɛ o bíí nɛ bara’ɛ.

⁵Mi hɔɔ mɛ ba zu duk nɛ mɛ kaɗi! Mɛ nɛ mi GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ, mi tɛ kpɔ̧i̧ mɔ tɛ-mɛ a nu e mɛ nɛ sɔŋgɔɗɔ ha̧ o tugun bíí mɛ zɔk zim tɛ-mɛ. Búù tɛ ba mɛ ti wa.

⁶Mi tɛ e bùk ndaa mɛ; mi tɛ fɛŋ mɛ ha̧ bíí mɛ zɛkɛɗi mɛ.

⁷Koo o nde nɛ tɛ zɔk mɛ tɛ zik ɗoŋ e ha̧ mɛ, ɓɛɛ tɔ̧a̧: «Ninivɛ ɗaŋa hús-hús wo! O'o tɛ de ko ha̧ a̧ o? Wi tɛ kpa wi-ga̧-see-aa dee?»

⁸Ɛnɛ ŋgaia so gan Tɛb nɛ duka so nɛ ye-ŋgárá ká̧ zaŋ nana-yì Nil mɛ? Yi zika so ye'i e see-a, ɓɛɛ gba-tɔp kpe ɗoŋ-aa lɛŋ hee ŋgárá ga.

⁹Tɛb kpaa so ŋgai wen zu Etiopii in Egiptɛ; o bíí Put in Libii duka so mɛ yor ɗoŋ-aa mbɛt. Hegɔ, nduti kpaamɔ kɔ̧-a̧ bo na.

¹⁰Nɛ mɔ'ɔ nɛ o ŋma ŋga bíí kaia wa yaknɛ nɛ oi ŋgai kɔ-wa'i. Wa kuma o zɔɗi bem ko o bíí Tɛb nɛ sasa-war nɛnɛ; wa hɛra o gasawi kɔ-wa nɛ nyak-zɔɓɔ, ɓɛɛ wa gbɛ wa nɛ mbaɗi.

¹¹Ninivɛ, mɛ mbɛt, zu mɛ tɛ zik tɛ ŋgamɔ nɛ tɛ tik zu mɛ, ɓɛɛ mɛ tɛ kii fara-hu̧si wen o wisɛn kɔ-mɛ.

¹²O ŋga tua kɔ-mɛ hɔɔ ŋmaa in te-mbɔra nɛ wai nɛ haya-a; ka'i yak a̧, ɓɛɛ waya-a tira a nu ha̧ o wi nɛ kɔ̧ɔ̧ mɛ nyɔŋ, ɓɛɛ nyɔŋa.

¹³Zɔk, o wi-biro kɔ-mɛ nɛ o okoo sɔɔ gee! Nú tua kɔ-mɛ duk booŋ ti o wisɛn kɔ-mɛ! Dor-toyo kɔ-mɛ bia wee kaɗi.

¹⁴Biro tɛ gɔn nú‘nɛ́ e saaye; ɛ̀nɛ̀ ɗú yi ŋgaɓo, ɛ̀nɛ̀ yó ɗoŋ naŋ o ŋga tua k’ɛ́nɛ́; ɛ̀nɛ̀ ŋmá nu mbɛr nɛ brik.

¹⁵Zu-a'i, wee tɛ bíí kana ɛnɛ a nu gbuɗuk; gba-paa tɛ gɔm'nɛ́, ɓɛɛ ɛnɛ kuma hee nyɔnɔ nɛ gba-dɔya nyɔŋ ŋgɛ́rɛ́m-ŋgɛ́rɛ́m’ɛ ga. Ɛ̀nɛ̀ nyɛ́ɓí hee o ndondo-gba-dɔya ga, ɛ̀nɛ̀ nyɛ́ɓí hee o ŋgírí ga.

¹⁶O wi-ɗɔr-mɔ k’ɛ́nɛ́ dɔka so gan o sɔra, ɓɛɛ kinii, wa hɔɔ ŋmaa in o gba-dɔya nɛ bu̧i̧a pɛsi yak.

¹⁷O wi-pɛm-mɔ k’ɛ́nɛ́ gbisi so hee o ŋgírí ga, o mɔ-geŋa k’ɛ́nɛ́ dɔka so hee gii kokoɗo-mɔ ga. Kà gɛ̧ɛ̧ de mɔ, ɓɛɛ wa mboɗa duk tɛ ŋgeŋ, kà wese ba, ɓɛɛ wa kaia ŋmaa pɛsi yak. Wi iŋ oi wa ɓɔna.

¹⁸Ho! Wannu Asirii! O gasawi kɔ-mɛ ɔ nɛ ya nde? O ŋgaŋa wi-biro kɔ-mɛ fo tɛ ɓɔna. O duk wi-biro kɔ-mɛ pɛsa sót-sót dam zu kaya, ɓɛɛ ŋma bíí mɛ mɔi̧ wa pii ɗoŋ woyo bo na.

¹⁹Mɔ kɔ-mɛ'ɛ, nyina-a bo na; yuwar ɗafa-a bo na. Koo o nde nɛ zii nyɛrɛ tika-a kɔ-mɛ ɓu nɛ er nɛ desee, wen bɔnɛ nɛ mɛ usa so ha̧ o bíí bo nɛ mɔɔ-tɔ̧-nú-a na.