Read Northwest Gbaya HABAKUK 3 Bible Online

HABAKUK 3 - Northwest Gbaya bible

HABAKUK 3

¹Kɔfa-sɔ̧ ko Habakuk wi-tɔ̧-wen oi nú Sɔ̧ tɛ aia-nú nɛ mɔ'ɔ.

²Mi zia nyɛrɛ hu̧ra-nin'nɛ́ nɛ hu̧r'i, GASA WAN, hegɔ kíì de'm dee tɛ zɔka o tom k’ɛ́nɛ́ n’ɛnɛ dea. Ɛ̀nɛ̀ úsí mɔɔ nɔ‘i h’ɛ́ɛ́ woyo tɛ ŋgimbi k’ɛɛ kinii; ɛ̀nɛ̀ dé h’ɛ́ɛ́ mɛ iŋ wa! Kóó see'nɛ́ nyima, ɓɛɛ n’ɛ̀nɛ̀ dé ko h’ɛ́ɛ́.

³Sɔ̧ tɛ nɛ war Teman; Sa̧a̧-wi tɛ nɛ Kaya Paraŋ. Gasamɔ kɔ̧-a̧ duna yiwese; zaŋnu lɛŋ duna nɛ zɔnamɔ kɔ̧-a̧.

⁴Sa̧a̧mɔ tɛ-a tok hee wese ga; naŋ-wese gɔm nɛ kɔ̧ er-a, fara nɛ ŋgai kɔ̧-a̧ duk sɛnɛ.

⁵Fara n'aa nɛ, zɛɛ-geŋa yaka ti ha̧ a̧, ɓɛɛ ŋga-zɛɛ ndaka pata a̧.

⁶A̧ yora ɓɛɛ nù nak ti a̧, a̧ zɔka mɔ ɓɛɛ tɛ o tugun bíí nak. O gasa kaya nɛ ya ɓɔnsɛnɛ mbaŋa, o zu-tɔ̧́ nɛ yaa so ɓeemɛ hira, o fara nɔ‘i so nɛ yuwar kɔ̧-a̧.

⁷Mi zɔka bɔnɛ nɛ tika zu o bíí Kusaŋ, gasa kíì ba nɛ o be Madiaŋ mbɛt.

⁸GASA WAN, nyimsea k’ɛ́nɛ́ kur zu o nana-yì nde? Ŋga nyimsea k’ɛ́nɛ́ zɔk nɛ o gba-tɔp s’ɛnɛ daŋ nɛ o nyaŋa in o keekee-gbin-biro’ɛ nde?

⁹Ɛnɛ ŋgaŋa kusaa k’ɛ́nɛ́ kaɗi; ɛnɛ daka goo a ɗoŋ kusaa. Ɛnɛ dee ha̧ gasa yì-kórò mɛ aŋ nù ɗuk.

¹⁰O kaya zɔka'nɛ́, ɓɛɛ tɛ-wa nak; dir-yì mɛ ɗɔɔ nù dika, ŋga kin-yì sula, ɓɛɛ yi ŋmai̧ si yiwese.

¹¹Tɛ toka-a nɛ yí-góò k’ɛ́nɛ́ tok, tɛ zara-a nɛ yi-sɛɛ k’ɛ́nɛ́ zar'i, wese in nyaŋa-zɛ yora ɓɔn kpɔk oi.

¹²Ɛnɛ nɛ nɔ zu nù tɛ kura-see, tɛ ŋga nyimsea k’ɛ́nɛ́, ɛnɛ i̧sa̧ o tugun bíí mbɔli.

¹³Ɛnɛ gboo yor wen kpásá dukbíí k’ɛ́nɛ́, wen h’ɛ́nɛ́ mɛ kpasi wan n’ɛnɛ tɛna nɔ-wan a zu-a. Ɛnɛ gbɛɛ gasawi ko o wi-de-ɗaŋmɔ, ɛnɛ kuma o bíí kɔ̧-a̧ yinɛ lɛŋ.

¹⁴Wa ya fara-hu̧si kɔ-wa mɛ hee bíí tika so er-wa ha̧ wa mɛ nyɔŋ kaɗi ga; wa píí so hee gba búk-kórò ga, gai nɛ mɔ nɛ desee wen ndaka yɛ a taŋ, ɓɛɛ ɛnɛ pi̧ o wan kɔ-wa tɛ zu sar nɛ goo mɛ er-wa woyo.[5]

¹⁵Ɛnɛ pi̧i̧ war ɗɔɔ gba-tɔp, tɛ ŋga pɛŋa-yì, ha̧ o nyaŋa k’ɛ́nɛ́.

¹⁶Ɓɛɛ tɛ zia mɔ‘i n'am zia, nyak zaŋ-am daŋa dun kɔ̧ war ger-am; tɛ giti mɔ‘i, mi zaŋa nú‘m, gba̧a̧-tɛ‘m ɓuka gbin nduku-nduku, mi i̧si̧ nù ŋgai ɓɔna. Mi tɛ yor ɓɔn kpɔk fara zɛm nɛ wese ŋga bɔnɛ nɛ tɛ tik zu o wi-nasi-ɛɛ.

¹⁷O te-mbɔra do ɓɔna, o nyak-dɔ̧ɔ̧ wai ɓɔna, o te-nɔ̧́ wai na mbɛt, nyɔnɔ dɛm kpɛɛfɔ ɓɔna, o sami in o ndai bo kɔ̧ ɓoramɔ ɓɔna mbɛt.

¹⁸Ɓɛɛ kɔ‘m, desee kɔ‘m duk tɛ GASA WAN; mi duk nɛ tortɛ wen zu Sɔ̧, Wan-kpas'am.

¹⁹GASA WAN nɛ́ wan kɔ‘m, a̧ nɛ́ ŋgai kɔ‘m; nɛ́ a̧ a̧ de ha̧‘m mɛ duk nɛ haya-a hee o kalamba ga,[6] nɛ́ a̧ a̧ ba'm ndɛn nɛ zu ó kaya nɛnɛ. Gima ko wan-duk-zu-gima; gima nɛ̀ mɔɔ-mbɛr nɛ̀ nyak-aa a̧a̧ sɛnɛ.