Read Northwest Gbaya ZAKARII 6 Bible Online

ZAKARII 6 - Northwest Gbaya bible

ZAKARII 6

¹Mi hu̧i̧a̧ yí‘m woyo, ɓɛɛ mi zɔk keekee naar fara gboa-a nɛ mgbara kaya yiitoo mɛ tɛnɛ; o kaya nɔ‘i nɛ o kaya ndɛrɛ.

²O gbɛ̧ nyaŋa gbur nɛ kuti keekee, ɓɛɛ o tu̧ nyaŋa gbur nɛ yiitoo-aa;

³taar-a nɛ o bu nyaŋa a̧ gbur, ɓɛɛ naar-a nɛ o nyaŋa nɛ dap tɛ-wa a̧a̧ sɛnɛ a̧ gbur mbɛt.

⁴Ɓɛɛ mi ak betom nɛ duk we nɛ ɗoŋ wen ha̧‘m: «Nyaa, o keekee-nyaŋa nɔ'ɔ usi nɛ ge?»

⁵A̧ kifa nú ha̧‘m: «Nɛ́ o búk naar nɛ kura nɛ ti GASA WAN ɓa nɛ ɗoŋ mgbii-zan tɛnɛ.

⁶«O tu̧ nyaŋa nɛ kɔ-wa si ká̧-zan-mɛ́-ŋgɔn, o bu-a ndak kɔ‘i nɛ́ ɗoŋ wa,[5] o wan nɛ dap tɛ-wa a̧a̧ sɛnɛ nɛ kɔ‘i si ká̧-zan-mɛ́-ɗɔɔ,

⁷ɓɛɛ o gbɛ̧-a̧ gbo yor wen yaka-a mɛ yar nɛnɛ zu nù. GASA WAN tɔ̧ɔ̧ ha̧ wa: ‹Ɛ̀nɛ̀ yár nɛnɛ zu nù.› Ɓɛɛ o keekee nɔ‘i lɛŋ yar nɛnɛ zu nù.»

⁸Nɛ́ mɔ'ɔ n'aa saa'm ɓɛɛ tɔ̧: «Mɛ zɔk, o wan nɛ̀ nɛ́ kɔ‘i si ká̧-zan-mɛ́-ŋgɔn tɛ de ha̧ ɔmi kɔ‘m mɛ́ zir fara nɛ wa nɛ sɛnɛ‘i.»[6]

⁹GASA WAN tɔ̧ɔ̧ ha̧‘m hee mɔ'ɔ ga:

¹⁰«Mɛ̀ bá ha̧a̧mɔ er o bara-biro Hɛldai, Tobia in Yɛdaya nɛ pia nɛ Babilɔŋ, ɓɛɛ zir tɛ ko Yosia, bem ko Sefania.

¹¹Mɛ̀ bá bu-mbɔi in lɔr de nɛ laasɔ̧i-wan[7] gu zu gasa wan-ɗafi-sɔ̧ Josue bem ko Yosadak,

¹²ɓɛɛ mɛ̀ tɔ̧́ ha̧ a̧‘e: Wen nɛ GASA WAN nɛ a̧a̧ ŋgayamɔ lɛŋ tɔ̧ nɛ mɔ'ɔ: ‹Ŋma bíí a̧a̧ sɛnɛ nɛ nin-a nɛ Ɓɔɔ-te; fara n'aa tɛ yar sɛnɛ, mɔ tɛ ɓɔ fara'i, ɓɛɛ nɛ a̧ a̧ tɛ mbo Tua kɔ‘m.

¹³A̧ tɛ mbo Tua kɔ‘m, gasamɔ tɛ zik a̧, ɓɛɛ a̧ tɛ ɔ wan zu damti. Ŋma wi-ɗafi-sɔ̧ tɛ duk zu damti mbɛt, ɓɛɛ wa tɛ zii wen nú ŋmaa nɛ de-a nyɛmna.›

¹⁴«Nɛ̀ war ko laasɔ̧i-wan'i, a̧ tɛ duk nɛ mɔɔ-mbaŋ-tɛ-wi sɛn kɔ̧ Tua ko GASA WAN wen zu Hɛldai, Tobia in Yɛdaya, in wen zu dee demɔ ko Josue,[8] bem ko Sɛfania.»

¹⁵Ɓɛɛ o wi nɛ ya nɛ nyɛi̧a-a tɛ tɛ mɛ mbo Tua ko GASA WAN woyo. Hegɔ, ɛnɛ tɛ iŋ ndé, GASA WAN nɛ a̧a̧ nɛ ŋgayamɔ lɛŋ a̧ toma'm pii tɛ‘nɛ́. Mɔ‘i tɛ de hegɔ, k’ɛ̀nɛ̀ nɛ́ mboo zu ha̧ GASA WAN Sɔ̧ k’ɛ́nɛ́ mbɛt.