Read Northwest Gbaya ZAKARII 12 Bible Online

ZAKARII 12 - Northwest Gbaya bible

ZAKARII 12

¹Wen ko GASA WAN ha̧ Israɛl nɛ mɔ'ɔ: Nɛ́ tɔ̧ɔ̧ wen ko GASA WAN, Wan nɛ tata yiwese, nɛ ɗafa naŋ nù e oi gɔtɔ-a, in nɛ ee ɔmi tɛ bíí.[17]

²«Mi tɛ de ha̧ Jerusalɛm mɛ duk nɛ ɗele ŋga dɔ̧ɔ̧ nɛ tɛ gbɛ o dukbíí nɛ ya zik a̧. Kpɔk mɔ‘i tɛ kpa Juda ŋgimbi nɛ o bíí tɛ kɛr nɛ Jerusalɛm nɛ biro.

³Wese nɛ o dukbíí lɛŋ zu nù tɛ mɔi̧ ŋmaa mɛ bi nɛ Jerusalɛm'i, mi tɛ de ha̧ a̧ mɛ diti ti wa hee kam-ta nɛ‘i nyɛm mɛ ba nɛ ŋgɔn na ga. Tɛ́ o ndé nɛ tɛ kii mɛ hú̧í̧ a̧ nɛ ŋgɔn tɛ nyim; hegɔ o tugun bíí zaŋnu lɛŋ te e nú kpɔk mɛ bi a̧.

⁴Nɛ́ GASA WAN a̧ tɔ̧ wen’ɛ. Wese'i, mi tɛ pi̧ kíì tɛ o nyaŋa, ɓɛɛ bele zara o wi-daŋa-a. Mi tɛ bom yí o nyaŋa kɔ-wa lɛŋ, ɓɛɛ kɔ‘m, yí‘m tɛ duk zu tua ko Juda.

⁵Hegɔ o gasawi nù Juda tɛ tɔ̧ nɛ kɔ̧ see'e: ‹Ŋgai ko o bíí Jerusalɛm duk tɛ GASA WAN Sɔ̧ kɔ-wa nɛ a̧a̧ nɛ ŋgayamɔ lɛŋ.›

⁶«Wese'i, mi tɛ de ha̧ o gasawi nù Juda mɛ duk hee wee kɔya mɛ kaaŋguwee-bɛɛ ga, koo hee wee gba-zɔ̧ ga. Wa tɛ kum o dukbíí nɛ war wiiko in nɛ war gale nɛ ya katɛ wa lɛŋ, ɓɛɛ Jerusalɛm tɛ ɓɔn kana kpɔk fara kɔ‘i.

⁷«GASA WAN tɛ kpasi nɛ o be Juda nɛti, wen ká nutua ko David in o be Jerusalɛm tɛ́ɛ̀ ŋmaŋ tɛ zu wa.

⁸Wese'i, GASA WAN tɛ pɛm o bíí saaye Jerusalɛm; ɓɔsa bíí mgbara wa tɛ kpa ŋgai hee David ga, ɓɛɛ nú tua ko David tɛ duk hee Sɔ̧ ga, tɛ duk hee betom ko GASA WAN a̧ yak ti ha̧ wa ga.

⁹«Wese'i, tom kɔ‘m nɛ́ kuma o dukbíí lɛŋ nɛ tɛɛ mɛ bi Jerusalɛm.

¹⁰Mi tɛ de ha̧ nutua ko David in o bíí Jerusalɛm mɛ e see tɛ dee demɔ in tɛ kɔfa-sɔ̧, wa tɛ zɔk mɔ pii tɛ‘m, wi nɛ wa toka so, ɓɛɛ wa tɛ hi̧i̧ fio ko wi’ɛi hee fio ko kpɔk bem ga. Wa tɛ hi̧i̧ a̧ nɛ ɗaŋsee hee mɔ'ɔ nɛ‘i hi̧i̧ nɛ fio ko kaya-bem’ɛ ga.

¹¹Wese'i, wa tɛ hi̧i̧ fio sɛn Jerusalɛm batɛ hee mɔ'ɔ nɛ‘i hi̧i̧ nɛ fio ko Hadad-Rimɔŋ[18] tɛ bɔkɔ-nú Mɛgido’ɛ ga.

¹²Nù nɛ oi-aa, nú-gara kpɔk kpɔk tɛ nutua lɛŋ tɛ hi̧i̧ fio: nú-gara tɛ nutua ko David, o wiwii nɛtɛ, o okoo nɛtɛ; nú-gara tɛ nutua ko Nataŋ, o wiwii nɛtɛ, o okoo nɛtɛ;

¹³nú-gara tɛ nutua ko Levii, o wiwii nɛtɛ, o okoo nɛtɛ; nú-gara ko Simɛi, o wiwii nɛtɛ, o okoo nɛtɛ.

¹⁴O oi nú-gara tɛ nutua kpɔk kpɔk lɛŋ tɛ hi̧i̧ fio mbɛt, o wiwii nɛtɛ, o okoo nɛtɛ.»