Read Northwest Gbaya ZAKARII 3 Bible Online

ZAKARII 3 - Northwest Gbaya bible

ZAKARII 3

¹Nɛ mɔ'ɔ nɛ GASA WAN usa gasa wan-ɗafi-sɔ̧ Josue nɛ yor ti betom ko GASA WAN ha̧‘m, ɓɛɛ Satan wi-ba-wen zu bíí yor kɔ‘i nɛ war wii-er-a pi̧ nɛ wen zu a̧.

²Betom ko GASA WAN tɔ̧ɔ̧ ha̧ Satan: «GASA WAN a̧ ka zii wen kɔ-mɛ na, wi nɛ kpɛka Jerusalɛm a̧ ka zii wen nú-mɛ na! Ɓɛɛ war ko Josue, a̧ nɛ́ nú-gua nɛ‘i daka gbonɛ nɛ̀ yí wee.»

³Josue yora so nɛ̀ ndiŋ laa ti betom,

⁴ɓɛɛ betom tɔ̧ ha̧ o bíí nɛ yor ti Josue: «Ɛ̀nɛ̀ kpɔ̧́í̧ ndiŋ laa yinɛ tɛ-a.» Ɓɛɛ a̧ zik tɛ tɔ̧ ha̧ Josue: «Kinii, mi baa ɗaŋmɔ yinɛ tɛ-mɛ, ɓɛɛ wa tɛ pi̧ nɛ laa-de-gbaŋa ha̧ mɛ.»

⁵A̧ tɔ̧ɔ̧ woyo: «Ɛ̀nɛ̀ hɛ́r sa̧a̧ mɛtɛwol zu-a.» Wa hɛra sa̧a̧ mɛtɛwol zu-a ɓɛɛ wa pi̧ laa tɛ-a, ká betom ko GASA WAN a̧a̧ katɛ a̧;

⁶ɓɛɛ a̧ tɔ̧ ha̧ Josue:

⁷«Wen nɛ GASA WAN nɛ a̧a̧ nɛ ŋgayamɔ tɔ̧́ nɛ́ mɔ'ɔ: ‹Kà mɛ́ nɛ baa yuwar kɔ‘m in kà mɛ́ nɛ kasa o heembea kɔ‘m, mɛ tɛ ɔ wan zu Tua kɔ‘m, mɛ tɛ duk zu bee-gara kɔ‘m, ɓɛɛ mi tɛ de ha̧ mɛ mɛ ye mgbara o wi nɔ'ɔ nɛ ya hɛ̧ɛ̧.› »

⁸«Josue, gasa wan-ɗafi-sɔ̧, mɛ in o gbama wi-ɗafi-sɔ̧ nɛ ya ti mɛ'ɛ, ɛnɛ zii. Ɛnɛ nɛ mɔɔ-usi-mɔ wen mɔ nɛ tɛ hɔ. Ɛnɛ zɔk, mi tɛ tom wi-de-tom kɔ‘m ‹Ɓɔɔ-te›[2] nɛnɛ.

⁹Hegɔ mi ee ta ti Josue. Kpɔk ta'i a̧a̧ nɛ kpoi-a mɔɔrɔ-ɗoŋ-yiitoo nɛ duk hee gbaayí ga, ɓɛɛ nɛ́ mi nɛ tɛ‘m a̧‘m yɔr mɔ zu ta'i. Wen’ɛ nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧. Mi tɛ ba ɗaŋmɔ yinɛ zu nù'ɛ kpɔk wese.

¹⁰Ɓɛɛ wese'i ɛnɛ tɛ sa o ŋmaa mɛ mɔi̧ ya ti ɗɔɔ nyak-dɔ̧ɔ̧ in te mbɔra.» Wen'i nɛ́ wen ko GASA WAN nɛ a̧a̧ nɛ ŋgayamɔ lɛŋ.