Read Northwest Gbaya ZAKARII 4 Bible Online

ZAKARII 4 - Northwest Gbaya bible

ZAKARII 4

¹Betom nɛ duka we ɗoŋ wen ha̧‘m'i pia ɗoŋ, ɓɛɛ tɛɛ tun am hee ŋma bíí nɛ‘i tun tɛ yá ga.

²A̧ aka'm'e: «Ge a̧ mɛ zɔka ge?» Mi kifa nú: «Mi zɔka nɛ́ ŋma mɔɔ-e-wee nɛ‘i dee nɛ lɔr, ɓɛɛ fara-a-yí-a duk nɛ ŋgɔn, sɛn mgbák ɗata zu-a, lamba mɔɔrɔ-ɗoŋ-yiitoo nɛka sɛnɛ, ɓɛɛ fara há̧ yí-a mɛ tɛn nɛnɛ si tɛ-wa kpɔk kpɔk a̧a̧ sɛnɛ mbɛt.

³Te-nɔ̧́ yiitoo a̧a̧ nɛ ká̧ a̧, kpɔk nɛ war wiiko, ɓii-aa nɛ war gale.»

⁴Nɛ́ mɔ'ɔ n'am aka betom nɛ we ɗoŋ wen ha̧‘m hee mɔ'ɔ ga: «Nyaa, o mɔɔ nɔ'ɔ usi nɛ ge?»

⁵A̧ kifa nú ha̧‘m: «Mɛ iŋ gba̧a̧-mɔ nɛ o mɔɔ nɔ‘i kɔ̧ɔ̧ mɛ usi na nde?» Ɓɛɛ mi kifi nú ha̧ a̧‘e: «Nyaa, mi iŋ na.»

⁶Ɓɛɛ a̧ tɔ̧ ha̧‘m:

¹⁰«O lamba nɔ‘i mɔɔrɔ-ɗoŋ-yiitoo'i usi nɛ yí GASA WAN nɛ zɔk mɔ dam zu nù lɛŋ.»

¹¹Mi aka a̧ woyo: «Nɛ war ko o te-nɔ̧́ yiitoo nɛ a̧a̧ katɛ mɔɔ-e-wee nɛ war wiiko in war gale usi nɛ ge?»

¹²Mi aka a̧ siti woyo: «Nɛ̀ o gbaa-er te-nɔ̧́ nɔ'ɔ yiitoo nɛ̀ fara-tɛn-yí-a yiitoo duk sɛnɛ, nɛ‘i dee nɛ lɔr, nɛ nɔ̧́ tɛn sɛnɛ nɛ gbɛ̧-a̧ hee lɔr ga'i nɛ ge mɔ ge?»

¹³A̧ kifa nú ha̧‘m: «Mɛ iŋ gba̧a̧-mɔ nɛ o mɔɔ nɔ‘i kɔ̧ɔ̧ mɛ usi na nde?» Ɓɛɛ mi kifi nú ha̧ a̧: «Mi iŋ na, Nyaa.»

¹⁴A̧ tɔ̧ɔ̧ ha̧‘m: «Mɛ̀ nɛ́ bíí yiitoo nɛ‘i tɛna nɔ̧́ a zu wa wen dee tom ha̧ GASA WAN nɛ ɔ wan zu nù lɛŋ.» O tɔ̧ɔ̧-wen taar zu Zorobabɛl Wen nɛ GASA WAN tɔ̧ɔ̧ zu Zorobabɛl nɛ mɔ'ɔ: «Bó nɛ́ nɛ̀ war ko see na, kóó nɛ̀ war ko ŋgai na mbɛt, ɓɛɛ nɛ̀ war ko Ɔmi kɔ‘m ɛ̧. Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧. Gasa kaya’ɛ, mɛ́ nɛ́ ge ti Zorobabɛl ge? Mɛ tɛ kifi nɛ bɔkɔ-nù ti a̧; a̧ tɛ hu̧i̧ ta-e-mgbii-ŋgeŋ nɛ̀ tɛ-mɛ, ɓɛɛ o bíí gaia mɔ‘e: ‹Ɛ̀nɛ̀ zɔ́k ŋma de ta wo!› » Nɛ mɔ'ɔ nɛ GASA WAN tɔ̧ɔ̧ ha̧‘m woyo hee mɔ'ɔ ga: «Nɛ́ er Zorobabɛl a̧ ee naŋ Tua’ɛ, ɓɛɛ kana nɛ a̧ a̧ tɛ kaɗi tua’ɛ. «Hegɔ ɛnɛ tɛ iŋ‘e, nɛ GASA WAN nɛ a̧a̧ nɛ ŋgayamɔ lɛŋ a̧ toma'm pii tɛ‘nɛ́. Nyɛŋɛ tɛ pi̧ o wi nɛ ee so ku̧u̧naŋ tom-aa tɛ geemɔ,[3] ŋgimbi nɛ wa tɛ zɔk ta nɛ‘i hoka'i er Zorobabɛl.»